ЛЕКЦИЈА 58
Ачхов верно е Јеховаске
Сар чачутне христијања решиме сием те на дозволина ништо хем никој те чхинавел амен те служина е Јеховаске. Сигурно ту да мислинеа аѓаар. О Јехова бут ценинела со сиан леске верно. (Читин 1. Летописи 28:9.) Кола ситуацие шај те чхивен ко испит тли верност спрема лесте хем со шај те поможинел туке тегани?
1. Сар шај о јавера те керен аменге пхаро те ачхова верна е Јеховаске?
Несаве мануша мангена те чхинавен амен те служина е Јеховаске. Кој тане адала мануша? На пример, шај те овен о отпадникија — мануша кола со чхинавѓе те служинен е Јеховаске хем акана вакерена ховајба баши лескири организација, адалеске со мангена те уништинен амари вера. Исто аѓаар, несаве религиозна водачија ширинена ховајба баши аменде. Ако на пазинаја шај те пера ки замка те верујна ки ленде хем те мукха о чачипе. Адалеске, опасно тано те кера лафи акале противниконцар, те читина ленгере лила, те читина адава со чхивена ко интернет или те дикха ленгере видеоклипија. Најшукар тано те шуна е Исусескере лафија: „Мукхен лен. Ола тане короле водачија. А кеда короло ка водинел короле, о солдуј ка перен ки дупка“ (Матеј 15:14).
2. Сар шај амаре одлуке те сикавен кај сием верна е Јеховаске?
О мангипе спрема о Јехова ка поттикнинел амен те цида амен таро са сој тано поврзимо е ховавне религијаја. Адалеске, кеда ваљани те ана одлуке башо адава сави бути ка кера или дали те ова дело тари несави организација, мора те пазина ола те на овен поврзиме е ховавне религијаја. Амен мангаја те цида амен таро са со шај те поврзинел амен е ховавне религијаја. О Јехова поттикнинела амен: „Икљовен [таро Баро Вавилон], мло народо“ (Откровение 18:2, 4).
ДОЗНАЈН ПОВИШЕ
Со шај те поможинел туке те ачхове верно е Јеховаске чак ако некој керела туке пхаро адава? Сар адава со ка икљове таро Баро Вавилон ка сикавел кај сиан верно е Јеховаске?
3. Аракх тут таро окола со ширинена ховајба
Со ваљани те кера ако шунаја негативна информацие баши е Јеховаскири организација? Читин Изреки 14:15, а пало адава керен лафи башо акава пучибе:
Соске на ваљани те верујна ко са со шунаја?
Читин 2. Јованово 9-11, а пало адава керен лафи башо акала пучиба:
Сар ваљани те понашина амен спрема о отпадникија?
Сар шај те мукха о отпадникија те влијајнен упри аменде иако нане амен директно контакт ленцар?
Со мислинеа, сар би осетинела пе о Јехова ако мангаја те шуна негативна информацие баши лесте или баши лескири организација?
4. Ачхов верно е Девлеске кеда некој таро собрание грешинела
Со сием должна те кера ако дознајнаја кај некој таро собрание керѓа сериозно грево? Те дикха јекх начело таро Закони со денѓа ле о Девел е Израелцонге. Читин 3. Мојсеева 5:1.
Спрема акава начело, ако дознајнаја кај некој керѓа сериозно грево ваљани адава те вакера е старешиненге. Сепак, англедер те кера адава, љубезно тано те поттикнина е грешнико ов те џал ко старешине хем те признајнел пло грево. Ако на керела адава, тегани амари верност спрема о Јехова ка поттикнинел амен те вакера е старешиненге адава со џанаја. Сар адалеа со ка кера адава ка сикава верно мангипе...
е Јеховаске?
е грешникоске?
е јаверенге ко собрание?
Ма пхан тле јакхја кеда тле пхралеске ваљани помош!
5. Циде тут таро Баро Вавилон
Читин Лука 4:8 хем Откровение 18:4, 5, а пало адава керен лафи башо акала пучиба:
Дали сиум панда члени ки несави ховавни религија?
Дали сиум дело тари несави организација која сој поврзими е ховавне религијаја?
Дали мли бути поддржинела ко несаво начин е ховавне религија?
Дали иси панда нешто јавер ко мло живото со поврзинела ман е ховавне религијаја?
Ако о одговор ко било кова таро акала пучиба тано „оја“, тегани кола промене ваљани те кере?
Ана одлука со ка поможинел туке те овел тут чисто совест хем која со ка сикавел кај сиан верно е Јеховаске.
Дали би деа прилог баши несави хуманитарно организација тари црква?
НЕСАВЕ ШАЈ ВАКЕРЕНА: „Те шај те бранинав о чачипе мора те џанав со вакерена о отпадникија башо е Јеховаскере сведокија“.
Дали адава би овела мудро, хем соске мислинеа аѓаар?
СО СИКЛИЛЕМ
Те шај те ачхова верна е Јеховаске, на смејнаја те дружина амен околенцар со мангена те чхивен амен те кера нешто погрешно.
Сар ка одговорине?
Соске на ваљани те шуна адава со сикавена о отпадникија?
Ако дознајнаја кај несаво пхрал керѓа сериозно грево,со ваљани те кера?
Сар шај те сикава кај на мангаја те ова дело тари ховавни религија?
ИСТРАЖИН
Дознајн со ваљани те кере кеда о јавера ширинена ховајба башо е Јеховаскере сведокија.
„Дали иси тут о точна информацие?“ (Стражарско кула таро август 2018)
Сар шај те дознајне дали несави организација тани поврзими е ховавне религијаја?
„Ов зафатимо ко крајо таро ’последна диве‘“ (Стражарско кула таро октомври 2019, пасусија 16-18)
Ко искуство е насловеа „Го барав Бог уште од детството“, читин башо јекх свештенико кова со цидинѓа пе тари ховавни религија.
„Библијата менува животи“ (Стражарска кула таро 1 јули 2011)