37 УРОКИ
Со пхенел и Библия е букяке тай е паренге
Дали декхана халян холи, кай нащи те аракхес туке бути тай сар ка икалес парес? Ащи те овел трудно хем те керас со требе, за те овен амен о нужна букя, хем те служинас е Йеховаске целоне вогиеса. И Библия дел амен съвекя, колато ащи те помагинен аменге.
1. Со пхенел и Библия е букяке?
О Дел мангел и бути те анел аменге радост. И Библия пхенел, кай „о най-шукар е манушеске си те... овел лес радост тари бути, която керел“. (Еклисиаст 2:24) О Йехова керел бут бути. Кана дикхас те овас сар лесте тай керас бути вогиестар, аме анас леске радост тай чувствинас амен лачшес.
И бути си важно. Ама на требе те домукас ой те ачшол по-важно аменге таро Йехова. (Йоан 6:27) Ов обещинел, кай ако тховас лес ко първо тхан амаре животосте, ов ка дел амен о букя, колато требен аменге, за те живинас.
2. Со пхенел и Библия е паренге?
И Библия пхенел, кай „о парес защитинен амен“, ама ой пхенел също, кай о парес нащи те анен аменге истинско щастие. (Еклисиаст 7:12) Аке соске на требе те дехас о парес, а те овас „доволна таро букя, колато иси амен“. (Четине Евреи 13:5.) Ако синям доволна таро букя, колато иси амен, нанай постоянно те мангас те овен амен са по-бут букя тай ка овас по-спокойна. Нанай те тховас амен борчя, за те кинас аменге букя, колато на требен аменге. (Притчи 22:7) Нанай те кхелас комари или те керас авер букя, за те икалас парес без те керас бути.
3. Сар те използвинас амаре парес, без те мислинас само за аменге?
О Йехова си путерде вастенгоро тай аме мангас те овас сар лесте, като синям „путерде вастенгере, готова те дас околен“. (1 Тимотей 6:18) Ащи те използвинас лачшес амаре парес, като помагинас е сбориеске тай е манушенге, коленге на ресен о парес, особено амаре пхраленге тай пхениенге. Е Йеховаске нанай важно кизом дас, а соске дас. Кана синям путерде вастенгере тай дас вогиестар, ка овас щастлива тай ка анас радост е Йеховаске. (Четине Деяния 20:35.)
РОДЕ ПО-ХОРЕСТЕ
Дикх соске си амаре лачшипнаске те тховас и бути ко правилно тхан амаре животосте тай те овас доволна таро букя, колато иси амен.
4. Ащи те анес слава е Йеховаске, кана керес бути
Ако синям амала е Йеховаса, ка керас бути вогиестар тай ка тховас и бути ко правилно тхан. Дикхен о КЛИПИ тай хоратинен калке въпросиенге:
Со харешингяс туке, като дикхлян сар о Джейсън керелас бути тай сар икерелас пес пе колегиенца?
Со кергяс, за те тховел и бути ко правилно тхан пе животосте?
Четинен Колосяни 3:23, 24 тай хоратинен калке въпросиеске:
Соске си важно те керас бути целоне вогиеса?
И бути си важно. Ама на требе те домукас ой те ачшол по-важно аменге таро Йехова
5. Амаре лачшипнаске си те овас доволна
Бут мануша дикхен те икален кизом ащи по-бут парес. Ама и Библия дел амен авер съвети. Четинен 1 Тимотей 6:6-8 тай хоратинен калке въпросиеске:
Со пхенел и Библия, кай си шукар те керас?
Даже ако синям чоре, ащи те овас щастлива. Дикхен о КЛИПИ тай хоратинен калке въпросиеске:
Въпреки кай иси лен бут хари парес, соске калка семейства си щастлива?
Со ащи те ачшол, ако иси амен бут букя, ама мангас още по-бут? О Исусес пхенгяс йекх примери, за те сикавел кизом си опасно те овас салка мануша. Четинен Лука 12:15-21 тай хоратинен калке въпросиеске:
Со сикльовас таро примери, ковато пхенгяс о Исусес? (Дикх о 15 стихи.)
Четинен Притчи 10:22 тай 1 Тимотей 6:10. После хоратинен калке въпросиенге:
Со мислинес, кай си по-важно: те овес амал е Йеховаса или те овен тут бут парес? Соске?
Саве проблемя иси е манушен, колато манген по-бут парес?
6. О Йехова ка дел амен всичко со требел аменге, за те живинас
Кана нащи те аракхас аменге бути тай на ресен аменге о парес, ащи те ахальовас дали мукас амен е Йеховаске андо васта. Дикхен о КЛИПИ, ковато сикавел сар ащи те справинас амен, кана авен салка проблемя. После хоратинен калке въпросиенге:
Саве проблемя сине е пхралес таро клипи?
Со кергяс, за те справинел пес калке проблемиенца?
Четинен Матей 6:25-34 тай хоратинен калке въпросиеске:
Со обещинел те керел о Йехова е манушенге, колато тховен лес ко първо тхан пере животосте?
ДЕСАВЕ МАНУША ПХЕНЕН: „Требе те керав бут бути, за те парварав ме семействос. Нанай сар те авав ко събрания секо курко.“
Саво стихи барярел ти вяра, кай о Йехова ка дел тут о букя, колато требен туке, ако тховес лес ко първо тхан тере животосте?
СО СИКЛИЛЯМ
Требен аменге парес тай бути, ама на требе те домукас калка букя те циден амен таро Йехова.
О най-важна букя таро уроки
Со ка помагинел туке те тховес и бути ко правилно тхан тере животосте?
Соске си шукар те овес доволно таро букя, колато иси тут?
Сар ащи те сикавес, кай верувинес, кай о Йехова ка керел со обещингяс тай ка дел пе манушен всичко со требел ленге?
АХАЛЬОВ ПО-БУТ
Дикх дали и Библия пхенел, кай нанай шукар манушес те овен бут парес.
Ахальов сар ащи те използвинес те парес, за те анес радост е Йеховаске.
Безех ли си те кхелас комари?
Гледната точка на Библията: Хазартът („Пробудете се!“ март 2015)
Дикх со помагингяс йекхе манушеске те спиринел те кхелел комари тай те чорел.
„Интересувах се от състезателни коне“ („Стражева кула“ 1 ноември 2011)