О Павле хем о Тимотеј

О Тимотеј сине терно пхрал ко собрание Листра. Лескоро дад сине Грко, а и дај лескири Еврејка. И дај лескири, и Евника, хем и баба лескири и Лоида сикавѓе е Тимотеје башо Јехова панда таро тикнипе.

Кеда о Павле ало ки Листра ко пло дујто проповедничко патување, дикхља кај о Тимотеј бут мангела сине е пхрален хем кај сине спремно те поможинел ленге. О Павле викинѓа е Тимотеје те џал леа ко проповедничко патување. Сар со накхела сине о време, о Павле поможинѓа е Тимотејеске шукар те проповединел хем те сикавел е јаверен башо шукар хабери.

О свети дух водинѓа е Павле хем е Тимотеје сегде кај со геле. Јекх рат, ки визија јекх мануш вакерѓа е Павлеске те авел ки Македонија хем те поможинел ленге. Аѓаар о Павле, о Тимотеј, о Сила хем о Лука геле адари те проповединен хем те керен неве собранија.

Ко Солун, бут мурша хем џувља уле христијања. Ама, несаве Евреија сине љубоморна е Павлеске хем околенге со сине леа. Ола кхединѓе група мануша хем ингарѓе е пхрален ко е дизјакере управителија хем почминѓе те викинен: „Акала тане душмања е Римескере!“ Адалеске со сине ленгоро живото ки опасност, о Павле хем о Тимотеј раќате нашле ки Верија.

О мануша со живинена сине ки Верија бут мангена сине те сикљовен башо шукар хабери, па аѓаар хем о Гркија хем о Евреија уле ученикија. Ама, кеда несаве Евреија таро Солун але хем керѓе проблемија машкар о народо, о Павле нашља ки Атина. О Тимотеј хем о Сила ачхиле ки Верија те охрабринен е пхрален. Пало несаво време, о Павле охрабринѓа е Тимотеје палем те џал ко Солун хем те поможинел е пхраленге те издржинен о силно прогонство. А покасно, о Павле бичхалѓа е Тимотеје те охрабринел е пхрален таро јавера да собранија.

О Павле вакерѓа е Тимотејеске: „Секој со мангела те служинел е Јеховаске ка овел прогонимо“. О Тимотеј сине прогонимо хем пханло баши пли вера. Ов сине среќно со шај сине те сикавел кај тано верно е Јеховаске.

О Павле вакерѓа е Филипјаненге: „Бичхалава туменге е Тимотеје. Ов ка сикавел тумен сар ваљани те живинел јекх слуга е Девлескоро хем ка сикавел тумен те проповединен“. О Павле сине ле доверба ко Тимотеј. Ола бут берша соработинена сине сар амала хем слуге е Јеховаскере.