Soske o manuša više na ponašinena pe šukar? — So vakerela i Biblija?

Sa poviše manuša ponašinena pe lošno. Nervozna pacientija vikinena e doktorenge, o manuša ko restoranti grubo ponašinena pe e kelnerencar, buntovna patnikija napadinena e personale ko avioni, o čhave ponašinena pe lošno ki škola agjaar so lena ki hajgara e nastavnikon, zakaninena pe lenge hem napadinena len, hem nesave političarija kerena bukja kolencar so šokirinena e javeren, a javera trudinena pe te istakninen kaj tane but šukar.

I Biblija šaj najšukar te vakerel amenge soj tano šukar ponašibe. Oj isto agjaar objasninela soske but manuša avdive na ponašinena pe agjaar.

Soske o manuša više na ponašinena pe šukar?

Ko celo sveto dikhjola kaj sa pohari manuša ponašinena pe šukar.

• Sprema jekh anketa taro Galup so sine kerdi sigende, o Amerikancija mislinena kaj ko posledna 22 berša o moralna merilija e manušengere ki Amerika akana tane najtikne.

• Ki jekh javer anketa kote so učestvujngje poviše taro 32.000 manuša ko 28 države, 65 otsto lendar vakergje kaj nikogaš na dikhle doborom but o manuša te na poštujnen pe hem te na ponašinen pe šukar.

I Biblija prorokujngja sar ka ponašinen pe o manuša avdive.

• „Ko posledna dive ka ovel but pharo vreme. Soske o manuša ka mangen korkori pes, ka mangen o pare, ka oven čalmdžie, ka ikeren pe ko baripe, hulitelija, nane te šunen ple roditelen, nane te oven blagodarna... nane te mangen ple familija, [hem ka oven] surova (2. Timotej 3:1-3).

Te šaj te doznajne poviše bašo adava sar ispolninela pe akava proroštvo, čitin i statija „Dali navistina živeeme vo poslednite denovi?“

Najšukar sovetija bašo adava sar te ponašina amen

Ko akava sveto kote so o manuša sa pohari ponašinena pe šukar, but manuša halile kaj ki Biblija isi najšukar sovetija bašo šukar ponašibe. Ki late isi sovetija bašo moral kolen so isi len „cvrsta temelija, akana hem zasekogaš“ (Psalm 111:8). Te dikha nekobor primerija:

• So vakerela i Biblija: „Sa so tumen mangena o manuša te keren tumenge, tumen da mora te keren lenge“ (Matej 7:12).

  So značinela akava: Valjani te ponašina amen e javerencar ljubezno hem te sikava lenge poštovanje, isto sar so mangaja ola te ponašinen pe amencar.

• So vakerela i Biblija: „Akana, keda cidingjen tumendar o hovajbe, sarine vakeren o čačipe jekh jekheske“ (Efešanja 4:25).

  So značinela akava: Valjani te ova česna ko sa so vakeraja hem keraja.

Mangea li te doznajne poviše baši akaja tema?

• Čitin i Stražarsko kula e naslovea „Soj šukar a soj lošno — Koj šaj te vakerel amenge“

• Čitin i statija „So vakerela i Biblija baši tolerancija?“