Ов сигурно кай о Йехова дехел тут

1. Соске динян то животос е Йеховаске? (Дикх и снимка-да.)

Дес ли тут годи кана молингян тут е Йеховаске тай пхенгян леске кай дес то животос леске? Ту кергян давкха соскето ахалилян саво си ов тай задехингян лес. Обещингян леске кай ов ка овел о най-важно те животосте тай кай ка дехес лес те целоне сърцеса, вогиеса, гогяса тай силаса. (Мар. 12:30) Ти любов кариг лесте барьол са по-бут. Тогава со ка пхенес ако декхой пучел тут: „Верно ли дехес е Йеховас?“ Веднага ка пхенес: „Дехав лес по-бут секастар тай всичконастар!“

2-3. Состе о Йехова мангел те овас сигурна тай со ка ахальовас калке урокиестар? (Йеремия 31:3)

² Ама со ка пхенес ако декхой пучел тут: „Сигурно ли синян кай о Йехова дехел тут?“ Ка отговоринес ли веднага или ка чудинес тут со те пхенес например соскето на мислинес кай иси соске о Йехова те дехел тут? Йекх пхен колаке сине пхаро жикай барьолас пхенгяс: „Жанав кай дехав е Йеховас, сигурно синьом далкхесте. Ама подекхана чудинав ман дали о Йехова дехел ман.“ Тогава со ащи те помагинел туке те дикхес кай о Йехова дехел тут?

³ О Йехова мангел те овес сигурно кай ов дехел тут. (Четине Йеремия 31:3.) Ов цидингяс тут кариг песте тай кана динян то животос леске тай покръстисайлян ов диняс тут йекх баро подаръки — пери верно любов. Демек о Йехова бут дехел тут тай нисар нанай те мукел тут. Лескере верна служителя си сар златос лескере якхенде. Аке соске ту-да синян бут ценно леске. (Мал. 3:17) О Йехова мангел те овес сигурно сар о апостол Павел кай ов дехел тут. О Павлес даже пишингяс: „Жанав, кай нито о мериба, нито о животос, нито о ангеля, нито о мануша, колен иси власт, нито о букя, колато ачшон акана, нито о букя, колато ка ачшон андо бъдеще, нито сави-да те овел сила, нито со си упре, нито со си теле, нито нищо авер со си кердо нащи те спиринел е Девлес те сикавел кариг аменде пи любов.“ (Рим. 8:38, 39) Калке урокиесте ка дикхас соске си важно те овас сигурна кай о Йехова дехел амен тай сар те барярас амари вяра далкхесте.

СОСКЕ СИ ВАЖНО ТЕ ВЕРУВИНАС КАЙ О ЙЕХОВА ДЕХЕЛ АМЕН

4. Саве хохаймнасте мангел о Бенг те верувинас тай сар ащи те заачшовас мамуй лесте?

⁴ Като верувинас кай о Йехова дехел амен нанай те мукас о Бенг те хохавел амен. (Еф. 6:11) О Бенг ка дел всичко пестар те спиринел амен те служинас е Йеховаске. Йекх таро букя колато керел си те хохавел кай о Йехова на дехел амен. Ма бистер кай о Бенг на совел. И Библия пхенел, кай ов си сар лъвос. (1 Пет. 5:8, 9) О лъвовя дикхен те хан животнонен колато си слаба тай нащи те нашен. О Бенг-да дикхел те перавел амен кана синям слаба — например кана си аменге пхаро ашал десаве букиенде колато ачшиле преди, ашал о проблемя колато иси амен акана или ашал далкхеске кай на жанас со ка ачшол. (Пр. 24:10) О Бенг мангел те керел амен боркха слаба кай те спиринас те служинас е Йеховаске. Ама аме ащи заачшовас мамуй лесте тай мамуй лескере бенгикане букя като дас всичко амендар те овас сигурна кай о Йехова дехел амен. (Як. 4:7)

5. Соске си боркха важно те усетинас кай о Йехова дехел тай ценинел амен бут?

⁵ Като верувинас кай о Йехова дехел амен, амаро амалипе леса ка ачшол по-зорало. Соске ащи те пхенас давкха? О Йехова кергяс е манушен те манген те сикавен любов кариг околенде тай те усетинен околенгери любов. Кана декхой сикавел кай дехел амен аме-да мангас те дехас лес. Аке соске кибор по-бут усетинас кай о Йехова дехел тай ценинел амен боркха по-бут аме ка дехас лес. (1 Йоан 4:19) Тай кибор по-бут дехас лес боркха по-бут ов дехел амен. И Библия пхенел аменге: „Жан по-паше жи ко Дел тай ов ка авел по-паше жи туменде.“ (Як. 4:8) Тогава сар ащи те овас по-сигурна кай о Йехова дехел амен?

СО АЩИ ТЕ ПОМАГИНЕЛ АМЕНГЕ ТЕ ВЕРУВИНАС КАЙ О ЙЕХОВА ДЕХЕЛ АМЕН?

6. Со ащи те керес ако на синян сигурно, кай о Йехова дехел тут?

⁶ Продължине те молинес е Йеховас те помагинел туке те ахальовес соске дехел тут. (Лука 18:1; Рим. 12:12) Ако требе секо диес молине тут бут дром е Йеховаске те помагинел туке те дикхес о лачшипе ковато ов дикхел туте. Подекхана ащи те мислинес боркха кханиле букя за туке кай те овел туке пхаро те верувинес кай о Йехова дехел тут. Ма бистер кай о Йехова пенжарел тут по-лачшес тутар. (1 Йоан 3:19, 20) Ов дикхел о лачше букя туте колато ту нащи те дикхес. (1 Царе 16:7; 2 Лет. 6:30) Аке соске ащи те пхенес леске то воги тай те молинес лес те помагинел туке те верувинес кай ов дехел тут. (Пс. 62:8) Акана ка дикхас со ащи те керес после.

7-8. Сар о псалмя помагинен аменге те овас сигурна кай о Йехова дехел амен?

⁷ Верувине далкхесте со пхенел о Йехова. О Йехова диняс пе святоне духостар е мрушен колато пишинде и Библия. Аке соске о букя колато он пишинде е Йеховаске си верна. Йекх таро псалмя ковато пишингяс о Давид сикавел кибор бут о Йехова дикхел за аменге. Лесте пишинел: „О Йехова си паше жи калкенде, колен иси бари дукх, тай спасинел калкен, колен нанай силес.“ (Пс. 34:18) Кана си туке бут пхаро ащи те мислинес кай синян коркоро. Ама о Йехова пхенел кай си жи туте соскето дикхел кибор бут требел туке лескери помощ. Авере псалмиесте о Давид пишингяс: „Киде ме асва тере гоносте.“ (Пс. 56:8) О Йехова дикхел кана дукхал тут тай тогава лес-да дукхал. Сарто секо капка пани йекхе бутилкате си ценно е манушеске ковато пътувинел ки пустиня, о асва-да колато чшорес си ценна е Йеховаске тай ов помнинел секо дром кана дукхал тут тай кана ровес. Ко Псалм 139:3 четинас: „Ту [Йехова] жанес всичко со керав.“ О Йехова дикхел всичко со керес, ама най-бут мислинел е шукаре букиенге колато керес. (Евр. 6:10) Соске? Соскето си леске бут ценно всичко со керес за те анес леске радост.a

⁸ Калке стиховиенца о Йехова мангел те пхенел туке кай дикхел туке тай кай бут дехел тут. Ама сарто дикхлям, о Бенг мангел те верувинес кай о Йехова на дехел тут. Аке соске ако подекхана мислинес кай давкха си верно, спирине тай пуч тут: „Каске ка верувинав — калкеске колестар „авел секо йекх хохайбе“ или е Девлеске колестар авел и истина?“ (Йоан 8:44; Пс. 31:5)

9. Со обещинел о Йехова калкенге колато дехен лес? (Изход 20:5, 6)

⁹ Мислине далкхеске сар о Йехова икерел пес калкенца колато дехен лес. Дикх со пхенгяс о Йехова е Моисейеске тай е израилтяниенге. (Четине Изход 20:5, 6.) О Йехова обещинел те продължинел те сикавел верно любов кариг калкенде колато дехен лес. Ашал далкхеске кай о Йехова си верно ащи те овас сигурна кай ов нанай те спиринел те дехел декхас ковато дехел лес. (Неем. 1:5) Аке соске ако подекхана мислинес кай о Йехова на дехел тут спирине тай пуч тут: „Ме дехав ли е Йеховас?“ После мислине далкхеске: Ако ту дехес лес тай дес всичко тутар те анес леске радост ащи те овес сигурно кай ов дехел тут бут. (Дан. 9:4; 1 Кор. 8:3) Ако на чудинес тут дали ту дехес е Йеховас соске чудинес тут дали ов дехел тут? Ащи те овес сигурно кай ов винаги ка дехел тут тай нанай те мукел тут.

10-11. Со мангел о Йехова те на бистерес е Исусескере жертваке? (Галатяни 2:20)

¹⁰ Мислине е Исусескере жертваке. О Йехова диняс е манушен о най-баро подаръки. Ов бичшалгяс пе чшес те мерел аменге. (Йоан 3:16) Ама дали о Йехова бичшалгяс пе чшес те мерел за туке? Ва! Дикх со ачшило е Павлеса. Ов кергяс бут кханиле букя англал те ачшол християни тай даже палал далкхесте-да требелас те продължинел те боринел пес пе безехеса. (Рим. 7:24, 25; 1 Тим. 1:12-14) Ама ов сине сигурно кай о Йехова диняс пе Чшес за леске. (Четине Галатяни 2:20.) Ма бистер кай о Йехова диняс е Павлес пе духостар за те пишинел калка думес тай мангел те сикльовас лендар. (Рим. 15:4) О Йехова мангел те верувинес кай е Исусескери жертва си подаръки за туке. Ако верувинес далкхесте ка овес по-сигурно кай о Йехова дехел тут.

¹¹ Бут синям благодарна е Йеховаске кай бичшалгяс е Исусес те мерел за аменге. Ама ов ало ки пхув за те пхенел-да околенге и истина е Девлеске тай те сикавел аменге кибор бут дехел амен о Йехова. (Йоан 18:37)

О ИСУСЕС СИКАВГЯС АМЕНГЕ КИБОР БУТ ДЕХЕЛ АМЕН О ЙЕХОВА

12. Соске ащи те верувинас ко букя колато о Исусес пхенгяс за е Йеховаске?

¹² Кана сине ки пхув о Исусес вогиестар сикавелас е манушенге саво си о Йехова. (Лука 10:22) Ащи те верувинас, кай о букя колато о Исусес пхенгяс за е Йеховаске си верна. Соске? Соскето о Исусес сине ко небес пе Дадеса бут бреша англал те авел ки пхув. (Кол. 1:15) Ов жанел кибор бут лескоро Дад дехел лес тай дикхляс сар сикавел пи любов кариг о верна ангеля тай кариг пе саворе верноне чшенде тай чшайенде ки пхув. Сар о Исусес помагингяс околенге те овен сигурна кай о Йехова дехел лен?

13. Со мангел о Исусес те жанас е Йеховаске?

¹³ О Исусес мангел те жанас кибор бут дехел амен о Йехова. Ко Евангелия декхате 160 дрома ов хоратинел е Йеховаске сар „Дад“. Тай пхенгяс пе ученикиенге кай о Йехова си ленгеро Дад. (Мат. 5:16; 6:26) Англал о Исусес те авел ки пхув е Йеховаскере верна служителя пхененас е Йеховаске „Най-зоралея“, „Най-бареа“ тай авер салка букя. Ама о Исусес най-бут пхенелас е Йеховаске „мо Дад“. Давкха сикавел кай о Йехова мангел лескере служителя те овен зомкха близка леса кибор си йекх чшаво пе дадеса. О Исусес сикавгяс аменге кай о Йехова дехел амен сар йекх дад ковато бут дехел пе чшаворен. Акана ка дикхас сар о Исусес дуй дром използвингяс и дума „Дад“ за те сикавел саво си о Йехова.

14. Сар о Исусес сикавгяс кай секо йекх амендар си ценно амаре небесноне Дадеске? (Матей 10:29-31) (Дикх и снимка-да.)

¹⁴ Първо ка дикхас со пхенгяс о Исусес ко Матей 10:29-31. (Четине.) О Исусес пхенгяс кай амаро Дад жанел точно кате си секо йекх цикно чирикло. Ама о чирикле нащи те дехен е Йеховас тай те служинен леске. Ако о Йехова дикхел е цикне чирикленге боркха бут ащи те овас сигурна кай ов дикхел аменге още по-бут соскето дехас лес тай служинас леске. О Исусес също пхенгяс кай амаро Дад жанел кибор бала иси секоне йекхес амендар. Щом о Йехова жанел салка цикне букя за аменге ащи те овас сигурна кай ов дикхел аменге. О Исусес мангел те жанас кай секо йекх амендар си ценно амаре небесноне Дадеске.

15. Со ахальовес те небесноне Дадеске таре Исусескере думес ко Йоан 6:44?

¹⁵ Акана ка дикхас со авер пхенгяс о Исусес кай кергяс амаро Дад о Йехова. (Четине Йоан 6:44.) Торо небесно Дад помагингяс туке те ахальовес за леске тай те дехес лес. Соске кергяс давкха? Соскето ов дикхляс кай синян лачше вогиескоро. (Деян. 13:48) Кана о Исусес пхенгяс о думес таро Йоан 6:44 ов сигурно мангляс те пхенел о думес колато о Йехова пхенгяс ко Йеремия 31:3. Отхе пишинел: „Ашал далкхеске кай дехав тут тай синьом туке верно, цидингьом тут кариг манде.“ (Йер. 31:3; дикх също Ос. 11:4.) Амаро небесно Дад винаги дикхел о лачшипе туте даже ако ту на дикхес лес.

16. а) Со сикавгяс амен о Исусес тай соске требе те верувинас леске? б) Сар ащи те овес сигурно кай о Йехова си о най-лачшо Дад за туке? (Дикх о блокчес „О Йехова си о най-лачшо Дад за аменге“.)

¹⁶ Като пхенгяс кай о Йехова си амаро Дад о Исусес мангляс те пхенел: „О Йехова нанай само моро Дад, а си тумаро-да Дад.“ Тогава ако подекхана чудинес тут дали о Йехова дехел тут, пуч тут: „На требе ли те верувинав е Исусеске ковато пенжарел амаре Дадес най-лачшес тай винаги пхенел и истина?“ (1 Пет. 2:22)

ДЕ ВСИЧКО ТУТАР ВИНАГИ ТЕ ДИКХЕС КАЙ О ЙЕХОВА ДЕХЕЛ ТУТ

17. Соске требе те дас всичко амендар винаги те дикхас кай о Йехова дехел амен?

¹⁷ Требе те дас всичко амендар винаги те дикхас кай о Йехова дехел амен. Сарто дикхлям амаро душмани о Бенг ка дел всичко пестар те спиринел амен те служинас е Йеховаске тай те на овен амен силес далкхеске. Аке соске нанай те спиринел те традел амен те мислинас кай о Дел на дехел амен. Нисар на требе те мукас о Бенг те хохавел амен! (Йов 27:5)

18. Со ащи те керес за те овес сигурно кай о Йехова дехел тут?

¹⁸ Калке урокиесте дикхлян со ащи те керес за те овес сигурно кай о Йехова дехел тут. Ащи те молинес лес те помагинел туке те ахальовес соске дехел тут. Мислине шукар со ахальовес таро стиховя колато сикавен кай о Йехова дикхел калкенге колен дехел. Ма бистер кай о Йехова винаги ка дехел калкес ковато дехел лес. Нисар ма бистер давкха-да кай ов диняс пе Чшавес те мерел за туке тай кай о Йехова си торо Дад сарто пхенгяс о Исусес. Тогава ако декхой пучел тут: „Сигурно ли синян кай о Йехова дехел тут?“ ка ащи те пхенес: „Ва, ов дехел ман! Тай ме-да дав всичко мандар секо диес те сикавав кай дехав лес!“