3. Soske o šukar manuša cidena muke?

Soske tano važno o odgovor

O fakti kaj o šukar manuša cidena muke tano sprotivno taro amaro čuvstvo baši pravda. Isto agjaar, adava fakti anela amen dži ko zaklučok kaj na vredinela te ove šukar adaleske so agjaar da ka cide muke.

Razmislin

Nesave manuša mislinena kaj postojnela jekh krugo kote so o manuš stalno bijangjovela hem merela. Ola verujnena kaj okova so kerela šukar bukja, keda palem bijangjovela ka ovel le pošukar životo. Ama, okova so kerela lošna bukja, ko javer životo stalno ka cidel muke. Sprema adava veruvanje, čak keda nekoj so akana tano šukar šaj te cidel muke ako postapingja lošno ko nesavo „angluno životo“. Javera palem, verujnena kaj o manuša cidena muke soske agjaar sine lenge pišimo. Ama...

• Savi smisla isi nekoj so demek palem bijangjovela te cidel muke bašo angluno životo koleste so ni na setinela pe?

• Ako nasvaljovaja ili doživinaja nesrekje sar kazna bašo nešto so kergjem angleder, tegani soske akana te arakha amaro sastipe hem te izbegina nesrekje?

  DOZNAJN POVIŠE

  Dikh o videoklipi Soske o Devel panda mukhela te ovel o lošnipe hem o muke? ki jw.org.

So vakerela i Biblija

O muke nane kazna taro Devel.

Namesto adava, but puti slučinena pe tragedie soske nekoj arakhljovela ko pogrešno than ko pogrešno vreme.

„I trka na dobinena la sekogaš okola so sigate prastana, ni o silna i bitka, ni o maro nane sekogaš okolen soj mudra, ni o barvalipe okolen soj inteligentna, čak okola so but džanena nane len sekogaš uspeh; soske o vreme hem o bukja so našti te predvidinen pe arakhena sekole manuše“ (PROPOVEDNIK 9:11).

Jekh taro pričine bašo amare muke tano o grevo so nasledingjem le.

O lafi „grevo“ o manuša obično povrzinena le nesave lošno postapkaja so kergja la nekoj. Ama, i Biblija koristinela akava lafi te šaj te opišinel i nesovršenost koja so sa o manuša — hem o šukar hem o lošna — nasledingje la taro prva manuša, o Adam hem i Eva.

„Keda bijandiljum više sium sine krivo bašo grevo, panda taro momenti keda mi daj ačhili khamni o grevo sine ki mande“ (PSALM 51:5).

Adaleske so o manuša nasledingje o grevo isi len bare posledice.

O grevo na samo so rumingja amaro odnos amare Stvoritelea nego hem kerela te ovel amenge popharo te ova ko šukar odnosija e javerencar hem te kontrolirina amare čuvstvija. Bašo sa akava cidena sa o manuša, a na samo poedincija.

„Keda mangava te kerav adava soj šukar, o lošno tano ki mande“ (RIMJANITE 7:21).

„Sa o stvorime bukja zaedno ofkinena hem tane ki dukh sa dži akana“ (RIMJANITE 8:22).