ЛЕКЦИЈА 28
Сикав благодарност башо адава со керѓе туке о Јехова хем о Исус
Сар осетинеа тут кеда добинеа јекх шужо поклон таро несаво амал? Сигурно сиан бут бахтало хем мангеа те сикаве леске кај ценинеа о поклон. Таро Јехова хем таро Исус добинѓем о најбаро поклон со шај те добина, адава тано и откупно жртва. Сар шај те сикава кај сием благодарна башо адава поклон?
1. Сар шај те сикава кај сием благодарна башо адава со керѓе аменге о Девел хем о Христос?
И Библија вакерела кај „секој со верујнела [ко Исус]“ ка шај вечно те живинел (Јован 3:16). Сар шај те сикава кај иси амен вера? Адава шај те кера ле преку амаре одлуке хем постапке (Јаков 2:17). Кеда сикаваја вера амаре лафенцар хем амаре постапкенцар, амен оваја попаше амала е Исусеа хем лескере Дадеа, е Јеховаја. (Читин Јован 14:21.)
2. Ки која посебно прилика шај те сикава кај сием благодарна башо адава со керѓе аменге о Јехова хем о Исус?
И рат англедер те мерел, о Исус вакерѓа пле следбениконге сар шај ко јавер начин те сикавен пумари благодарност баши лескири жртва. Ов вакерѓа ленге те кхеден пе заедно башо јекх посебно настан. Ки Библија акава посебно настан тано пенџардо сар „е Господарескири вечера“, или сар Спомен-свеченост башо е Исусескоро мерибе (1. Коринќаните 11:20). О Исус мангља о апостолија хем са о чачутне христијања, те сетинен пе кај ов денѓа пло живото аменге. Адалеске о Исус вакерѓа: „Керен акава те сетинен тумен ки манде“ (Лука 22:19). Кеда сиан присутно ки Спомен-свеченост, ту сикавеа кај сиан благодарно башо баро мангипе со сикавѓе аменге о Јехова хем о Исус.
ДОЗНАЈН ПОВИШЕ
Сикљов ко кола јавера да начинија шај те сикаве тли благодарност башо мангипе со сикавѓе о Јехова хем о Исус. Дикх кобор тани важно и Спомен-свеченост башо е Исусескоро мерибе.
3. И благодарност поттикнинела амен те кера нешто
Замислин кај некој спасинела тло живото. Дали едноставно ка бистре адава? Или ка роде начинија те сикаве леске тли благодарност?
О Јехова спасинѓа амаро живото. Читин 1. Јованово 4:8-10, а пало адава керен лафи башо акала пучиба:
Соске е Исусескири откупно жртва тани јекх посебно поклон?
Сар осетинеа тут башо адава со керѓе туке о Јехова хем о Исус?
Сар шај те сикава амари благодарност е Јеховаске хем е Исусеске? Читин 2. Коринќаните 5:15 хем 1. Јованово 4:11; 5:3. Пало секова стихо, керен лафи башо акава пучибе:
Спрема акава стихо, сар шај те сикава амари благодарност?
4. Џа пало е Исусескоро пример
Јавер начин сар шај те сикава амари благодарност тано аѓаар со ка џа пало е Исусескоро пример. Читин 1. Петрово 2:21, а пало адава керен лафи башо акава пучибе:
Ко кола начинија шај те џа пало е Исусескере чекорија?
О Исус мангела сине е Девлескоро Лафи, проповединела сине о шукар хабери хем поможинела сине е јаверенге
5. Ов присутно ки Спомен-свеченост башо е Исусескоро мерибе
Те шај те џане сар сине воспоставими е Господарескири вечера, читин Лука 22:14, 19, 20, а пало адава керен лафи башо акала пучиба:
Со случинѓа пе ки е Господарескири вечера?
Со претставинена о маро хем и мол? (Дикх о стихија 19 хем 20.)
О Исус мангља лескере ученикија те икерен и Спомен секова берш ко диве кеда муло. Адалеске е Јеховаскере сведокија кхедена пе секова берш те сетинен пе ко е Христосескоро мерибе аѓаар сар со заповединѓа ов. Те шај те сикљове нешто повише башо акава важно состанок дикх о ВИДЕОКЛИПИ, а пало адава керен лафи башо акава пучибе:
Со случинела пе ки Спомен-свеченост?
О маро хем и мол тане симболија. О маро претставинела е Исусескоро совршено манушикано тело кова со денѓа ле жртва аменге. И мол претставинела лескоро рат
НЕСАВЕ ШАЈ ВАКЕРЕНА: „Те шај те ове спасимо, доволно тано само те верујне ко Девел“.
Сар шај те користине о стихија таро Јован 3:16 хем Јаков 2:17, те шај те сикаве кај ваљани нешто повише таро адава?
СО СИКЛИЛЕМ
Амен шај те сикава кај сием благодарна башо адава со керѓа аменге о Исус аѓаар со ка сикава амари вера лафенцар хем постапкенцар хем ако секова берш сием присутна ки Спомен-свеченост.
Сар ка одговорине?
Сар шај те сикаве кај верујнеа ко Исус?
Сар шај те сикаве тли благодарност башо адава со керѓе туке о Јехова хем о Исус?
Соске тано важно те ове присутно ки Спомен-свеченост башо е Исусескоро мерибе?
ИСТРАЖИН
Сикљов повише баши вера хем сар шај те сикава ла.
„Покажи дека имаш вера во Јеховините ветувања“ (Стражарска кула таро октомври 2016)
Ко искуство е насловеа „Водам чист и исполнет живот“, читин сар влијајнѓа упро живото јекхе џувљакоро адава со сиклили баши е Исусескири жртва.
„Библијата менува животи“ (Стражарска кула таро 1 август 2011)
Дикх соске само некобор лена таро симболија ки Спомен-свеченост.