2. Дали амен сием крива башо муке со цидаја лен?

Соске тано важно о одговор

Ако о одговор тано оја, тегани шај те кера нешто те на овен добором муке.

Размислин

Кобор тане крива о мануша башо акала буќа со керена те цида муке?

• 

  Насилство.

  И Светско здравствено организација (СЗО) проценинела кај секова штарто мануш доживинѓа физичко насилство ко периоди џикоте сине тикно хем кај секоја трито џувли сине физичко или сексуално малтретирими (или о солдуј буќа) ко несаво периоди таро пло живото.

• 

  Кеда мерела некој таро тле мангле.

  „Проценинела пе кај ко 2016 берш сине мударде 477.000 мануша ко цело свето“, пишинела ки Светско здравствено статистика (издание башо 2018 берш објавимо таро СЗО). Исто аѓаар мислинела пе кај адава берш сине мударде околу 180.000 мануша ко војне хем ко вооружена конфликтија.

• 

  Проблемија састипаја.

  Ки јекх статија со иклили ко списание National Geographic, и писателка Френ Смит пишинѓа кај повише тари милјарда мануша пушинена, а о цигаре предизвикујнена несаве таро најчеста причине башо мерибе, сар сој: насвалипе ко срце, мозочен удар хем рако ко плуќа.

• 

  Разлике ко социјално статус.

  „Кеда о мануша тане чороле, дискриминириме башо ленгоро социјално статус, раса или пол, хем кеда иси лен притисок те селинен пе или те докажинен кој тано пошукар, побари тани и веројатност те овел лен емоционална проблемија“, вакерела о психолого Џеј Вотс.

  ДОЗНАЈН ПОВИШЕ

  Дикх о видеоклипи Соске о Девел керѓа и Пхув? ки jw.org.

Со вакерела и Библија

О мануша тане крива башо бут муке со постојнена ко свето.

Башо побаро дело соске иси мукхе тане крива о владетелија. Ола мучинена е манушен хем керена ленгоро живото попхаро, а вакерена кај владинена башо ленгоро шукарипе.

„О мануш владинела упро мануш ки лескири штета“ (ПРОПОВЕДНИК 8:9).

Шај те овен амен похари муке.

О библиска начелија поможинена аменге те овел амен пошукар састипе хем пошукар односија е јаверенцар.

„О мирно вило дела живото е телоске, а и љубомора тани насвалипе кова со руминела о кокала“ (ИЗРЕКИ 14:30).

„Циден тумендар секоја бари омраза, холи, гнев, викибе хем лафија со вреџинена хем са о јавера лошна буќа“ (ЕФЕШАНИТЕ 4:31).