Сар те ачхове радосно ко попхуре берша

1-2. Сар дикхела о Јехова ко пле верна слуге кола сој попхуре? (Псалм 92:12-14; дикх хем и слика.)

О МАНУША ко различна тхана таро свето дикхена различно ко пхурипе. На пример, сетинеа тут ли кеда ко тло шеро дикхљан тли прво парни бал? Шај одма икалѓан ла те шај о јавера те на дикхен ла. Ама, халиљан кај адалеа со ка икале о парне бала нане те чхинаве те бајрон јавера. Акава пример сикавела кај некој кобор хем те трудинел пе нашти те чхинавел те пхујрол.

² Сепак, амаро небесно Дад појавер дикхела ко пле слуге со пхујрона (Изр. 16:31). Ов спорединела лен каштенцар со цутонена. (Читин Псалм 92:12-14.) Соске акаја споредба одговоринела? Најчесто, о кашта сој пхерде листонцар хем мирислива лулуѓенцар постојнена бершенцар. Јекх таро најшуже кашта тано и јапонско трешна. Несаве таро асавке шуже кашта постојнена повише таро милја берша. Слично сар акала кашта со постојнена бут берша, о слуге е Јеховаскере сој ко попхуре берша тане шуже, јавере лафенцар бут скапоцена англо лескере јакхја. О Јехова на дикхела о парне бала него дикхела и личност. Хем ов ценинела о шуже особине е попхуренгере — ленгири истрајност хем верност — хем адава со бут берша служинѓе леске верно.

3. Вакер пример башо адава сар о Јехова користинѓа попхурен те шај те исполнинел пли намера.

³ Адава со некој пхурило на значинела кај нане више добором вредно англо е Јеховаскере јакхја.a Уствари, о Јехова бут пути користинела е попхурен те шај те исполнинел пли намера. На пример, и Сара сине бут пхури кеда о Јехова вакерѓа кај ка овел дај јекхе моќно народоскири хем кај латар ка авел о Месија (1. Мој. 17:15-19). О Мојсеј сине ко попхуре берша кеда о Јехова бичхалѓа ле те ослободинел е Израелцон таро Египет (2. Мој. 7:6, 7). О апостол Јован да сине пхуро кеда о Јехова користинѓа ле те пишинел панџ библиска лила.

4. Спрема Изреки 15:15, со шај те поможинел е попхуренге те истрајнен ко пхарипа? (Дикх хем и слика.)

⁴ Адаленге сој ко берша, о пхурипе анела бут пхарипе. Јекх пхен вакерѓа кај е пхуренге ваљани храброст соске нане локхо те овел пе пхуро. Ама, адава со ка овен радоснаb шај те поможинел е попхуренге те истрајнен ко пхарипа кола со анела лен о пхурипе. (Читин Изреки 15:15.) Ки акаја статија ка дикха некобор практична буќа кола со шај те керен о попхуре те шај те ачховен радосна. Исто аѓаар, ка дикха сар шај о јавера те поможинен е попхуре пхраленге хем пхењенге ко собрание. Прво, те дикха соске шај те овел пхаро те ачхова радосна џикоте пхујроваја.

СОСКЕ ТАНО ПХАРО ТЕ АЧХОВА РАДОСНА КЕДА ПХУЈРОВАЈА

5. Со шај те обесхрабринел е попхурен?

⁵ Со шај те лел тли радост? Шај сиан обесхрабримо адалеске со нашти те кере адава со кереа сине англедер. Шај фалинела туке о време кеда сиан сине потерно хем кеда сиан сине посасто (Проп. 7:10). На пример, јекх пхен со викинела пе Руби вакерела: „Пхаро манге те уравав ман адалеске со иси ман дукха хем нашти више добором бут те движинав ман. Пхаре манге чак хем несаве едноставна буќа, сар на пример те ваздав мло про те шај те уравав и чорапа. Мле васта тане кочиме хем иси ман артритис, адалеске манге пхаро чак те керав несаве ситна буќа“. А о Харолд, кова со служинѓа ко Бетел вакерела: „На пенџарава коркори ман хем адава понекогаш бут нервиринела ман. Англедер сиум сине бут силно хем бут спортујнава сине. Уживинава сине те кхелав бејзбол. О јавера вакерена сине: ’Де и топка е Харолдеске соске ов никогаш на уткинела‘. Ама акана мислинава кај чак нашти ни те фрдав и топка“.

6. а) Кола јавера буќа шај те обесхрабринен е попхурен? б) Со шај те поможинел е попхуренге те одлучинен дали те чхинавен те возинен? (Дикх и статија е насловеа „Ваљани ли те чхинавав те возинав?“, која со аракхљола ко акава број.)

⁶ Шај сиан обесхрабримо адалеске со нашти више те кере несаве буќа коркори. Шај чак јавер некој ваљани те грижинел пе туке или палем ваљани те живине јекхеа таро тле чхаве. Или, шај сиан бут разочаримо адалеске со тло састипе уло полошно или адалеске со више на дикхеа шукар со чак нашти више коркори те џа ко несаве тхана или те возине. Акава шај те керел те ове чаче тажно. Ама нешто со шај те поможинел туке тано адава со нане те бистре кај амари вредност англо е Јеховаскере јакхја хем англо јавера на зависинела таро адава дали шај те грижина амен аменге, те живина коркори или те возина врда. Хем шај те ова сигурна кај о Јехова хаљола сар осетинаја амен. Леске тано важно саве сием андрал. Ов дикхела кај бут мангаја ле таро вило хем ценинаја лесте хем амаре пхрален хем пхењен (1. Сам. 16:7).

7. Со шај те поможинел адаленге сој тажна адалеске со мислинена кај шај нане те доџакерен о крајо акале светоскоро?

⁷ А со ако сиан тажно адалеске со мислинеа кај шај нане те доџакере о крајо акале светоскоро? Со шај те поможинел туке? Ма бистре кај о Јехова стрпливо аџикерела те чхивел крајо акале лошно светоске (Иса. 30:18). Иси причина соске о Јехова тано стрпливо. Адалеа сој тано стрпливо дела време хем прилика милиоња манушенге те запознајнен ле хем те почминен те служинен леске (2. Пет. 3:9). Адалеске, кеда сиан обесхрабримо сетин тут кај панда бут мануша шај те запознајнен е Јехова англедер те авел о крајо хем те спасинен пе. Дали машкар ленде шај те овен хем несаве тари тли фамилија?

8. Сар о проблемија со анела лен о пхурипе шај те влијајнел упро попхуре?

⁸ Бизи разлика кобор берш иси амен кеда на осетинаја амен шукар, побари тани и веројатност те вакера или те кера нешто колеске со покасно ка пера пишмани (Проп. 7:7; Јак. 3:2). На пример, кеда цидинѓа муке, о верно Јов керѓа лафи бизо те размислинел (Јов 6:1-3). Јавер причина соске о попхуре шај те вакерен или те керен нешто со обично на би керена шај те овел адалеске со иси лен несаво проблеми састипаја или шај користинена несаве хапија. Џанѓола пе, никој амендар намерно на би користинела о берша или о састипе сар изговор те на овел љубезно или превише те аџикерел е јаверендар. Хем ако хаљоваја кај некаске вакерѓем нешто со нане љубезно, ваљани одма те извинина амен (Мат. 5:23, 24).

САР ТЕ АЧХОВЕ РАДОСНО

9. Соске ваљани те прифатине помош таро јавера? (Дикх хем о слике.)

⁹ Прифатин помош таро јавера (Гал. 6:2). Ко почеток шај адава те овел туке пхаро. Јекх пхен со викинела пе Гретл вакерела: „Понекогаш манге пхаро те прифатинав помош таро јавера адалеске со мислинава кај ка овав ленге ко терет. Ваљанѓа манге време те шај те менинав мло начин сар размислинава хем понизно те признајнав кај ваљани манге помош“. Кеда прифатинеа помош таро јавера деа лен прилика те осетинен и радост со авела таро дејбе (Апо. 20:35). А сигурно ту да ка ове радосно кеда ка дикхе кај о јавера мангена тут хем грижинена пе туке.

10. Соске тано важно те на бистре те сикаве благодарност? (Дикх хем и слика.)

¹⁰ Сикав кај сиан благодарно (Кол. 3:15; 1. Сол. 5:18). Кеда о јавера керена шукар буќа баши аменге, амен сием благодарна, ама шај бистраја те сикава адава. Сепак, ако асаја хем вакераја „фала“ шај те сикава е јаверенге кај сием благодарна хем кај ценинаја адава со керена аменге. И Лија која со грижинела пе е попхуренге ко Бетел, вакерела: „Јекх пхен колаке со грижинава ман мукхела картичке коленцар со сикавела кај тани благодарно. Адала тане само некобор лафија, ама тане бут љубезна. Осетинава ман шукар кеда добинава адала картичке хем керела ман радосно адава со џанава кај ој ценинела адава со поможинава ла“.

11. Сар шај те поможине е јаверенге? (Дикх хем и слика.)

¹¹ Трудин тут те поможине е јаверенге. Ако размислинеа башо јавера хем трудинеа тут те поможине ленге, тегани похари ка размислине башо тле проблемија. Јекх африканско изрека спорединела е попхурен библиотекаја пхерди лиленцар колен со иси лен бари мудрост. Ама, ако о мануша на читинена адала лила ола ка нашти те сикљовен лендар. Слично, о терне ка нашти те сикљовен тутар важна буќа ако на кереа ленцар лафи хем ако на вакереа адава со џанеа. Пуч лен пучиба хем шун лен. Спомнин ленге несаве ситуацие таро тло живото кола со сикавена соске тано секогаш најшукар те живинел пе спрема е Јеховаскере мерилија хем кај адава ка керел лен среќна. Сигурно ка ове радосно ако утешинеа хем охрабринеа тле потерне амален (Пс. 71:18).

12. Спрема Исаија 46:4, со ветинела о Јехова кај ка керел е попхуренге? (Дикх хем и слика.)

¹² Молин е Јехова баши сила. Иако шај осетинеа тут физички хем емоционално уморно, о Јехова никогаш „на уморинела пе хем на чхинѓола“ (Иса. 40:28). Сар ов користинела пли сила кола со нане ла крајо? Јекх начин тано аѓаар со зојракерела пле верна попхуре слуген (Иса. 40:29-31). Уствари, ов ветинела кај ка поможинел ленге. (Читин Исаија 46:4.) Хем о Јехова секогаш исполнинела пле ветувања (Ис. Нав. 23:14; Иса. 55:10, 11). Кеда молинеа тут е Јеховаске хем пало адава осетине лескоро мангипе хем поддршка, нашти те на ове радосно.

13. Спрема 2. Коринќања 4:16-18, со на ваљани те бистра? (Дикх хем и слика.)

¹³ Секогаш нека овел тут ки годи кај тли ситуација тани моментално. Кеда џанаја кај несави пхари ситуација тани моментално полокхо аменге те истрајна. И Библија уверинела амен кај о пхурипе хем о насвалипе тане моментална (Јов 33:25; Иса. 33:24). Адалеске, шај те керел ту радосно адава со џанеа кај о најшукар диве тек ка авен, а на кај више накхле. (Читин 2. Коринќања 4:16-18.) Ама сар шај о јавера те поможинен туке?

САР ШАЈ О ЈАВЕРА ТЕ ПОМОЖИНЕН

14. Соске тано важно те јавина амен хем те џа ко попхуре?

¹⁴ Редовно џа хем јавин тут е попхуре пхраленге хем пхењенге (Евр. 13:16). О попхуре шај те осетинен пе коркори. Јекх пхрал со викинела пе Ками, кова со нашти те икљол кхералдан, вакерела: „Таро сабајле џи раќате сиум кхере хем бут манге досадно. Понекогаш осетинава ман сар пхуро лави ко кафези. Уштава нервозно хем вознемиримо“. Адалеа со ка џа ко попхуре уверинаја лен кај аменге важна хем кај мангаја лен. Веројатно сарине амен шај сетинаја амен ки несави ситуација кеда манглем те јавина амен некаске сој попхуро таро амаро собрание или те џа ки лесте, ама на керѓем адава. Секој амендар тано бут зафатимо. Адалеске, со шај те поможинел аменге те кера адава сој најважно, коте сој тано хем те џа ко попхуре? (Фил. 1:10). Шај те поможинел туке адава со ка пишине туке ко тло календари те шај те сетинкерел тут те бичхале порака некаске сој попхуро таро тло собрание или те јавине тут леске. Исто аѓаар, шај те кере туке распоред те шај те џа ки ленде. Бирин јекх диве те шај те на бистре те џа.

15. Со шај те керен заедно о потерне хем о попхуре?

¹⁵ Ако сиан терно шај пучеа тут башо со шај те кере лафи е попхуренцар или кола буќа шај те керен лен заедно. Ама ма размислин бут башо адава. Само ов шукар амал (Изр. 17:17). Кер лафи е попхуренцар англедер хем пало состанок. Шај те пуче лен кова тано ленгоро омилено стихо или те вакере ленге те раскажинен туке несави смешно ситуација кеда сине тикне. Исто аѓаар, шај те викине лен заедно те дикхен е масекоскири емисија ко JW Broadcasting^®. А шај хем те поможине е попхуренге ко практична начинија. На пример, шај те поможине ленге редовно те апдејтиринен пумаре уредија или те перавен о најневе публикацие проучибаске. Јекх пхен со викинела пе Керол вакерела: „Нудин е попхуренге те керен буќа со ту да мангеа те кере лен. Иако сиум пхури панда мангава те уживинав ко живото. Мангава те џав ко шопинг, те хав авријал хем те пхирав ки природа“. Јекх пхен со викинела пе Мајра вакерела: „Јекха таро мле амалинке иси ла 90 берш. Ој тани 57 берш попхури мандар. Ама бут пути бистрава адава адалеске со асаја хем дикхаја филмија заедно. Хем кеда иси амен несаво проблеми родаја совет јекх јекхатар“.

16. Соске шај е попхуренге те поможинел адава со ка џа ленцар ко доктори?

¹⁶ Ов ленцар кеда џана ко прегледија. Освен со шај те ингаре е попхурен ко доктори, шај хем те ачхове ленцар џикоте трајнела о преглед те шај те ове сигурно кај о докторија ка понашинен пе ленцар шукар хем ка ден лен и помош со ваљани ленге (Иса. 1:17). Шај те поможине е попхуренге аѓаар со ка пишине адава со ка вакерел о доктори. Јекх попхури пхен, со викинела пе Рут вакерела: „Бут пути кеда џава коркори ко преглед о доктори на хаљола ман сериозно. О докторија шај те вакерен: ’Са и џи ки тли годи‘. Ама кеда иси некој манцар, о докторија понашинена пе скроз јавер. Бут сиум благодарно е пхраленге хем е пхењенге со одвојнена време те авен манцар“.

17. Ко кола начинија шај те проповедине е попхуренцар?

¹⁷ Соработин ленцар ки служба. Несаве попхуре шај нане лен доволно сила те шај те џан ки служба таро кхер ко кхер. На пример, шај те викине несаве попхуре пхења те сведочинен заедно ко количке. А шај чак те ане лаке столица те шај те бешел паше узи количка. Или, шај те викине несаве попхуре пхрале ко библиско курси, па чак хем шај те водине о курси лесте кхере. О старешине шај те размислинен дали шај о состанокија службаке те икерен пе ко кхера несаве попхуре пхраленгере или пхењенгере те шај те овел ленге полокхо те учествујнен ки служба. Врединела са со кераја те шај те сикава чест е попхуренге (Изр. 3:27; Рим. 12:10).

18. Со ка дикха ки јавер статија?

¹⁸ Акаја статија сетинкерѓа амен кај о Јехова мангела хем ценинела е попхурен. А сарине амен да мангаја лен хем ценинаја лен. О пхурипе тано пхаро, ама адалеске со о Јехова ка поможинел тут шај те ачхове радосно (Пс. 37:25). Бут охрабринела адава со џанеа кај о најшукар диве тек авена, а на кај више накхле. Ама, сар шај те ачховен радосна окола со грижинена пе некаске сој насвало, на пример несаве попхуреске ки фамилија, несаве чхавеске или амалеске? О одговор ко акава пучибе ка дикха ле ки јавер статија.