1. Дали о Девел тано криво башо муке со цидаја лен?

Соске тано важно о одговор

Бут мануша на мангена те служинен е Девлеске соске мислинена кај ов тано криво башо муке со цидаја.

Размислин

Ко директно или индиректно начин, бут верска водачија сикавена кај о Девел тано криво башо амаре муке. На пример, несаве вакерена:

• О природна катастрофе тане казна таро Девел.

• О чхаве мерена адалеске со е Девлеске ваљани повише ангелија ко небо.

• О Девел биринела ки каскири страна ка овел ко војне — кола со анена бут муке е манушенге.

Ама, дали шај адава со сикавена о верска водачија башо Девел тано ховајбе? Со ако о Девел на прифатинела лен?

Со вакерела и Библија

О Девел нане криво башо амаре муке.

Ако тано криво башо амаре муке, тегани адава би овела спротивно таро лескере особине кола со дознајнаја лен тари Библија. На пример:

„Са [е Девлескере] друмија тане праведна... Праведно тано хем мангела о чачипе“ (5. МОЈСЕЕВА 32:4).

„Нашти о чачутно Девел те керел лошнипе, о Семоќно те на овел праведно!“ (ЈОВ 34:10).

„О Семоќно на иранела и правда“ (ЈОВ 34:12).

О Девел на одобринела е религиен со вакерена ховајба баши лесте.

Ки ленде тане вклучиме о религие со сикавена кај о Девел тано криво башо муке, исто аѓаар окола со одобринена о војне хем о насилство.

„Адала пророкија пророкујнена ховајбе ко мло [е Девлескоро] анав. Ме на бичхалѓум лен, ни на заповединѓум ленге, ни на вакерѓум ленге нешто. Пророкујнена ховавне визие таро пло вило... хем ховајбе“ (ЕРЕМИЈА 14:14).

О Исус осудинѓа е верска водачен соске сине лицемерна.

„На секова јекх со вакерела манге: ’Господаре, Господаре‘, ка кхувел ко небесно царство, него само окова со керела мле Дадескири волја кова сој ко небо. Бут џене ко адава диве ка вакерен манге: ’Господаре, Господаре, на керѓем ли лафи сар пророкија ко тло анав, на палдинѓем ли демонија ко тло анав хем на керѓем ли бут чудија ко тло анав?‘ Тегани ме ка вакерав ленге: ’Никогаш на пенџарѓум тумен! Циден тумен мандар, тумен со керена лошна буќа!‘“ (МАТЕЈ 7:21-23).