Е Йеховаскери любов ачшол завинаги

1-2. Саво проблеми иси буте християниен?

Представине туке со ачшол йекхе лодкаса кана иси бари буря. Ой жал наатхе наотхе. Жикай декхой на мукел котва и лодка ка жал накате мангел. Ама и котва ка икерел и лодка стабилно.

² Кана си туке бут пхаро ащи те овес сар кайка лодка. Те чувства все едно жан наупре нателе, демек променинен пес бут сиго. Йекх диес ащи те овес сигурно кай о Йехова дехел тут тай си жи туте, а ки тасярин те чудинес тут дали ов изобщо дикхел анде туте. (Пс. 10:1; 13:1) Ащи йекх амал те пхенел туке букя колендар те локьол туке за хари. (Пр. 17:17; 25:11) Ама после пак ащи те почнинес те чудинес тут дали о Йехова помагинел туке. Ащи даже те мислинес кай о Йехова мукляс тут. Сар ащи кана иси тут проблемя все едно те мукес котва? Демек сар ащи те овес сигурно кай о Йехова дехел тут тай помагинел туке?

3. Со означинен о думес „верно любов“ ко Псалм 31:7 тай ко 136:1 тай соске ащи те пхенас кай о Йехова сикавел и най-бари верно любов? (Дикх и картинка-да.)

³ Кана си туке пхаро ащи те „мукес котва“ като на бистерес е Йеховаскери верно любов. (Четине Псалм 31:7; 136:1.) О думес „верно любов“ означинен бари любов тай верност която декхой сикавел кариг авересте. О Йехова сикавел и най-бари верно любов. И Библия пхенел кай лесте иси „бари верно любов“. (Из. 34:6, 7) Ки Библия пхенел пес също е Йеховаске: „Сикавес верно любов кариг саворенде, колато роден тут.“ (Пс. 86:5) Калка стиховя все едно пхенен: О Йехова нисар нанай те мукел пе верноне служителен! Ако мислинес далкхеске кай о Йехова си верно все едно ка мукес котва кана иси тут проблеми ковато си сар бари буря. (Пс. 23:4)

МА БИСТЕР КАЙ Е ЙЕХОВАСКЕРИ ЛЮБОВ СИ ЙЕКХ ТАРО ОСНОВНА БУКЯ КОЛАТО СИКАВЕЛ И БИБЛИЯ

4. Кола си о основна букя колато сикавел и Библия тай соске верувинас ленде?

⁴ Ащи все едно те мукес котва кана иси тут проблемя също като на бистерес кай е Йеховаскери любов си йекх таро основна букя колато сикавел и Библия. Со авел те гогяте кана шунес „о основна букя колато сикавел и Библия“? Сигурно мислинес е букиенге колато сиклилян тари Библия. Например кай е Девлескоро алав си Йехова, кай о Исусес си е Девлескоро Чшаво, кай о муле на ахальовен нищо тай кай ка овел рай ки пхув колесте о мануша ка живинен вечно. (Пс. 83:18; Екл. 9:5; Йоан 3:16; Откр. 21:3, 4) Кана почнингян те верувинес калке букиенде сине трудно декхой те традел тут те мислинес кай он нанай верна. Соске? Соскето ахалилян кай о букя коленде верувинес авен букиендар колато си докажиме. Акана ка дикхас сар давкха те мислинас кай е Йеховаскери любов си йекх таро основна букя колато сикавел и Библия, ащи те помагинел туке те спиринес те чудинес тут дали о Йехова дикхел туке.

5. Пхен сар йекх мануш ащи те отчшиел о хохавне букя коленде верувинел.

⁵ Со помагингяс туке те спиринес те верувинес хохавне букиенде, кана започнингян те изучинес и Библия? Сигурно дикхлян дали давкха со сикавел и Библия тай давкха со сикавенас тут тере кхангеряте си йекх тай също. Аке йекх примери: Може би верувинесас кай о Исусес си о Най-баро Дел. Ама жикай изучингян и Библия сигурно пучлян тут: „Верно ли си давкха“? Кана дикхлян со пхенел и Библия далкхеске, ахалилян кай о Исусес нанай о Най-баро Дел. Тогава отчшивгян о хохайбе колесте верувинесас тай започнингян те верувинес кай о Исусес „си о първо таро букя, колато кергяс о Дел“ тай си е Девлескоро йекхоро чшаво. (Кол. 1:15; Йоан 3:18) Верно си кай о хохавне букя коленде о мануша верувинен ащи те овен „баре тай зорале сар стенес“ тай си пхаро те отчшиес лен. (2 Кор. 10:4, 5) Ама отсарто ахалилян и истина ту на започнингян пак те верувинес салке хохавне букиенде. (Флп. 3:13)

6. Соске ащи те овес сигурно кай е Йеховаскери „верно любов ачшол завинаги“?

⁶ Далкхеса со жанес тари Библия за е Йеховаскери любов ащи те керес о също. Кана иси тут проблеми тай започнинес те чудинес тут дали о Йехова дехел тут, пуч тут: „Верно ли си давкха со мислинав манге?“ Дикх кибор си различно давкха со пхенел пес ко Псалм 136:1 далкхестар со ту мислинес туке. Соске о Йехова пхенел кай лескери любов си „верно“? Соске 26 пъти калке псалмиесте пхенел пес кай „лескери верно любов ачшол завинаги“? Сарто дикхлям, давкха кай о Йехова дехел пе народос си йекх таро основна букя колато сикавел и Библия тай си сар окола основна букя колато ту вече приемингян. Нанай верно кай о Йехова мислинел кай нищо на ачшол тутар тай кай нанай соске те дехел тут. Отчшив кавка хохайбе сарто ка отчшивесас авер хохавне букя!

7. Пхен десаве стиховя колато сикавен кай о Йехова дехел тут.

⁷ Ки Библия ащи те аракхас бут авер-да букя колато сикавен кай о Йехова дехел амен. Например о Исусес пхенгяс пе ученикиенге: „Туме синьен бут по-важна саворе калке цикне чириклендар.“ (Мат. 10:31) О Йехова пхенгяс пе народоске: „Ка дав тут силес тай ка помагинав туке! Ка икерав тут ме десноне вастеса, колеса винаги керав со си лачшо.“ (Иса. 41:10) Нанай со те чудинас амен кана четинас калка думес! О Исусес на пхенгяс „Туме сигурно синьен по-важна“ тай о Йехова на пхенгяс „Ме може би ка помагинав туменге“. Он пхенде аменге „Туме синьен бут по-важна“ тай „[Ме] ка помагинав [туменге]“. Кана иси тут десаво проблеми тай чудинес тут дали о Йехова дехел тут, салка стиховя ма само ка помагинен туке те усетинес лескери любов. Он ащи те помагинен туке те овес сигурно кай о Йехова дехел тут. Калка стиховя сикавен аменге и истина. Ако пхенес е Йеховаске то воги тай мислинес калке стиховиенге, ка ащи те пхенес о думес таро 1 Йоан 4:16: „Тай аме ахалилям кай о Дел дехел амен тай синям сигурна далкхесте.“a

8. Со ащи те керес ако подекхана чудинес тут дали о Йехова дехел тут?

⁸ Со ащи те керес ако подекхана пак на синян сигурно кай о Йехова дехел тут? Дикх дали давкха со чувствинес си сар далкхесте со жанес. О чувства променинен пес, ама давкха кай о Йехова дехел амен си истина тари Библия, която на променинел пес. Ако на верувинас кай о Йехова дехел амен, все едно на верувинас кай „о Дел си любов“. (1 Йоан 4:8)

МИСЛИНЕ ДАЛКХЕСКЕ КАЙ О ЙЕХОВА „ВОГИЕСТАР ДЕХЕЛ“ ТУТ

9-10. За соске хоратинелас о Исусес кана пхенгяс „о Дад вогиестар дехел тумен“? (Йоан 16:26, 27) (Дикх и картинка-да.)

⁹ Ащи те ахальовас по-бут за е Йеховаскери любов като мислинас далкхеске кай о Исусес пхенгяс пе ученикиенге: „О Дад вогиестар дехел тумен.“ (Четине Йоан 16:26, 27.) О Исусес на пхенгяс калка думес само за те ачшол шукар лескере ученикиенге. Тогава ов изобщо на хоратинелас далкхеске сар чувствинен пес он, а хоратинелас е молитваке.

¹⁰ О Исусес пхенгяс пе ученикиенге кай требе те молинен пес лескере алавесте, а ма леске. (Йоан 16:23, 24) Важно сине он те жанен давкха. Кана о Исусес сине възкресиме лескере ученикя ащине те манген те молинен пес леске. Ов сине ленгоро амал. Он ащине те мислинен песке кай щом дехел лен боркха бут о Исусес ка шунел лен тай ка молинел пе Дадес те помагинел ленге. Ама ов пхенгяс ленге те на мислинен песке салка букя. Соске? Соскето „о Дад вогиестар дехел [лен]“. Кавка си йекх таро основна букя колато сикавел и Библия е молитваке. Помислине со означинел давкха за туке. Като изучингян и Библия ту ахалилян по-бут е Исусеске тай почнингян те дехес лес. (Йоан 14:21) Ама сар о ученикя ту-да ащи те молинес тут е Девлеске тай те овес сигурно кай ов „вогиестар дехел“ тут. Секо дром кана молинес тут сикавес кай верувинес далкхесте. (1 Йоан 5:14)

АХАЛЬОВ СО ПРЕЧИНЕЛ ТУКЕ ТЕ ВЕРУВИНЕС КАЙ О ЙЕХОВА ДЕХЕЛ ТУТ

11. Соске о Бенг ка овел щастливо ако на верувинас кай о Йехова дехел амен?

¹¹ Соске ащи те на верувинес кай о Йехова дехел тут? Ащи те пхенес кай о Бенг традел амен те мислинас салка букя тай давкха ащи те овел верно. О Бенг „родел кас те хал“ тай ка овел щастливо ако ту на верувинес кай о Йехова дехел тут. (1 Пет. 5:8) Ашал далкхеске кай дехел амен о Йехова диняс пе Чшес те мерел аменге, а о Бенг мангел те мислинас кай аме синям боркха безехале кай е Исусескери жертва нащи те учшарел амаре безеха. (Евр. 2:9) Ама кой ка овел щастливо ако на верувинас кай о Йехова дехел амен? О Бенг. Тай кой мангел те спиринас те служинас е Йеховаске кана иси амен проблемя? Пак о Бенг. Ов мангел те мислинас кай о Йехова на дехел амен, ама и истина си кай о Йехова на дехел лес. Лескоро най-баро „бенгипе“ си те традел амен те мислинас кай нанай сар о Йехова те дехел амен тай кай отчшивгяс амен. (Еф. 6:11) Кана ахальовас со мангел те керел амаро душмани ащи те заачшовас мамуй лесте. (Як. 4:7)

12-13. Сар ащи давкха кай биянгьовас безехале те традел амен те на верувинас кай о Йехова на дехел амен?

¹² Ма само о Бенг традел амен те мислинас кай о Йехова на дехел амен. А со авер? О безех-да. (Пс. 51:5; Рим. 5:12) Ов аравгяс амаро амалипе е Девлеса. О безех аравгяс амаро мислине, амаре чувства тай амаро састипе-да.

¹³ О безех традел амен те чувствинас амен грозно, те чувствинас амен бут виновна, те хас холи, те мислинас кай нищо на ачшол амендар тай те лажас. Ащи те чувствинас калка букя кана керас безех. Ама ащи те овен амен салка чувства само ашал далкхеске-да кай ахальовас кай синям безехале тай на синям салка саве о Дел мангляс те овас кана кергяс амен. (Рим. 8:20, 21) Сарто йекх лека кола пхарярде гумаса нащи те движинел пес сарто требе, аме-да нащи те керас саворе букя сарто требе ашал далкхеске кай синям безехале. Аке соске си нормално подекхана те мислинас кай о Йехова на дехел амен. Кана давкха ачшол требе та дас амен годи кай о Йехова „сикавел верно любов кариг калкенде колато дехен лес тай керен давкха со пхенел ов“. (Неем. 1:5)

14. Сар давкха те мислинас е Исусескере жертваке ка помагинел аменге те верувинас кай о Йехова дехел амен? (Римляни 5:8) (Дикх о блокчес-да „Дикх те на хохавгьовес таро безех“.)

¹⁴ Верно си кай подекхана чувствинас амен грозно соскето на заслужинас е Йеховаскери любов. Ама точно ашал далкхеске кай на заслужинас ла ой си боркха баро подаръки аменге. Со-да те керас нащи те заслужинас е Йеховаскери любов. Ама о Йехова диняс пе Чшес за те ащи те простинел амаре безеха соскето дехел амен. (1 Йоан 4:10) Ма бистер кай о Исусес ало те спасинел е безехале манушен. (Четине Римляни 5:8.) Никхой амендар нащи те керел о букя сар о Йехова тай ов на мангел давкха амендар. Кана ахальовас кай о безех ащи те традел амен те мислинас кай о Йехова на дехел амен нанай те домукхас давкха те ачшол. (Рим. 7:24, 25)

ИЗБИРИНЕ ТЕ АЧШОВЕС ВЕРНО

15-16. Состе ащи те овас сигурна ако ачшовас верна е Йеховаске тай соске? (2 Царе 22:26)

¹⁵ О Йехова мангел те лас шукар решения като ачшовас жи лесте. (Втор. 30:19, 20) Ако керас давкха ащи те овас сигурна кай ов ка овел верно кариг аменде. (Четине 2 Царе 22:26.) Жикай синям верна е Йеховаске ащи те овас сигурна кай ов ка помагинел аменге со-да те ачшол амаре животосте.

¹⁶ Сарто дикхлям иси бут букя колато помагинен аменге все едно те мукас котва кана иси амен проблемя. Жанас кай о Йехова дехел амен тай ка овел жи аменде. Давкха сикавел и Библия. Ако декхана чудинас амен дали ов дехел амен ащи те мислинас далкхеске со жанас за е Йеховаскери любов, а ма далкхеске сар чувствинас амен акана. Мангас те овас сигурна кай е Йеховаскери верно любов ачшол завинаги сарто пхенел и Библия.