Сар те овес щастливо ко пхурипе

1-2. Со мислинел о Йехова е пхуренге? (Псалм 92:12-14; дикх и снимка-да.)

Десаве тханенде о мануша мислинен кай си шукар те пхурьовес соскето окола ка уважинен тут. Ама авере тханенде ден всичко пестар те на дикхьон пхуре. Например дес ли тут годи кана сине о първо дром кана дикхлян кай иси тут парно бал? Сигурно веднага манглян те цидес лес англал декхой авер те дикхел лес. Ама после дикхлян кай даже те цидес лен, о парне бала пак ка икльон. Давкха сикавел кибор бут о мануша на манген те пхурьовен.

² Со мислинел амаро небесно Дад пе служителиенге колато вече пхуриле? (Пр. 16:31) Ов пхенел кай он си сар шукар кашта. (Четине Псалм 92:12-14.) Соске? О пуране кашта си бут шукар соскето иси лен бут листа или цъфтинен бут. Например ки Япония барьон кашта коленгоро алав си Японско вишна. Десаве лендар си на 1000 години тай си бут шукар. Точно сар калка кашта, о пхуре пхрала тай пхеня си бут шукар е Девлеске андо якха. О Йехова на дикхел о парне бала, а о лачшипе ленде. Он служинен леске вече бут бреша тай ачшовен леске верна со-да те ачшол.

3. Пхен йекх примери ковато сикавел сар о Йехова използвингяс пхуре манушен за те керел давкха со мангел.

³ Аме синям ценна е Йеховаске андо якха даже кана пхурьовас.a Ов даже използвингяс десаве пхуре манушен за те керел давкха со мангел. Например и Сара сине бут пхури кана о Йехова пхенгяс лаке кай ка овел ла чшаво тай кай лестар ка икльол баро народос тай о Месия-да ка авел калке народостар (Бит. 17:15-19) О Моисей-да на сине терно кана о Йехова бичшалгяс лес те икалел е израилтяниен таро Египет. (Из. 7:6, 7) Тай о апостол Йоан сине бут пхуро кана о Йехова диняс лес по духос те пишинел панч лила тари Библия.

4. Со ащи те помагинел е пхуренге те овен щастлива? (Притчи 15:15) (Дикх и снимка-да.)

⁴ Кибор по-бут пхурьовес, боркха по-бут проблемя иси тут. Йекх пхен керел песке майтапи като пхенел: „За те овес пхуро требе те овел тут зорало сърцес.“ Ама о Йехова ащи те помагинел туке те овел тут радостb со-да те ачшол. (Четине Притчи 15:15.) Калке урокиесте ка дикхас со ащи те керен о пхуре за те овен щастлива тай сар окола таро сбори ащи те помагинен ленге. Ама първо ка дикхас соске ащи те овел пхаро те овес щастливо кана пхурьовес.

СОСКЕ АЩИ ТЕ ОВЕЛ ПХАРО ТЕ ОВЕС ЩАСТЛИВО КАНА ПХУРЬОС

5. Соске ащи те овел трудно е пхуренге?

⁵ Соске ащи те овел туке пхаро те овес щастливо? Ащи те овел туке пхаро соскето нащи те керес о букя колато кересас преди. Сигурно мангел пес туке още те овес терно тай зорало. (Екл. 7:10) Например и пхен Руби пхенел: „Ашал далкхеске кай нащи те движинав ман сарто преди тай иси ман бут дукха, си манге трудно те урявав ман. Подекхана си манге трудно даже те урявав ме чорапя. Ме васта дукхан ман тай едвам мърдинав ме ная. Адалкхеске мъкаса керав всичко.“ О пхрал Харолд ковато служинелас ко Бетел пхенел: „Нащи пенжарав ман. Подекхана нерверинав ман соскето нащи те керав о букя колато преди харешинавас. Сар терно синьомас бут зорало. Дехавас те спортувинав. Окола пхененас за манге: „Поден леске и топка соскето ов ащи те помагинел аменге те печелинас и игра.“ Ама акана на мислинав кай ка ащи даже те подав и топка.“

6. a) Саве авер букя ащи те керен е пхуренгоро животос пхаро? б) Со ащи те помагинел е пхуренге те дикхен дали требе те спиринен те траден лека кола? (Дикх и статия „Те спиринав ли те традав?“)

⁶ Ащи те овел туке пхаро соскето нащи те опринес тут коркоро. Особено ако декхой требе те помагинел туке или ако требе те бешес паш те чшавенде. Или ако вече нащи те традес лека кола или коркоро те жас декхате, соскето нанай тут силес или нащи дикхес шукар. Калка букя ащи те керен то животос бут пхаро! Ама ма бистер кай о Йехова тай окола на дехен тут по-хари ашал далкхеске кай нащи те керес десаве букя. Ленгере якхенде ту синян сар златос! Ащи те овас сигурна кай о Йехова жанел со си аменге. Ов жанел кибор бут дехас лес тай амаре пхрален тай пхениен. Давкха си о най-важно леске. (1 Царе 16:7)

7. Со ащи те помагинел калкенге коленге си пхаро соскето мислинен песке кай ка мерен англал те авел о крайос?

⁷ Може би то воги тангьол соскето мислинес туке кай ка мерес англал те авел о крайос. Со ка помагинел туке тогава? Дикх те на бистерес соске о Йехова на сигярел те унищожинел о светос. (Иса. 30:18) Ов сикавел търпение соскето мангел още бут мануша те сикльон за леске тай те ачшон лескере амала. (2 Пет. 3:9) Кана си туке пхаро, ма бистер кай ашал е Йеховаскоро търпение бут мануша ащи те пенжарен лес тай те спасинен пес англал те авел о крайос. Десаве лендар ащи те овен тере енданя-да.

8. Со ащи те керен десаве мануша ашал далкхеске кай си пхуре или насвале?

⁸ Кибор-да брешенгере те овас, кана синям насвале или иси амен баре дукха, ащи те пхенас или те керас букя колато на требе. (Екл. 7:7; Як. 3:2) О Йов сине верно е Йеховаске. Ама кана дукхалас лес бут ов пхенгяс кай хоратинел без те мислинел. (Йов 6:1-3) Десаво насвалипе или о илачя колато пиен също ащи те траден е по-пхурен те керен букя колато иначе нанаяс те керен. Ама даже ако синям пхуре или насвале нанай амен право те икерас амен грозно околенца или те мислинас кай он си длъжна те керен десаве букя за аменге. Тай ако жанас кай пхенгям букя коленца дукхавгям декхас, требе сиго те пхенас леске кай съжалинас далкхеске. (Мат. 5:23, 24)

САР АЩИ ТЕ ОВЕС ЩАСТЛИВО

9. Соске требе те мукес окола те помагинен туке? (Дикх о снимкес-да.)

⁹ Мук окола те помагинен туке. (Гал. 6:2) Отначало давкха ащи те овел туке трудно. Йекх пхен колакоро алав си Гретъл пхенел: ,,Нанай манге лесно те мукав окола те помагинен манге, соскето на мангав те овел ленге пхаро ашал манге. Требелас манге време за те ахальовав кай нащи коркори те опринав ман тай кай наистина требел манге помощ.” Ма бистер кай окола ка овен щастлива ако мукес те помагинен туке. (Деян. 20:35) Тай туке-да ка овел бут шукар кана дикхес кибор бут дехен тут тай кибор бут дикхен туке.

10. Соске на требе те бистерес те пхенес околенге кай синян ленге благодарно? (Дикх и снимка-да.)

¹⁰ Сикав кай синян благодарно. (Кол. 3:15; 1 Сол. 5:18) Аме синям бут благодарна кана окола керен шукар букя за аменге. Ама подекхана ащи те бистерас те пхенас ленге кай синям благодарна. Ама ако вогиестар пхенас „Благодаринав туке“ амаре амала ка жанен кай бут ценинас давкха со керен за аменге. И Лея която дикхел е пхурен ко Бетел, пхенел: „Йекх таро пхеня винаги мукел манге йекх бележка за те благодаринел манге. Ой на пишинел манге бут букя ама манге ачшол бут шукар. Дехав те четинав калка бележкес соскето лендар дикхав кай и пхен си благодарно тай давкха анел манге радост.“

11. Сар ащи те помагинес околенге? (Дикх и снимка-да.)

¹¹ Кер со ащи за те помагинес околенге. Ако мислинес по-бут околенге тай дикхес те помагинес ленге, ка мислинес по-хари тере проблемиенге. Йекх африканско поговорка пхенел кай о пхуре си сар лила колендар ащи те сикльовас бут шукар букя. Ама ако о лила бешен песке андо шкафи нанай те ащи те ахальовас нищо лендар. Ту-да нанай те ащи те помагинес е по-терненге те сикльовен десаве важна букя, ако на хоратинес ленца тай на пхенес ленге со жанес тай состар накхлян. Пуч лен десаве букя за ленге тай после шун со ка пхенен туке. После ащи те пхенес ленге сар о Йехова помагингяс туке жи акана тай кибор радост ангяс туке давкха кай шунес лес. Ка овес бут щастливо кана синян жи ко терне тай помагинес ленге. (Пс. 71:18)

12. Со обещинел о Йехова е пхуренге ко Исаия 46:4? (Дикх и снимка-да.)

¹² Молине е Йеховас те дел тут силес. Ту ащи те овес кхино соскето нанай тут силес или соскето хас холи буте букиенге, ама о Йехова нисар на кхиньол. (Иса. 40:28) Со керел ов е силаса която иси лес? Йекх таро букя колато керел си те помагинел е пхуренге. (Иса. 40:29-31) О Йехова даже обещингяс те керел давкха. (Четине Исаия 46:4.) А ов винаги икерел пе думате. (Ис. Н. 23:14; Иса. 55:10, 11) Кана молинес тут тай дикхес е Йеховаскери любов тай лескоро вас, нанай сар те на овес щастливо.

13. Со на требе те бистерас? (2 Коринтяни 4:16-18) (Дикх и снимка-да.)

¹³ Ма бистер кай пак ка овес терно тай зорало. По-лесно си те издържинас о трудноскя, ако жанас кай сиго ка накхен. И Библия пхенел аменге кай вече нанай те овел пхурипе тай насвалипе. (Йов 33:25; Иса. 33:24) Ащи те овес щастливо соскето те най-шукар диеса на накхле, а си англал туте. (Четине 2 Коринтяни 4:16-18.) А сар ащи окола те помагинен е пхуренге?

САР АЩИ ОКОЛА ТЕ ПОМГИНЕН Е ПХУРЕНГЕ?

14. Соске си важно те жас те дикхас е пхурен тай те звънинас ленге?

¹⁴ Дикх често те жас паш о пхуре пхрала тай пхеня тай те звънинес ленге. (Евр. 13:16) О пхуре ащи те чуствинен пес коркоре. Йекх пхрал ковато нащи икльол пумендар пхенел: „По цело диес синьом андре тай ми холи пхарьол. Подекхана чувствинав кай синьом сар пхуро лъвос пханло йекхе клеткате тай давкха бут нерверинел ман.“ Кана жас паш о пхуре, сикавас кай он си важна аменге тай кай бут дехас лен. Сигурно саворе дас амен годи кана мангелас пес аменге те жас или те звънинас йекхе пхуре пхралеске или пхеняке ама на кергям лес. Саворен иси бут бути. Ама йекх таро „по-важна букя“ си те жас те дикхас е по-пхурен. (Флп. 1:10) Со ащи те помагинел аменге те керас лес? За те на бистерес те звънинес или те пишинес е пхуренге таро сбори, ащи те пишинес туке давкха ко календари. Ащи също те мислинес кана ащи те жас паш ленде тай те избиринес туке йекх диес за те на бистерес те керес лес.

15. Со ащи те керен заедно о пхуре тай о терне?

¹⁵ Ако синян терно, сигурно хас холи кай нанай со те хоратинес туке е пхуренца или кай на жанес со ащи те керен заедно. Ама ма ха холи салке букиенге. Дикх само те овес лачшо амал. (Пр. 17:17) Англал или палал о събрание хоратине йекхе пхуре пхралеса или йекхе пхуре пхеняса. Ащи те пучес лен кова си ленгоро любимо стихи или те мангес те пхенен туке саве смешна букя керде кана сине цикне. Ащи също те канинес лен те дикхен заедно о броудкастинги. Или те помагинес ленге например като дикхес дали ленгере телефоня керен бути шукар или като ухлявес ленге о най-неве букя. И пхен Карол пхенел: „Пуч е пхурен дали манген те керен заедно давкха со туке харешинел. Въпреки кай вече на синьом терни мангав те овел ман радост таро животос. Манге-да си шукар те пазарувинав, те хав шукар хабе нааври тай те дикхав о букя колато о Йехова кергяс.” И пхен Майра пхенел: „Йекх мере амалиниендар си на 90 тай си 57 бреша по-бари мандар. Ама ме направо бистерав давкха соскето кана синям заедно, асас тай дикхас филмя. Тай кана иси амен проблемя мангас годи йекх авератар.“

16. Соске ащи те овел шукар те жас е пхуренца кана требе те жан ко лекари?

¹⁶ Жа ленца кана требе те жан ко лекари. Ащи те ингалес лен жи ки болница, ама ащи също те овес ленца жикай предикхен лен за те дикхес дали о лекари ка икерел пес лачшес ленца тай ка иринел ленге внимание. (Иса. 1:17) Ащи те помагинес е пхуренге като пишинес о букя колато о лекари пхенел. Йекх пхури пхен пхенел: „Кана жав коркори ко лекари ов на верувинел далкхесте со пхенав леске тай даже ащи те пхенел кай о проблеми си само ме гогяте. Ама кана декхой си манца, о лекари икерел пес бут по-лачшес. Бут синьом благодарно ме пхраленге тай ме пхениенге колато на мукен ман коркори.“

17. Сар ащи те жас на служба е по-пхуренца?

¹⁷ Жа ленца на служба. Е пхуренге ащи те на овел лесно те жан на служба кхер кхерестар. Ама ащи те канинес лен те проповединен заедно ки количка тай даже те лес ленге йекх столос за те ащи те бешен паше жи лате. Или ащи те пучес лен дали манген те авен туса на изучаване или даже те керес о изучаване ленде. О старейшиня ащи те решинен о сбиркес те овен йекхе пхуре пхеняке или йекхе пхуре пхралеске ко кхер за те ащи он-да те шунен о сбиркес. Е Йеховас иси бари радост като дикхел кай сикавас бари любов тай уважение кариг о по-пхуре. (Пр. 3:27; Рим. 12:10)

18. Со ка дикхас ко следващо уроки?

¹⁸ Кавка уроки помагингяс аменге те дас амен годи кибор бут о Йехова дехел тай ценинел е по-пхурен. Он си бут важна аменге-да. Нанай лесно кана мануш пхурьовел, ама о Йехова ащи те помагинел туке те ачшовес щастливо. (Пс. 37:25) Бут си шукар те жанес кай те най-шукар диеса на накхле, а си англал туте! Ама со те пхенас е пхраленге тай е пхениенге колато дикхен пе пхуре енданиен, пе насвале чшавес или десаве насвале амалес? Сар он ащи те овен щастлива? Ка дикхас давкха ко следващо уроки.