ЛЕКЦИЈА 07
Саво тано о Јехова?
Сар замислинеа туке е Јехова е Девле? Несаве мануша мислинена кај о Девел тано бут баро адалеске амен сар мануша нашти никогаш те ова леа паше. А јавера мислинена кај о Девел тано само јекх бари сила, сар јекх громи, ама нане ле особине сар јекх личност. Ама, саво чаче тано о Јехова? Преку пло Лафи, и Библија, о Јехова сикавела аменге несаве таро пле особине, хем исто аѓаар вакерела аменге кај мангела амен хем кај грижинела пе аменге.
1. Соске нашти те дикха е Девле?
„О Девел тано Духо“ (Јован 4:24). Е Јехова нане ле тело сар е манушенгоро. Ов тано Духо со живинела ко небо, ко тхан кова со амен нашти те дикха ле.
2. Кола тане несаве таро е Јеховаскере особине?
Иако нашти те дикха е Јехова, сепак шај те запознајна ле. Уствари, кобор повише ка запознајна лескере бут шуже особине, добором повише ка бајрол амаро мангипе спрема лесте. И Библија вакерела: „О Јехова мангела и правда хем нане те мукхел околен сој тане леске верна“ (Псалм 37:28). Исто аѓаар, ов „тано пхердо сочувство хем милост“, посебно спрема окола со цидена муке (Јаков 5:11). „О Јехова тано паше узо адала сој пхаге вилеа хем спасинела адален сој пхаге духоја“ (Псалм 34:18). Дали џанљан кај амаре постапке влијајнена упро адава сар осетинела пе о Јехова? Кеда некој керела лошна буќа, о Јехова тано разочаримо хем тажно (Псалм 78:40, 41). Ама, кеда некој постапинела исправно, о Јехова тано бахтало. (Читин Изреки 27:11.)
3. Сар о Јехова сикавела кај мангела амен?
Е Јеховаскири најбари особина тани о мангипе. Уствари, и Библија вакерела: „О Девел тано мангипе“ (1. Јованово 4:8). О Јехова сикавела пло мангипе, на само преку и Библија, него хем преку о буќа со створинѓа лен. (Читин Дела 14:17.) На пример, размислин башо адава сар сием створиме. О Јехова денѓа амен и способност те дикха бут шуже бое, те шуна шужи музика хем те уживина ки вкусно храна. Ов мангела те уживина ко живото.
ДОЗНАЈН ПОВИШЕ
Дикх со користинѓа о Јехова те шај те керел баре хем бут шуже буќа. Исто аѓаар, дикх сар о Јехова сикавела пле бут шуже особине.
4. О свети дух — е Девлескири активно сила
Исто сар о мануш со користинела пле васта те керел несави бути, аѓаар о Јехова користинела пло свети дух. И Библија сикавела кај о свети дух нане личност, него и сила со користинела о Девел те керел о буќа со мангела. Читин Лука 11:13 хем Дела 2:17, а пало адава керен лафи башо акала пучиба:
И Библија вакерела кај о Девел дела пло свети дух е манушенге. Спрема акава, дали о свети дух шај те овел личност? Соске мислинеа аѓаар?
О Јехова користинѓа пло свети дух те шај те керел баре хем бут шуже буќа. Читин Псалм 33:6 хем 2. Петрово 1:20, 21, а пало адава керен лафи башо акава пучибе:
Ко кола начинија о Јехова користинѓа пло свети дух?
5. Е Јехова иси ле бут шуже особине
Иако о Мојсеј сине е Девлескоро верно слуга, сепак ов мангља панда пошукар те пенџарел пле Створителе. Адалеске, о Мојсеј вакерѓа леске: „Вакер манге... башо тле друмија, те шај те пенџарав тут“ (2. Мојсеева 33:13). А о Јехова вакерѓа леске саве особине иси ле. Читин 2. Мојсеева 34:4-6, а пало адава керен лафи башо акала пучиба:
Кола таро пле особине о Јехова вакерѓа е Мојсееске?
Кола таро е Јеховаскере особине посебно свиџинена пе туке?
6. О Јехова грижинела пе е манушенге
О Евреија, кола со сине е Девлескоро народо, сине робија ко Египет. Сар осетинела пе сине о Јехова кеда ола цидена сине муке? Шун и АУДИОСНИМКА или читин 2. Мојсеева 3:1-10. Пало адава, керен лафи башо акава.
Со сикљоваја таро акава извештај башо адава сар осетинела пе о Јехова кеда о мануша цидена муке? (Дикх о стихија 7 хем 8.)
Со мислинеа, дали о Јехова чаче мангела те поможинел е манушенге, хем дали иси ле и моќ те керел адава? Соске мислинеа аѓаар?
7. Е Јеховаскере особине дикхјона ки природа
О Јехова сикавела пле особине преку о буќа со створинѓа лен. Дикх о ВИДЕОКЛИПИ. Пало адава читин Римјаните 1:20, хем керен лафи башо акава пучибе:
Кола е Јеховаскере особине дикхеа ко буќа со створинѓа лен?
НЕСАВЕ ШАЈ ВАКЕРЕНА: „Нашти те дикха е Девле, хем адалеске нашти шукар те запознајна ле“.
Со мислинеа ту?
Соске мислинеа аѓаар?
СО СИКЛИЛЕМ
Е Јехова нашти те дикха ле соске ов тано Духо. Ле иси ле бут шуже особине, а и најбари тани о мангипе.
Сар ка одговорине?
Соске нашти те дикха е Јехова?
Сој тано о свети дух?
Кола тане несаве таро е Јеховаскере особине?
ИСТРАЖИН
Сикљов повише таро е Девлескере штар главна особине.
Дикх несаве доказија кај о Јехова нане присутно сегде хем ко са.
„Дали о Девел тано присутно сегде хем ко са?“ (интернет статија)
Дикх соске и Библија башо свети дух вакерела кај тано е Девлескере васта.
Јекхе короле манушеске сине пхаро те верујнел кај о Девел мангела ле. Дикх со поможинѓа леске те менинел пло мислење.
„Сега можам да им помагам на другите“ (Стражарска кула таро 1 октомври 2015)