O političarija predupredinena kaj panda hari ka ovel Armagedon — So vakerela i Biblija?

Ponedelnik, 10 oktomvri 2022 berš, rano sabajle ruska rakete pogodingje poviše dizja ki Ukraina adaleske so angleder duj dive jekh bari eksplozija oštetingja o mosti kova so povrzinela o Krim hem i Rusija. Akava ulo pali izjava e političarengiri kaj panda hari ka ovel Armagedon.

• „O rizik taro nuklearno Armagedon tano panda pobaro nego ko vreme keda sine o [amerikansko pretsedateli o Džon ] Kenedi hem i kubansko raketno kriza... Mislinava kaj, ako nekoj probinela te koristinel taktično nuklearno oružje, adava sigurno ka anel dži ko Armagedon“ (izjava taro amerikansko pretsedateli o Džo Bajden, dendi ko 6 oktomvri 2022 berš).

• „Soglasinava man kaj but paše siem ko Armagedon, ko rizik tani celi planeta“ (izjava taro ukrainsko pretsedateli o Volodimir Zelenski dendi bašo Bi-bi-si ko 8 oktomvri 2022 berš, keda pučle le bašo adava save bi ovena sine o posledice ako koristinela pe nuklearno oružje).

Ako koristinela pe nuklearno oružje, dali adava ka anel dži ko Armagedon? So vakerela i Biblija?

Dali o nuklearno oružje ka anel dži ko Armagedon?

Na. O lafi „Armagedon“ pojavinela pe samo jekh puti ki Biblija, ko Otkrovenie 16:16, hem adathe na kerela pe lafi baši vojna maškar o države ko sveto, nego maškar o Devel hem o „carija taro celo sveto“ (Otkrovenie 16:14). Ki vojna Armagedon, o Devel ka uništinel o manušikane vlade (Daniel 2:44).

Te šaj poviše te doznajne so ka značinel o Armagedon e Phuvjake, čitin i statija Što e Armagedon?

Dali i Phuv hem o manuša ka oven uništime ki nuklearno vojna?

Na. Iako ki idnina o manušikane vladetelija šaj ka koristinen nuklearno oružje, o Devel nane te dozvolinel i Phuv te ovel uništimi. Ki Biblija pišinela:

• „I phuv ačhovela zasekogaš“ (Propovednik 1:4).

• „O pravedna manuša ka nasledinen i phuv hem ka živinen večno ki late“ (Psalm 37:29).

Ama, o bibliska proroštvija hem o momentalna nastanija sikavena kaj ka oven bare promene ki manušikani istorija (Matej 24:3-7; 2. Timotej 3:1-5). Bašo adava so vakerela i Biblija baši amari idnina šaj te doznajne taro amaro besplatno biblisko kursi.