Soske e Jehovaskere svedokija džana ko manuša kola so isi len pumari religija?

Halilem kaj but manuša so isi len pli religija mangena te keren lafi bašo bibliska teme. Iako tano adava agjaar, amen poštujnaja lengoro pravo te verujnen ko nešto javer hem na čhivaja len silaja te šunen adava so vakeraja lenge.

Keda propovedinaja, amen ikeraja amen ko biblisko sovet te kera adava „šukaripaja“ hem te sikava „hor poštovanje“ sprema o javera (1. Petrovo 3:15). Na očekujnaja sarine te šunen adava so vakeraja lenge (Matej 10:14). Ama, amen na džanaja dali o manuša ka šunen amen sa džikote na džaja ki lende te vakera lenge bašo šukar haberi. Isto agjaar, džanaja kaj o okolnostija ko lengoro životo meninena pe.

Na primer, o manuša šaj isi len but buti hem nane len vreme te keren amencar lafi, ama javer puti šaj ka ovel len vreme te keren amencar lafi. Isto agjaar, but manuša šaj ka oven len nesave problemija ili ka meninen pe nesave bukja ko lengoro životo hem tegani ka mangen te šunen o šukar haberi tari Biblija. Adaleske ka da sa amendar hem ponadari da te kera lafi e manušencar bašo šukar haberi tari Biblija.