Со сикљоваја башо амаро Цари таро јекх едноставно хем посебно настан

1-2. а) Соске на изненадинела амен адава со о Исус ко едноставно начин сикавѓа аменге сар ваљани те сетина амен ко лескоро мерибе? б) Башо кола особине е Исусескере ка кера лафи?

ШАЈ ли те објаснине со случинела пе ки е Господарескири вечера? Бут џене амендар шај те керен адава. Соске? Адалеске со адаја вечера тани бут едноставно. Ама, адава настан тано бут посебно. Адалеске, некој шај ка пучел пе: „Соске адаја вечера тани добором едноставно ако тани нешто посебно?“

² Џикоте о Исус керела сине пли служба ки Пхув, ов сине пенџардо пало адава со вакерела сине о хор чачипа е манушенге ко начин со сине едноставно, јасно хем локхо те хаљовел пе (Мат. 7:28, 29). Слично, ов ко јекх едноставно хем логично начин сикавѓа сар ваљани те сетина амен ко лескоро мерибе. Те дикха акана сар икерѓа пе е Господарескири вечера хем со вакерѓа хем керѓа тегани о Исус. Адава ка поможинел аменге панда пошукар те хаљова кобор бари понизност, храброст хем мангипе сине е Исусе хем сар шај панда пошукар те џа пало лескоро пример.

О ИСУС ТАНО ПОНИЗНО

3. Спрема Матеј 26:26-28, кобор сине едноставно е Господарескири вечера хем со претставинена сине о маро хем и мол?

³ О Исус керѓа и прво Господарескири вечера пле 11 учениконцар. Ов леља адава со ачхило тари Пасха хем керѓа едноставно вечера. (Читин Матеј 26:26-28.) Користинѓа само о маро бизо квасацо хем и мол кола со више сине адатхе. Пле апостоленге вакерѓа кај адала дуј буќа претставинена лескоро совршено тело хем лескоро совршено рат, кола со панда хари ваљанѓа те дел лен сар жртва. О апостолија веројатно на сине изненадиме таро адава со о Исус сикавѓа кај акава нево важно настан ваљани те икерел пе ко добором едноставно начин. Соске шај те вакерел пе адава?

4. Сар о совет со денѓа ле о Исус е Мартаке поможинела аменге те хаљова соске е Господарескири вечера тани бут едноставно?

⁴ Те дикха со уло некобор масекија англедер адава. Ко трито берш тари пли служба о Исус сине ко кхер пле амаленгоро, ко Лазар, ки Марта хем ки Марија. Џикоте сине адатхе ов почминѓа те сикавел лен. Иако и Марта сине адатхе, ој сине зафатими адалеа со спреминела леске сине бут хајбаске. Кеда о Исус дикхља адава, ов љубезно вакерѓа лаке кај на ваљани секова пути те овел добором бут хајбаске (Лука 10:40-42). Несаво време пало адава, кратко англедер те мерел, ов коркори икерѓа пе ко адава совет со денѓа ле лаке. Е Господарескири вечера која со керѓа ла пле учениконцар сине бут едноставно. Со сикавела аменге адава башо Исус?

5. Со сикљоваја башо Исус таро адава со користинѓа едноставна симболија ки е Господарескири вечера, хем сар адава тано ко склад е лафенцар таро Филипјаните 2:5-8?

⁵ Таро са со вакерѓа хем со керѓа о Исус дикхела пе сине кобор тано понизно. Адалеске на изненадинела амен адава со и последно рат таро пло живото ки Пхув сикавѓа бари понизност (Мат. 11:29). Ов џанља кај панда хари ваљани те дел пло живото сар најбари жртва ки цело манушикани историја хем кај о Јехова ка воскреснинел ле хем ка чхивел ле те овел Цари ко небо. Ама, ов на мангља те истакнинел пе англо јавера аѓаар со ка родел е Господарескири вечера те керел пе ко јекх комплицирано начин. Адалеске, пле учениконге вакерѓа кај ваљани јекх пути ко берш те икерен е Господарескири вечера адалеа со ка користинен само маро хем мол (Јован 13:15; 1. Кор. 11:23-25). Акала едноставна, ама соодветна симболија, сикавена аменге кај о Исус на сине гордо мануш. Чаче шај те ова бахтале со о Исус, амаро Цари ко небо, тано понизно. (Читин Филипјаните 2:5-8.)

6. Сар шај те ова понизна сар о Исус кеда иси амен искушенија?

⁶ Сар шај те ова понизна сар о Исус? Аѓаар со ка чхива е јаверенгере потребе англо амаре (Фил. 2:3, 4). Те сетина амен панда јекх пути со уло и последно рат таро е Исусескоро живото ки Пхув. Ов џанља кај панда хари ка мерел баре дукхенцар, ама иако џанља адава ов сине секиримо башо пле апостолија коленге со ка овел сине бут пхаро башо лескоро мерибе. Адалеске, ов користинѓа адаја рат те сикавел лен, те охрабринел лен хем те керел ленгири вера позорали (Јован 14:25-31). Е Исусескири бари понизност дикхела пе сине таро адава со е јаверенгере потребе чхивела сине англо пле. Чаче, о Исус мукхља аменге бут шукар пример!

О ИСУС ТАНО ХРАБРО

7. Сар сикавѓа о Исус бари храброст одма пали е Господарескири вечера?

⁷ Одма пали е Господарескири вечера, о Исус сикавѓа бари храброст. Соске шај те вакера акава? Ов керѓа пле Дадескири волја, иако џанља кај башо адава ка овел лаџакердо адалеа со ка овел мудардо сар мануш кова со керела лафи против о Девел (Мат. 26:65, 66; Лука 22:41, 42). О Исус ачхило верно џи ко крајо хем аѓаар фалинѓа е Девлескоро анав, сикавѓа кај е Девле иси ле право те владинел упро са хем пхравѓа о друмо околенге со кајнена пе те шај вечно те живинен. Ко исто време, спреминѓа пле ученикон башо буќа кола со ваљани сине панда хари те овен.

8. а) Со вакерѓа о Исус пле верна апостоленге? б) Сар сикавѓе е Исусескере ученикија храброст бершенцар пало лескоро мерибе?

⁸ О Исус исто аѓаар сикавѓа храброст адалеа со на мангља те размислинел башо пхарипа со сине ле хем со ка овен ле. Наместо адава, ко адала пхаре моментија ов мислинела сине ко потребе пле апостоленгере. Е Господарескири вечера која со керѓа ла откеда гело песке о Јуда, ваљани сине те сетинкерел адален со ка овен лескере помазиме следбеникија ки корист со ка овел лен таро лескоро рат хем ко адава со ка овен дело таро нево сојуз (1. Кор. 10:16, 17). Те шај те поможинел ленге те ачховен верна хем те овен леа ко небо, о Исус вакерѓа ленге со аџикерена лендар ов хем лескоро Дад (Јован 15:12-15). Исто аѓаар, вакерѓа пле апостоленге кај ка овен лен искушенија. А пало адава поттикнинѓа лен те овен храбра, исто сар со сине ов (Јован 16:1-4а, 33). Бершенцар пало адава, е Исусескере ученикија понадари да керена сине баре жртве хем сине храбра сар лесте. Кеда сине лен разна неволје ола поможинена сине јекх јекхеске, иако башо адава сине лен проблемија (Евр. 10:33, 34).

9. Сар шај те ова храбра сар о Исус?

⁹ Амен да авдиве сием храбра сар о Исус. На пример, ваљани аменге храброст те поможина е пхраленге сој прогониме баши пли вера. Понекогаш амаре пхраља тане пханле иако на керѓе ништо против о закони. Кеда ка овел асавко нешто, ваљани те кера са со шај те поможина ленге, чак ако ваљани храбро те бранина лен амаре лафенцар (Фил. 1:14; Евр. 13:19). Исто аѓаар, сикаваја храброст кеда бизи дар понадари да вакераја о шукар хабери (Дела 14:3). Исто сар о Исус, одлучна сием те вакера о шукар хабери иако о мануша шај те овен против аменде хем те прогонинен амен. Ама, понекогаш шај на сием добором храбра. Со шај те кера тегани?

10. Со ваљани те кера некобор курке англедер и Спомен-свеченост хем соске?

¹⁰ Кеда размислинаја баши надеж со иси амен адалеске со о Исус денѓа пло живото аменге, тегани шај те овел амен храброст (Јован 3:16; Еф. 1:7). Некобор курке англедер и Спомен-свеченост иси амен бут шукар прилика те сикава амари благодарност башо адава со о Исус денѓа пло живото аменге. Ка овел шукар те читина и Библија спрема о распоред кова сој дендо башо периоди кеда икерела пе и Спомен хем хор те размислина башо буќа со уле ко време кеда муло о Исус. Аѓаар, ки Спомен-свеченост панда пошукар ка хаљова со значинена о симболија хем и бари жртва со претставинена ла. Ако хаљоваја со керѓе аменге о Исус хем о Јехова хем кобор шукарипе адава анела аменге хем околенге со мангаја лен, тегани амари надеж ка овел панда позорали хем ка дел аменге сила те ачхова храбра џи ко крајо (Евр. 12:3).

11-12. Со сиклилем џи акана?

¹¹ Џи акана сиклилем кај и Спомен-свеченост на сетинела амен само ко адава кобор бари жртва керѓа о Исус, него исто аѓаар кобор сине ов понизно хем храбро. Кобор ваљани те ова благодарна башо адава со о Исус понадари да сикавела асавке особине. Ов тано акана ко небо сар Првосвештенико хем керела лафи ки амари корист англо Јехова (Евр. 7:24, 25). Ако секова берш сетинаја амен ко е Исусескоро мерибе сар со заповединѓа ов, тегани таро вило сикаваја кај сием благодарна баши лескири жртва (Лука 22:19, 20). Адава кераја ле ко 14 нисан — о најважно диве ко берш.

¹² О едноставно начин сар сине икерди е Господарескири вечера сикавела панда јекх особина со поттикнинѓа е Исусе те дел пло живото аменге. Џикоте сине ки Пхув, ов сине пенџардо пали адаја особина. Која сине адаја особина?

О ИСУС ТАНО ПХЕРДО МАНГИПАЈА

13. Со пишинела ко Јован 15:9 хем ко 1. Јованово 4:8-10 башо мангипе со сикавѓе о Јехова хем о Исус, хем кас иси корист лестар?

¹³ Ко са со керѓа, о Исус совршено сикавѓа сар е Јеховаскоро мангипе спрема аменде. (Читин Јован 15:9; 1. Јованово 4:8-10.) Ама највише таро са пло мангипе сикавѓа адалеа со денѓа пло живото сар жртва аменге. Бизи разлика дали сием помазаникија, или таро „јавера бакхре“ саринен амен иси амен берекетија адалеске со о Јехова хем лескоро Чхаво сикавѓе аменге мангипе преку и жртва со денѓе ла (Јован 10:16; 1. Јов. 2:2). Ако размислинаја башо симболија со сине користиме ки е Господарескири вечера, тегани ка сикљова нешто башо е Исусескоро мангипе хем башо адава кобор сине разумно. Соске шај те вакера адава?

14. Сар сикавѓа мангипе о Исус спрема пле ученикија?

¹⁴ О Исус сикавѓа пло мангипе спрема пле ученикија сој помазиме адалеа со вакерѓа ленге те сетинен пе ко лескоро мерибе ко едноставно, а на ко комплицирано начин. Сар со накхела сине о време, о помазиме ученикија ваљанѓе секова берш те икерен и Спомен-свеченост хем адава ко различна околностија, чак кеда несаве лендар сине пханле (Отк. 2:10). Дали керѓе адава со вакерѓа ленге о Исус? Оја!

15-16. Сар икерѓе несаве и Спомен-свеченост чак кеда сине ко пхаре околностија?

¹⁵ Таро прво веко па са џи авдиве, о чачутне христијања дена пестар са секова берш те сетинен пе ко е Исусескоро мерибе. Ола икерена и Спомен-свеченост ко исто начин сар со керѓа ла о Исус, чак понекогаш ко бут пхаре околностија. Те дикха некобор примерија. Кеда о пхрал Харолд Кинг сине пханло ки самица ко јекх затвор ки Кина, ов ваљанѓа те размислинел башо адава сар ка икерел и Спомен-свеченост. Ов гаравиндор спреминѓа о симболија баши Спомен-свеченост аѓаар со користинѓа адава со сине ле. Гејнѓа о диве кеда ваљани сине те овел и Спомен хем дикхља те овел со поточно. Кеда ало о време, иако сине коркори ко пханлипе ов гиљавѓа, молинѓа пе хем икерѓа о библиско говор.

¹⁶ Те дикха панда јекх пример. Некобор пхења кола со ки Дујто светско војна сине пханле ко концентрационо логори икерѓе и Спомен-свеченост, иако џанле кај аѓаар шај те нашавен пло живото. Адалеске со о симболија со користинена пе ки Спомен тане едноставна, ола шај сине те керен адава бизо те дикхен лен о јавера. Ола вакерѓе сар керѓе адава: „Кхединѓем амен ко круго, а ко машкар сине јекх тикни столица која со сине учхарди парне чаршафеа коте со сине о маро хем и мол. На манглем те тхара и сијалица, соске аѓаар ка дикхен амен сине со кераја, адалеске тхарѓем и момоли... Молинѓем амен таро вило хем денѓем лафи амаре Дадеске кај ка да амендар са те шај те оправдинел пе лескоро свето анав“. Ола чаче сикавѓе бари вера! А кобор баро мангипе сикавѓа о Исус адалеа со керѓа и Спомен-свеченост те овел едноставно, соске аѓаар шај те икера ла чак ко пхаре околностија.

17. Кола пучиба шај те пуча амен?

¹⁷ Џикоте авела и Спомен-свеченост, шукар тано те пуча амен: „Сар шај панда повише те сикавав мангипе исто сар о Исус? Дали повише мислинава ко е пхраленгере хем е пхењенгере потребе, а на ко мле? Дали таро пхраља хем таро пхења аџикерава повише него со шај те керен, или сиум свесно башо ленгере границе?“ Ваљани те трудина амен те ова сар о Исус те шај те хаљова сар осетинена пе о јавера (1. Пет. 3:8).

МА БИСТРЕ АДАВА СО СИКЉОВЕА

18-19. а) Ко со шај те ова сигурна? б) Со сиан одлучно те кере?

¹⁸ Панда хари, нане више те родел пе амендар те икера и Спомен-свеченост. Кеда о Исус ка авел ки бари неволја, ов ка лел ко небо е биримен со ачхиле хем нане више те икерел пе е Господарескири вечера (1. Кор. 11:26; Мат. 24:31).

¹⁹ Чак кеда нане више те икера е Господарескири вечера, шај те ова сигурна кај е Јеховаскоро народо таро вило ка сетинел пе ки лате — ој секогаш ка сетинкерел амен ко најбаро пример баши понизност, храброст хем мангипе. Окола со сине ки адаја посебно вечера ка вакерен сариненге со ка живинен тегани сар изглединела сине адава. Ама, те шај панда авдиве те овел амен корист таро акава настан, ваљани те ова одлучна те сикава понизност, храброст хем мангипе исто сар о Исус. Ако кераја адава, шај те ова увериме кај о Јехова ка дел аменге баре берекетија (2. Пет. 1:10, 11).