Сар о Йехова помагинел аменге те издържинас?

1. Соске си аменге пхаро те издържинас жи ко крайос, ама кой ащи те помагинел аменге? (1 Петър 5:10)

Саворен иси амен бут проблемя тай подекхана ащи те мислинас кай нанай те ащи те издържинас жи ко крайос. Десаве амендар си бут насвале. Аверенге си пхаро соскето декхой колес дехен муло. Иси пхрала тай пхеня-да колен декхой ленгере семействостар или таро правителство мангел те спиринел те служинен е Йеховаске. (Мат. 10:18, 36, 37) Ов сигурно кай саве-да проблемя те овен тут о Йехова ащи те помагинел туке те издържинес. (Четине 1 Петър 5:10.)

2. Соске ащи те издържинас?

² Те издържинас означинел те ачшовас верна е Йеховаске тай те овел амен радост далкхестар даже кана иси амен проблемя, дикхен те спиринен амен те служинас е Йеховаске или си аменге трудно те на керас безех. За те издържинас требе също те верувинас кай всичко ка опринел пес. Аме ащи те издържинас само соскето о Йехова дел амен „и сила, която си бут по-бари тари сила, която йекхе манушес ащи те овел“. (2 Кор. 4:7) Калке урокиесте ка дикхас щар букя колато о Йехова дел амен за те помагинел аменге те издържинас. Ка ахальовас също со ащи те керас за те овен калка букя амаре лачшипнаске.

И МОЛИТВА

3. Соске ащи те пхенас кай и молитва си чудо?

³ О Йехова кергяс йекх чудо за те ащи те издържинас. Въпреки кай синям безехале ов кергяс те ащи те хоратинас леса тай ов те шунел амен. (Евр. 4:16) Мислине далкхеске: Аме ащи те молинас амен е Йеховаске всичконаске тай винаги кана мангас. Ов ащи те шунел амен сави-да чшиб те хоратинас тай кате-да те бешас даже ако синям дур авере манушендар или синям ко пханлибе. (Йона 2:1, 2; Деян. 16:25, 26) Кана си аменге бут пхаро тай на жанас со те пхенас леске о Йехова пак ащи те ахальовел со мангас те пхенас. (Рим. 8:26, 27) И молитва верно си баро чудо!

4. Катар жанас кай кана молинас е Йеховас те помагинел аменге те издържинас, ов ка керел лес?

⁴ Тари Библия ахальовас кай „со-да те мангас таро Дел, ов шунел амен, ако мангас букя, колато си леске угодна“. (1 Йоан 5:14) Ащи ли те молинас е Йеховас те помагинел аменге те издържинас? Ва! О Йехова мангел те продължинас те издържинас. Катар жанас? О Йехова пхенел аменге кай кана ачшовас верна ов ащи те отговоринел е Бенгеске. (Пр. 27:11) И Библия пхенел кай о Йехова мангел „те сикавел пи сила, като помагинел калкенге, колато си леске верна пе целоне вогиеса“. (2 Лет. 16:9) Ащи те овас сигурна кай о Йехова хем мангел хем иси лес и сила те помагинел аменге те издържинас. (Иса. 30:18; 41:10; Лука 11:13)

5. Сар и молитва помагинел те локьол аменге? (Исаия 26:3)

⁵ И Библия пхенел кай кана молинас амен е Йеховаске „о мири таро Дел, ковато си по-баро таро букя, колато йекх мануш ащи те ахальовел, ка пазинел [амаре] сърца тай [амаре] гогя“. (Фил. 4:7) Бут синям благодарна далкхеске. Е манушен-да колато на служинен е Йеховаске иси проблемя. Бут лендар дикхен те керен десаве букя за те локьол ленге тай те бистерен пе проблемя. Например дикхен те керен медитация за те на мислинен нисоске тай те спиринен те хан холи. Ама си бут опасно мануш те керел салка букя соскето тогава о демоня ащи те траден лес те мислинел далкхеске со манген он. (Дикх Матей 12:43-45.) Даже ако далкхестар локьол леске, нанай те овел лес о истинско мири таро Йехова, ковато си бут по-шукар. Кана молинас амен е Йеховаске сикавас кай мукас амен лескере вастенде тай ов дел амен мири. (Четине Исаия 26:3.) Например о Йехова дел амен мири като помагинел аменге те дас амен годи стиховиенге колендар те локьол аменге. Калка стиховя помагинен аменге те дас амен годи кай ов бут дехел амен тай мангел те овел жи аменде. (Пс. 62:1, 2)

6. Саве букиенге ащи те молинес тут?

⁶ Со ащи те керес? Кана си туке пхаро пхен е Йеховаске то воги. „Мук то пхарипе“ лесте тай манг те дел тут мири. (Пс. 55:22) Молине лес те дел тут годи-да за те жанес со те керес. (Пр. 2:10, 11) Ма бистер те благодаринес-да леске. (Флп. 4:6) Мислине сар помагинел туке секо диес те издържинес тай благодарине леске саворе шукаре букиенге колато дел тут. Ма мук о проблемя те пханден те якха тай те на дикхес о благословиес колато иси тут. (Пс. 16:5, 6)

И БИБЛИЯ

7. Сар като изучинас и Библия ащи те овел аменге по-лесно те издържинас?

⁷ О Йехова диняс амен по Слово за те помагинел аменге те издържинас. Ки Библия иси бут стиховя колато сикавен аменге кай ащи те овас сигурна кай о Йехова ка помагинел аменге. Дикх йекх лендар. Ко Матей 6:8 пишинел: „Тумаро дад жанел со требел туменге още англал те пхенен леске.“ О Исусес пхенгяс давкха, а никхой на пенжарел е Йеховас по-лачшес лестар. Ащи те овас сигурна кай кана си аменге пхаро о Йехова жанел со требел аменге тай ка помагинел аменге. Ки Библия си е Йеховаскере обещания колато ащи те ден амен силес за те издържинас о проблемя. (Пс. 94:19)

8. a) Пхен саво съвети тари Библия ащи те помагинел аменге те издържинас. б) Со ащи те помагинел аменге те дас амен годи со пхенел и Библия, кана требел аменге помощ?

⁸ И Библия дел амен съвекя колато ащи те помагинен аменге те издържинас о проблемя тай те лас шукар решения. (Пр. 2:6, 7) Например пхенел аменге те спиринас те хас холи далкхеске со ащи те ачшол, а те мукас амен е Йеховаске андо васта секо диес. (Мат. 6:34) Ако четинас и Библия секо диес тай мислинас хоресте далкхеске со четингям, ка овел по-лесно те дас амен годи со пхенел ой кана ка требе те лас решение или кана мангас те жанас сар те справинас амен десаве проблемиеса.

9. Сар чувствинас амен кана четинас ки Библия сар о Йехова помагингяс пе служителенге?

⁹ Ки Библия ащи те четинас манушенге-да, колато мукенас пес е Йеховаске андо васта тай ов помагингяс ленге. (Евр. 11:32-34; Як. 5:17) Кана мислинас далкхеске сар о Йехова помагингяс ленге амари вяра кай ов ка помагинел аменге-да барьол. Ов си „амаро гаравдуно тхан тай амари сила тай си готово те помагинел аменге кана си аменге пхаро“. (Пс. 46:1) Като дикхас сар е Йеховаскере служителя ко пуране диеса сикавде вяра тай ачшиле леске верна даже кана на сине ленге пхаро, аме-да мангас те овас сар ленде. (Як. 5:10, 11)

10. Со те керес за те ащи и Библия те помагинел туке?

¹⁰ Со ащи те керес? Четине и Библия секо диес тай пишине туке о стиховя колато дикхлян кай помагинен туке. Бут мануша четинен о ежедневно стихи анди явин за те овел лен шукар букя коленге те мислинен презал о диес. Йекх пхен колакоро алав си Мариa дикхляс кай кавка си шукар кана лакоро дад тай лакери дай ахалиле кай иси лен ракос. Со помагингяс лаке те издържинел жикай дикхелас лен презал о последна масекя англал те мерен? Ой пхенел: „Секо явин четинавас о ежедневно стихи тай мислинавас со сиклильом лестар. Давкха помагингяс манге секо диес те мислинав е Йеховаске тай е шукаре букиенге, колато ов сикавел амен тари Библия вместо те мислинав само ме проблемиенге.“ (Пс. 61:2)

ТЕ ПХРАЛА ТАЙ ТЕ ПХЕНЯ

11. Сар чувствинас амен като мислинас кай амаре пхрала тай пхеня издържинен кана иси лен проблемя?

¹¹ О Йехова диняс амен амаре пхрален тай пхениен таро цело светос за те помагинел аменге те издържинас. Като жанас „кай о съща кханиле букя ачшон амаре пхраленца“ синям сигурна кай на синям коркоре. (1 Пет. 5:9) Иси пхрала тай пхеня колен иси проблемя сар амаренде тай ачшовен верна е Йеховаске. Аке соске ащи те овас сигурна кай аме-да ащи те издържинас. (Деян. 14:22)

12. Сар ащи амаре пхрала тай пхеня те помагинен аменге тай со ащи аме те керас за ленге? (2 Коринтяни 1:3, 4)

¹² Амаре пхрала тай пхеня ащи те ден амен силес те издържинас е букиенца колато пхенен аменге тай керен за аменге. Десаве пхрала тай пхеня помагиненас е Павлеске. Ко лила колато пишингяс ов пхенгяс кола сине калка колато помагиненас леске кана нащине те икльол пумендар тай благодарингяс ленге. Калка пхрала тай пхеня утешиненас е Павлес тай денас лес со требел леске. (Флп. 2:25, 29, 30; Кол. 4:10, 11) Кана аменге-да авдиес требен силес за те издържинас, амаре пхрала тай пхеня си жи аменде, тай кана ленге требел помощ аме-да на мукас лен. (Четине 2 Коринтяни 1:3, 4.)

13. Со помагингяс е Маяке те издържинел?

¹³ Амаре пхрала тай пхеня бут помагинде йекхе пхеняке тари Русия колакоро алав си Мая. Презал о 2020 бреш о жандаря дине лакере кхересте за те аракхен букя ашал коленге те долен ла. По-късно ой требелас те защитинел пес англал о съдос ашал далкхеске кай проповединел. И Мая пхенел: „Подекхана синьомас измориме, тъжно тай бут хавас холи. Ама ме пхрала тай ме пхеня обадиненас пес манге тай пишиненас манге съобщения тай лила. Он пхененас манге кибор бут дехен ман. Винаги жангльом, кай иси ман баро семейство, ковато дехел ман, ама кана он керде саворе калка букя за манге дикхльом давкха още по-шукар.“

14. Со ащи те керас за те помагинен аменге амаре пхрала тай пхеня? (Дикх и снимка-да.)

¹⁴ Со ащи те керес? Кана си туке пхаро си бут важно те овес те пхраленца тай те пхениенца. Ма лажа те мангес помощ таро старейшиня. Он си „сар гаравдуно тхан, колесте мануш ащи те гаравел пес тари балвал тай таро баро бришим“. (Иса. 32:2) Ма бистер кай те пхраленге тай те пхениенге също си пхаро. Кана керес лачше букя декхаске ка овес по-щастливо тай давкха ка помагинел туке те издържинес тере проблемя. (Деян. 20:35)

Е ЙЕХОВАСКЕРЕ ОБЕЩАНИЯ

15. Сар е Йеховаскере обещания помагинде е Исусеске тай сар помагинен аменге-да? (Евреи 12:2)

¹⁵ Е Йеховаскере обещания коленге синям сигурна кай ка ачшон помагинен аменге те издържинас. (Рим. 15:13) Ма бистер кай о Исусес издържингяс о най-пхаро диес пе животостар ки пхув соскето мислинелас е букиенге колато о Йехова обещингясас леске. (Четине Евреи 12:2.) О Исусес жанелас кай като ачшол верно е Йеховаске ка помагинел лескоро алав те овел свято. Ов също мислинелас далкхеске сар ка иринел пес паш пе Дадесте тай ка ачшол Цари тай заедно пе пхраленца ка управлинен ко небес. Е Девлескоро обещание кариг аменде-да кай ка живинас вечно ко нево светос помагинел аменге те издържинас саворе проблемя колато иси амен ке Бенгескоро светос.

16. Сар е Йеховаскере обещания помагинде йекхе пхеняке тай со сикльовес лакере думендар?

¹⁶ Дикх сар о обещание те живинас вечно ко нево светос помагингяс йекхе пхеняке тари Русия колакоро алав си Алла. О жандаря долде лакере ромес тай чшитле лес ко пханлибе жикай авел лескоро делос. Кана ачшило давкха и Алла пхенгяс: „Молинав ман е букиенге колато жарас те ачшон тай мислинав за ленге за те на откажинав ман. Ахальовав кай кана накхен о проблемя ка авен шукар букя. О Йехова ка унищожинел пе душманиен тай ка благословинел амен.“

17. Сар ащи те сикавас кай синям благодарна кай о Йехова пхенгяс аменге со ка керел? (Дикх и снимка-да.)

¹⁷ Со ащи те керес? Мислине е шукаре букиенге колато о Йехова обещинел туке те ачшон. Представине туке сар ка живинес ко нево светос те саворе амаленца тай те семействоса тай кибор щастлива ка овен саворе. О кханиле букя колато иси авдиес нанай те ачшон завинаги тай нанай те дикхьон аменге боркха пхаре ко нево светос. (2 Кор. 4:17) Кер со ащи за те пхенес околенге-да саве букя обещинел о Дел. Мислине кибор си пхаро о животос е манушенгоро колато на служинен е Йеховаске соскето лен-да иси проблемя ама на жанен саве шукар букя ка керел о Йехова. Даже ако само хари хоратинес ленца он ащи те манген те сикльон по-бут е Девлескере Царствоске тай е букиенге колато ка керел ов.

18. Соске ащи те верувинас кай о Йехова ка керел со обещингяс?

¹⁸ О Йов цидингяс бут, ама ачшило верно е Йеховаске тай пхенгяс леске: „Акана жанав кай ту ащи те керес всичко тай нанай букя колато мангес, ама нащи те керес.“ (Йов 42:2) О Йов ахалило кай нищо нащи те спиринел е Йеховас те керел давкха со обещингяс. Кана на бистерас кай о Йехова ка махнинел амаре проблемя сарто обещингяс, ка овен амен силес те издържинас. Например представине туке кай йекх жувли си насвали бут време. Бут си лаке пхаро соскето гели буте докториенде ама никхой нащине те помагинел лаке. Ама после ой аракхел лачше докториес ковато пхенел лаке со си лаке тай сар ка помагинел лаке те опринел пес. Акана си лаке по-лесно те издържинел соскето жанел кай ка саскьол. Аме-да ащи те издържинас соскето синям сигурна кай е Девлескоро обещание те керел и пхув рай ка ачшол.

19. Со требел аменге за те издържинас?

¹⁹ Сарто дикхлям о Йехова помагинел аменге те издържинас амаре проблемя като дел амен и молитва, и Библия, амаре пхрален тай пхениен тай пе обещания. Ако дас всичко амендар те молинас амен, те четинас и Библия, те овас амаре пхраленца тай пхениенца тай те мислинас е букиенге колато обещинел о Йехова, ов ка помагинел аменге со-да те ачшол амаре животосте. Тогава ка ащи те издържинас жикай авел о крайос е Бенгескере светоскоро. (Флп. 4:13)