4. Dali e Devle sine le namera te cida muke?
Soske tano važno o odgovor
O odgovor bašo akava pučibe vlijajnela upro adava sar dikhaja ko životo.
Razmislin
Dali tano logično o Devel, kova so kergja doborom šukar bukja ko sveto, te ovel le namera o manuša te ciden muke?
Adaleske so ko sveto isi but muke, okola so nane religiozna vakerena kaj o manuša nane važna e Devleske, a adalea anena ko pučibe hem adava dali ov postojnela. Sprema lende o muke tane dokaz kaj 1) e Devle nane le mokj te čhinavel len, 2) o Devel na mangela te čhivel lenge krajo, ili 3) o Devel na postojnela.
Ama dali tane adala o edinstvena pričine soske cidaja?
DOZNAJN POVIŠE
Dikh o videoklipi Dali adava so pišinela ki Biblija tano čače? ki jw.org.
So vakerela i Biblija
O Devel na kergja amen te cida muke.
Ov mangela te uživina ko životo.
„[E manušenge] nane ništo pošukar taro adava te oven bahtale hem te keren šukaripe ko plo životo, hem sekova manuš valjani te hal hem te piel hem te uživinel ko šukar bukja taro celo plo trudo. Adava tano poklon taro Devel“. (PROPOVEDNIK 3:12, 13).
O Devel kergja o prva manuša, o Adam hem i Eva, te živinen ko sovršena uslovija.
Leskiri namera na sine te ciden muke ni ola ni lengere potomcija.
„Palo adava o Devel dengja len bereketi hem vakergja lenge: ’Te ovel tumen pherdo čhave hem te oven but džene, pheren i phuv hem keren la buti‘“ (1. MOJSEEVA 1:28).
O Adam hem i Eva biringje te na šunen e Devle.
Akaja odluka angja bare muke lenge hem sa lengere potomconge.
„Preku jekh manuš o grevo khuvgja ko sveto hem preku o grevo o meribe, hem agjaar o meribe širingja pe ko sa o manuša, soske sarine grešingje“ (RIMJANITE 5:12).a
O Devel na kergja amen te živina bizo leskoro vodstvo.
Isto sar so na siem kerde te živina telo pani, ni na siem kerde te ova nezavisna taro Devel.
„O manuš kova so phirela našti te upravinel ple drumoja“ (EREMIJA 10:23).
O Devel na mangela te cida muke.
Adaleske ov sikavela amen sar te izbegina o problemija.
„Ako pazinea sine ko mle zapovedija! Tlo mir ka ovel sine sar reka“ (ISAIJA 48:18).
a Keda ki Biblija spomninela pe o „lafi grevo“ na mislinela pe samo ki nesavi lošno postapka nego hem ki nesovršenost koja so nasledingje la sa o manuša.