Lekcija 10
Navike so mrzinela o Devel
Sar te dikha ko bukja so o Devel vakjerela kaj tane bilačhe? (1)
Save seksualna vrske tane pogrešna? (2)
Sar valjani jek sluga e Devleskoro te dikhel ko hovajbe? (3) Komari? (3) Čoribe? (3) Zulumi? (4) Spiritizam? (5) Matibe? (6)
Sar šaj nekoj te cidelpe taro bilačhe navike? (7)
1. E Devleskere sluge mangena odova so i šukar. Ama ola valjani te sikljon te mrzinen o bilačhipe (Psalmi 97:10). Odova značinela te ciden pestar o navike kola so mrzinelalen o Devel. Kola tane disave taro odola navike?
2. Blud: Seksualna vrske angleder o brako, preljuba, bestijalnost, incest hem homoseksualnost tane baro grevo anglo Devel (3. Mojseeva 18:6; Rimjanite 1:26, 27; 1. Korinkjanite 6:9, 10). Ako jek murš hem džuvli dživdinena zaedno, a nae venčime, tegani ola valjani te ulavenpe ja te venčinenpe sar so rodela o zakoni (Evreite 13:4).
3. Hovajbe, komari, čoribe: O Jehova našti te hovavel (Tit 1:2). Okola so mangena te prifatinelen o Devel, valjani te na hovaven (Izreki 6:16-19; Kološanite 3:9, 10). Sakova komari tano bilačhe, soske terinela te mange te oveltu pobuter. Odoleske, e Devleskere sluge na khelena loto, sportska prognoza ja javer komari (Efešanite 5:3-5). Isto agjaar, e Devleskere sluge na čorena. Ola na kinena bukja so džanena kaj i čordikane ja te len nekastar nešto bizo pučibe (2. Mojseeva 20:15; Efešanite 4:28).
4. Holi, zulumi: I bari holi šaj te čhiveltu te kjere zulumi (1. Mojseeva 4:5-8). Jek siledžija našti te ovel e Devleskoro amal (Psalmi 11:5; Izreki 22:24, 25). Pogrešno tano te ikala amaro garazi ja te irana lošnipaja nekaske so kjergja amengje bilačhipe (Izreki 24:29; Rimjanite 12:17-21).
5. Magije hem spiritizam: Nesave manuša rodena sila taro bilačhe duhija te sasljaren manušen. Javera kjerena magije pumare dušmanengje te nasvaljon, čak te meren. Palo sa akala bukja bešela o Beng. Odoleske e Devleskere sluge nisar na mešinenape ko akala bukja (5. Mojseeva 18:9-13). Te ačhove paše uzo Jehova tani najbari zaštita taro magije (Izreki 18:10).
6. Matibe: Nae pogrešno te pielpe pohari pivo, vino ja disavo javer pijbe (Psalmi 104:15; 1. Timotej 5:23). O But pijbe hem o matibe tane pogrešno anglo e Devleskere jakha (1. Korinkjanite 5:11-13; 1. Timotej 3:8). Kjeda o pijbe tuke navika, odova šaj te uništinel to sastipe hem ti familija. Isto agjaar šaj te kjerel but sigate te pere ko javera iskušenija (Izreki 23:20, 21, 29-35).
7. O manuša so kjerena bukja kola so o Devel vakjerela kaj i bilačhe, nae te khuven ko e Devleskoro Thagaripe (Galatite 5:19-21). Ako čače mangeja e Devle hem kjereja odova so mangela ov, ka šaj te cidetu taro akala pogrešna navike (1. Jovanovo 5:3). Sikljov te mrzine o bukja so o Devel vakjerela kaj i bilačhe (Rimjanite 12:9). Nek oventu amala so sikavena kaj služinena e Devleske (Izreki 13:20). Ola šaj te pomožinentu te cidetu taro pogrešna navike (Jakov 5:14). A naj angle, ki molitva rode o Devel te pomožineltu (Filipjanite 4:6, 7, 13).
[Pictures on page 20, 21]
O Devel mrzinela o matibe, čoribe, komari hem o zulumi