17 УРОКИ

Саво си о Исусес?

Печатно издание

Като сикльовас со пхенгяс тай со кергяс о Исусес, кана сине ки пхув, ахальовас саво си ов тай саво си лескоро Дад, о Йехова, тай мангас те овас амала ленца. Саве букя траден амен те мангас те овас амала ленца тай сар ащи те овас сар о Исусес?

1. Соске пхенас, кай о Исусес си сар пе Дадесте?

Ко небес о Исусес бут бреша, дикхелас тай сикльовелас пе Дадестар, колес бут дехел. Аке соске мислинел тай керел всичко сар лесте. (Четине Йоан 5:19.) О Исусес зомкха бут препел упрал пе Дадесте, кай пхенгяс: „Кавка, ковато дикхляс ман, дикхляс ме Дадес-да.” (Йоан 14:9) Като ахальовес по-бут е Исусеске ка пенжарес по-лачшес е Йеховас-да. Например кана дикхас сар о Исусес тховелас пес е манушенге ко тхан, ахальовас кизом бут о Йехова дикхел аменге.

2. Сар о Исусес сикавгяс пи любов кариг о Йехова?

О Исусес пхенгяс: „За те жанел о светос, кай дехав е Дадес, керав точно со пхенел манге о Дад.“ (Йоан 14:31) Кана сине ки пхув, о Исусес сикавгяс, кай бут дехел пе Дадес като шунелас лес, даже кана сине леске пхаро. О Исусес също дехелас те хоратинел околенца за пе Дадеске тай те помагинел е манушенге те ачшовен амала Леса. (Йоан 14:23)

3. Сар о Исусес сикавгяс пи любов кариг о мануша?

И Библия пхенел, кай о Исусес сине бут щастливо кана дикхелас е манушен таро небес. (Притчи 8:31) Ов сикавгяс, кай дехелас е манушен, като хоратинелас ленге шукар букя тай като делас всичко пестар, за те помагинел ленге. Ов кергяс чудеса, коленца сикавгяс ма само кизом бари сила иси лес, ама също, кай ахальовел саво пхарипе иси е манушен. (Марко 1:40-42) Ов икерелас пес лачшес секаса тай на керелас нисави разлика машкар о мануша. Лескере думес денас утеха тай надежда саворе манушенге, колато сине лачше вогиенгере тай шуненас лес. О Исусес сине готово те мъчинел пес тай те мерел, соскето дехел саворе манушен. Ама най-бут дехел калкен, колато керен со сикавелас ов. (Четине Йоан 15:13, 14.)

РОДЕ ПО-ХОРЕСТЕ

Ахальов саво си о Исусес тай дикх сар те сикавес любов тай те овес путерде вастенгоро сар лесте.

4. О Исусес дехел пе Дадес

О Исусес сикавгяс аменге сар те сикавас амари любов кариг о Дел. Четинен Лука 6:12 тай Йоан 15:10; 17:26 тай палал секоне стихиесте хоратинен калке въпросиеске:

Сар ащи те сикавас, кай аме-да сар о Исусес дехас е Йеховас?

О Исусес молинел пес. — О Исусес дехелас пе небесноне Дадес тай често хоратинелас леса, като молинелас пес леске

5. Е Исусес дукхал е манушенге

О Исусес мислинелас по-бут е манушенге, а ма песке. Даже кана сине измориме, ов използвингяс по време тай пе силес, за те помагинел е манушенге. Четинен Марко 6:30-44 тай хоратинен калке въпросиенге:

Со керелас о Исусес, за те сикавел, кай дикхел околенге? (Дикх о 31, 34, 41 тай 42 стихи.)
Со траделас е Исусес те помагинел е манушенге? (Дикх о 34 стихи.)
Щом о Исусес зомкха бут препел упрал пе Дадесте, со ахальовес е Йеховаске таро букя, колато дикхлям жи атхе?
Сар ащи те овас сар о Исусес тай те дикхас околенге?

О Исусес керел чудо, за те парварел буте манушен, като керел бут хабе панче марендар тай до цикне мачшендар. О ученикя разден о хабе е мрушенге, е жувлиенге тай е чшавенге.

6. О Исусес си путерде вастенгоро

О Исусес сине путерде вастенгоро, въпреки кай на сине лес бут парес тай авер букя. Ов пхенгяс аме-да те овас путерде вастенгере. Четинен Деяния 20:35 тай хоратинен калке въпросиеске:

Со пхенгяс о Исусес те керас, за те овас щастлива?

Дикхен о КЛИПИ тай хоратинен калке въпросиеске:

КЛИПИ: „По-бут щастие иси, кана дас“ (част таро клипи) (4:00)

Со ащи те дас, даже ако нанай амен бут парес?

Жанес ли?

И Библия сикавел амен те молинас амен е Йеховаске, като ко крайос пхенас, кай бичшалас и молитва е Исусескере алавесте. (Четине Йоан 16:23, 24.) Калка думес сикавен, кай синям благодарна всичконаске со кергяс о Исусес, за те помагинел аменге те ачшовас е Йеховаскере амала.

ДЕСАВЕ МАНУША ПХЕНЕН: „О мануша мъчинен пес, соскето о Дел бичшалел ленге изпитания.“