Скромно прифатин кај иси буќа со на џанеа

1. Саве способностија денѓа амен о Јехова, хем соске?

О ЈЕХОВА денѓа амен способност те размислина, те сикљова неве буќа хем те применина адава со сиклилем. Соске о Јехова створинѓа амен ко асавко начин? Ов мангела „[те пенџара] шукар е Девле“ хем те служина леске аѓаар со ка користина амари годи (Изр. 2:1-5; Рим. 12:1).

2. Со ваљани те признајна, хем соске адава тано корисно аменге? (Јов 37:23, 24; дикх хем и слика.)

² Иако о Јехова денѓа амен способност те сикљова, иси бут буќа со на џанаја. (Читин Јов 37:23, 24.) Размислин башо е Јовескоро пример. О Јехова пучља ле бут пучиба кола со поможинѓе ле те хаљол кај иси бут буќа со на џанела. Адава разговор е Јеховаја поможинѓа леске те хаљол кај ваљани те овел понизно хем те менинел пло начин сар размислинела (Јов 42:3-6). Аменге да ка користинел ако скромно признајнаја кај на џанаја са. Асавки скромност поттикнинела амен те овел амен доверба кај о Јехова ка откринел аменге адава со чаче ваљани те џана те шај те ана мудра одлуке (Изр. 2:6).

3. Со ка дикха ки акаја статија?

³ Ки акаја статија ка дикха несаве буќа кола со амен на џанаја лен хем саве предизвикија шај те овен амен башо адава. Исто аѓаар, ка дикха соске тано шукар адава со на џанаја несаве буќа. Адава со ка сикљова тари акаја статија ка бајрарел амари доверба кај о Јехова, „окова со совршено џанела са“, вакерела аменге адава со чаче ваљани те џана (Јов 37:16).

АМЕН НА ЏАНАЈА КЕДА КА АВЕЛ О КРАЈО

4. Спрема Матеј 24:36, со на џанаја?

⁴ Читин Матеј 24:36. Амен на џанаја кеда ка авел о крајо акале светоске. Чак ни о Исус, џикоте сине ки пхув, на џанља башо „адава диве хем адава саати“.a Ов покасно вакерѓа е апостоленге кај е Јехова „иси ле власт те одрединел о време кеда ка овен о буќа“, јавере лафенцар кај ле иси ле право те одрединел кеда ка случинен пе несаве настанија (Апо. 1:6, 7). О Јехова одрединѓа о време кеда ка авел о крајо, ама амен нашти те џана кеда точно ка овел адава.

5. Сар шај те влијајнел упри аменде адава со на џанаја кеда ка авел о крајо?

⁵ Спрема адава со вакерѓа о Исус, амен на џанаја кобор време ка ваљани те аџикера о крајо. Адалеске, шај те ова нестрплива или те обесхрабрина амен, посебно ако бут време аџикераја е Јеховаскоро диве. Или, шај те овел аменге пхаро те издржина адава со некој тари амари фамилија или јавера мануша асана аменге (2. Пет. 3:3, 4). Шај ка мислина кај ка ова пострплива или кај полокхо ка икљова ко крајо адалеа со о јавера асана аменге ако џанаја кеда ка авел о крајо.

6. Соске тано шукар адава со на џанаја кеда ка авел о крајо?

⁶ Уствари, адалеа со на откринѓа аменге о точно датум, о Јехова дела амен прилика те сикава кај служинаја леске адалеске со мангаја ле хем кај иси амен доверба ки лесте. Амен на служинаја е Јеховаске несаве рокоја ки годи, него мангаја те служина леске ки цели вечност. Наместо цело време те мислина ко адава кеда ка авел е Јеховаскоро диве, шукар тано те мислина со са ка случинел пе откеда ка авел адава диве. Адава ка поможинел аменге те ова попаше е Јеховаја, те овел амен доверба ки лесте хем те кера са со шај те радујна ле (2. Пет. 3:11, 12).

7. Со џанаја?

⁷ Важно тано те концентририна амен ко адава со џанаја — кај о последна диве почминѓе ко 1914 берш. Ко пло Лафи ки Библија, о Јехова денѓа амен пророштвија кола на само со поможинена амен точно те одредина адава берш, него хем детално објаснинена саве ка овен о условија таро адава берш па са џи акана. Адалеске, амен сием увериме ко адава кај „паше тано о баро диве е Јеховаскоро“ (Соф. 1:14). Исто аѓаар, џанаја со мангела о Јехова те кера — кобор со шај повише манушенге те вакера о „шукар хабери башо Царство“ (Мат. 24:14). Акава хабери вакерела пе ко околу 240 пхувја хем ко повише таро 1000 чхибја. На ваљани те џана „о диве хем о саати“ те шај ревно те кера акаја важно задача.

НА ЏАНАЈА СО КА КЕРЕЛ О ЈЕХОВА ТЕ ШАЈ ТЕ ПОМОЖИНЕЛ АМЕН

8. Ко со мислинела пе е лафенцар „о постапке е чачутне Девлескере“? (Проповедник 11:5).

⁸ Амен на џанаја секогаш „о постапке е чачутне Девлескере“. (Читин Проповедник 11:5.) Акале лафенцар мислинела пе ко адава со о Јехова предизвикујнела или мукхела те случинел пе те шај те керел пе лескири волја. Амен нашти точно те џана соске о Јехова мукхела нешто те случинел пе или со точно ка керел те шај те поможинел амен (Пс. 37:5). Нашти те хаљова адава исто сар со нашти те хаљова сар развинела пе јекх чхаво пле дајаке ко воги, нешто со чак ни о научникија нашти целосно те хаљон.

9. Саве предизвикија шај те овен амен адалеске со на џанаја со ка керел о Јехова те шај те поможинел амен?

⁹ Адалеске со на џанаја со ка керел о Јехова те шај те поможинел амен, шај те на ова одлучна. Шај те почмина те мислина амен дали те кера несаве жртве те шај те кера повише ки служба, сар на пример те поедноставина амаро живото или те селина амен адари коте со иси побари потреба таро објавителија. Или палем, шај те сумнина амен дали о Девел тано задоволно амендар ако на исполнинѓем несави теократско цел, ако на дикхаја баре резултатија таро трудо со даја ки служба или ако иси амен пхарипа ко несаво градежно проекти ки амари организација.

10. Кола важна особине шај те развина лен адалеске со на џанаја со ка керел о Јехова те шај те поможинел амен?

¹⁰ Адава со на џанаја со ка керел о Јехова те шај те поможинел амен, уствари дела амен прилика те развина несаве важна особине сар сој и понизност хем и скромност. Освен адава, поможинела амен те хаљова кај е Јеховаскере мисле хем друмија тане поуче таро амаре (Иса. 55:8, 9). Исто аѓаар, сикљоваја те овел амен целосно доверба кај о Јехова ка грижинел башо буќа ко јекх најшукар начин. Кеда ка овен амен несаве шукар резултатија ки служба или ко несаво градежно проекти, свесна сием кај са и слава ваљани те да е Јеховаске (Пс. 127:1; 1. Кор. 3:7). Ако нешто на икљола аѓаар сар со очекујнѓем, на ваљани те бистра кај о Јехова панда иси ле целосно контрола упро буќа (Иса. 26:12). Амен кераја амаро дело, а ко исто време иси амен доверба кај о Јехова ка керел пло дело. Увериме сием кај ов ка дел амен о водство со ваљани аменге иако шај нане те керел адава преку несаво чудо сар со понекогаш керѓа англедер (Апо. 16:6-10).

11. Кола важна буќа џанаја?

¹¹ Џанаја кај о Јехова тано секогаш пхердо мангипаја, тано праведно хем мудро. Исто аѓаар, џанаја кај ов бут ценинела са адава со кераја баши лесте хем башо амаре пхраља хем пхења. А џанаја хем кај о Јехова секогаш наградинела околен сој леске верна (Евр. 11:6).

НА ЏАНАЈА СО КА ОВЕЛ ТАЈСА

12. Спрема Јаков 4:13, 14, со на џанаја?

¹² Читин Јаков 4:13, 14. Јекх основно чачипе тано адава кај на џанаја саво ка овел амаро живото тајса. Ко акава свето „о време хем о буќа со нашти те предвидинен пе аракхена секоле мануше“ (Проп. 9:11). Адалеске, нашти те џана дали амаре планија ка успејнен, па чак ни дали ка ова џивде те шај те исполнина лен.

13. Сар шај те влијајнел упри аменде адава со на џанаја со шај те случинел пе аменге ко живото?

¹³ Адава со на џанаја со ка случинел пе аменге ко живото шај те керел аменге баро пхарипа. Ки сави смисла? Ако сием превише секириме башо адава со шај ка случинел пе, шај те нашава амари радост. Амаро живото шај таро јекх пути те менинел пе или шај таро јекх пути те случинен пе лошна буќа. Адава шај те керел те осетина бари дукх хем секирација. А ако о буќа на икљона аѓаар сар со очекујнѓем, шај те разочарина амен хем те обесхрабрина амен (Изр. 13:12).

14. Таро со зависинела дали ка ова чаче среќна? (Дикх хем о слике.)

¹⁴ Кеда истрајнаја ко пхаре ситуацие, докажинаја кај бизи разлика со ка случинел пе, амен служинаја амаре небесно Дадеске таро мангипе, а на таро себична мотивија. О библиска извештаија сикавена кај на ваљани те очекујна о Јехова те заштитинел амен таро са о пхарипа хем кај ов на одлучинѓа англедер со са ка случинел пе аменге ко живото. Ов џанела кај амари среќа ко живото на зависинела таро адава дали џанаја со ка овел ки иднина. Наместо адава, амари среќа зависинела таро адава дали родаја лестар водство хем дали сием леске послушна (Ерем. 10:23). Адалеа со иси амен доверба ки лесте кеда анаја одлуке, амен уствари вакераја: „Ако о Јехова мангела, ка живина хем ка кера акава или окова“ (Јак. 4:15).

15. Со џанаја баши иднина?

¹⁵ Иако на џанаја со ка случинел пе секова нево диве, џанаја кај о Јехова ветинѓа аменге вечно живото — било ко небо, било ки пхув. Џанаја кај ов нашти те ховавел хем кај ништо нашти те чхинавел ле те исполнинел са пле ветувања (Тит 1:2). Само ов шај „таро почеток [те вакерел] о крајо, одамна [те вакерел] адава со панда на уло“. Аѓаар сине англедер, а аѓаар ка овел хем ки иднина (Иса. 46:10). Сигурна сием ко адава кај ништо нашти те чхинавел е Јехова те мангел амен (Рим. 8:35-39). Ов ка дел амен и мудрост, и утеха хем и сила со ваљанена аменге те шај те истрајна бизи разлика со ка случинел пе. Шај те ова сигурна кај о Јехова ка поможинел амен хем ка благословинел амен (Ерем. 17:7, 8).

НАШТИ ЦЕЛОСНО ТЕ ХАЉОВА КОБОР ШУКАР ПЕНЏАРЕЛА АМЕН О ЈЕХОВА

16. Со џанела о Јехова баши аменге, хем сар осетинеа тут башо адава? (Псалм 139:1-6).

¹⁶ Читин Псалм 139:1-6. Амаро Створители џанела сар сием створиме хем со влијајнела упри аменде ко физичко хем емоционално поглед. Ов цело време интересинела пе аменге. Ов џанела со вакераја хем со мангаја те вакера адалеа, со кераја хем соске кераја адава. Спрема адава со вакерѓа о цари о Давид, о Јехова тано секогаш узи аменде хем спремно тано те поможинел амен. Зарем на воодушевинела тут адава со о Најбаро Владетели, о Семоќно Створители е небоскоро хем е пхувјакоро добором бут интересинела пе аменге! Сар со вакерѓа о Давид: „Адава пенџарибе тано манге бут чудесно, добором учо со нашти те хаљовав ле“ (Пс. 139:6).

17. Соске шај те овел аменге пхаро те прифатина кај о Јехова шукар пенџарела амен?

¹⁷ Башо адава со случинѓа пе аменге нешто ки фамилија, баши амари култура или башо адава ко со верујнаја сине англедер, шај те овел аменге пхаро те дикха е Јехова сар Дад кова сој пхердо мангипаја хем кова грижинела пе аменге. Или шај мислинаја кај адалеске со англедер керѓем добором сериозна грешке, о Јехова никогаш нане те мангел те џанел нешто баши аменге хем кај ов тано дур амендар. Чак хем о Давид понекогаш осетинела пе сине аѓаар (Пс. 38:18, 21). Или палем, некој со живинела неморално, ама искрено мангела те живинел спрема е Девлескере праведна мерилија, шај пучела пе: „Ако о Девел чаче пенџарела ман, тегани соске очекујнела мандар те менинав ман наместо те прифатинел ман саво со сиум?“

18. Соске аменге корисно те прифатина адава кај о Јехова пенџарела амен пошукар амендар? (Дикх хем о слике.)

¹⁸ Амен шај те успејна те прифатина адава кај о Јехова пенџарела амен пошукар амендар хем кај шај те дикхел о шукар ки аменде кова со амен нашти те дикха. Иако дикхела амаре грешке хем хаљола соске осетинаја амен или постапинаја ко одредено начин, ов сепак мангела амен (Рим. 7:15). Кеда ка хаљова кај о Јехова секогаш дикхела сави личност шај те ова, адава ка дел амен и сила со ваљани аменге те шај те служина леске верно хем радосно.

19. Ко кола буќа ни хари на сумнинаја амен башо Јехова?

¹⁹ Амен џанаја кај о Јехова тано мангипе. Ни хари на сумнинаја амен ко адава (1. Јов. 4:8). Џанаја кај лескере праведна мерилија сикавена лескоро мангипе спрема аменде хем кај ов мангела те живина о најшукар живото со шај. Исто аѓаар, џанаја кај о Јехова мангела те добина вечно живото. Те шај адава те овел, ов денѓа и откупнина. Акава бут шужо поклон уверинела амен кај шај успешно те служина е Јеховаске иако сием несовршена (Рим. 7:24, 25). А џанаја хем кај „о Девел тано побаро [таро амаро вило] хем ов џанела са“ (1. Јов. 3:19, 20). О Јехова џанела са баши аменде хем кај шај успешно те кера лескири волја.

20. Со ка поможинел аменге те на ова превише секириме?

²⁰ О Јехова на кратинѓа амендар нијекх информација која со чаче ваљани те џана ла. Ако скромно прифатинаја акава, нане те ова превише секириме башо буќа упри коленде со нане амен контрола хем ка шај те концентририна амен ко адава сој чаче важно. Ко асавко начин, сикаваја кај иси амен целосно доверба ко Јехова, „окова со совршено џанела са“ (Јов 36:4). Иако акана адава со џанаја тано ограничимо, едвај аџикераја те авел о нево свето коте со ки цели вечност ка сикљова неве буќа башо амаро бут шукар Девел (Проп. 3:11).