Пучиба таро читателија

Кеда о Сатана вакерѓа е Еваке кај нане те мерел ако хала таро каш башо пенџарибе сој шукар хем сој лошно, дали мангља те чхивел ла те верујнел кај и душа на мерела, сар со верујнена бут џене авдиве?

Изгледа кај на. Соске шај те вакера адава? О Бенг на вакерѓа е Еваке кај, ако хала таро плоди со забранинѓа о Девел, ка мерел само лакоро тело, а лакири душа понадари да ка живинел ко јавер тхан. Кеда керѓа лафи преку о сап, о Сатана вакерѓа кај и Ева сигурно нане те мерел ако хала таро плоди со сине ко каш. Ов мангља те вакерел кај ој понадари да ка живинел, кај ка овел ла пошужо живото ки Пхув хем кај нане те зависинел таро Девел (1. Мој. 2:17; 3:3-5).

Ако о ховавно верување кај и душа на мерела на авела тари рајско градина, тегани кеда појавинѓа пе? Нашти сигурно те вакера. Ама џанаја кај са о ховавне сикљојба сине цидиме ко Потоп ко време е Ноескоро. Нијекх ховавно религиозно сикљојбе на ачхило пало Потоп соске преживинѓе само о Ное хем лескири фамилија — а сарине ола служинена сине е Јеховаске.

Значи, о сикљојбе кај и душа на мерела сигурно појавинѓа пе пало Потоп. А сар ширинѓа пе акава сикљојбе? Кеда о Девел менинѓа о чхибја ко Вавилон хем о мануша селинѓе пе те живинен ки цели Пхув, ола сигурно ширинѓе о верување кај и душа на мерела (1. Мој. 11:8, 9). Бизи разлика котар авела акава ховавно сикљојбе, шај те ова сигурна кај о Сатана о Бенг, кова сој тано „дад е ховајбаскоро“ бешела пало акава сикљојбе хем сине леске задоволство те дикхел сар ширинела пе сегде (Јован 8:44).