Sar šaj te sikljove bašo Devel

Šaj te sikljove bašo Devel ako čitineja i Biblija. But poangle, o Devel biringja disave manušen te pišinen leskere misle. Odova so ola pišingje vikjinelape Biblija. Čitibaja i Biblija siklovaja bašo o Devel. Baši Biblija vakjerelape kaj tani e Devleskoro Lafi soske ki o late pišime e Devleskere lafija. Šaj te verunja ko odova so vakjerela i Biblija soske o Jehova nikjed na hovavela. ,O Devel našti te hovavel‘ (Evreite 6:18). Odoleske ko e Devleskoro lafi šaj te arakhe o čačipe (Jovan 17:17).

I Biblija tani jek taro najbare poklonja amengje. Oj tani sar jek lil taro jek dat dži leskere but mangle čhave. Vakjerela amengje kaj o Devel vetingja te kjerel i Phuv te ovel jek but šužo than dživdipaske — raj. Vakjerela amengje so kjergja poangle, so kjerela akana hem so ka kjerel ki idnina pe čhavengje so ka oven verno. Isto agjaar, pomožinela amen te rešina amare problemija thaj te ova bahtale (2. Timotej 3:16, 17).

E Jehovaskere svedokija tane paše e Devleja; ola ka pomožinen tuke te haljove odova so poučinela i Biblija. Tu samo vakjer lenge kaj mangea te proučine i Biblija. Ola na rodena love odoleske (Matej 10:8). Isto agjaar, šaj te dža ko lengere sostanokija. O sostanokija ikjerenape ko thana kote so obožavinelape o Devel, ola vikinenape Thagaripaskere Sale. Ako džaja ko sostanokija, sigate ka džane but bukja bašo Devel.

Šaj te sikljove bašo Devel taro bukja so kjergja. Na primer, i Biblija vakjerela: ,O Devel kjergja o nebo thaj i phuv‘ (1. Mojseeva 1:1). Kjeda o Devel kjergja o „nebo“ tegani kjergja o Kham. Akana, so sikavela amengje odova bašo Devel? Odova sikavela kaj e Jehova isile bari mokj. Samo Ov šaj te kjerel asavki mokjno buti sar so i o Kham. Isto agjaar sikavela amenge kaj o Jehova tano mudro hem odoleske šaj sine te kjerel o Kham kova so dela svetlo hem takjarela amen, a nikjed na trošinelape.

Sa o Jehova so kjergja sikavela kaj ov mangela amen. Razmislin baši o različno ovošje so isi ki Phuv. Jek primer, o Jehova šaj sine te kjerel amenge samo phabaja ili te nakjerel nisavo ovošje. Ama, o Jehova dingja amen but ovošje, tikne, bare, so isilen razlika ki boja hem ko lezeti. Akava sikavela kozom o Jehova mangela amen hem ljubezno dela amen sa so valjani amenge (Psalm 104:24).