Со те керав ако закачинена ман ки школа?

СО БИ КЕРЕА ТУ?

Замислин туке акаја ситуација: О Дејани на мангела више те џал ки школа. О проблеми почминѓа англедер трин масек кеда ки школа почминѓе те ширинен леске лафија. Викинена ле сине различно анавенцар те шај те лаџакерен ле. Понекогаш намерно перавена сине о лила таро лескере васта. А некогаш пали лесте џана сине бари група чхаве хем кхувена ле сине бизо ов те џанел кој кхувѓа ле. Ерати уло нешто панда полошно о Дејани добинѓа закане ко интернет...

Те ове сине ко е Дејанескоро тхан, со би кереа сине ту?

АЧХОВ ХЕМ РАЗМИСЛИН!

На сиан бизи помош. Околен со закачинена пе туја шај те победине лен бизо те маре тут ленцар. Сар?

• МА СИЃАР АХЧОВ СМИРИМО. И Библија вакерела: „О бигоѓавер мануш на контролиринела пли холи, а окова сој гоѓавер, ачховела мирно џи ко крајо“ (Изреки 29:11). Ако ачховеа смиримо кеда закачинена пе туја, тегани шај ка циден пе тутар.

• МА ИРАН ЛЕНГЕ ЛОШНИПАЈА. Ки Библија пишинела: „Башо лошнипе, никаске ма иран лошнипаја“ (Римјаните 12:17). Ако некаске иранеја лошнипаја, адава шај те керел и ситуација те овел попхари.

• МА ЧХИВ ТУТ КИ БЕЉА. И Библија вакерела: „О гоѓавер мануш дикхела о лошнипе хем цидела пе“ (Изреки 22:3). Кобор со шај, циде тут подур таро мануша со керена беље хем таро ситуацие со шај те анен туке проблемија.

• ИЗНЕНАДИН ЛЕН ТЛЕ РЕАКЦИЈАЈА. И Библија вакерела: „О љубезно одговор смиринела и бари холи“ (Изреки 15:1). Пробин те шалине тут ленцар. На пример, ако некој задинела тут башо тло тхулипе шај те вакере: „На, на сиум тхуло, него ме шеја тикниле таро тхојбе“.

• ЏА ТУКЕ АДАТХАР. „Ако џаја туке хем на пхенеа ништо, тегани сикавеа кај сиан зрело мануш, исто аѓаар кај сиан посилно таро адала со закачинена тут“, вакерела и Нора (19). „Аѓаар ка сикаве кај шај те контролирине тут — особина со нане е насилникон“ (2. Тимотеј 2:24).

• НЕКА ОВЕЛ ТУТ ПОБАРИ ДОВЕРБА КИ ТУТЕ. О насилникија обично шај те дикхен кеда некој нане ле доверба ки песте хем нане те иранел ленге. Тари јавер страна, о насилникија ка нашен тутар ако дикхена кај на дараја лендар.

• ВАКЕР НЕКАСКЕ. Јекх манушни со сине наставничка вакерела: „Советинава саринен касте со иси лен акава проблеми, ма те чутинен. Ако вакерена кола тане о насилникија, адава шај те чхинавел лен те закачинен е јаверен да“.