Lekcija 2
Ko i o Devel?
Ko i o pravo Devel hem kova i leskoro anav? (1, 2)
Soske o manuš našti te dikhel e Devle? (3)
Sar so vakjeri i Biblija, savo tano o Devel? (4)
Valjani li te kulandina bukja sar so i o slike thaj o krsto kjeda obožavinaja e Devle? (5)
Ko kola duj načinija šaj te sikljova bašo Devel? (6)
1. O manuša obožavinena but bukja. Ama i Biblija vakjerela amengje kaj isi samo jek PRAVO Devel. Ov kjergja sa so i upre hem tele ki phuv. Samo ole valjani te obožavina, soske Ov dingja amen o dživdipa (1. Korinkjanite 8:5, 6; Otkrovenie 4:11).
2. E Devle isile but titule, ama samo jek anav. Odova anav tano JEHOVA. Ko pobuter Biblije, e Devleskoro anav sine ikaldo hem čhivde i o titule GOSPOD ja BOG. Kjeda sine pišimi i Biblija, o anav Jehova arakhljola sine 7.000 puti! (2. Mojseeva 3:15; Psalmi 83:18).
3. O Jehova nae sar amende. I Biblija vakjerela kaj o Devel tano duho (Jovan 4:24). O duho tano dživdipe kova so i but pošukar taro e manušengoro. Nijek manuš, dži akana na dikhlja e Devle. O Jehova dživdinela ko nebo, ama šaj te dikhel sa o bukja (Psalmi 11:4, 5; Jovan 1:18). So i o Sveti Duh? Odova nae Devel. Odova tani e Devleskiri sila, kolaja kjerela sa o bukja (Psalmi 104:30).
4. I Biblija vakjerela amengje savo tano o Devel. Latar sikljovaja kaj e Devle isile but šukar tabieti. Isile najbaro mangipe, mudrost, pravedno tano hem mokjno (5. Mojseeva 32:4; Jov 12:13; Isaija 40:26; 1. Jovanovo 4:8). Isto agjaar i Biblija sikavela amen kaj ov i but šukar, strplivo tano, oprostinela thaj spremno pomožinela amen. Sar leskere gogjaver čhave, amen valjani te ova sar oleste (Efešanite 5:1, 2).
5. Valjani li te klanjina ja te molinaamen anglo slike thaj o krsto kjeda obožavinaja e Devle? Na! (2. Mojseeva 20:4, 5). O Jehova vakjerela kaj valjani samo le te obožavina. Odoleske so nijek nae Baro sar oleste, ov namangela te molinaamen slikengje ja javere bukjengje. Lende naelen nisavi sila te pomožinen amen (Psalmi 115:4-8; Isaija 42:8).
6. Sar šaj pošukar te pendžara e Devle? Jek način tano ako dikhaja sa o bukja so ov kergjalen hem ako hor razmislinaja bašo odova so mangena ola te vakjeren amengje baši oleste. Ola sikavena amengje kaj ov tano mokjno hem isile bari mudrost. Leskoro mangipe dikhelape ko sa odova so kjergja (Psalmi 19:1-6; Rimjanite 1:20). Javerčhane te džana bašo Devel tano ako proučinaja i Biblija. Ki olate, but pobuter vakjerela savo Devel tano ov. Isto agjaar vakjerela amengje baši pli namera hem so rodela amendar te kjera (Amos 3:7; 2. Timotej 3:16, 17).
[Pictures on page 5]
Bašo Devel sikljovaja taro sa o bukja so kjergjalen hem tari i Biblija