Juni

O Jehova blagoslovingja e hristijanen taro prvo veko sa džikote prilagodinena pe sine ko okolnostija. Ola sine but puti progonime, ponekogaš čak keda ni hari na očekujngje adava. Te dikha so slučingja pe e Varnavaske hem e apostol Pavleske džikote propovedinena sine ki Listra hem ko okolna thana. Ko početok o manuša ljubezno dodžakergje len hem spremno šungje len. Ama pokasno o protivnikija kergje o narodo te ovel protiv o Pavle hem nesave lendar kamenujngje e Pavle hem mukhle le te merel (Apo. 14:19). Ama o Varnava hem o Pavle prodolžingje te propovedinen ko jekh javer than. Savo sine o rezultati? Ola kergje but učenikija hem lengere lafija hem primer ohrabringja e javere hristijanen (Apo. 14:21, 22). Bute dženen sine len korist taro adava so o Varnava hem o Pavle na otkažingje pe taro propovedibe iako taro jekh puti sine progonime. Sa džikote na otkažinaja amen tari služba so doveringja amenge o Jehova, amen ka ova blagoslovime (w23.04 16-17, pas. 13-14).

But puti e Davideskoro životo sine ki opasnost taro leskere dušmanja, hem ov često rodela sine pomoš taro Jehova ki molitva. O David sine sigurno kaj o Jehova šungja leskere molitve hem odgovoringja ki lende. Tu da šaj te ove uverimo ko adava. I Biblija uverinela amen kaj o Jehova šaj te del amen i mudrost hem i sila so valjani amenge te šaj te istrajna. Ov šaj te koristinel amare duhovno familija ili ponekogaš čak okolen so na služinena leske te šaj te pomožinen amenge. Iako o Jehova šaj nane sekogaš te odgovorinel ko amare molitve sar amen so očekujnaja, sepak uverime siem kaj ov ka odgovorinel ki lende. Ov ka del amen baš adava so valjani amenge hem ko vreme keda valjani. Adaleske ponadari da molin tut hem neka ovel tut doverba kaj o Jehova ka šunel tut hem ov uverimo kaj ov ka grižinel pe tuke akana hem kaj ko nevo sveto ka del sarinenge adava so mangena (Ps. 145:16; w23.05 8, pas. 4; 13, pas. 17-18).

Fino tano te koncentririne tut ko blagoslovija so ka oven tut ako ispolninea nesavi cel. Bašo kola koristija šaj tu te razmisline? Ako tli cel tani te čitine i Biblija ili te kere pošukar tle molitve, razmislin sar adava ka pomožinel tuke te ove popaše amal e Jehovaja (Ps. 145:18, 19). Ili ako tli cel tani te razvine hristijanska osobine, razmislin sar adava ka pomožinel tut te ove ko šukar odnosija e javerencar (Kol. 3:14). Šaj te pišine tuke taro kola pričine mangea te ispolnine tli cel hem palo adava redovno dikh so pišingjan. Isto agjaar, družin tut okolencar so ka ohrabrinen tut te ispolnine tli cel (Izr. 13:20). Te ova iskrena, sarinen amen ponekogaš nane amen bari želba te kera nešto. Dali adava značinela kaj našti te ispolnina amari cel? Na. Amen šaj te ispolnina amari cel čak keda nane amen bari želba. Iako akava značinela kaj ka valjani te ovel tut samokontrola, ko krajo ka ove but radosno adaleske so ka ispolnine tli cel (w23.05 27-28, pas. 5-8).

Adava so džanaja kaj isi amen odgovornost bašo amare odluke šaj te pottikninel amen te priznajna amare greške, te promenina amen hem te na povtorina len. Sa akala bukja šaj te pomožinen amenge te ačhova ki trka e životoskiri. Ako više angjan nesavi pogrešno odluka, prifatin i realnost. Ma koristin tlo vreme hem tli sila te šaj te sikave kaj sian ko pravo ili palem te krivine tut ili nekas javere. Namesto adava, priznajn tli greška hem ker adava so šaj te kere sprema tle momentalna okolnostija. Ako osetinea tut krivo bašo nešto so kergjan pogrešno, ponizno rode e Jehova ki molitva, priznajn leske tli greška hem rode lestar te prostinel tuke (Ps. 25:11; 51:3, 4). Isto agjaar, izvinin tut okolenge kaske so grešingjan hem ako tano potrebno rode pomoš taro starešine (Jak. 5:14, 15). Sikljov taro tle greške hem trudin tut te na povtorine len. Ako kerea adava, šaj te ove sigurno kaj o Jehova ka sikavel tuke milost hem ka poddržinel tut (Ps. 103:8-13; w23.08 28-29, pas. 8-9).

O Jodaj but šukar vlijajngja upro cari o Joas. Adaleske džikote sine terno ov manglja te ugodinel e Jehovaske. Ama keda o Jodaj mulo, o Joas počmingja te šunel e knezon so čhinavgje te služinen e Jehovaske (2. Let. 24:4, 17, 18). Iako o Jehova sine lendar but dukhavdo, ov ponadari da bičhalela sine prorokon te šaj te iranen pe leske, ama ola na mangle te šunen. Ola ni na mangle te šunen e Jodajeskere čhave, e Zaharija, kova so na sine samo e Jehovaskoro proroko hem svešteniko nego isto agjaar e Joaseskoro bratučeti. Ustvari, o cari o Joas mudargja e Zaharija (2. Let. 22:11; 24:19-22). Palo nesavo vreme e Joase na sine le više ispravno dar taro Jehova. O Jehova vakergja: „Okola so na poštujnena man, me da nane te poštujnav len“ (1. Sam. 2:30). Pokasno jekh tikni sirisko vojska pobedingja e Joaseskere „bare vojska“ hem raningja le (2. Let. 24:24, 25). E Joaseskere sluge mudargje le adaleske so mudargja e Zaharija (w23.06 18-19, pas. 16-17).

O apostol Pavle nesavo vreme sine ko Efes, kote so propovedingja hem sikavgja e javeren bašo šukar haberi (Apo. 19:1, 8-10; 20:20, 21). Ov but mangela sine e phralen hem e phenjen hem manglja te pomožinel len te ačhon verna e Jehovaske. O Efešanja kolenge so o Pavle jekh puti pišingja, sine delo tari hovavni religija hem verujnena sine ko sueverie. O manuša ko Efes živinena sine nemoralno hem ponašinena pe sine bezobrazno. Ko teatarska pretstave, pa čak ko verska proslave sine najnormalno te koristinen pe nepristojna lafija (Ef. 5:3). But džene taro Efešanja „našavgje sekova čuvstvo bašo moral“, lafija so doslovno značinena „čhinavgje te osetinen dukh“ (Ef. 4:17-19). Angleder te doznajnen e Jehovaskere merilija bašo ispravno hem pogrešno, lengiri sovest na mučinela len sine keda kerena nešto pogrešno. Adaleske o Pavle šaj sine te vakerel kaj lengere „gogja tane ki temnica hem tane durjarde taro životo so dela o Devel“. Nesave taro Efešanja na ačhile ki temnica (w24.03 20, pas. 2, 4; 21, pas. 5-6).

E Gedeoneskiri zadača sar sudija sine naporno. Keda o Madijamcija našle rakjate tari borba, o Gedeon gelo pali lende hem mora sine te nakhel tari jezraelsko dolina dži ki reka Jordan (Sud. 7:22). Dali o Gedeon reslja dži ko Jordan hem otkažingja pe? Na. Iako sine umorna, ov hem o 300 murša nakhle i reka hem prodolžingje te džan pali lende. Ko krajo resle e Madijamcon hem pobedingje len (Sud. 8:4-12). E Gedeone sine le doverba kaj o Jehova ka del le sila, hem o Jehova kergja adava (Sud. 6:14, 34). Jekh puti, o Gedeon hem leskere manuša prastandile palo duj Madijamska carija džikote ola verojatno prastana sine kamilencar (Sud. 8:12, 21). Ama o Devel pomožingja e Izraelconge te astaren len hem te pobedinen ki adaja borba. E starešinen da šaj te ovel len doverba ko Jehova kova so nikogaš na umorinela pe. Ov ka del len sila keda ka valjanel lenge (Isa. 40:28, 29; w23.06 6, pas. 14, 16).

Amen šaj te ovel amen odlučno vilo bizi razlika save predizvikija isi amen. Adaleske, neka ovel tut doverba ko Jehova. Razmislin sar koristingja e Varakoske adava so sine le doverba ko vodstvo e Jehovaskoro. Iako ko celo Izrael nikas na sine kopje ili štiti, o Jehova vakergja e Varakoske te džal te borinel pe protiv o Sisara hem leskiri vojska kola so sine la but oružje (Sud. 5:8). I proročica i Devora vakergja e Varakoske te hulel tari planina hem te džal te borinel pe e Sisaraja hem leskere 900 voena kočiencar. E Izraelconge ka ovel sine but pharo te borinen pe ko ramno teren e Hanaancencar adaleske so sine but pobrza lendar. Iako o Varak džanlja adava, sepak ov sine poslušno. Džikote o vojnikija hulena sine tari planina Tavor, o Jehova kergja te del baro bršim. O voena kočie e Sisaraskere zaglavingje ki čik hem agjaar o Jehova pomožingja e Varakoske te pobedinel (Sud. 4:1-7, 10, 13-16). Slično, amenge da o Jehova ka pomožinel te pobedina ako isi amen doverba ki leste hem ko upatstvija so dela amen preku pli organizacija (w23.07 19, pas. 17-18).

Ako mangaja te dobina večno životo, mora te ova strpliva. Isto sar o verna sluge taro purano vreme, amen da valjani strplivo te adžikera o Jehova te ispolninel ple vetuvanja (Evr. 6:11, 12). I Biblija sporedinela amen jekhe zemjodelcoja (Jak. 5:7, 8). Jekh zemjodelco kerela but buti te šaj te frdel seme ki pli niva hem te čhivel lake pani. Ama, ov na džanela točno keda o seme ka mukhel plodi. Adaleske, jekh zemjodelco strplivo adžikerela hem isi le doverba kaj ka khedel o plodi tari niva. Slično, amen siem zafatime duhovno aktivnostencar iako na džanaja ko kova dive ka avel amaro Gospodari (Mat. 24:42). Amen strplivo adžikeraja soske siem uverime kaj o Jehova ka ispolninel adava so vetingja ko vreme kova so odredingja. Ako počminaja te ova nestrpliva šaj te umorinel amen adava so adžikeraja hem agjaar hari pohari te cida amen taro Jehova. Isto agjaar, šaj te počmina te koncentririna amen ko bukja kola so ka radujnen amen samo kratko vreme. Ama ako siem strpliva ka šaj te istrajna dži ko krajo hem te ova spasime (Mih. 7:7; w23.08 22, pas. 7).

Ako sporedinaja o proroštvo taro Daniel 2:41-43 javere proroštvoncar taro lila Daniel hem Otkrovenie, šaj te haljova kaj o pre pretstavinena e Anglo-Amerikansko svetsko sila koja soj tani i najmokjno sila ko amaro vreme. Baši akaja sila o Daniel vakerela: „O carstvo ko isto vreme ka ovel hem zoralo hem slabo“. Soske akava carstvo ka ovel asavko? Adaleske so o obična manuša soj pretstavime glinaja kerena pharo akale svetsko silake te ovel silno sar sastrn. Taro objasnuvanje so dengja le o Daniel bašo kipi otkrinaja važna čačipa. Prvo, i Anglo-Amerikansko svetsko sila ko nekobor načinija sikavgja pli mokj. Na primer, i Amerika hem i Britanija sine maškar o phuvja kola so pobedingje ki Prvo hem ki Dujto svetsko vojna. Ama akaja svetsko sila slabongja hem ponadari da ka slabonel soske isi konfliktija maškar lakere gragjanija. Dujto, i Anglo-Amerika ka ovel i posledno svetsko sila koja so ka vladinel angleder e Devleskoro Carstvo te anel krajo bašo sa o manušikane carstvija (w23.08 10-11, pas. 12-13).

Ponekogaš, o David osetinela pe sine voznemirimo taro sa o problemija hem nevolje so sine le (Ps. 18:4, 5). Sepak, o mangipe hem i griža taro Jehova dengja le nevi sila. O Jehova ingargja ple umorno amale „ko than kote so isi but čar“ hem „ko thana kote so isi but pani“. Adava pomožingja e Davideske te dobinel nevi sila hem ponadari da te služinel e Jehovaske (Ps. 18:28-32; 23:2). Slično, e Jehovaskoro verno mangipe šaj amenge da te pomožinel te ikljova ko krajo e nevoljencar so isi amen (Plač 3:22; Kol. 1:11). E Davideskoro životo but puti sine ki opasnost hem le sine le but mokjna dušmanja. Sepak, adaleske so džanlja kaj o Jehova mangela le, ov osetingja pe sigurno hem zaštitimo. O David šaj sine ki sekoja situacija te osetinel kaj o Jehova sine lea hem kaj ohrabrinela le. Adaleske ki gili vakergja: „Taro sa so darava [o Jehova] oslobodingja man“ (Ps. 34:4). Iako ponekogaš darala sine, o David šaj sine te pobedinel adaja dar soske džanela sine kaj e Jehovaskoro mangipe sine but posilno tari leskiri dar (w24.01 30, pas. 15-17).

Sikljov taro lošna odluke so angja o Joas. Otkeda o prvosvešteniko o Jodaj mulo, o Joas biringja lošno društvo (2. Let. 24:17, 18). Ov odlučingja te šunel e knezon tari Juda kola so na mangena sine e Jehova. Sigurno soglasinea tut kaj o Joas valjani sine te cidel pe taro adava lošno društvo. Namesto adava, ov šungja lengere lošna sovetija. Ustvari, keda leskoro bratučeti o Zaharija manglja te sovetinel le, o Joas naredingja te mudaren le (2. Let. 24:20, 21; Mat. 23:35). Kobor grubo hem glupavo tari leskiri strana! Ko početok o Joas anela sine šukar odluke, ama žalno tano so pokasno ulo otpadniko hem ubijco. Ko krajo, leskere sluge mudargje le (2. Let. 24:22-25). Kobor pojaver ka ovel sine leskoro životo ako ponadari da šunela sine e Jehova hem okolen so mangena sine e Jehova (w23.09 9, pas. 6).

O Isus džanlja kaj o apostol Petar šaj te ačhovel verno. Adaleske, o Isus ljubezno vakergja leske: „Ma dara“. I doverba koja so o Isus sikavgja e Petareske celosno meningja leskoro životo. Pokasno o Petar hem leskoro phral o Andrej čhinavgje e bukjaja te astaren mačhe hem ule e Mesijaskere sledbenikija, tegani o Jehova ko but načinija blagoslovingja le (Mar. 1:16-18). E Petare sine le but šuže iskustvija sar učeniko e Hristoseskoro. Ov dikhlja sar o Isus sasljargja e nasvalen, paldingja demonen hem čak sar voskresningja e mulen (Mat. 8:14-17; Mar. 5:37, 41, 42). Isto agjaar, le sine le prilika te ovel prisutno keda o Isus ki jekh vizija sine sikavdo sar Cari ko e Devleskoro Carstvo. O Petar nikogaš na bistergja akava nastan (Mar. 9:1-8; 2. Pet. 1:16-18). Čače, ov nikogaš nane sine te dikhel akala bukja te na ovel sine e Isuseskoro sledbeniko. Sigurno but radujngja pe so na mukhlja o negativna čuvstvija baši peste te čhinaven le te doživinel akala blagoslovija! (w23.09 21, pas. 4-5).

Ko plo prvo pismo, o apostol Petar koristinela o izraz „baro mangipe“. Asavko mangipe na učharela samo nekobor grevija, nego „but grevija“ (1. Pet. 4:8). Keda vakergja akala lafija, o Petar šaj setingja pe ki pouka bašo prostibe koja so o Isus sikavgja le nekobor berša angleder. Ko adava vreme o Petar verojatno mislingja peske kaj tano darežlivo soske vakergja kaj ka prostinel ple phraleske „dži ko efta puti“. Ama o Isus sikavgja le — hem amen — te prostina dži ko 77 puti, javere lafencar sekogaš (Mat. 18:21). Ako tuke pharo te primenine akava sovet, ma obeshrabrin tut! Sarine amen siem nesovršena, adaleske ponekogaš amenge pharo te prostina. Ama važno tano te kere sa so šaj te prostine tle phraleske hem te smirine tut lea (w23.09 29, pas. 12).

Ko vogi e mačheskoro, o Jona sine uverimo kaj o Jehova ka šunel leskiri molitva hem kaj ov ka pomožinel le. O Jehova spasingja e Jona hem pokasno ov sine spremno te kerel i zadača koja so o Jehova dengja le (Jona 2:10 — 3:4). Keda isi tu nesavi nevolja, dali tuke doborom pharo so našti arakhea lafija te vakere e Jehovaske sar osetinea tut? Ili dali osetinea tut doborom umorno taro problemija so našti te proučine? Ma bistre, o Jehova najšukar haljovela tli situacija. Adaleske, čak keda na vakerea but bukja ki molitva, ov sigurno kaj o Jehova ka del tut baš adava so valjani tuke (Ef. 3:20). Ako tuke pharo te čitine hem te proučine adaleske so sian nasvalo, umorno ili sian but voznemirimo, šaj te šune o audiosnimke tari Biblija ili taro amare publikacie. Šaj isto agjaar te šune nesave taro amare gilja, ili te dikhe nesave videoklipija tari amari internet-stranica jw.org. O Jehova mangela te kerel tut zoralo, hem ka kerel adava ako tu molinea tut leske hem ako rodea o odgovorija taro tle molitve ki Biblija hem ko sa o javera bukja so dela tut (w23.10 13, pas. 6; 14, pas. 9).

O sveto šatori hem o hramija kola so pokasno sine gradime ko Erusalim sine but slična andral. Andre sine samo duj prostorie — „i Sveto prostorija“ hem „i Najsveto prostorija“ — kola so sine odvojme jekhe zavesaja (Evr. 9:2-5; 2. Moj. 26:31-33). Ki Sveto prostorija sine zlatno svetilniko, žrtveniko kote so tharela pe sine temjan hem astali kote so sine mare. Samo okolenge so sine „pomazime sveštenikija“ sine dozvolimo te khuven ki Sveto prostorija hem te keren pumari sveto služba (4. Moj. 3:3, 7, 10). Ki Najsveto prostorija sine o zlatno kovčeg e sojuzeskoro kolea so sine pretstavimi e Jehovaskiri prisutnost (2. Moj. 25:21, 22). Samo o prvosvešteniko šaj sine te khuvel pali zavesa ki Najsveto prostorija jekh puti ko berš, ko Dive prostibaske o grevija (3. Moj. 16:2, 17). Ov khuvela sine e životnengere ratea te šaj te oven čistime leskere grevija hem o grevija e celo narodoskere. Sar so nakhela sine o vreme, o Jehova otkringja so čače pretstavinela sine sekova delo taro sveto šatori (Evr. 9:6-7; w23.10 27, pas. 12).

But puti ko e Devleskoro Lafi arakhaja i zapoved „mangen tumen jekh jekhea“ (Jovan 15:12; Rim. 13:8; 1. Sol. 4:9; 1. Pet. 1:22; 1. Jov. 4:11). Ama o mangipe tani osobina soj andre ko vilo, a so isi amen ko vilo našti nijekh manuš te džanel. Tegani, sar šaj o javera te džanen kaj mangaja len? Taro amare lafija hem postapke. Isi but načinija sar šaj te sikava kaj mangaja amare phralen hem phenjen. Te dikha nekobor primerija: „Vakeren o čačipe jekh jekheske!“ (Zah. 8:16). „Oven ko mir jekh jekhea“ (Mar. 9:50). „Oven prva ko adava te sikaven kaj poštujnena jekh jekhe“ (Rim. 12:10). „Prifatinen tumen jekh jekhea“ (Rim. 15:7). „Ponadari da „prostinen tumenge“ (Kol. 3:13). „Phiraven o pharipa jekh jekheskoro“ (Gal. 6:2). „Ponadari da utešinen jekh jekhe“ (1. Sol. 4:18). „Izgradinen jekh jekhe“ (1. Sol. 5:11). „Molinen tumen jekh jekheske“ (Jak. 5:16; w23.11 9, pas. 7-8).

Sekova dive anaja odluke kolenge so valjani te ovel amen bari vera. Na primer, anaja odluke bašo društvo, zabava, obrazovanie, brako, čhave hem buti. Ko asavke situacie šukar tano te puča amen: „Dali mle odluke sikavena kaj sium sigurno kaj akava sveto tano privremeno hem kaj panda hari ka avel e Devleskoro nevo sveto, ili mukhava ko mle odluke te vlijajnen manuša kola so verujnena kaj akale svetoja završinela sa?“ (Mat. 6:19, 20; Luka 12:16-21). Ka ana šukar odluke ako bajraraja amari vera ko adava kaj o nevo sveto ka avel but sigate. Isto agjaar isi amen nevolje baši kolende so valjani amenge silno vera. Šaj isi amen progonstvo ili valjani te ikljova ko krajo seriozno nasvalipaja ili javere bukjencar kola so šaj te obeshrabrinen amen. Ko početok šaj te mislina amenge kaj šaj te istrajna ki adaja nevolja. Ama obično o nevolje trajnena poviše vreme, adaleske valjani amenge silno vera te šaj te istrajna hem ponadari da te služina radosno e Jehovaske (1. Pet. 1:6, 7; w23.04 27, pas. 4-5).

O Jehova očekujnela amendar te postapina sprema amare molitve. Na primer, jekh phral šaj te molinel e Jehova te pomožinel leske te dobinel slobodna dive tari buti te šaj te džal ko regionalno kongres. Sar šaj o Jehova te odgovorinel ki leskiri molitva? Ov šaj te del le hrabrost te šaj te kerel lafi ple šefea. Sepak o phral ka valjani te džal te kerel lafi bašo slobodna dive. Šaj ka valjani te kerel lea lafi poviše puti. Šaj ka valjani te rodel te meninel pe nesave kolegaja te džal javer smena ki buti ili ka lel slobodna dive bizo te ovel platimo. O Jehova očekujnela poviše puti te molina amen leske bašo bukja so sekirinena amen. Sar so šaj te dikha taro e Isuseskere lafija, nesave bukja bašo kola so molinaja amen nane te dobina len odma (Luka 11:9). Adaleske ma otkažin tut! Molin tut taro vilo hem poviše puti (Luka 18:1-7). Keda keraja adava, tegani sikavaja e Jehovaske kaj adava nane samo momentalno želba. Isto agjaar sikavaja vera kaj ov šaj te pomožinel amenge (w23.11 22, pas. 10-11).

O Jehova vetingja ple amaleske e Avraameske kaj preku leskoro potomstvo ka oven blagoslovime sa o narodija ki phuv (1. Moj. 15:5; 22:18). Adaleske so e Avraame sine le bari vera ko Devel, ov sine uverimo kaj e Devleskoro vetuvanje čače ka ispolninel pe. Sepak, keda e Avraame sine le 100 berš, a leskere romnja 90, akale verna slugen panda na sine len čhavo (1. Moj. 21:1-7). Ama, ki Biblija pišinela: „[E Avraame] sine le nadež kaj ka ovel dad bute narodonge hem adaleske sine le vera ko adava so vakergja leske o Devel“ (Rim. 4:18). Džanaja kaj i nadež so sine e Avraame ispolningja pe. Bijandilo leske o Isak — o čhavo kole so doborom vreme adžikergja. Soske o Avraam sine uverimo kaj o Jehova ka ispolninel plo vetuvanje? Adaleske so o Avraam sine paše amal e Jehovaja, ov sine „celosno uverimo kaj o Devel šaj te kerel adava so vetinela“ (Rim. 4:21). Adaleske so sine le vera, o Avraam sine odobrimo taro Devel hem o Jehova dikhlja ki leste sar pravedno manuš (Jak. 2:23; w23.12 8, pas. 1-2).

Jekh terno phral kova soj doverlivo, šukar grižinela pe bašo sa ple odgovornostija. Razmislin bašo sovršeno primer e Isuseskoro. Ov sekogaš sine vnimatelno hem odgovorno keda kerela sine o zadače so dobingja len taro Jehova. Ov kerela sine sekoja zadača so dengja le o Jehova, čak keda adava na sine lokho. Ov mangela sine e manušen — posebno ple učenikon — hem spremno dengja plo životo lenge (Jovan 13:1). Ako mangea te dža palo e Isuseskoro primer, de tutar sa te kere sekoja zadača so dobinea la. A ako na sian sigurno sar te kere la, ov ponizno hem rode pomoš taro zrela phralja. Ma frde i buti tle šerestar samo te šaj te ovel završimi (Rim. 12:11). Namesto adava, ker sekoja zadača „sar e Jehovaske, a na e manušenge“ (Kol. 3:23). Džangjola pe tu na sian sovršeno, adaleske ov skromno hem priznajn sekoja greška so ka kere la (Izr. 11:2; w23.12 26, pas. 8).

Sekova jekh amendar sine but radosno keda krstingja pe hem ulo delo tari e Jehovaskiri familija. Okola so isi len čest te oven e Jehovaskere amala, složinena pe adalea so vakergja o psalmisti o David: „Srekjno tano okova kole so tu, [Jehova] ka birine hem kaske so dozvolinea te avel tute paše te šaj te živinel ko tle dvorija“ (Ps. 65:4). Kaske o Jehova dozvolinela te živinel ko leskere dvorija, javere lafencar, te ovel leskoro amal? Ov birinela te ovel paše okolencar so sikavena kaj mangena te oven lea paše (Jak. 4:8). Keda dea lafi e Jehovaske kaj ka služine leske celo životo hem krstinea tut, šaj te ove sigurno kaj palo tlo krstibe ov ka blagoslovinel tut džikote na ovela dosta (Mal. 3:10; Erem. 17:8). O krstibe tano samo početok. Tu ka mange te de tutar sa te šaj te živine sprema tlo zavet čak keda ka oven tut iskušenija ili keda ka ovel ispitimi tli vera (Prop. 5:4, 5). Sar učeniko e Isuseskoro, tu ka trudine tut kobor so šaj pošukar te dža palo leskoro primer hem te ikere tut ko leskere zapovedija (Mat. 28:19, 20; 1. Pet. 2:21; w24.03 8, pas. 1-3).

So ako tu hem tlo bračno partneri na uživinena keda nakhavena vreme zaedno? Tegani so šaj te keren? Razmislin bašo jekh primer jagaja. Keda tharaja jag oj nane odma silno. Valjani hari pohari te čhive tikne kašta, a keda i jag ovela posilno šaj te čhive pobare kašta. Slično, ko početok šaj te počminen agjaar so sekova dive ka nakhaven kratko vreme zaedno. Keren nešto so o solduj džene mangena (Jak. 3:18). Ako počminena tikne bukjencar, tumaro mangipe šaj palem te ovel silno. O poštovanje tano but važno ko jekh brako. Adava tano sar vozduh so pomožinela e jagake te thabljol. Bizo vozduh i jag sigate ačhola. Slično, bizo poštovanje o mangipe maškar o rom hem i romni šaj sigate te šudrol. Tari javer strana, ako o rom hem i romni trudinena pe te sikaven poštovanje jekh jekheske tegani lengoro mangipe ka ovel posilno. Sepak na valjani te bistre kaj nane važno dali tu mislinea kaj sikavea poštovanje, nego važno tano dali tlo bračno partneri osetinela pe poštujmo (w23.05 22 pas. 9; 24, pas. 14-15).

Ki Biblija čitinaja bašo verna sluge e Devleskere kola so vakergje kaj nakhena taro phare situacie hem kaj darandile taro pumare dušmanja ili javera pritisokija (Ps. 18:4; 55:1, 5). Slično, amen da šaj isi amen protivibe ki škola, ki buti, tari amari familija ili taro vlastija. Šaj čak daraja kaj ka mera adaleske so siem but nasvale. Ko asavke situacie šaj osetinaja amen slabo sar jekh tikno čhavo. Sar pomožinela amen o Jehova ko asavke momentija? Ov utešinela amen hem smirinela amen. Adaleske redovno odvojn tuke vreme te šaj te ove e Jehovaja agjaar so ka moline tut hem ka čitine leskoro Lafi (Ps. 77:1, 12-14). Ako isi tut asavki navika, tegani najverojatno o prvo nešto so ka kere keda ka ovel tut stres tano te rode pomoš taro tlo nebesno Dad. Vaker e Jehovaske sostar daraja hem bašo so sekirinea tut. Dozvolin leske preku i Biblija te kerel tuja lafi hem te utešinel tut (Ps. 119:28; w24.01 24-25, pas. 14-16).

But tano važno te ovel tut bari želba te šaj te ispolnine tle celija. Ako but mangea te kere nešto tegani ka kere sa so valjani te šaj te ispolnine adava. A kobor pobari želba isi amen doborom pobari tani i verojatnost kaj ka ispolnina amare celija. Adaleske, so šaj te kere te šaj te bajrare tli želba? Molin tut te ovel tut pobari želba. O Jehova preku plo duho šaj te del tut pobari želba te šaj te ispolnine tli cel. Ponekogaš čhivaja amenge cel adaleske so džanaja kaj valjani te kera adava, hem adava tano šukar. Ama šaj nane amen nesavi bari želba te ispolnina la. Razmislin bašo adava so kergja o Jehova tuke (Ps. 143:5). O apostol Pavle but razmislingja bašo e Jehovaskoro šukaripe so na zaslužinela pe hem adava bajrargja leskiri želba te del pe poviše e Jehovaske (1. Kor. 15:9, 10; 1. Tim. 1:12-14). Slično, kobor poviše razmislinea bašo adava so o Jehova kergja tuke, doborom poviše ka mange te ispolnine tli cel (Ps. 116:12; w23.05 27, pas. 3-5).

Keda falinaja amare nebesno Dadeskoro anav keraja le radosno (Ps. 119:108). Dali akava značinela kaj o Semokjno Devel tano sar o nesovršena manuša, kola so mangena o javera te falinen len adaleske so nane sigurna ki peste? Na. Keda falinaja amare nebesno Dade pomožinaja te dokažinel pe kaj nane točno panda jekh hovajbe so vakergja le o Satana baši sekova jekh amendar. Ov vakergja kaj nijekh manuš nane verno te braninel e Devleskoro anav. Sprema leste nijekh manuš nane te ačhovel verno keda ka ovel čhivdo ko ispit. Ov vakerela kaj sarine amen ka čhinava te služina e Devleske ako mislinaja kaj agjaar ka ovel amenge pošukar (Jov 1:9-11; 2:4). Ama o Jov ačhilo verno e Jehovaske hem dokažingja kaj o Satana hovavela. Dali tu da ka ačhove verno e Devleske? Sekoj amendar šaj te birinel te braninel amare Dadeskoro anav hem te kerel le radosno agjaar so ka služinel leske verno (Izr. 27:11). Adaja tani čače bari čest amenge (w24.02 8-9, pas. 3-5).

Palo e Mojseeskoro hem e Isus Navineskoro vreme, o Jehova čhivgja sudie te šaj te vodinen leskere narodo. Palo adava, keda vladingje carija, o Jehova čhivgja prorokija te vodinen leskere narodo. O verna carija šunena sine o sovetija e prorokongere. Na primer, o cari o David ponizno prifatingja o ukor taro proroko o Natan (2. Sam. 12:7, 13; 1. Let. 17:3, 4). E care e Josafate sine le doverba ko vodstvo e prorokoskoro o Jaziel hem ohrabringja e Judejcon e lafencar: „Verujnen ko [e Devleskere] prorokija“ (2. Let. 20:14, 15). Keda sine ki phari situacija o cari o Ezekija rodingja pomoš taro proroko o Isaija (Isa. 37:1-6). Sekogaš keda o carija džana sine palo vodstvo e Jehovaskoro, ov blagoslovinela len sine a o narodo sine zaštitimo (2. Let. 20:29, 30; 32:22). Sarinenge sine jasno kaj o Jehova koristinela e prorokon te šaj te vodinel ple narodo (w24.02 21, pas. 8).

O Satana mangela te nakhava vreme manušencar kola so ka keren amenge pharo te ikera amen ko e Jehovaskere merilija. Na valjani te bistra kaj amare amala nane samo okola kasaja so družinaja amen lično. Maškar lende tane hem okola kasaja so komunicirinaja preku socijalna mreže. Amen mora te borina amen te šaj te na razmislina sar o manuša taro akava sveto, kaj o nemoralno ponašibe tano prifatlivo. Amen džanaja kaj adava tano pogrešno (Ef. 4:19, 20). Šukar tano te puča amen: „Dali trudinava man te na nakhavav vreme bizi potreba me kolegencar, součenikoncar ili javerencar kola so na poštujnena e Jehovaskere pravedna merilija?“ „Dali hrabro ikerava man ko e Jehovaskere merilija čak ako o javera mislinena kaj sium kruto ko adava?“ Sprema o lafija taro 2. Timotej 2:20-22, šaj čak ka valjani te pazina kasaja ka ova paše amala ko sobranie. Amen na mangaja te bistra kaj nesave šaj nane te pomožinen amen te ačhova verna e Jehovaske (w24.03 22-23, pas. 11-12).

Dali nekogaš probingjan te zamisline sar izgledinela o Jehova? Iako amen našti te dikha le, sepak i Biblija opišinela le ko različna načinija. Bašo Jehova vakerela kaj tano „kham hem štiti“ hem „jag so gltinela“ (Ps. 84:11; Evr. 12:29). O Ezekiel ki jekh vizija opišingja e Jehovaskiri prisutnost sar safiri, parno zlato so svetinela hem vinožito so but svetinela (Ezek. 1:26-28). Adaleske so našti te dikha e Jehova šaj te ovel amenge pharo te verujna kaj ov mangela amen. Nesave mislinena kaj o Jehova nikogaš našti te mangel len adaleske so doživingje lošna bukja ko životo. O Jehova haljola adala čuvstvija hem sar ola vlijajnena upri amende. Te šaj te pomožinel amenge, ov preku plo Lafi sikavela amenge savi ličnost tano. E Jehova najšukar šaj te opišina le jekhe lafea — e lafea mangipe. Baš adava vakerela i Biblija, o Jehova tano mangipe (1. Jov. 4:8). Sa so kerela, kerela taro mangipe. E Devleskoro mangipe tano doborom baro hem silno so sikavela le čak okolenge so na mangena le (Mat. 5:44, 45; w24.01 26, pas. 1-3).

O Jehova biringja e Mojsee te ikalel e Izraelcon taro Egipet hem sar jasno dokaz mukhlja lenge stubo taro oblako diveskoro, a rakjate stubo tari jag (2. Moj. 13:21). O Mojsej džala sine palo adava stubo hem agjaar ov hem o Izraelcija resle dži ko Crveno more. Keda arakhlile maškar o more hem i egipetsko vojska so džala sine pali lende, e Izraelcon astargja len panika. Ama adava na sine greška. O Jehova namerno preku o Mojsej angja ple narodo adathe (2. Moj. 14:2). Palo adava o Jehova spasingja ple narodo ko jekh posebno način (2. Moj. 14:26-28). Ko adala 40 berš džikote sine ki pustina, e Mojsee sine le doverba kaj o Jehova koristinela o stubo taro oblako te šaj te vodinel ple narodo (2. Moj. 33:7, 9, 10). O Jehova kerela sine lafi e Mojseea taro stubo, a palo adava o Mojsej vakerela sine e narodoske o upatstvija so dobinela len sine taro Jehova. E Izraelcon sine len jasno dokaz kaj o Jehova vodinela len preku o Mojsej (w24.02 21, pas. 4-5).