Со сикльовас таро думес, колато пхенгяс о Яков, англал те мерел? (2 част)

1. Со ка дикхас калке урокиесте?

Е Яковескере чшаве бешенас турял лесте тай шуненас внимателно со мангел те пхенел ов секоне йекхеске лендар. Сарто дикхлям ко предишно уроки, о Яков пхенгяс е Рувимиеске, е Симеониеске, е Левиске тай е Юдаске букя, колато он на мислиненас, кай ка шунен. Аке соске он чудиненас пес со ка пхенел пе околе охто чшавенге — о Завулон, о Исахар, о Дан, о Гад, о Асир, о Нефталим, о Йосиф тай о Вениамин. Акана ка дикхас со ащи те сикльовас далкхестар со пхенгяс ленге-да о Яков.a

О ЗАВУЛОН

2. Со пхенгяс о Яков е Завулониеске тай сар лескере думес ачшиле? (Битие 49:13) (Дикх о блокчес-да.)

² Четине Битие 49:13. О Яков пхенгяс, кай е Завулониескере чшаве тай унукя ка бешен ки северно част тари Обещиме пхув паше жи ко морес. Декхате 200 бреша палал далкхесте о завулонця получинде пхув машкар о Галилейско езеро тай о Средиземно морес. О Моисей пхенгяс: „Бари радост те овел тут, Завулоне, кана цидес дроместе.“ (Втор. 33:18) Ащи о Моисей те мангляс те пхенел, кай о завулонця ка ащи лесно те жан авере тханенде те бикинен тай те кинен букя таро мануша. Сар-да те овелас, лен сине соске те овен щастлива.

3. Со ка помагинел аменге те овас доволна е букиенца, колато иси амен?

³ Со сикльовас? Со-да те ачшол амаре животосте, винаги ка овел со те анел аменге радост. Ка овас щастлива, ако синям доволна е букиенца, колато иси амен. (Пс. 16:6; 24:5) Подекхана си по-лесно те мислинас е букиенге, колато нанай амен, вместо е шукаре букиенге, колато иси амен. Аке соске дикх те на бистерес саве шукар букя иси тут. (Гал. 6:4)

О ИСАХАР

4. Сави благословия диняс о Яков е Исахариес тай сар ачшили ой? (Битие 49:14, 15) (Дикх о блокчес-да.)

⁴ Четине Битие 49:14, 15. О Яков хвалингяс е Исахариес, кай си бут букярно, като пхенгяс, кай ов си зорало сар хер, ковато пхиравел баро пхарипе пе думесте. Ов също пхенгяс леске, кай ка овел лес шукар пхув. Калка букя ачшиле, кана е Исахериескоро племе лиляс и пхув турял и лен Йордан, която делас бут хабе. (Ис. Н. 19:22) Он керенас бут бути, за те садинен пи пхув, ама денас всичко пестар те помагинен околенге-да. (3 Царе 4:7, 17) Например, кана о Варак тай и Девора мангле помощ таро израилтяня, за те марен пес е манушенца таро Ханаан, е Исахериескоро племе сине готово те помагинел тогава тай авер-да дром. (Съд. 5:15)

5. Соске требе те дас всичко амендар анди служба?

⁵ Со сикльовас? Кана дас всичко амендар анди служба, анас бари радост е Йеховаске, сар о мануша таро племе Исахар, колато керенас бут бути. (Екл. 2:24) Например о пхрала, колато дикхен е сбориеске, на требе те марен пес декхаса, ама требе те пазинен амен таро букя, колато ащи те аравен амаро амалипе е Йеховаса. (1 Тим. 3:1; 1 Кор. 5:1, 5; Юда 17-23) Он ден всичко пестар те керен проповегя тай те помагинен аменге те продължинас те служинас е Йеховаске. (1 Тим. 5:17)

О ДАН

6. Сави задача сине е манушен таро племе Дан? (Битие 49:17, 18) (Дикх о блокчес-да.)

⁶ Четине Битие 49:17, 18. О Яков пхенгяс, кай о Дан сине сар сап, ковато ащи те данделел животнонен, колато си бут по-баре лестар, сар о граста, коленца жан маримнасте. О племе Дан сине смело тай готово те марел пес е израилтяниенгере душманиенца. Ко дром кариг и Обещиме пхув, он пхиренас най-палал, за те пазинен околен. (Чис. 10:25) Окола нащине те дикхен всичко со керен он, ама ленгери задача сине бут важно.

7. Со на требе те бистерас сави-да задача те овел амен ко сбори?

⁷ Со сикльовас? Подекхана ащи те мислинес, кай никхой на дикхел со керес. Например ащи те чистингян и зала, те помагингян те керел пес ремонти лате, те помагингян ко конгреси или те кергян авер букя околенге. Бут си шукар, кай керес салка букя! Ма бистер, кай о Йехова дикхел тай бут ценинел всичко со керес за леске. Ов си най-щастливо, кана служинес леске, ма соскето окола ка хвалинен тут, ама соскето мангес те сикавес кибор бут дехес лес. (Мат. 6:1-4)

О ГАД

8. Соске сине лесно о душманя те ухкьен мамуй о племе Гад? (Битие 49:19) (Дикх о блокчес-да.)

⁸ Четине Битие 49:19. О Яков пхенгяс, кай разбойникя ка авен мамуй о Гад. Кана накхле декхате 200 бреша, о мануша таро племе Гад лиле сар наследство пхув околе ригатар тари лен Йордан, кате сине е народоскере душманя. Аке соске сине бут лесно о душманя те ухкьен мамуй ленде. Ама он мангле те ачшон калке пхувяте, соскето отхе сине бут тхана, коленде те чарьон ленгере животна. (Чис. 32:1, 5) О мануша таро племе Гад сине бут смела тай верувиненас, кай о Йехова ка помагинел ленге те марен пес пе душманиенца тай те лен и пхув, която ов диняс лен. Он даже бичшалде пе войникиен бут бреша те помагинен окола племена те лен пи пхув околе ригатар тари лен Йордан. (Чис. 32:16-19) О мануша таро племе Гад верувиненас, кай о Йехова ка пазинел ленгере ромниен тай ленгере чшавен, жикай о рома си дуре. О Йехова благословингяс лен далкхеске, кай он сине смела тай кай помагиненас околенге даже кана на сине лесно. (Ис. Н. 22:1-4)

9. Саве решения ка лас, ако мукас амен е Йеховаске андо васта?

⁹ Со сикльовас? За те служинас е Йеховаске, кана си аменге пхаро, требе те продължинас те мукас амен леске андо васта. (Пс. 37:3) Бут пхрала тай пхеня сикавен, кай керен давкха, като мукен всичко, за те ащи те помагинен те строинен пес залес, те проповединен отхе, кате иси нужда или те помагинен авере букиенца. Он керен калка букя, соскето жанен, кай о Йехова ка дикхел ленге. (Пс. 23:1)

О АСИР

10. Со на керде о мануша таро племе Асир? (Битие 49:20) (Дикх о блокчес-да.)

¹⁰ Четине Битие 49:20. О Яков пхенгяс, кай о мануша таро племе Асир ка овен барвале тай давкха-да ачшило. Ленгери пхув делас най-бут хабе тай сине паше жи ко Средиземно море, кате сине и барвали-да диз Сидон. (Втор. 33:24) Ама о мануша таро племе Асир на гонинде е ханаанциен тари пхув. (Съд. 1:31, 32) Ащи ашал далкхеске кай барвалиле тай кай о мануша турял ленде керенас кханилипе, он те на денас всичко пестар те служинен е Йеховаске. Например кана о Варак мангляс помощ таро израилтяня, за те марел пес е манушенца таро Ханаан, никхой таро племе Асир на гело те помагинел. Аке соске о мануша таро племе Асир на дикхле саве букя кергяс о Йехова, за те помагинел пе народоске те побединел. (Съд. 5:19-21) Сигурно он бут лажаниле, кана шунде сар о Варак тай и Девора гилябенас: „О Асир бешелас турял о морес тай нищо на кергяс.“ (Съд. 5:17)

11. Соске о парес на требе те овен о най-важно аменге?

¹¹ Со сикльовас? Мангас те дас е Йеховас о най-лачшо амендар. Аке соске на требе те мислинас сар о мануша ко светос, коленге о парес си о най-важно. (Пр. 18:11) Аме жанас, кай требен аменге парес, ама на мислинас, кай он си по-важна таро Йехова. (Екл. 7:12; Евр. 13:5) На дас амаро време тай амаре силес букиенге, колато на требен аменге, а керас всичко со ащи е Йеховаске тай жанас, кай ако ачшовас леске верна, ов ка благословинел амен ко нево светос. (Пс. 4:8)

О НЕФТАЛИМ

12. Сар може би ачшило давкха со пхенгяс о Яков е Нафталимиеске? (Битие 49:21) (Дикх о блокчес-да.)

¹² Четине Битие 49:21. О Яков пхенгяс, кай о Нефталим ка пхенел шукар думес. Давкха ащи те сикавел сар хоратингяс о Исусес, кана сине ки пхув. Ов бут време бешто ки диз Капернаум, която о племе Нефталим получингяс сар наследство, тай даже пхенел пес, кай кайка си е Исусескери диз. (Мат. 4:13; 9:1; Йоан 7:46) О пророк Исаия пхенгяс, кай о Исусес ка овел сар „бари светлина“, която о мануша таро Завулон тай таро Нефталим ка дикхен. (Иса. 9:1, 2) Ашал далкхеске сар сикавелас е манушен, о Исусес сине „и истинско светлина, която дел светлина секоне йекхе манушес“. (Йоан 1:9)

13. Сар ащи те анас радост е Йеховаске, кана хоратинас?

¹³ Со сикльовас? Е Йеховаске си важно со тай сар хоратинас. Сар ащи те пхенас „шукар думес“, колато анен радост е Йеховаске? Като на хохавас. (Пс. 15:1, 2) Също като дас куражи околен амаре думенца, например като хвалинас лен, кана керен лачше букя. Авере ригатар дикхас те на хоратинас околенгере грешкенге тай те на ровас амен. (Еф. 4:29) Също ащи те дикхас те сикльовас по-лачшес сар те започнинас разговори е манушенца, за те ащи те проповединас ленге.

О ЙОСИФ

14. Сар давкха со пхенгяс о Яков е Йосифиеске ачшило? (Битие 49:22, 26) (Дикх о блокчес-да.)

¹⁴ Четине Битие 49:22, 26. О Яков сигурно керелас по барипе е Йосифиеса, соскето о Йехова избирингясас лес „машкар лескере пхраленде“. О Яков пхенгяс, кай ов си сар „клони каштестар, ковато дел бут плодове“. О Яков сине о каш, а о Йосиф сине о клони, ковато иклило калке каштестар. О Йосиф сине о първо чшаво, ковато биянгяс и Рахил, кола о Яков бут дехелас. О Яков пхенгяс, кай о Йосиф ка лел двойно наследство вместо о Рувим, ковато сине е Лиякоро първо чшаво. (Бит. 48:5, 6; 1 Лет. 5:1, 2) Кавка ачшило, кана таре Йосифиескере чшаве, о Ефрем тай о Манасия, ачшиле дуй племена, тай о дуй-да получинде пхув. (Бит. 49:25; Ис. Н. 14:4)

15. Со кергяс о Йосиф, кана керде леске кханилипе?

¹⁵ О Яков пхенгяс, кай мануша, ка „чшиен стрелес кариг [о Йосиф] тай ка мразинен лес“. (Бит. 49:23) Калка мануша сине лескере пхрала, колато къскандинде лес тай керде леске кханиле букя. Ама о Йосиф на холянгяс нито пе пхраленге, нито е Йеховаске. О Яков пхенгяс, кай е Йосифиескоро лъкос „ачшило зорало тай лескере васта сине зорале тай сиго чшиенас стрелес“. (Бит. 49:24) О Йосиф мукелас пес е Йеховаске андо васта, кана сине лес изпитания тай ма само простингяс пе пхраленге, а сине лачшо-да кариг ленде. (Бит. 47:11, 12) Ов мукляс лескере изпитания те керен лес по-лачшо мануш. (Пс. 105:17-19) Аке соске о Йехова ащине те използвинел лес, за те керел бут баре букя.

16. Сар ащи те овас сар о Йосиф, кана иси амен изпитания?

¹⁶ Со сикльовас? На требе ашал о изпитания те спиринас те дехас е Йеховас тай амаре пхрален тай пхениен. Ма бистер, кай о Йехова ащи те керел амен по-лачше мануша, ако продължинас те служинас леске, кана си аменге пхаро. (Евр. 12:7) Ов ащи те сикавел амен те овас сар лесте, те овас по-милостива тай те овас готова те простинас. (Евр. 12:11) О Йехова ка благословинел амен-да, кай издържинас, сарто благословингяс е Йосифиес.

О ВЕНИАМИН

17. Сар ачшиле о букя, колато о Яков пхенгяс, кай ка ачшон е Вениаминеса? (Битие 49:27) (Дикх о блокчес-да.)

¹⁷ Четине Битие 49:27. О Яков пхенгяс, кай о Вениамин ка марел пес шукар сар рув. (Съд. 20:15, 16; 1 Лет. 12:2) О първо цари андо Израил, о Саул, сине лескере племестар. О Саул смело марелас пес е филистимциенца. (1 Царе 9:15-17, 21) Бут бреша палал далкхесте и царица Естир тай о Мардохей, колато сине таро племе Вениамин, спасинде е израилтяниен, за те на овен мударде. (Ест. 2:5-7; 8:3; 10:3)

18. Сар ащи те овас верна сар о мануша таро племе Вениамин?

¹⁸ Со сикльовас? Саворе таро племе Вениамин сине бут щастлива, кана о Саул, ковато сине ленгере племестар, ачшило цари. Ама кана о Йехова кергяс цари е Давидес, ковато сине таро племе Юда, он подкрепиненас е неве цариес-да. (2 Царе 3:17-19) Бут бреша палал далкхесте, кана окола племена ухтиниле мамуй о племе Юда, о мануша таро племе Вениамин ачшиле верна е цариеске, колес о Йехова избирингясас тай ковато сине таро племе Юда. (3 Царе 11:31, 32; 12:19, 21) Аме-да мангас сар ленде те ачшовас верна е Девлеске, като шунас калкен, колен ов избирингяс те водинен лескере народос. (1 Сол. 5:12)

19. Соске о букя, колато пхенгяс о Яков, англал те мерел, си амари лачшипнаске?

¹⁹ Ащи те сикльовас бут таро букя, колато пхенгяс о Яков, англал те мерел. Като дикхас сар калка букя ачшиле, амари вяра далкхесте, кай о Йехова ащи те пхенел со ка ачшол, барьол, тай ахальовас-да по-лачшес сар ащи те анас радост амаре Девлеске.