Sar te arakha i pravo religija

Ako mangea te ove paše e Devleja, mora te kjere odova so o Devel vakjerela kaj tano šukar. O Isus vakjergja kaj e Devleskere prava sluge ka obožavinen e Devle, sar so rodela ov (Jovan 4:23, 24). Isi samo jek način sar te služina e Devleske (Efešanite 4:4-6). I pravo religija ingarela ko večno dživdipe, a i hovavni religija ingarela ko uništuvanje (Matej 7:13, 14).

I pravo religija dikhelape taro odova so kjerena o manuša ki odoja religija. Odoleske so o Jehova tano šukar, leskere sluge valjani te oven šukar manuša. Isto sar jek šukar kaš tari phabaj so dela šukar phabaja, agjaar i pravo religija pomožinela e manušenge te kjeren šukar bukja (Matej 7:15-20).

Koj tano paše e Jehovaja, but ceninela i Biblija. Ola džanena kaj i Biblija tani taro Devel. Dozvolinena odova so vakjerela oj te vodinelen ko lengoro dživdipe, te rešinel lengere problemija hem te pomožinel len te sikljon bašo Devel (2. Timotej 3:16). Odova so propovedinena, dena pestar sa te kjerenle ko plo dživdipe.

Koj tano paše e Jehovaja, sikavela mangipe jek jekheske. O Isus sikavgja kaj mangela e manušen odolea so sikavela len sine bašo Devel hem so sasljarela sine e nasvalen. O prava hristijanja valjani te sikaven mangipe javerenge. Sar o Isus, ola na delinena e manušen ko čorole hem barvale, ili ko lengere rase ili grupe. O Isus vakjergja kaj o manuša ka pendžaren leskere učenikon agjaar so isilen mangipe jek jekheja (Jovan 13:35).

E Devleja koj tano paše poštunjela e Devleskoro anav, Jehova. Ako nekoj na vikinelatu ko to anav, dali sikavela kaj tuke paše amal? Na! Kjeda isi amen amal, vikinajale ko leskoro anav hem javerenge vakjeraja šukar bukja baši leste. Agjaar okola so mangena te oven paše e Devleja, sar amala, valjani te koristinen leskoro anav hem te vakjeren javerenge baši leste. O Jehova mangela te kjera odova (Matej 6:9; Rimjanite 10:13, 14).

Sar o Isus, e Devleskere sluge sikavena e manušen bašo e Devleskoro Thagaripe. E Devleskoro Thagaripe tano vlada taro nebo kova ka kjerel celo Phuv raj. E Devleskere sluge propovedinena baši akaja šukar vest bašo e Devleskoro Thagaripe (Matej 24:14).

E Jehovaskere svedokija kjeren sa samo te oven paše e Devleja. Ola ceninena i Biblija hem isilen mangipe jek jekheja. Isto agjaar koristinena hem poštujnena e Devleskoro anav, thaj sikavena javerende bašo e Devleskoro Thagaripe. Agjaar e Jehovaskere svedokija sikavena kaj ikjerena i pravo religija.