1. Dali o Devel tano krivo bašo muke so cidaja len?

Soske tano važno o odgovor

But manuša na mangena te služinen e Devleske soske mislinena kaj ov tano krivo bašo muke so cidaja.

Razmislin

Ko direktno ili indirektno način, but verska vodačija sikavena kaj o Devel tano krivo bašo amare muke. Na primer, nesave vakerena:

• O prirodna katastrofe tane kazna taro Devel.

• O čhave merena adaleske so e Devleske valjani poviše angelija ko nebo.

• O Devel birinela ki kaskiri strana ka ovel ko vojne — kola so anena but muke e manušenge.

Ama, dali šaj adava so sikavena o verska vodačija bašo Devel tano hovajbe? So ako o Devel na prifatinela len?

So vakerela i Biblija

O Devel nane krivo bašo amare muke.

Ako tano krivo bašo amare muke, tegani adava bi ovela sprotivno taro leskere osobine kola so doznajnaja len tari Biblija. Na primer:

„Sa [e Devleskere] drumija tane pravedna... Pravedno tano hem mangela o čačipe“ (5. MOJSEEVA 32:4).

„Našti o čačutno Devel te kerel lošnipe, o Semokjno te na ovel pravedno!“ (JOV 34:10).

„O Semokjno na iranela i pravda“ (JOV 34:12).

O Devel na odobrinela e religien so vakerena hovajba baši leste.

Ki lende tane vklučime o religie so sikavena kaj o Devel tano krivo bašo muke, isto agjaar okola so odobrinena o vojne hem o nasilstvo.

„Adala prorokija prorokujnena hovajbe ko mlo [e Devleskoro] anav. Me na bičhalgjum len, ni na zapovedingjum lenge, ni na vakergjum lenge nešto. Prorokujnena hovavne vizie taro plo vilo... hem hovajbe“ (EREMIJA 14:14).

O Isus osudingja e verska vodačen soske sine licemerna.

„Na sekova jekh so vakerela mange: ’Gospodare, Gospodare‘, ka khuvel ko nebesno carstvo, nego samo okova so kerela mle Dadeskiri volja kova soj ko nebo. But džene ko adava dive ka vakeren mange: ’Gospodare, Gospodare, na kergjem li lafi sar prorokija ko tlo anav, na paldingjem li demonija ko tlo anav hem na kergjem li but čudija ko tlo anav?‘ Tegani me ka vakerav lenge: ’Nikogaš na pendžargjum tumen! Ciden tumen mandar, tumen so kerena lošna bukja!‘“ (MATEJ 7:21-23).