Јован Крстител — пример со шај те поможинел аменге те ачхова бахтале

ИСИ ли несави задача со мангеа те кере ко собрание, ама аканаске нашти? Шај некој јавер керела адаја задача. Или, шај англедер сиан сине ки полновремено служба. Ама, шај адалеске со сиан ко берша, иси тут проблемија састипаја, финансиска проблемија или фамилијарна одговорностија нашти те кере више добором кобор со би мангеа. Или, адалеске со сине промене ки организација, шај ваљанѓан те чхинаве несаве задачаја со бут берша кереа ла сине. Бизи разлика која тани и причина, шај мислинеа кај на кереа добором бут кобор со би мангеа ки служба башо Девел. Ко асавке ситуацие, нормално тано понекогаш те осетине тут разочаримо. Сепак, со шај те поможинел туке те на ачхове обесхрабримо или хољамо? Сар шај те ачхове бахтало?

Таро Јован Крстител шај те сикљова сар те ачхова бахтале. Ов веројатно на аџикерѓа адава со случинѓа пе леске ки служба башо Јехова. Шај ни на мислинѓа кај ка накхел повише време ко затвор него ки служба башо Девел. Ама, ов понадари да сине бахтало хем ачхило асавке ставеа џи ко крајо таро пло живото. Со поможинѓа леске? Хем сар шај те ачхова бахтале чак кеда доживинаја нешто со разочаринела амен?

ЗАДАЧА СО КЕРЃА ЛЕ БАХТАЛО

Ко 29 берш а.е., о Јован почминѓа те керел и задача со денѓа леске о Јехова — те спреминел е народо башо Месија. Ов вакерела сине: „Каинен тумен, соске паше тано о небесно Царство“ (Мат. 3:2; Лука 1:12-17). Бут џене шукар реагиринѓе. Уствари, бут мануша дуралдан авена сине те шунен ле, а бут џене сине поттикниме те каинен пе хем те крстинен пе. О Јован исто аѓаар храбро предупрединела сине е верска водачен со керена пе сине праведна кај аџикерела лен осуда таро Девел ако на менина пе (Мат. 3:5-12). О исто берш, шов масек пало адава, случинѓа пе о најважно нешто со керѓа о Јован ки пли служба — крстинѓа е Исусе. Оттегани, о Јован вакерела сине е јаверенге те џан пало Исус, о ветимо Месија (Јован 1:32-37).

Е Јоване сине ле важно улога, адалеске о Исус шај сине те вакерел: „Машкар ко бијаме тари џувли на појавинѓа пе некој сој побаро таро Јован Крстител“ (Мат. 11:11). Шај те ова сигурна кај о Јован бут ценинела сине о берекетија со добинѓа лен. Слично сар о Јован, о авдисутне слуге е Девлескере кола со цело вилеа служинена е Јеховаске добинена бут берекетија. Те дикха о пример јекхе пхралескоро со викинела пе Тери. Ов хем лескири ромни и Сандра накхле повише таро 50 берш ки полновремено служба. О Тери вакерела: „Керава сине различна задаче. Служинѓум сар општо пионери, ко Бетел, пало адава сар специјално пионери, сар покраинско хем областно надгледнико хем акана палем сар специјално пионери“. Асавке задаче анена аменге баро бахталипе. Ама, таро е Јованескоро пример ка дикха кај о бахталипе на зависинела таро задаче со кераја лен хем кај ваљани те трудина амен те ачхова бахтале кеда ка менинен пе амаре околностија.

ЦЕНИН И ЧЕСТ СО ШАЈ ТЕ СЛУЖИНЕ Е ЈЕХОВАСКЕ

О Јован Крстител ачхило бахтало соске никогаш на чхинавѓа те ценинел о задаче со добинѓа лен таро Девел. Те дикха јекх пример. Откеда крстинѓа пе о Исус, о број е Јованескере следбениконгоро почминѓа те тикњол, а о број е Исусескере следбениконгоро овела сине са побаро. Адалеске со сине секириме башо адава, е Јованескере ученикија вакерѓе леске: „Ов крстинела хем сарине џана ки лесте“ (Јован 3:26). О Јован одговоринѓа ленге: „Каскири тани и бори, ов тано о џамутро. А о амал е џамутрескоро, кеда терѓовела хем шунела ле, бут тано бахтало со шунела о гласо е џамутрескоро. Аѓаар ме да пхерѓовава бахталипаја“ (Јован 3:29). О Јован на натпреваринѓа пе е Исусеа, а ни на мислинѓа кај на врединела више адава со керела соске е Исусескири улога сине поважно. Наместо адава, о Јован ачхило бахтало соске ценинела сине пли улога сар „амал е џамутрескоро“.

О стави со сине е Јоване поможинѓа леске те на нашавел пло бахталипе иако и задача на сине леске локхи. На пример, ов сине назарејцо панда таро бијанибе хем адалеске сине леске забранимо те пиел мол (Лука 1:15). Кеда о Исус вакерѓа: „Ало о Јован, кова со ни хала сине ни пиела сине“, ов мангља те сикавел кобор едноставно живото живинела сине о Јован. Тари јавер страна, о Исус хем лескере ученикија на сине назарејција хем шај сине те живинен сар о јавера мануша (Мат. 11:18, 19). Исто аѓаар, иако на керѓа нијекх чудо, о Јован џанља кај о ученикија е Исусескере, машкар кола со сине окола со англедер џана сине пало Јован, шај сине те керен чудија (Мат. 10:1; Јован 10:41). О Јован на размислинела сине бут башо асавке разлике него понадари да ревно керела сине пли задача со добинѓа ла таро Јехова.

Адава со ценинаја и задача со акана кераја ла ки служба башо Јехова, ка поможинел аменге да те ачхова бахтале. О Тери, коле со спомнинѓем англедер, вакерела: „Концентриринава ман сине ки секоја задача со добинава ла сине ки организација“. Башо живото со накхља ле ки полновремено служба, ов вакерела: „На жалинава башо ништо. Наместо адава, иси ман бут шуже споменија“.

Амаро бахталипе ки служба башо Девел шај те овел панда побаро ако размислинаја башо најважно нешто ки секоја теократско задача или одговорност — и чест те ова „е Девлескере соработникија“ (1. Кор. 3:9). Те вакера јекх пример. Јекх скапоцено предмети ка ачхол шужо само ако секогаш грижинаја амен леске. Слично аѓаар, амен ка ачхова бахтале само ако секогаш размислинаја кобор бари чест иси амен те соработина е Јеховаја. Адава ка поможинел аменге те на споредина амаре жртве е жртвенцар со керена о јавера. Исто аѓаар, нане те мислина кај о задаче со дела амен о Јехова тане похари важна таро задаче со дела лен е јаверенге (Гал. 6:4).

АЧХОВ КОНЦЕНТРИРИМО КО ДУХОВНА БУЌА

О Јован шај сине свесно кај нане бут време те керел пли задача, ама шај на аџикерѓа кај добором сигате ка завршинел (Јован 3:30). Ко 30 берш а.е., околу шов масек откеда крстинѓа е Исусе, о цари о Ирод чхивѓа е Јоване ко затвор. Сепак, ов понадари да сведочинела сине ко асавке околностија (Мар. 6:17-20). Со поможинѓа леске те ачховел бахтало иако сине ле асавке промене? Ачхило концентриримо ко духовна буќа.

Џикоте сине ко затвор, о Јован добинѓа извештаија кај са повише мануша слединена е Исусе (Мат. 11:2; Лука 7:18). Ов сине уверимо кај о Исус тано о Месија, ама шај пучела пе сине сар ка исполнинел о Исус са со пишинела ко е Девлескоро Лафи башо адава со ка керел о Месија. Адалеске со о Месија ваљани сине те овел цари, о Јован шај пучела пе сине дали о Исус ка почминел те владинел панда хари. Исто аѓаар, шај пучела пе сине дали о Исус ка ослободинел ле таро затвор. Адалеске со мангела сине те џанел повише башо адава со ка керел о Исус, о Јован бичхалѓа дује пле ученикон те пучен ле: „Ту ли сиан адава со ваљани те авел или те аџикера некас јавере?“ (Лука 7:19). Пало адава о Исус вакерѓа ленге те иранен пе ко Јован хем те вакерен леске акала лафија: „О короле акана дикхена, о сакатија пхирена, о лепрозна чистинена пе, о кашуке шунена, о муле уштена, е чороленге вакерела пе о шукар хабери“ (Лука 7:20-22). Кеда иранѓе пе, о Јован сигурно шукар шунела сине џикоте вакерена леске сине башо адава сар о Исус сасљарела сине преку чудо.

О Јован сигурно сине охрабримо таро адава со вакерѓе леске. Адава сикавѓа леске кај о Исус исполнинела сине о пророштвија башо Месија. О Јован џанља кај лескири служба врединѓа иако о Исус на ослободинѓа ле таро затвор. Иако сине ко асавке околностија, е Јоване сине ле причине те овел бахтало.

Ако амен да исто сар о Јован сием концентририме ко духовна буќа, ка шај те ачхова бахтале хем стрплива (Кол. 1:9-11). Адалеске ваљани те читина и Библија хем те размислина баши лате. Адава ка поможинел аменге те на бистра кај са со кераја ки служба башо Девел врединела (1. Кор. 15:58). И Сандра вакерела: „Адава со секова диве читинава по јекх поглавје тари Библија поможинела манге те овав попаше е Јеховаја. Поможинела манге те мислинав ки лесте а на ки манде“. Исто аѓаар, шај те размислина башо извештаија тари служба со керена амаре пхраља хем пхења. Адава ка поможинел аменге те на мислина само ко амаре околностија, него ко адава со керела о Јехова. И Сандра вакерела: „Е масекоскере емисие ко JW Broadcasting^® поможинена аменге те осетина амен попаше е организацијаја хем те ачхова бахтале ки служба со кераја ла“.

Ко адава кратко време џикоте служинѓа, о Јован Крстител проповединѓа „сар е Илијаскере духоја хем силаја“ хем сине „обично мануш сар аменде“ (Лука 1:17; Јак. 5:17). Ако џаја пало лескоро пример аѓаар со ка ценина и чест со сием е Девлескере соработникија хем аѓаар со ка ова концентририме ко духовна буќа, амен да ка ачхова бахтале ки служба башо е Девлескоро Царство бизи разлика со ка случинел пе аменге ко живото.