Сави тани е Девлескири намера е манушенцар?

1. Сави тани е Девлескири намера е манушенцар?

Е ДЕВЛЕ иси ле бут шужи намера е манушенцар. Ов керѓа е прво мурше хем е прво џувља, е Адаме хем е Ева, те живинен ки јекх бут шужи градина. Лескири намера сине те овел лен чхаве, те керен цело Пхув рај хем те грижинен пе башо животне (1. Мојсеева 1:28; 2:8, 9, 15). (Дикх и 6 фуснота.)

2. а) Котар џанаја кај о Девел ка керел адава со мангља? б) Саве мануша мангела о Девел те живинен ки Пхув, хем кобор време?

² Со мислинеа, дали некогаш ка живина ко рај? О Јехова вакерела аменге: „Адава сој ми намера, адава ка керав ле“ (Исаија 46:9-11; 55:11). Оја, ов ка керел адава со мангља хем никој нашти те чхинавел ле. О Јехова вакерѓа кај ов на керѓа и Пхув бизи причина. Ов „на керѓа ла бизи цел“ (Исаија 45:18). Ов мангела о мануша те живинен ки цело Пхув. Саве мануша мангела о Девел те живинен ки Пхув, хем кобор време? И Библија пхенела: „О праведна мануша ка наслединен и пхув хем ка живинен вечно ки лате“ (Псалм 37:29; Откровение 21:3, 4).

3. Со шај пучеа тут кеда дикхеа кај о мануша насваљовена хем мерена?

³ Ама, авдиве о мануша насваљовена хем мерена. Ко бут тхана, ола марена пе хем мударена пе машкар песте. Сигурно акава на сине е Девлескири намера. Тегани, шај пучеа тут: „Соске овена асавке буќа?“ Само и Библија шај те вакерел аменге соске тано адава аѓаар.

Е ДЕВЛЕСКОРО ДУШМАНИ

4, 5. а) Кој користинѓа јекхе сапе те керел лафи е Еваја ки Еденско градина? б) Сар шај јекх шукар мануш те променинел пе хем те овел чор?

⁴ И Библија вакерела аменге кај е Девле иси ле душмани, „кова со викинела пе Бенг хем Сатана“. О Сатана ки Еденско градина користинѓа јекхе сапе те керел е Еваја лафи (Откровение 12:9; 1. Мојсеева 3:1). Ов керѓа те дикхјол кај о сап керела лафи. (Дикх и 7 фуснота.)

⁵ Дали о Девел керѓа е Бенге? На! Јекх ангели со сине ко небо кеда о Девел керѓа и Пхув е Адамеске хем е Еваке, променинѓа пе хем уло Бенг (Јов 38:4, 7). Сар ало џи ко адава? Па, сар шај јекх шукар мануш те променинел пе хем те овел чор? Сигурно ов на бијандило сар чор. Ама ов мангља, или сине ле желба те овел ле нешто со нане лескоро. Кобор повише размислинела сине башо адава, добором повише бајрола сине лескири погрешно желба. Тегани кеда ка овел ле прилика, ка чорел адава со мангља. Ов коркори уло чор. (Читин Јаков 1:13-15.) (Дикх и 8 фуснота.)

6. Сар јекх ангели уло е Девлескоро душмани?

⁶ Акава исто аѓаар уло адале ангелеа да. Кеда о Девел керѓа е Адаме хем е Ева, ов пхенѓа ленге те овел лен чхаве хем те „пхерен и пхув“ (1. Мојсеева 1:27, 28). Акава ангели шај мислинѓа песке: „Соске са о мануша те служинен е Јеховаске, кеда шај те служинен манге!“. Кобор повише размислинела сине башо адава, добором повише мангела сине те лел е Јеховаскоро тхан. Ов мангела сине о мануша те служинен леске. Адалеске акава ангели ховавѓа е Ева. (Читин 1. Мојсеева 3:1-5.) Кериндор акава, ов уло Сатана хем Бенг, душмани е Девлескоро.

7. а) Соске о Адам хем и Ева муле? б) Соске амен пхујроваја хем мераја?

⁷ О Адам хем и Ева на шунѓе е Девле хем хале таро плоди (1. Мојсеева 2:17; 3:6). Ола грешинѓе леске хем исто сар со вакерѓа ленге о Јехова, пхуриле хем ко крајо муле (1. Мојсеева 3:17-19). О чхаве е Адамескере хем е Евакере уле грешникија хем адалеске муле. (Читин Римјаните 5:12.) Те дикха јекх пример со ка поможинел аменге те хаљова соске ленгере чхаве исто аѓаар уле грешникија. Замислин туке те пеке маро ки јекх банги тепсија. О маро со ка пеќол ка икљол банго исто сар и тепсија. Кеда о Адам на шунѓа е Девле, ов уло грешнико. Адалеске со сием е Адамескере чхаве, сарине амен сием грешникија, сар со сине ов. Хем адалеске со сарине сием грешникија, амен пхујроваја хем мераја (Римјаните 3:23). (Дикх и 9 фуснота.)

8, 9. а) Со мангља о Сатана те верујнен о Адам хем и Ева? б) Соске о Јехова одма на мударѓа адален со противинѓе пе леске?

⁸ О Бенг почминѓа те противинел пе е Јеховаске кеда влијајнѓа упро Адам хем и Ева те на шунен е Девле. Ов мангља ола те верујнен кај о Девел ховавела лен, кај на мислинела ленге о најшукар. О Бенг мангља те вакерел кај о Девел на ваљани те пхенел е манушенге со те керен, хем кај о Адам хем и Ева ваљани коркори те одлучинен сој шукар, а со на. Со керѓа о Јехова? Ов шај сине те мударел лен хем адалеа те чхинавел и побуна. Ама, дали аѓаар ка сикавел сине кај о Сатана ховавела? На, нане те сикавел сине.

⁹ Адалеске, о Јехова на мударѓа лен одма. Ов мукхља време о мануша коркори те владинен. Адава јасно ка сикавел сине кај о Сатана ховавела, а о Јехова џанела сој најшукар е манушенге. Ко дешујекхто поглавје таро акава лил ка сикљова повише башо адава. Ама, со мислинеа баши одлука е Адамескири хем е Евакири? Дали сине шукар адава со шунѓе е Сатана, а на е Девле? Са со сине е Адаме хем е Ева, денѓа лен о Јехова. Ов денѓа лен совршено живото, шужо тхан живибаске хем бути колате со уживинена сине. Ама о Бенг никогаш на керѓа ленге нисаво шукарипе. Те ове сине ту адатхе, со ка кере сине?

10. Сој тано важно секој амендар те биринел?

¹⁰ Авдиве да, секој амендар иси ле право те биринел со ка керел, хем амаро живото зависинела адалестар. Амен шај те бирина те шуна е Јехова сар амаро владетели хем те сикава кај о Сатана тано ховавно. Или шај те бирина е Сатана сар амаро владетели. (Псалм 73:28; читин Изреки 27:11.) Ко акава свето хари мануша шунена е Девле. Ов на владинела е светоја. Ама, ако о Девел на владинела, тегани кој владинела?

КОЈ ВЛАДИНЕЛА Е СВЕТОЈА?

11, 12. а) Со сикљоваја таро адава со о Бенг нудинѓа о царствија е Исусеске? б) Кола стихија тари Библија сикавена аменге кај о Бенг владинела е светоја?

¹¹ О Исус џанела сине кој чаче владинела е светоја. Ки јекх прилика о Бенг сикавѓа леске „са о царствија е светоскере хем ленгири слава“. О Бенг вакерѓа е Исусеске: „Са акава ка дав тут ако переа хем поклонинеа тут манге“ (Матеј 4:8, 9; Лука 4:5, 6). Пуч тут: „Ако акала царствија на сине е Бенгескере, тегани дали шај сине те нудинел лен е Исусеске?“ На. Са о царствија тане е Бенгескере.

¹² Шај пучеа тут: „Сар шај о Бенг те владинел е светоја? Нане ли о Јехова Семоќно Девел кова со керѓа са?“ (Откровение 4:11). Оја, ов тано Семоќно, ама о Исус пхенѓа кај о Бенг тано о „владетели е светоскоро“ (Јован 12:31; 14:30; 16:11). О Павле вакерѓа кај о Бенг тано о „девел акале светоскоро“ (2. Коринќаните 4:3, 4). Исто аѓаар о апостол Јован да пишинѓа кај „цело свето тано ко васта е Лошноскере“ (1. Јованово 5:19).

САР КА ОВЕЛ УНИШТИМО Е САТАНАСКОРО СВЕТО?

13. Соске ваљани аменге нево свето?

¹³ Акава свето овела са полошно. Дикхаја војне, корупција, лицемерна мануша хем бут насилство. Бизи разлика кобор трудинена пе, о мануша нашти икљона ко крајо акале проблеменцар. Ки пли војна Армагедон, о Девел ка уништинел акава лошно свето, хем пало адава ка овел јекх праведно свето (Откровение 16:14-16). (Дикх и 10 фуснота.)

14. Касте чхивѓа о Јехова те овел Цари ко лескоро Царство? Со вакерѓа и Библија англедер башо Исус?

¹⁴ Ко пло Царство ко небо, о Јехова чхивѓа е Исусе те овел Цари. Бут берша англедер, и Библија вакерѓа кај о Исус ка владинел сар „Принцо е Мирескоро“ хем лескоро царство нане те овел ле крајо (Исаија 9:6, 7). О Исус сикавѓа пле ученикон те молинен пе башо акава Царство кеда пхенѓа: „Те авел тло Царство. Те овел тли волја, сар ко небо аѓаар ки пхув“ (Матеј 6:10). Ко офтото поглавје таро акава лил ка сикљова сар е Девлескоро Царство ка менинел о авдисутне владе. (Читин Даниел 2:44.) Е Девлескоро Царство ка керел и Пхув те овел бут шужо рај. (Дикх и 11 фуснота.)

О НЕВО СВЕТО ТАНО ПАШЕ!

15. Сој тани и „неви пхув“?

¹⁵ И Библија вакерела: „Аџикераја нево небо хем неви пхув коте со ка живинел и праведност“ (2. Петрово 3:13; Исаија 65:17). Понекогаш, кеда ки Библија керела пе лафи баши „пхув“, тегани мислинела пе ко мануша со живинена ки лате (1. Мојсеева 11:1). Адалеске, и праведно „неви пхув“ тани са о мануша со шунена е Девле хем иси лен берекетија лестар.

16. Саво шужо поклон ка дел о Девел околен со ка живинен ко нево свето, хем со ваљани те кера те шај те добина акава поклон?

¹⁶ О Исус ветинѓа кај о мануша со ка живинен ко е Девлескоро нево свето ка овел ленге дендо „вечно живото“ (Марко 10:30). Со ваљани те кера те шај те добина акава поклон? Молинаја тут читин Јован 3:16 хем 17:3 те шај те аракхе о одговор. Те дикха со вакерела и Библија башо адава саво ка овел о живото ко рај ки Пхув.

17, 18. Котар џанаја кај ки цело Пхув ка овел мир, хем кај са о мануша ка осетинен пе безбедна?

¹⁷ Нане те овел лошнипе, војне, криминал хем насилство. Нане те овел нијекх лошно мануш ки Пхув (Псалм 37:10, 11). О Девел ка „чхинавел о војне ки цело пхув“ (Псалм 46:9; Исаија 2:4). И Пхув ка овел пхерди манушенцар со мангена е Девле хем шунена ле. Ка овел вечно мир (Псалм 72:7).

¹⁸ Е Јеховаскоро народо нане те дарал. Ко пурано време, са џикоте о Израелција шунена сине е Девле, ола на дарана сине соске ов заштитинела лен сине (3. Мојсеева 25:18, 19). Ко рај, амен нане те дара таро ништо. Секогаш ка осетина амен безбедна. (Читин Исаија 32:18; Михеј 4:4.)

19. Соске шај те ова сигурна кај ко нево свето ка овел бут хајбаске?

¹⁹ Ка овел бут хајбаске. „Ки пхув о гив бут ка бијанел, хем ко најуче тхана е планинакере ов бут ка бајрол“ (Псалм 72:16). О Јехова, „амаро Девел ка дел амен берекети“ хем „и пхув ка бијанел“ (Псалм 67:6).

20. Котар џанаја кај и Пхув ка овел рај?

²⁰ Цело Пхув ка овел рај. Е манушен ка овен лен шуже кхера хем бавче. (Читин Исаија 65:21-24; Откровение 11:18.) Цело Пхув ка овел шужи сар со сине и Еденско градина. О Јехова секогаш дела амен са со ваљани аменге. И Библија вакерела башо Девел: „Ту пхравеа то вас хем деа са е манушенге хем е животненге адава со мангена“ (Псалм 145:16).

21. Котар џанаја кај ка овел мир машкар о мануша хем о животне?

²¹ Ка овел мир машкар о мануша хем о животне. О животне повише нане те керен лошнипе е манушенге. О тикне чхаве нане те даран, чак таро животне сој тане опасна авдиве. (Читин Исаија 11:6-9; 65:25.)

22. Со ка керел о Исус е насваленге?

²² Нијекх мануш нане те овел насвало. Џикоте о Исус сине ки Пхув, ов сасљарѓа буте манушен (Матеј 9:35; Марко 1:40-42; Јован 5:5-9). Ама, сар Цари ко е Девлескоро Царство, ов ка сасљарел са е манушен. Нијекх нане те вакерел: „Насвало сиум“ (Исаија 33:24; 35:5, 6).

23. Со ка керел о Девел околенцар со муле?

²³ О муле палем ка живинен. О Девел вакерѓа кај ка авел диве кеда ка ваздел е манушен со муле. „О Девел ка воскреснинел околен сој праведна хем околен со нане праведна.“ (Читин Јован 5:28, 29; Дела 24:15.)

24. Сар осетинеа тут кеда размислинеа башо рај?

²⁴ Сарине амен шај те бирина со ка кера. Шај те бирина те сикљова башо Јехова хем те служина леске, или палем, те кера адава со мангаја амен. Ако биринаја те служина е Јеховаске, тегани ка овел амен бут шужи иднина. Кеда јекх мануш родинѓа е Исусестар те сетинел пе ки лесте пало лескоро мерибе, о Исус вакерѓа леске: „Ка ове манцар ко Рај“ (Лука 23:43). Ајде те сикљова повише башо Исус Христос, хем сар ов ка исполнинел са адава со вакерѓа о Девел.