ЛЕКЦИЈА 13
О Тимотеј мангља те поможинел е манушенге
О Тимотеј сине јекх терно мануш со мангела сине те поможинел е манушенге. Ов гело ко бут тхана те поможинел јаверенге. Адалеске лескоро живото сине бут интересно. Мангеа ли те џане побутер баши лесте?—
Е Тимотејескири дај хем и баба сикавена ле сине башо Јехова
О Тимотеј барило ки јекх диз со викинела пе сине Листра. Кеда сине тикно, лескири баба и Лоида хем лескири дај и Евника, сикавена ле сине башо Јехова. Сар со бајровела сине, о Тимотеј мангља те поможинел е јаверенге те џанен башо Јехова.
Кеда о Тимотеј сине терно, о Павле пучља ле те џал леа ко јавера тхана те вакерен е манушенге башо Девел. О Тимотеј мангља те џал хем те поможинел е манушенге.
О Тимотеј гело е Павлеа ки јекх диз со викинела пе сине Солун. Те шај те ресен ки адаја диз, ваљани сине те пхирен баро друмо хем пало адава те џан бродеа. Кеда ресле адари, ола поможинге буте манушенге те сикљовен башо Јехова. Ама, несаве мануша сине бут хољаме хем мангле те керен ленге лошнипе. Адалеске о Павле хем о Тимотеј мора сине те џан ко јавера тхана те вакерен башо Јехова.
О Тимотеј сине радосно
Некобор масек пало адава, о Павле бичхалѓа е Тимотеје те иранел пе ко Солун те дикхел сар тане о пхраља. Ваљани сине леске храброст те иранел пе ко адава опасно тхан! Ама о Тимотеј гело адари соске мангела сине е пхрален. Кеда иранѓа пе ко Павле, вакерѓа леске шукар буќа лендар. О пхраља таро Солун сине бут шукар!
О Тимотеј бут берша поможинѓа е Павле. О Павле јекх пути пишинѓа кај о Тимотеј сине о најшукар мануш со шај сине те бичхалел ле те поможинел ко собранија. О Тимотеј мангела сине е Јехова хем е манушен.
Мангеа ли е манушен хем мангеа ли те поможине лен те џанен башо Јехова?— Ако кереа адава, ка ове бут радосно сар со сине о Тимотеј!