Сар шај те овел тут мир иако иси војне хем конфликтија
„Англедер те проучинав и Библија“, вакерела о Гери, кова со англедер сине војнико, „на хаљовава сине соске ко свето иси добором лошнипе, неправде хем неволје. Ама акана иси ман андруно мир. Џанава кај о Јехова, о Девел, ка керел о свето сигурно тхан живибаске“.
Бут јавера да осетинена пе исто сар о Гери. Дознајн сар и Библија поможинѓа јаверенге да.
И БИБЛИЈА ВАКЕРЕЛА: „Ту, Јехова, сиан шукар хем спремно сиан те простине“ (Псалм 86:5).
САР АКАВА ПОМОЖИНЕЛА: „Акава стихо уверинела ман кај о Јехова тано милостиво. Џанава кај тано спремно те простинел манге башо са со керѓум англедер кеда учествујнава сине ки војна“ (Вилмар, Колумбија).
И БИБЛИЈА ВАКЕРЕЛА: „Ме керава нево небо хем неви пхув. Ко адава со сине поангле нане те сетинен тумен, а ни нане те појавинел пе туменге ко вило“ (Исаија 65:17).
САР АКАВА ПОМОЖИНЕЛА: „Иси ман трауме, стрес хем депресија таро адава со доживинѓум сар војнико. Акава стихо сетинкерела ман кај о Јехова панда хари ка цидел мле немирна мисле хем нане више те овен ман кошмарија, нане више те авен манге ни ки годи ни ко вило. Кобор шужо поклон!“ (Зафира, Америка).
И БИБЛИЈА ВАКЕРЕЛА: „Ко диве кеда ов ка владинел о праведнико ка цутинел хем ка овел баро мир са џикоте постојнела и месечина“ (Псалм 72:7).
САР АКАВА ПОМОЖИНЕЛА: „Бут пути размислинава башо акала лафија. Панда хари, и војна хем са о лошна буќа со анела ој нане више те овен хем повише нане те секирина амен баши безбедност амаре пашутненгири“ (Александра, Украина).
И БИБЛИЈА ВАКЕРЕЛА: „Тле муле ка уштен... Џангавѓовен хем радујнен тумен, тумен со аракхљовена ко право“ (Исаија 26:19).
САР АКАВА ПОМОЖИНЕЛА: „Скоро сарине тари мли фамилија сине мударде кеда сине о геноцид упро племе Тутси. Ама, акава стихо уверинела ман кај палем ка дикхав лен. Едвај аџикерава те шунав ленгоро асајбе кеда ка воскреснинен!“ (Мери, Руанда).
И БИБЛИЈА ВАКЕРЕЛА: „Панда хари, о лошно нане те овел више... А о кротка ка наслединен и пхув, хем ка уживинен ко баро мир“ (Псалм 37:10, 11).
САР АКАВА ПОМОЖИНЕЛА: „Иако и војна завршинѓа, панда иси неправде хем лошна мануша. Акала стихија бут поможинена ман. О Јехова дикхела са хем хаљола мли ситуација. Ов ветинела кај панда хари нане те овен више муке хем ка бистра лен“ (Далер, Таџикистан).
О мануша сој цитириме ко акава списание тане машкар о милиоња Јеховаскере сведокија коленге со и Библија поможинѓа те аракхен мир. Ола сиклиле те циден пестар и омраза која со иси машкаро расе, о нацие, о племија хем о поединција (Ефешања 4:31, 32). Е Јеховаскере сведокија на мешинена пе ки политика хем на учествујнена ко нисаво насилство (Јован 18:36).
Исто аѓаар, е Јеховаскере сведокија поддржинена пе јекх јекхеа сар фамилија која сој пхерди мангипаја (Јован 13:35). На пример, и Александра која со сине цитирими англедер, мора сине те нашел пе пхењаја адалеске со сине војна. Ој вакерела: „Кеда накхлем и граница, одма дикхлем Сведокон таро адава тхан кола со сине атхе те аџикерен амен. Ленгири поддршка бут поможинѓа аменге те навикнина амен ки неви пхув сар избеглице“.
Канинаја тут те аве ко амаре состанокија коте со преку и Библија дознајнаја кај панда хари ка овел мир ки пхув хем сикљоваја сар панда авдиве те ова ко мир е јаверенцар. Џа ки jw.org те шај те дознајне коте најпаше икерена пе состанокија или те шај те роде бесплатно библиско курси некасаја таро е Јеховаскере сведокија, аѓаар со ка користине и публикација Ов бахтало засекогаш.