Со вакерела и Библија башо бокхалипе со иси ко свето?

„Нигде те на овел бокхалипе.“ Асавки цел иси лен о светска водачија колаја со мангена те решинен јекх таро најбаре проблемија е манушенгере — сар те овел хајбе са е манушенге ки пхув.a Ама дали ка авел време кеда никој нане те овел бокхало? Со вакерела и Библија?

И Библија пророкујнѓа кај ко амаро време ка овел бокхалипе

Ки Библија пишинела кај ко амаро време ка овел бокхалипе. Адава периоди викинела пе „последна диве“ (2. Тимотеј 3:1). О Девел нане криво башо бокхалипе, него ов предупрединела амен башо акава проблеми (Јаков 1:13). Те дикха дуј библиска пророштвија.

„Ка овел бокхалипе... ко разна тхана“ (Матеј 24:7). Акале лафенцар и Библија пророкујнѓа кај овел бокхалипе ко бут тхана. Ко јекх извештај со иклило сигенде таро мануша со истражинена сар о хајбе керела пе хем ингарела пе пишинела: „И ситуација ко свето е бокхалипаја овела са полошно, нане доволно хајбаске хем и храна нане здраво“.b Бут милиоња мануша ко бут пхувја нане лен о хајбе со ваљанела ленге. Адалеске, жално тано со бут лендар мерена.

„Дикхљум јекх кало грас хем лескере јаваче сине ле вага ко вас“ (Откровение 6:5). Ко акава пророштво, о грас хем о јавачи симболично претставинена о бокхалипе ко последна диве.c О јавачи иси ле вага ко вас со меринела о хајбе те шај секој те добинел нешто. Џикоте о јавачи тано ко грас јекх гласо вакерела кај и цена башо хајбе ка овел бут бари хем предупрединела е манушен те штединен о основна буќа башо хајбе (Откровение 6:6). Акава пророштво бут шукар опишинела и авдисутни криза ко цело свето башо хајбе — криза коте со милијарде мануша нашти те овел лен здраво храна.

Сар ка решинел пе о проблеми е бокхалипаја?

О експертија вакерена кај амари пхув дела повише храна таро адава сој потребно те шај сарине со живинена ки лате те овел лен доволно хајбаске. Тегани соске иси бокхалипе? Кола проблемија керена те овел бокхалипе? Хем со вакерела и Библија башо адава сар амаро Створители о Јеховаd ка решинел акала проблемија?

Проблеми: О владе нашти те чхивен крајо башо чоролипе хем башо неправде кола со керена о мануша те на овел лен доволно хајбаске.

Решение: О несовршена манушикане владе ка овен мениме јекхе совршено владаја — е Девлескере Царствоја (Даниел 2:44; Матеј 6:10). Авдиве бут чороле мануша на успејнена секогаш те кинен песке о основна буќа хајбаске, ама кеда ка владинел е Девлескоро Царство адава нане те овел више аѓаар. Башо Исус, кова сој тано Цари ко е Девлескоро Царство, и Библија вакерела: „Соске ка спасинел е чороле со ровела баши помош, околе со цидела муке хем секас со нане ле кој те поможинел ле... Ки пхув о гив бут ка бијанел, хем ко најуче тхана е планинакере ов бут ка бајрол“ (Псалм 72:12, 16).

Проблеми: О војне керена бари штета хем економска проблемија. Сар резултати, бут пхаро тано о мануша те добинен и храна со ваљанела ленге.

Решение: „[О Јехова] чхинавела о војне ки цели пхув. Пхагела о стреле хем о копје, јагаја тхарела и воено кочија“ (Псалм 46:9). О Девел ка уништинел са о оружје хем е манушен со керена војне. Адалеске ка шај секој безбедно хем локхе те добинел храна. И Библија ветинела: „О праведнико ка цутинел хем ка овел баро мир“ (Псалм 72:7).

Проблеми: О екстремна временска условија хем о природна катастрофе мударена е стока хем уништинена о ниве.

Решение: О Девел ка контролиринел о природна силе е пхувјакере хем аѓаар ка овен шукар условија те шај и пхув те бијанел. И Библија вакерела: „[О Јехова] чхинавела и бура хем смиринела о морска бранија... Ов керела и пустина те овел езеро хем ки шуки пхув те тхавдел пани. Адари мукхела е бокхален те живинен... Ола сејнена ко ниве хем садинена ниве дракхенцар хем адава анела ленге бари жетва“ (Псалм 107:29, 35-37).

Проблеми: Алчна хем нечесна мануша произвединена штетно храна или спречинена и храна те ресел џи ко окола сој ленге потребно.

Решение: Е Девлескоро Царство панда хари ка уништинел е лошна манушен (Псалм 37:10, 11; Исаија 61:8). И Библија вакерела кај о Јехова тано Девел кова со „дела правда околенге со доживинѓе неправда, маро околенге сој тане бокхале“ (Псалм 146:7).

Проблеми: Јекх третина таро хајбе со произвединела пе ко свето фрдела пе или на користинела пе секова берш.

Решение: Кеда ка владинел е Девлескоро Царство е хранаја ка постапинел пе мудро. Кеда сине ки пхув, о Исус пазинѓа ко адава те на фрдел пе хајбе. На пример, ки јекх прилика чудоја денѓа хајбе повише таро 5.000 манушенге. Покасно ов вакерѓа пле учениконге: „Кхеден адава со ачхило, те шај ништо ма те џал зијани“ (Јован 6:5-13).

Адалеске со е Девлескоро Царство ка решинел о проблемија со керена те овел бокхалипе, са о мануша ка уживинен ки бут квалитетно хем здраво храна (Исаија 25:6). Те шај те дознајне кеда е Девлескоро Царство ка керел акава, читин и статија „Кеда е Девлескоро Царство ка почминел те владинел упри Пхув?“