Ко цело свето бајрона о цене — Со вакерела и Библија башо адава?

„И економија ко свето тани палем ки опасност“, вакерела о претседатели тари Група тари Светско банка. „О цене башо хајбе хем услуге сигате бајрона, а тари јавер страна, е манушен иси лен са похари паре.“

О Меѓународно монетарно фонди вакерела: „О цене башо гориво хем хајбе бут сигате уштена, а адава највише влијајнела упро мануша ко чороле пхувја“.

И Библија поможинела аменге те хаљова соске иси економска проблемија, сар шај те икљова ко крајо ленцар хем кова тано о трајно решение.

Ко „последна диве“ ка бајрон о цене

• И Библија вакерела кај живинаја ко „последна диве“ (2. Тимотеј 3:1).

• О Исус вакерѓа кај ко акава време ка овен буќа со ка даравен е манушен (Лука 21:11). О мануша дарана кеда о цене бајрона. Ола дарана баши пли иднина хем дали ка шај те обезбединен о основна буќа баши пли фамилија.

• Ко библиско лил Откровение пишинела кај ко последна диве ка бајрон о цене башо хајбе: „Шунѓум јекх гласо сар вакерела: ’Похари таро јекх кило гив коштинела цело дивескири плата хем похари таро трин киле јачмен коштинела цело дивескири плата‘“ (Откровение 6:6).

Те шај те џане повише башо „последна диве“ хем башо пророштво сој пишимо ко лил Откровение, дикх о видеоклипи О свето менинѓа пе таро 1914 берш хем читин и статија „Што претставуваат четирите јавачи?“

О решение башо економска проблемија

• „Ола ка градинен кхера хем ка живинен ки ленде, ка садинен дракха хем ка хан ленгоро плоди. Нане ола те градинен, а некој јавер те живинел ки ленде, нане ола те садинен, а некој јавер те хал ленгоро плоди“ (Исаија 65:21, 22).

• „Ки пхув о гив бут ка бијанел, хем ко најуче тхана е планинакере ов бут ка бајрол“ (Псалм 72:16).

• „’О лошна мучинена околен сој ки мука, а о чороле офкинена, адалеске акана ка уштав хем ка спасинав лен лендар‘, вакерела о Јехова“ (Псалм 12:5).a

О Девел панда хари ка анел крајо баши неправедно економско ситуација ко цело свето. Те шај те дикхе сар ка керел адава, читин и статија „Да ли је могуће остварити праведан економски систем?“

Ама панда акана, и Библија шај те поможинел аменге те икљова ко крајо акале пхаре ситуацијаја. Сар? Ки лате иси практична советија сар мудро те трошинен пе о паре (Изреки 23:4, 5; Проповедник 7:12). Те шај те дознајне повише, читин о статие „Пазите како располажете новцем“ хем „Како живети с мање новца“.