Различна верувања

Хиндуистија

Ола верујнена кај о мануш бијанѓовела повише пути ко различно тело. Адалеске, кеда некој цидела муке адава тано соске керѓа нешто лошно ко акава живото или ко несаво јавер живото англедер. О муке шај те овен чхинавде ако о мануш добинела мокша — ослободибе таро круго палем те овел бијамо хем те мерел.

Муслимања

Ола верујнена кај кеда некој цидена муке адава тано или казна башо лескере гревија или испит баши лескири вера. Спрема о д-р Саид Сајед, кова сој тано претседатели ки Исламско верско заедница тари Северно Америка, о трагедие сетинкерена амен „кај ваљани те ова благодарна е Девлеске башо берекетија со дела амен хем кај ваљани те поможина адаленге со иси лен несави потреба“.

Еврејска верувања

Ола верујнена кај о муке тане последице таро лична постапке. Несаве лендар верујнена кај адала со сине неправедно мучиме ка добинен правда откеда ка воскреснинен. И кабала (традиционално еврејско мистицизам) сикавела кај иси реинкарнација хем кај ој дела е манушеске прилика те поправинел пле грешке со керѓа лен англедер.

Будистија

Ола верујнена кај о мануш бијанѓовела повише пути хем кај цидела муке са џикоте целосно на ослободинела пе таро неисправна постапке, чувствија хем желбе. Ако некој сикавела мудрост, керела шукар буќа хем медитација, тегани шај те добинел нирвана — состојба коте со нане муке.

Конфучијанистија

Според јекх речнико о конфучијанистија мислинена кај побаро дело таро муке тане резултати „таро манушикане грешке“ (Dictionary of Comparative Religion). Ола верујнена кај ако некој керела шукар буќа ка овен ле похари муке. Сепак, мислинена кај бут муке предизвикујнена лен о духовна суштествија кола сој бут посилна таро мануша хем кај едноставно ваљани те прифатинел пе адава.

Несаве племенска религие

Спрема ленгоро верување, и причина башо муке тане о магие. Адала со керена магие, шај те керен те случинел пе некаске нешто шукар или лошно. Те шај те овел потикно о дејство е магијакоро, ваљани те керен пе несаве ритуалија. Кеда некој насваљовела, верујнела пе кај кердо тано леске магија хем кај лакоро дејство шај те овел потикно ако керена несаве обредија хем лена иљачија кола со керена о бајачија.

Христијања

Ола верујнена кај и причина соске цидаја муке тано о грево со керѓе ле о прва мануша, о Адам хем и Ева, коленге со керела пе лафи ки Библија. Сепак, бут христијанска религие менинѓе акава сикљојбе. На пример, несаве католикија вакерена кај некој шај те молинел е Девле те прифатинел лескере муке хем башо адава те дел берекети е Црква или несаве јавере мануше.