Нека овел тут доверба ко милостиво Судија е цело пхувјакоро

1. Сави утешно поука денѓа о Јехова е Аврааме?

АНГЛЕДЕР бут берша, о Девел преку јекх ангели вакерѓа е Авраамеске кај ка уништинел о дизја Содом хем Гомор. Кеда шунѓа адава о Авраам секиринѓа пе, иако сине ле бари вера ко Девел. Адалеске пучља: „Дали чаче ка уништине е праведнико заедно околеа сој лошно?... Нане ли о Судија е цело пхувјакоро те керел адава сој праведно?“ О Јехова стрпливо поможинѓа пле мангле амалеске, е Авраамеске, те сикљол јекх важно поука која сој корисно хем утешно сариненге аменге: О Девел никогаш нане те уништинел е праведно мануше (1. Мој. 18:23, 33).

2. Соске шај те ова сигурна кај о Јехова кеда судинела е манушенге секогаш керела адава ко праведно хем милостиво начин?

² Соске шај те ова сигурна кај о Јехова кеда судинела е манушенге секогаш керела адава ко праведно хем милостиво начин? Адалеске со џанаја кај „о Јехова дикхела адава со иси ко вило“ е манушенге (1. Сам. 16:7). Уствари, ов џанела „са е манушенгере виле“ (1. Цар. 8:39; 1. Лет. 28:9). Акава тано јекх бут шужо чачипе. Амен никогаш целосно нашти те хаљова таро кола причине о Јехова анела несаве одлуке, адалеске со ов тано бут помудро амендар. О апостол Павле башо Јехова вакерѓа: „Кој шај те хаљол лескере одлуке хем лескере друмија!“ (Рим. 11:33).

3-4. Со шај понекогаш пучаја амен, хем со ка дикха ки акаја статија? (Јован 5:28, 29).

³ Иако џанаја кај о Јехова керела секогаш адава сој исправно, шај аменге да појавинена пе слична пучиба сар е Авраамеске. Шај чак пучаја амен: „Дали шај о мануша колен со о Јехова уништинѓа лен, сар адала таро Содом хем Гомор, палем те живинен? Дали шај некој лендар те овен машкар о неправедна колен со о Девел ка воскреснинел?“ (Апо. 24:15).

⁴ Те дикха акана со хаљоваја башо воскресение. Сигенде добинѓем појасно објаснибе башо адава со значинела „воскресение живибаске“ хем „воскресение судибаске“.a (Читин Јован 5:28, 29.) Акава појасно објаснибе анѓа џи ко несаве промене ко амаро хаљојбе коленге со ка кера лафи ки акаја хем ки јавер статија. Башо е Јеховаскере праведна осуде прво ка дикха со на џанаја, а пало адава ка дикха со џанаја.

СО НА ЏАНАЈА

5. Со пишинела сине ко амаре публикацие башо окола со сине уништиме ко Содом хем Гомор?

⁵ Англедер, ко амаре публикацие вакераја сине кај о мануша со сине уништиме таро Јехова, сар сој окола таро Содом хем Гомор, нане те овен воскресниме. Ама, откеда шукар проучинѓем хем молинѓем амен баши акаја бути, халилем кај нашти сигурно те вакера адава. Соске?

6. Вакер несаве примерија кеда о Јехова анѓа осуда упро неправедна мануша, ама со на вакерела и Библија?

⁶ Ки Библија иси бут извештаија кола со вакерена аменге башо е Јеховаскере осуде упро неправедна мануша. На пример ко Потоп о Јехова уништинѓа саринен, освен е Ное хем лескере фамилија. Исто аѓаар, ов користинѓа е Израелцон те шај те мударел е ефта нациен кола со живинена сине ки Ветими пхув, хем користинѓа јекхе ангеле те шај те мударел 185.000 асирска војникон само јекхе раќаке (1. Мој. 7:23; 5. Мој. 7:1-3; Иса. 37:36, 37). Дали ко акала извештаија и Библија дела доволно информацие кола со сикавена кај о Јехова осудинѓа секоле јекхе таро адала мануша те овел вечно уништимо бизи надеж те воскреснинел? На. Соске шај те вакера адава?

7. Со на џанаја башо мануша со сине уништиме ко Потоп хем башо окола со сине уништиме кеда о Израелција освојнѓе и ханаанско пхув? (Дикх и слика .)

⁷ Ко примерија со спомнинѓем лен, амен на џанаја саво судо анѓа о Јехова секоле јекхеске таро адала мануша. Исто аѓаар, на џанаја дали адала мануша со сине уништиме сине лен прилика те запознајнен е Јехова хем те каинен пе. Башо време кеда сине о Потоп, и Библија вакерела кај о Ное „проповединела сине и праведност“ (2. Пет. 2:5). Ама ки лате на пишинела кај џикоте о Ное градинела сине и арка, ов исто аѓаар пробинела сине те проповединел секоле јекхе манушеске ки пхув. Слично, амен на џанаја дали са о лошна мануша со живинена сине ки ханаанско пхув, сине лен прилика те запознајнен е Јехова хем те менинен пумаре постапке.

8. Со на џанаја башо мануша таро Содом хем Гомор?

⁸ А сар тано е манушенцар таро Содом хем Гомор? О Лот кова со сине праведно, живинела сине машкар адала мануша. Ама дали проповединѓа секоле јекхеске лендар? Адава на џанаја. Јасно тано кај ола сине бут лошна, ама дали секова јекх лендар џанља сој исправно а сој погрешно? Изгледа кај на. Сетин тут со вакерела и Библија баши група мурша кола со мангле те силујнен е Лотескере гостон. И Библија вакерела кај ки адаја група сине мануша тари различно возраст „таро чхаво џи ко пхуро“. Акава сикавела кај сарине ола бариле ки бут лошно средина хем кај веројатно на сине лен прилика те сикљовен баши е Девлескере мерилија (1. Мој. 19:4; 2. Пет. 2:7). Дали чаче џанаја кај амаро милостиво Девел одлучинѓа нијекх таро адала мануша те на овел воскреснимо? На. Таро разговор машкар о Авраам хем о Јехова шај те хаљова кај ки адаја диз на сине ни деш праведна мануша (1. Мој. 18:32). Значи, ола сине неправедна хем е Јехова сине ле право те уништинел лен башо ленгере постапке. Ама дали шај сигурно те вакера кај нијекх лендар нане те овел ирамо ко живото кеда „ка воскреснинен о неправедна“? На, нашти те вакера адава.

9. Со на џанаја башо Соломон?

⁹ Тари јавер страна, ки Библија исто аѓаар иси извештаија башо праведна мануша со уле неправедна. Јекх асавко пример тано о цари о Соломон. Ов шукар џанља кој тано о Јехова хем сар ваљани те служинел леске, а о Јехова бут благословинѓа ле. Ама пало несаво време, о Соломон почминѓа те обожавинел ховавне девлен. Лескере гревија бут хољанкерѓе е Јехова хем башо адава цело нација Израел веконцар трпинѓа о последице (1. Цар. 11:5-9; 2. Цар. 23:13). Пало несаво време о Соломон муло. Бут берша мислинаја сине кај о Соломон ка воскреснинел. Аѓаар мислинаја сине соске и Библија вакерела кај о Соломон сине „парумо ко пле парадада“, лафија со исто аѓаар користинена пе башо верна слуге, сар сој о цари о Давид (1. Цар. 11:43). Ама, дали о начин сар сине парумо о Соломон тано гаранција кај ов ка воскреснинел? И Библија на вакерела адава. Несаве шај те мислинен песке кај о Соломон ка воскреснинел соске и Библија вакерела кај „окова со муло тано ослободимо таро пло грево“ (Рим. 6:7). Ама, акава на значинела кај са адала со муле ка овен воскресниме. Ко крајо, адава со некој муло на значинела кај иси ле право палем те живинел. О воскресение тано поклон таро амаро Девел сој пхердо мангипаја. Ов дела адава поклон околенге со мангела те дел лен прилика те служинен леске вечно (Јов 14:13, 14; Јован 6:44). Дали о Соломон ка добинел асавко поклон? О Јехова џанела о одговор, амен на џанаја ле. Ама џанаја кај о Јехова ка керел адава сој праведно.

СО ЏАНАЈА

10. Сар осетинела пе о Јехова кеда ваљани те уништинел несаве манушен? (Езекиел 33:11; дикх хем и слика.)

¹⁰ Читин Езекиел 33:11. О Јехова вакерела аменге сар осетинела пе кеда ваљани те судинел е манушенге. Слично сар со пишинѓа о Езекиел, о апостол Петар вакерѓа: „О Јехова на мангела никој те овел уништимо“ (2. Пет. 3:9). Акала лафија тане бут утешна! Амен џанаја кај о Јехова нане те уништинел некас засекогаш, освен ако нане ле шукар причина башо адава. Ов тано бут милостиво хем сикавела милост секогаш кеда иси тхан башо адава.

11. Кој нане те овел воскреснимо, хем котар џанаја адава?

¹¹ Со џанаја башо мануша кола со нане те воскреснинен? И Библија спомнинела само некобор примерија.b Е Исусескере лафија сикавена кај о Јуда Искариот нане те воскреснинел. (Марко 14:21; дикх хем Јован 17:12.c) О Јуда свесно хем доброволно гело против о Јехова хем лескоро Чхаво. (Дикх Марко 3:29.d) Слично, о Исус вакерѓа кај несаве религиозна водачија со противинѓе пе леске, ка мерен бизи надеж те овен воскресниме (Мат. 23:33). О апостол Павле да предупрединѓа кај о отпадникија со нане те каинен пе, нане те овен воскресниме (Евр. 6:4-8; 10:29).

12. Со џанаја баши е Јеховаскири милост? Вакер примерија.

¹² Ама, со џанаја баши е Јеховаскири милост? Сар ов сикавѓа кај „на мангела никој те овел уништимо“? Те дикха сар сикавѓа милост несавенге со керѓе сериозна гревија. О цари о Давид керѓа некобор сериозна гревија, сар сој прељуба хем мударибе. Сепак, о Давид каинѓа пе хем адалеске о Јехова спремно простинѓа леске (2. Сам. 12:1-13). О цари о Манасија, побаро дело таро пло живото керѓа бут лошна буќа. Чак ко асавко случај, о Јехова сикавѓа милост хем простинѓа леске соске каинѓа пе (2. Лет. 33:9-16). Акала примерија сикавена кај о Јехова сикавела милост секогаш кеда иси причина башо адава. Ов ка воскреснинел асавке манушен адалеске со халиле кај керѓе бут лошна буќа хем каинѓе пе башо адава.

13. а) Соске о Јехова сикавѓа милост е Ниневијцонге? б) Со вакерѓа о Исус покасно башо о Ниневијција?

¹³ Амен исто аѓаар џанаја кај о Јехова сикавѓа милост е Ниневијцонге. О Девел вакерѓа е Јонаске: „Ленгоро лошнипе ресља џи манде“. Ама кеда каинѓе пе башо пумаре гревија, о Јехова спремно простинѓа ленге. Ов сине бут помилостиво таро Јона. О Јона бут хољанѓа хем адалеске о Девел мора сине те сетинкерел ле кај адала Ниневијција „на џанена сине сој исправно, а сој погрешно“ (Јона 1:1, 2; 3:10; 4:9-11). Покасно, о Исус користинѓа адава пример те шај те сикавел е јаверен баши е Јеховаскири правда хем милост. Ов вакерѓа кај о Ниневијција ка уштен „ко диве кеда о Девел ка судинел е манушенге“ (Мат. 12:41).

14. Со ка значинел е Ниневијцонге „о воскресение судибаске?“

¹⁴ Со значинела адава со о Ниневијција ка уштен „ко диве кеда о Девел ка судинел“? О Исус вакерѓа кај ки иднина ка овел „воскресение судибаске“ (Јован 5:29). Ов керела сине лафи башо време кеда ка владинел сар Цари милја берша, коте со „о праведна хем о неправедна“ ка воскреснинен (Апо. 24:15). Башо неправедна акава ка овел „воскресение судибаске“. Акава значинела кај откеда акала мануша ка воскреснинен, о Јехова хем о Исус внимателно ка дикхен те шај те проценинен дали ола шунена хем применинена о буќа со сикљовена лен. Ако несаво Ниневијцо сој воскреснимо на мангела те служинел е Јеховаске, о Јехова нане те дозволинел леске те живинел понадари (Иса. 65:20). Ама са окола со ка одлучинен верно те служинен е Јеховаске, ка шај те живинен вечно (Дан. 12:2).

15. а) Соске нашти точно те вакера кај нијекх таро окола со сине уништиме ко Содом хем Гомор нане те воскреснинен? б) Сар шај те хаљова о лафија сој пишиме ко Јуда 7? (Дикх хем и рамка „Со мислинѓа о Јуда?“)

¹⁵ Кеда керѓа лафи башо мануша таро Содом хем Гомор, о Исус вакерѓа кај ленге ка овел бут пошукар „ко диве кеда о Девел ка судинел е манушенге“ него околе манушенге со отфрлинѓе ле хем лескере сикљојба (Мат. 10:14, 15; 11:23, 24; Лука 10:12). Дали о Исус користинѓа хипербола те шај те сикавел кај о мануша таро лескоро време сине бут полошна таро окола ко Содом хем Гомор? На. О Исус мислинѓа адава дословно. Исто сар кеда вакерѓа кај о Ниневијција ка уштен „ко диве кеда о Девел ка судинел е манушенге“.e Ко солдуј ситуацие, е лафенцар „диве кеда о Девел ка судинел е манушенге“ мислинела пе ки исто бути. Исто сар о Ниневијција, о мануша да таро Содом хем Гомор керена сине лошна буќа. Ама поразлично таро Ниневијција, е манушен таро Содом хем Гомор на сине лен прилика те каинен пе. Освен адава, сетин тут со вакерѓа о Исус башо „воскресение судибаске“. Ки лесте ка овен вклучиме „окола со керѓе лошнипе“ (Јован 5:29). Значи, изгледа кај шај иси несави надеж башо мануша таро Содом хем Гомор. Шај барем несаве таро адала мануша ка воскреснинен хем шај ка овел амен прилика те сикава лен башо Јехова хем башо Исус Христос.

16. Со џанаја башо адава сар о Јехова ка одлучинел кас те воскреснинел? (Еремија 17:10).

¹⁶ Читин Еремија 17:10. Ко акава стихо шај те дикха со џанаја башо начин сар о Јехова судинела. О Јехова секогаш „истражинела о вило хем испитинела о најхор мисле“. Кеда ка ваљани те одлучинел кас ка воскреснинел, ов секогаш „ка дел секаске спрема лескере друмија“. О Јехова ка овел цврсто кеда адава ка ваљани, ама милостиво секогаш кеда ка овел тхан башо адава. Адалеске, на ваљани те претпоставина аменге кај некаске нане надеж башо воскресение, освен ако на џанаја адава адалеске со и Библија вакерела ле.

„О СУДИЈА Е ЦЕЛО ПХУВЈАКОРО“ КА „КЕРЕЛ АДАВА СОЈ ПРАВЕДНО“

17. Со ка случинел пе е манушенцар со муле?

¹⁷ Откеда о Адам хем и Ева геле тари е Сатанаскири страна хем бунинѓе пе против о Јехова, милијарде мануша муле. О мерибе кова сој најбаро душмани, леља бут животија (1. Кор. 15:26). Со ка случинел пе са адале манушенцар? Јекх тикно број таро 144.000 верна следбеникија е Христосескере, ка воскреснинен хем ка добинен бесмртно живото ко небо (Отк. 14:1). Јекх баро број таро верна мурша хем џувља кола со мангле е Јехова, ка овен дело таро „праведна“ кола со ка воскреснинен хем ка живинен вечно ки пхув ако ачховена праведна џикоте о Христос владинела милја берша хем ко последно испит (Дан. 12:13; Евр. 12:1). Исто аѓаар, џикоте трајнена адала милја берша, е неправеднонге, машкар коленде сој окола со никогаш на служинѓе е Јеховаске па чак окола со керѓе лошна буќа — ка дел пе ленге прилика те променинен пе хем те овен верна слуге е Девлескере (Лука 23:42, 43). Ама, несаве мануша сине добором лошна, добором одлучна те бунинен пе против о Јехова хем лескири намера, со ов одлучинѓа ола никогаш те на овен воскресниме (Лука 12:4, 5).

18-19. а) Соске шај те овел амен доверба ко начин сар о Јехова ка судинел околенге со муле? (Исаија 55:8, 9). б) Со ка дикха ки следно статија?

¹⁸ Дали шај те ова целосно сигурна кај кеда о Јехова судинела е манушенге, секогаш анела исправно одлука? Оја. О Авраам шукар халило кај о Јехова тано совршено, мудро хем милостиво „Судија е цело пхувјакоро“. О Јехова обучинѓа пле Чхаве хем леске денѓа и одговорност те судинел сариненге (Јован 5:22). Хем о Јехова, хем о Исус, џанена со иси секоле манушеске ко вило (Мат. 9:4). Значи, кеда ка судинен секаске посебно, ола секогаш ка керен „адава сој праведно“.

¹⁹ Те ова одлучна те овел амен доверба ко Јехова хем ко са лескере одлуке. Хаљоваја кај амен на сием способна исправно те судина, ама о Јехова тано. (Читин Исаија 55:8, 9.) Адалеске, иси амен доверба ко Јехова хем ко Исус хем мукхаја ола те судинен ко са. Исто аѓаар џанаја кај амаро совршено Цари о Исус, совршено ка сикавел пе Дадескири правда хем милост (Иса. 11:3, 4). Ама со шај те вакера башо адава сар о Јехова хем о Исус ка судинен е манушенге ки „бари неволја“? Со на џанаја? А со џанаја? Ки следно статија ка кера лафи башо акала пучиба.