И војна хем о климатска промене керѓе те овел бокхалипе ко цело свето — Со вакерела и Библија?

И војна ки Украина хем о баре климатска промене понадари да уништинена о резерве тари храна со иси ко цело свето. Акава посебно случинела пе ко почороле пхувја коте со аѓаар да нане доволно хајбаске.

• „О конфликтија, о климатска промене, о скупо гориво хем струја хем јавера буќа керѓе те овел пхаро те производинел пе хем те анел пе хајбаске“ (Антонио Гутереш, Генерално секретари таро Обединета нацие, 17 јули 2023).

• „И Русија нане више дело таро договор башо извоз таро гив сој тано ки Украина. О експертија мислинена кај акава ка анел криза баши храна ко цело свето хем кај о хајбе, посебно ко почороле пхувја сар сој и Северно Африка хем о Близок Исток, ка овел панда поскупо“ (Atalayar.com, 23 јули 2023).

Дознајн со вакерела и Библија баши и криза хајбаске хем баши амари иднина.

И Библија вакерѓа кај ка овел бокхалипе

• О Исус вакерѓа: „Ка боринел пе народо против народо, хем царство против царство, хем ка овел бокхалипе“ (Матеј 24:7).

• О библиско лил Откровение керела лафи башо штар симболична јавачија ко граста. Јекх лендар претставинела и војна. Пали лесте авела јавер јавачи кова со претставинела о бокхалипе — време кеда нане те овел доволно хајбаске хем и храна ка овел бут скупо. Ко Откровение 6:5, 6 пишинела: „Дикхљум јекх кало грас хем лескере јаваче сине ле вага ко вас. Шунѓум јекх гласо сар вакерела: ’Похари таро јекх кило гив коштинела цело дивескири плата. Похари таро трин киле јачмен коштинела цело дивескири плата‘“.

Адава со вакерѓа и Библија башо бокхалипе исполнинела пе ко амаро време кова со и Библија викинела ле „последна диве“ (2. Тимотеј 3:1). Ако мангеа те дознајне повише башо „последна диве“ хем башо штар јавачија таро Откровение, дикх о видеоклипи О свето менинѓа пе таро 1914 берш хем читин и статија „Што претставуваат четирите јавачи?“

Сар шај и Библија те поможинел туке?

• Ки Библија иси практична советија со шај те поможинен аменге те икљова ко крајо пхаре ситуациенцар, сар на пример кеда бајрона о цене баши храна хем кеда иси криза баши храна. Асавке советија шај те аракхе ки статија „Како да раководиш со парите“.

• И Библија исто аѓаар дела надеж кај о условија ки пхув ка овен пошукар. Ој ветинела кај ка авел време кеда „ки пхув о гив бут ка бијанел“ хем саринен ка овел лен бут хајбаске (Псалм 72:16). Ако мангеа те дознајне повише башо адава сави надеж дела и Библија хем соске шај те верујне ки лате, читин и статија „Патот до среќата — надеж“.