Сар о Јехова поможинела амен те истрајна

1. Соске ваљани аменге сила те шај те истрајна, хем кој шај те поможинел аменге? (1. Пет. 5:10).

КО АКАЛА последна пхаре диве, е Јеховаскере слугенге ваљани сила те шај те истрајнен. Несаве џене боринена пе несаве насвалипаја кова со трајнела повише време. Јаверендар муло некој сој ленге паше. А несавенге шај противинела пе и фамилија или о властија (Мат. 10:18, 36, 37). Ов сигурно кај со хем те случинел пе, о Јехова шај те поможинел туке те истрајне. (Читин 1. Петарескоро 5:10.)

2. Котар добинаја сила те шај те истрајна?

² Те истрајна значинела те ачхова верна е Јеховаске хем те на нашава амари надеж чак кеда иси амен пхарипа, сием прогониме или сием ко искушение те кера грево. Ама, адава нашти те кера само амаре силаја. Те шај те истрајна, ваљани аменге помош таро Јехова кова со дела амен „сила која со накхавела и нормално“ (2. Кор. 4:7). Ки акаја статија ка дикха ко кола штар начинија поможинела амен о Јехова те истрајна, а ка дикха хем со ваљани те кера амен те шај те добина адаја помош.

И МОЛИТВА

3. Соске шај те вакера кај и молитва тани скапоцено поклон?

³ О Јехова денѓа амен јекх скапоцено поклон кова со поможинела амен те истрајна. Иако сием грешна, ов дозволинела аменге те комуницирина леа (Евр. 4:16). Те размислина башо акава: шај те молина амен е Јеховаске башо са хем ко секова време. Ов шај те шунел амен ки секоја чхиб, било кај те ова чак ако сием изолириме или ко затвор (Јона 2:1, 2; Апо. 16:25, 26). Ако аменге добором пхаро со чак нашти те вакера е Јеховаске со мислинаја, ов ка хаљол амен хем ка џанел со мангаја те вакера леске (Рим. 8:26, 27). Оја, и молитва тани чаче јекх скапоцено поклон!

4. Соске шај те вакера кај адава со ка молина е Јехова те поможинел аменге те истрајна тано спрема лескири волја?

⁴ Ко пло Лафи, о Јехова уверинела амен кај „било со те рода, ако тано спрема лескири волја, ов шунела амен“ (1. Јов. 5:14). Тегани, дали шај те молина е Јехова те поможинел аменге те истрајна? Оја! Адава тано спрема лескири волја. Соске вакераја акава? Кеда истрајнаја иако иси амен испитија, тегани о Јехова ка шај те сикавел е Јеховаске кај нане ко право кеда вакерела кај лескере слуге ка служинен леске само кеда ленге са шукар (Изр. 27:11). Освен адава, и Библија вакерела кај о Јехова мангела „те сикавел пли сила ки корист околенге со служинена леске цело вилеа“ (2. Лет. 16:9). Адалеске, шај те ова сигурна кај е Јехова иси ле хем моќ хем желба те поможинел аменге те истрајна (Иса. 30:18; 41:10; Лука 11:13).

5. Сар и молитва поможинела амен те овел амен андруно мир? (Исаија 26:3).

⁵ И Библија вакерела кај кеда ки молитва вакераја са е Јеховаске со мучинела амен, „о мир таро Девел, кова сој упредер таро адава со шај о мануш те хаљол, ка аракхел [амаре] виле хем [амаре] мисле“ (Фил. 4:7). Те размислина со значинела акава. О мануша со на служинена е Јеховаске иси лен проблемија хем ола шај пробинена различна методе те шај те аракхен андруно мир. Ама бизи разлика со хем те пробинен о мануша те шај те овел лен мир, адава мир нашти те спорединел пе е миреа со дела ле о Јехова. Кеда молинаја амен е Јеховаске, сикаваја кај иси амен целосно доверба упри лесте хем ов дела амен „трајно мир“. (Читин Исаија 26:3.) Јекх начин сар о Јехова керела адава тано аѓаар со поможинела аменге те сетина амен ко охрабрувачка стихија таро лескоро Лафи. Асавке стихија керена те осетина амен смириме соске уверинена амен кобор бут о Јехова грижинела пе аменге хем кобор мангела те поможинел амен (Пс. 62:1, 2).

6. Башо со јавер шај те молине тут? (Дикх хем и слика.)

⁶ Со шај те кере ту. Кеда тли вера тани испитими, „фрде тло пхарипе е Јеховаске“ хем молин ле те дел тут пло мир (Пс. 55:22). Молин ле те дел тут мудрост те шај те џане со шај те кере ки тли ситуација (Изр. 2:10, 11). Ама, освен со ка молине ле те поможинел туке те истрајне, ма бистре те благодарине тут леске ки молитва (Фил. 4:6). Приметин ко кола начинија поможинела туке те истрајне секова диве хем благодарин тут леске башо са адава со керела туке. Ма мукх о пхарипа те чхинавен тут те дикхе о шуже буќа со о Јехова више керела лен туке (Пс. 16:5, 6).

Е ДЕВЛЕСКОРО ЛАФИ

7. Сар адава со проучинаја и Библија поможинела аменге те истрајна?

⁷ О Јехова денѓа амен пло Лафи те шај те поможинел аменге те истрајна. Ки Библија иси бут стихија кола со уверинена амен кај о Јехова тано узи аменде. Те дикха само јекх асавко стихо. Ко Матеј 6:8 пишинела: „Тумаро Дад џанела со ваљани туменге англедер те роден лестар адава“. Акала лафија вакерѓа лен о Исус, а ов пенџарела е Јехова пошукар таро било кој јавер. Адалеске, шај те ова целосно сигурна кај кеда цидаја муке о Јехова џанела со ваљани аменге хем поможинела амен. Ки Библија иси панда бут јавера слична мисле кола со шај те керен те ова панда поодлучна те истрајна (Пс. 94:19).

8. а) Вакер несаво библиско начело кова со шај те поможинел аменге те истрајна. б) Со ка поможинел амен те сетина амен ко библиска начелија кеда ваљанена аменге?

⁸ О библиска начелија шај те поможинен аменге те истрајна. Ки ленде иси мудрост која со шај те поможинел аменге те ана шукар одлуке (Изр. 2:6, 7). На пример, и Библија охрабринела амен те чхинава те секирина амен башо адава со шај те случинел пе ки иднина, наместо адава те овел амен доверба ко Јехова секова диве (Мат. 6:34). Ако иси амен навика те читина и Библија секова диве хем хор те размислина башо адава, ка овел аменге полокхо те сетина амен ко библиска советија кеда ка ваљани те ана несави одлука или кеда ваљани те истрајна ко несаво проблеми.

9. Сар о пример е Јеховаскере верна слугенгоро таро пурано време панда повише бајрарела амари доверба кај ов ка поможинел амен?

⁹ Ки Библија исто аѓаар читинаја башо мануша кола со чаче постојнѓе, мануша сар аменде колен со сине лен доверба ко Јехова хем коленге со ов поможинѓа (Евр. 11:32-34; Јак. 5:17). Кеда размислинаја баши ленге, панда повише уверинаја амен кај о Јехова „тано амаро тхан гарајбаске хем амари сила, помош со локхе аракхела пе ко пхаро време“ (Пс. 46:1). О пример е Јеховаскере верна слугенгоро таро пурано време поттикнинела амен те овел амен сар ленгири вера хем истрајност (Јак. 5:10, 11).

10. Со шај те кере те шај те овел тут целосно корист таро е Девлескоро Лафи?

¹⁰ Со шај те кере ту. Читин и Библија секова диве хем кер туке списако стихонцар кола со туке лично бут поможинена. Бут џене халиле кај најшукар начин те почминен о диве хем те аракхен охрабрувачка мисле тари Библија, тано аѓаар со ка читинен е дивескоро стихо. Јекх пхен со викинела пе Мериa вакерела кај е дивескоро стихо бут поможинѓа лаке кеда солдуј лакере родителија насвалиле таро рако. Со поможинѓа лаке те истрајнел џикоте грижинела пе ленге сине ко последна масекија таро ленгоро живото? Ој вакерела: „Секова сабајле читинава сине е Дивескоро стихо хем размислинава сине башо адава со читинава. Адаја навика поможинѓа манге те пхерав ми годи библиска мисленцар, а адава палем, поможинѓа манге те концентриринав ман ко поважна буќа, а на ки манде хем ки пхари ситуација колате со сиум сине“ (Пс. 61:2).

О ПХРАЉА ХЕМ О ПХЕЊА

11. Соске утешинела амен адава со џанаја кај на сием само амен адала кола со цидена муке?

¹¹ Јавер начин сар о Јехова поможинела аменге те истрајна, тано преку амаре пхраља хем о пхења. Утешинела амен адава со џанаја кај „о иста муке трпинена хем [амаре] пхраља“, со сикавела кај на сием само амен адала кола со цидена муке (1. Пет. 5:9). Акава значинела кај иси пхраља хем пхења кола со сине лен слична проблемија сар амаре, ама сепак ачхиле верна е Јеховаске. Адава сикавела кај амен да шај те истрајна (Апо. 14:22).

12. Сар шај те поможинен аменге о пхраља хем о пхења, хем сар шај амен да те поможина ленге? (2. Коринќања 1:3, 4).

¹² Амаре пхраља хем пхења шај те охрабринен амен хем те поможинен аменге те истрајна бизи разлика таро со накхаја. О апостол Павле да осетинѓа адава ки пли кожа. Ко пле писмија бут пути спомнинѓа ко анав адален со поможинѓе леске џикоте сине пханло ко јекх кхер хем благодаринѓа пе ленге. Ола утешинѓе ле, охрабринѓе ле хем поможинѓе леске ко практична начинија (Фил. 2:25, 29, 30; Кол. 4:10, 11). Амен да авдиве шај те доживина нешто слично. Кеда ваљани аменге помош те истрајна, амаре пхраља хем пхења тане спремна те поможинен. А кеда ленге ваљани амари поддршка, амен сием ленге акате. (Читин 2. Коринќања 1:3, 4.)

13. Со поможинѓа е Мајаке те истрајнел?

¹³ О пхраља хем о пхења бут поможинѓе е Мајаке, јекх пхен тари Русија. Ко 2020 берш, ко лакоро кхер изненадено кхувѓа полиција те керел претрес, а покасно ингарѓе ла англо судо адалеске со вакерела сине баши пли вера е јаверенге. И Маја вакерела: „Ко периоди кеда емоционално нашти сине више те издржинав, о пхраља хем о пхења јавинена пе сине, пишинена манге сине хем вакерена манге сине кобор мангена ман. Секогаш џанава сине кај иси ман бари фамилија со мангела ман, ама ко 2020 берш панда повише уверинѓум ман ко адава“.

14. Со шај те кера те шај те добина помош таро пхраља хем таро пхења? (Дикх хем и слика.)

¹⁴ Со шај те кере ту. Ачхов паше тле пхраленцар хем пхењенцар. Ма лаџа те роде помош таро старешине. Ола тане аменге „сар тхан гарајбаске тари бавлал, сар заштита тари бура“ (Иса. 32:2). Хем ма бистре кај о пхраља да о пхења да боринена пе пумаре проблеменцар. Адава со ка кере шукарипе некаске кеда ваљани леске помош, ка поможинел туке те овел тут урамнотежено стави башо тле проблемија хем те ачхове позитивно (Апо. 20:35).

АМАРИ НАДЕЖ

15. Сар и надеж поможинѓа е Исусеске, хем сар поможинела аменге? (Евреија 12:2).

¹⁵ О Јехова денѓа амен сигурно надеж која со поможинела аменге те истрајна (Рим. 15:13). Сетин тут сар и надеж поможинѓа е Исусеске те издржинел ко најпхаро диве таро лескоро живото ки пхув. (Читин Евреија 12:2.) О Исус џанља кај адалеа со ка ачхол верно ка поможинел те бранинел пе е Јеховаскоро анав. Исто аѓаар, и надеж поможинѓа леске спремно те аџикерел о време кеда палем ка иранел пе ко небо коте со ка овел пле Дадеа хем коте со заедно пле пхраленцар ка владинел ко небесно Царство. Аменге да и надеж кај ка живина вечно ко е Девлескоро нево свето, поможинела аменге те истрајна иако шај ка доживина бут пхарипа ко акава свето е Сатанаскоро.

16. Сар и надеж поможинѓа јекхе пхењаке те истрајнел, хем со сикљовеа таро адава со вакерѓа?

¹⁶ Сар и надеж башо вечно живото ко нево свето поможинѓа јекхе пхењаке тари Русија со викинела пе Ала, колакере роме астарѓе ле хем чхивѓе ле ко затвор џикоте аџикерела сине те судинен ле? Кеда случинѓа пе са акава, и Ала вакерела: „Кеда молинава ман хем размислинава баши надеж со иси амен баши иднина, адава поможинела манге те на разочаринав ман превише. Џанава кај акава нане крајо башо са. О Јехова ка побединел хем ка наградинел амен“.

17. Сар ка сикава кај сием благодарна баши надеж со дела амен о Јехова? (Дикх хем и слика.)

¹⁷ Со шај те кере ту. Одвојн туке време те размислине баши бут шужи иднина со ветинела аменге о Јехова. Замислин тут ко е Девлескоро нево свето хем сар доживинеа са о благословија со ка овен амен. Хем аѓаар, бизи разлика сави неволја ка овел амен, ка џана кај ој „тани моментално хем локхи“ (2. Кор. 4:17). Исто аѓаар, кер са со шај те вакере е јаверенге ко со верујнеа. Ленге тано попхаро те боринен пе е проблеменцар ко акава свето адалеске со на џанена о чачипе хем на џанена е Девлескере ветувања баши иднина. Чак ако вакереа ленге само некобор буќа, шај те охрабрине лен те манген те џанен нешто повише башо е Јеховаскоро Царство хем лескере ветувања.

18. Соске шај те овел амен доверба ко е Јеховаскере ветувања?

¹⁸ О Јов верно истрајнѓа ко бут пхаре испитија хем адалеске шај сине те вакерел е Јеховаске: „Акана џанава кај ту са шај те кере хем кај на постојнела бути која со нашти те кере ла“ (Јов 42:2). О Јов халило кај нашти ништо те чхинавел е Јехова те исполнинел пли намера. Акава шај аменге да авдиве те дел сила те истрајна. Те вакера јекх пример. Јекх џувли тани насвали хем разочарими адалеске со сине ко бут докторија хем нијекх лендар на успејнѓа те сасљарел ла. Ама кеда јекх шукар хем искусно доктори откринела сој о проблеми хем објаснинела лаке сар ка сасљарел ла, ој локхјола, иако ка ваљани те накхел време те шај те сасљол. Адава со џанела кај аџикерена ла пошукар диве, и надеж кај ка сасљол, поможинела лаке те истрајнел. Слично тано аменцар да, и надеж кај ка живина ко рај поможинела аменге те истрајна.

19. Со ваљани аменге те шај те истрајна?

¹⁹ Сар со дикхлем, о Јехова поможинела аменге те истрајна ко амаре неволје преку и молитва, преку пло Лафи, преку о пхраља хем о пхења хем преку амари надеж. Ако прифатинаја акаја помош, о Јехова ка овел аменцар бизи разлика со ка доживина, са џикоте са о муке ко акава свето е Сатанаскоро нане више те постојнен (Фил. 4:13).