Ов уверимо кај о Јехова мангела тут

1. Соске одлучинѓан те де лафи е Јеховаске кај ка служине леске цело живото? (Дикх хем и слика.)

ДАЛИ сетинеа тут кеда ки молитва денѓан лафи е Јеховаске кај ка служине леске цело живото? Ту анѓан адаја одлука адалеске со запознајнѓан ле хем замангљан ле. Денѓан ле лафи кај ко живото најважно ка овел туке те служине леске хем кај понадари да ка манге ле цело вилеа, душаја, гоѓаја хем цело силаја (Марко 12:30). Оттегани па џи акана, тло мангипе спрема лесте са повише бајрола. Тегани, со ка вакере ако некој пучела тут: „Дали сиан сигурно кај мангеа е Јехова?“ Сигурно одма ка вакере: „Мангава ле повише таро било со јавер!“

2-3. Ко со мангела о Јехова те ова увериме, хем со ка дикха ки акаја статија? (Еремија 31:3).

² Ама со ка вакере ако некој пучела тут: „Дали сиан сигурно кај о Јехова мангела тут?“ Дали ка ачхове хари англедер те одговорине адалеске со шај мислинеа кај на сиан достојно башо е Јеховаскоро мангипе? Јекх пхен која со барили бизо мангипе, вакерѓа: „Џанава кај мангава е Јехова. Ни хари на сумнинава ман ко адава. Ама бут пути сумнинава ман дали о Јехова мангела ман“. Со шај те поможинел туке те дознајне со чаче осетинела о Јехова баши туке?

³ О Јехова мангела те ове уверимо кај ов мангела тут, ни хари те на сумнине тут ко адава. (Читин Еремија 31:3.) Џанеа кај о Јехова привлечинѓа тут ки песте. Хем кеда денѓан ле лафи кај ка служине леске хем крстинѓан тут, добинѓан нешто бут скапоцено — лескоро верно мангипе. Адава значинела кај ов бут мангела тут хем кај никогаш нане те мукхел тут. Асавко мангипе поттикнинела ле те дикхел ко пле верна слуге — машкар коленде со сиан хем ту — сар пли скапоцено сопственост (Мал. 3:17). О Јехова мангела те ове сигурно кај мангела тут исто сар со сине сигурно о апостол Павле. Адалеске со сине сигурно кај о Јехова мангела ле, о Павле пишинѓа: „Уверимо сиум кај ни о мерибе, ни о живото, ни о ангелија, ни о властија, ни адава сој тано акана, ни адава со ка авел, ни било која сила, ни адава сој тано учо, ни адава сој тано хор ни било со јавер сој створимо нашти те одвојнел амен таро е Девлескоро мангипе“ (Рим. 8:38, 39). Ки акаја статија ка дикха соске тано важно те ова сигурна кај о Јехова мангела амен хем со шај те кера панда повише те уверина амен ко адава.

СОСКЕ ТАНО ВАЖНО ТЕ УВЕРИНА АМЕН КАЈ О ЈЕХОВА МАНГЕЛА АМЕН

4. Сар шај те борина амен против јекх таро најуспешна стапице е Сатанаскере?

⁴ Ако уверинаја амен кај о Јехова мангела амен адава шај те поможинел аменге те борина амен против е Сатанаскере стапице (Еф. 6:11). О Сатана ка керел са со шај те чхинавел амен те служина е Јеховаске. Јекх таро лескере најуспешна стапице тани те ширинел ховајба кај о Јехова на мангела амен. Ама, адава тано опасно ховајбе. И Библија спорединела е Сатана лавеа (1. Пет. 5:8, 9). О лавија нападинена е животнен кеда ола тане слаба хем нашти те бранинен пе. Слично, о Сатана бут пути нападинела амен кеда сием уморна, слаба или кеда сием тажна башо нешто со случинѓа пе аменге англедер, башо несаве проблемија со иси амен акана или адалеске со на џанаја со ка овел ки иднина (Изр. 24:10). О Сатана надинела пе кај добором бут ка уморинел амен со ка откажина амен таро Јехова. Ама, амен шај те борина амен против о Бенг хем лескере опасна тактике аѓаар со ка кера са со шај те шај целосно те уверина амен кај о Јехова мангела амен (Јак. 4:7).

5. Соске тано важно те осетина кај о Јехова мангела амен хем бут ценинела амен?

⁵ Ако сием увериме кај о Јехова мангела амен, амаро амалипе леа ка овел панда позорало. Соске шај те вакера акава? О Јехова створинѓа амен потребаја те манга хем те ова мангле. Кеда некој сикавела аменге мангипе, природно тано те ирана мангипаја. Адалеске, кобор повише осетинаја кај о Јехова мангела амен хем ценинела амен, добором повише бајрола амаро мангипе спрема лесте (1. Јов. 4:19). А кобор побаро тано амаро мангипе спрема лесте, добором побаро ка овел хем лескоро мангипе спрема аменде. И Библија јасно вакерела аменге: „Овен паше е Девлеа хем ов ка овел паше туменцар“ (Јак. 4:8). Ама со ка поможинел амен те ова панда поувериме кај о Јехова мангела амен?

СО ШАЈ ТЕ ПОМОЖИНЕЛ АМЕНГЕ ТЕ УВЕРИНА АМЕН КАЈ О ЈЕХОВА МАНГЕЛА АМЕН?

6. Те шај те уверине тут кај о Јехова мангела тут, со шај те кере?

⁶ Понадари да молин е Јехова конкретно те шај те поможинел туке те хаљове соске мангела тут (Лука 18:1; Рим. 12:12). Молин е Јехова, ако ваљани повише пути ко диве, те поможинел туке те дикхе ки туте аѓаар сар со дикхела ов. Џанѓола пе, ако тло вило осудинела тут, шај нане те овел локхо те уверине тут кај о Јехова мангела тут. Ама ма бистре кај о Јехова тано побаро таро тло вило (1. Јов. 3:19, 20). Ов пенџарела тут пошукар тутар коркори, ов дикхела тле шуже особине коленге со шај ту ни на сиан свесно кај иси тут (1. Сам. 16:7; 2. Лет. 6:30). Адалеске, слободно вакер леске сар осетинеа тут хем молин ле те поможинел туке те уверине тут кај мангела тут (Пс. 62:8). Пало адава, постапин спрема тле молитве аѓаар со ка применине о следна предлогија.

7-8. Сар о Псалмија поможинена аменге те уверина амен кај о Јехова мангела амен?

⁷ Шај те овел тут доверба ко адава со вакерела о Јехова ко пло Лафи. Ов пле силаја водинѓа е библиска писателен те опишинен ле баш аѓаар сар сој чаче. Ко јекх псалм о Давид ко бут шужо начин опишинѓа сар о Јехова грижинела пе аменге. Ов пишинѓа: „О Јехова тано паше узо адала сој пхаге вилеа хем спасинела адален сој пхаге духоја“ (Пс. 34:18). Кеда сиан обесхрабримо шај мислинеа туке кај никој на хаљола тут хем кај никој нашти те поможинел тут. Ама о Јехова ветинела кај ко асавке моментија тано паше узи туте адалеске со дикхела кај ваљанела туке повише таро било кеда англедер. Ко јекх јавер псалм о Давид пишинѓа: „Кхеде мле асва ко тло шиши тари кожа“ (Пс. 56:8). О Јехова дикхела кеда туке пхаро. Ов бут грижинела пе туке хем осетинела тли дукх. Исто сар со секоја капка пани ко јекх шиши тари кожа тани скапоцено некаске со патујнела ки пустина, тле асва тане скапоцена е Јеховаске хем ов сетинела пе ко секова моменти кеда осетинѓан дукх хем рунѓан. О Давид вакерѓа е Јеховаске: „Ту шукар џанеа са мле друмија“ (Пс. 139:3). О Јехова дикхела са со кереа, ама концентриринела пе ко шукар буќа (Евр. 6:10). Соске? Адалеске со ов бут ценинела адава со трудинеа тут те шај те радујне лескоро вило.a

⁸ Преку асавке утешна стихија сој пишиме ко лескоро Лафи, о Јехова уствари сар ка пхене вакерела: „Мангава те џане кобор бут мангава тут хем грижинава ман туке“. Ама сар со дикхлем англедер, е Сатанаскири цел тани те верујне ко ховајбе кај о Јехова на мангела тут. Адалеске, ако понекогаш сумнинеа тут дали о Јехова мангела тут, ачхов хем пуч тут: „Кас ка верујнав — е даде е ховајбаскоро или е Девле е чачипаскоро?“ (Јован 8:44; Пс. 31:5).

9. Со ветинела о Јехова околенге со мангена ле? (2. Мојсеева 20:5, 6).

⁹ Размислин со осетинела о Јехова башо окола со мангена ле. Те дикха со вакерѓа о Јехова е Мојсееске хем е Израелцонге. (Читин 2. Мојсеева 20:5, 6.) О Јехова ветинела кај понадари да ка сикавел верно мангипе околенге со мангена ле. Адалеске со о Јехова тано верно шај те ова сигурна кај ов секогаш ка мангел околен со мангена ле (Неем. 1:5, фус.). Адалеске, ако понекогаш мислинеа кај о Јехова на мангела тут, ачхов хем пуч тут: „Дали ме мангава е Јехова?“ Пало адава, размислин башо акава: Ако ту мангеа ле хем деа тутар са те шај те радујне ле, шај те ове сигурно кај ов да бут мангела тут (Дан. 9:4; 1. Кор. 8:3). Јавере лафенцар, ако на сумнинеа тут кај мангеа е Јехова, соске те сумнине тут кај ов мангела тут? Шај те ове сигурно кај ов секогаш ка мангел тут хем никогаш нане те мукхел тут.

10-11. Сар мангела о Јехова те дикхе ки откупнина? (Галатјања 2:20).

¹⁰ Размислин баши откупнина. И откупно жртва е Исус Христосескири тани о најбаро поклон со о Јехова денѓа е манушенге (Јован 3:16). Ама дали о Јехова денѓа пле Чхаве те мерел туке да? Џанѓола пе! Те дикха о пример е апостол Павлескоро. Ов керѓа некобор сериозна гревија англедер те овел христијани, а ваљани сине понадари да те боринел пе пле слабостенцар (Рим. 7:24, 25; 1. Тим. 1:12-14). Сепак, ов почминѓа те дикхел ки откупнина сар поклон кова со о Јехова денѓа леске лично. (Читин Галатјања 2:20.) Ма бистре кај о Јехова пле силаја водинѓа е Павле те пишинел акала лафија. А са адава сој тано пишимо ки Библија тано те шај те сикљова (Рим. 15:4). Таро е Павлескере лафија дикхјола сар о Јехова мангела ту те дикхе ки откупнина — сар поклон со денѓа ле лично туке. Кеда ка почмине ки откупнина те дикхе аѓаар, панда повише ка уверине тут кај о Јехова мангела тут.

¹¹ Бут сием благодарна е Јеховаске со бичхалѓа е Исусе ки пхув те шај те мерел аменге. Ама панда јекх причина соске о Исус ало ки пхув тани те вакерел е јаверенге о чачипе башо Девел (Јован 18:37). Ко адава чачипе тано вклучимо хем адава со о Јехова осетинела башо пле чхаве.

САР О ИСУС ПОМОЖИНЕЛА АМЕНГЕ ТЕ УВЕРИНА АМЕН КАЈ О ЈЕХОВА МАНГЕЛА АМЕН

12. Соске шај те верујна ко адава со Исус вакерѓа башо Јехова?

¹² Џикоте сине ки пхув, о Исус уживинела сине те вакерел е јаверенге саво тано о Јехова (Лука 10:22). Амен иси амен бут причине те верујна ко адава со о Исус вакерѓа башо Јехова. Соске? Адалеске со англедер те авел ки пхув, о Исус сине е Јеховаја ко небо милијарде берша (Кол. 1:15). Ов лично дикхља кобор бут о Јехова мангела пле верна чхавен хем чхајен. Сар о Исус поможинела аменге те уверина амен кај о Девел мангела амен?

13. Сар мангела о Исус те дикха ко Јехова?

¹³ О Исус мангела те дикха ко Јехова исто сар со дикхела ов. Ко евангелија, о Исус башо Јехова вакерѓа „Дад“ повише таро 190 пути. А кеда керела сине лафи пле следбениконцар, користинела сине лафија сар сој „тумаро Дад“ или „тумаро Дад сој ко небо“ (Мат. 5:16; 6:26). Англедер о Исус те авел ки пхув, е Девлескере верна слуге башо Јехова вакерена сине кај тано „Семоќно Девел“, „о Најбаро Девел“, хем „о Најбаро Створители“, а користинена сине хем јавера слична титуле. Ама о Исус бут пути вакерѓа башо Јехова „амаро Дад“. Акала лафија сикавена кај о Јехова мангела лескере слуге те осетинен пе леа паше, исто сар јекх чхаво со осетинела пе паше пле дадеа кова со грижинела пе леске. О Исус сикавела амен кај о Јехова мангела амен, исто сар јекх шукар дад со мангела пле скапоцена чхавен. Те дикха дуј примерија башо адава сар о Исус користинѓа о лафи „Дад“.

14. Сар о Исус сикавѓа кај секова јекх амендар тано скапоцено ко јакхја амаре небесно Дадескере? (Матеј 10:29-31; дикх хем и слика.)

¹⁴ Прво, те дикха е Исусескере лафија сој пишиме ко Матеј 10:29-31. (Читин.) О чирикља тане тикне хем ола никогаш нане те манген е Јехова, а ни палем те служинен леске. Сепак, амаре Дадеске секоја чирикли тани добором скапоцено со ов џанела кеда ка перел ки пхув. Ако е Јеховаске добором бут врединела јекх чирикли, шај те ова сигурна кај ов бут повише ценинела секоле јекхе амендар соске амен мангаја ле хем служинаја леске. Исто аѓаар, о Исус вакерѓа кај амаро Дад џанела кобор бала иси секоле јекхе амендар ко шеро. Адалеске со о Јехова џанела чак асавке ситна буќа аменге, шај те ова сигурна кај ов бут грижинела пе аменге. Јасно тано кај о Исус мангела те ова увериме кај секова јекх амендар тано скапоцено англо јакхја амаре небесно Дадескере.

15. Со сикавена туке о лафија е Исусескере сој пишиме ко Јован 6:44 башо тло небесно Дад?

¹⁵ Те дикха панда јекх пример сар о Исус користинѓа о лафи „мло Дад“. (Читин Јован 6:44.) Лично тло небесно Дад привлечинѓа тут ко чачипе. Соске керѓа адава? Адалеске со дикхља кај ко тло вило иси шуже особине (Апо. 13:48). Кеда вакерѓа о лафија сој пишиме ко Јован 6:44, о Исус шај мислинѓа ко лафија е Јеховаскере сој пишиме ко Еремија 31:3. Адатхе о Јехова вакерѓа: „Верно мангипаја привлечинѓум тут ки манде“ (Ерем. 31:3 фус.; споредин Осија 11:4). Размислин со значинела акава. Амаро небесно Дад, сој пхердо мангипаја, понадари да дикхела тле шукар особине кола со шај ни ту коркори на дикхеа лен.

16. а) Со уствари вакерела аменге о Исус, хем соске ваљани те верујна ле? б) Сар шај панда повише те уверине тут кај о Јехова тано о најшукар Дад со постојнела? (Дикх и рамка „О најшукар Дад со постојнела“.)

¹⁶ Адалеа со о Исус опишинѓа е Јехова сар амаро Дад, ов уствари вакерела аменге: „О Јехова нане само мо Дад, ов тано хем тло Дад. Хем уверинава тут кај ов бут мангела тут хем грижинела пе туке лично“. Адалеске, ако некогаш на сиан сигурно дали о Јехова мангела тут, ачхов хем пуч тут: „На ваљани ли те верујнав ко адава со вакерѓа о Исус — окова кова со најшукар џанела е Даде хем кова со секогаш вакерела о чачипе?“ (1. Пет. 2:22).

ПОНАДАРИ ДА КЕР СА СО ШАЈ ПАНДА ПОВИШЕ ТЕ УВЕРИНЕ ТУТ КАЈ О ЈЕХОВА МАНГЕЛА ТУТ

17. Соске мора понадари да те кера са со шај те ова панда поувериме кај о Јехова мангела амен?

¹⁷ Ваљани понадари да те кера са со шај те ова поувериме кај о Јехова мангела амен. Сар со дикхлем англедер, амаро опасно душмани о Сатана ка керел са те шај те теринел амен те чхинава те служина е Јеховаске. Те шај те слабонкерел амари одлучност те служина е Јеховаске, о Сатана понадари да ка пробинел те чхивел амен те сумнина амен дали о Девел мангела амен. На смејнаја те дозволина е Сатанаске те побединел! (Јов 27:5).

18. Сар шај панда повише те уверине тут кај о Јехова мангела тут?

¹⁸ Те шај панда повише те уверине тут кај о Јехова мангела тут, понадари да молин ле те поможинел туке те дикхе ки туте аѓаар сар со дикхела ов. Хор размислин башо библиска стихија коленде сој опишимо е Јеховаскоро верно мангипе. Ма бистре кај о Јехова секогаш ка мангел околен со мангена ле. Размислин соске шај ки откупнина те дикхе сар поклон кова со о Јехова денѓа ле лично туке хем нека овел тут доверба ко е Исусескере лафија кај о Јехова тано тло небесно Дад. Тегани, ако некој пучела тут: „Дали сиан сигурно кај о Јехова мангела тут?“, бизо ни хари те мислине тут ка вакере: „Оја, сигурно сиум ко адава! Хем секова диве керава са со шај те сикавав леске кај мангава ле“.