Januar

Sare amen, e Devlese verna sluge, mangaja te sikljova sar šaj potpuno te ćera i služba koja tani dindi amenđe (2. Tim. 4:5). Đanđola pe, odova delo tano považno hem pohitno ando bilo so aver so šaj te ćera. Ama, dijekh puti šaj te ovel but pharo te đa ki služba odobor kobor bi mangaja. Avera važna buća lena amaro vreme hem snaga. Šaj valjani svako dive te ćera but buti te šaj amari porodica te ovel la sa so valjani. Amen šaj isi amen hem avera porodična odgovornostija, ja hijam naborme, šaj hijam ki depresija ja isi amen problemija kova anela o phuripe. Ako amare okolnostija na mukhena amen te da sa amendar ki služba odobor kobor bi mangaja, na valjani te ova obeshrabrime. O Isus đanđa so našti sare te ana isto plod (Mat. 13:23). O Jehova but cenini odova so ćeraja olese, sa đi daja o najšukar amendar (Jevr. 6:10-12; w19.04 2 ¶1-3).

E Bengese hovajba kotar mule lađaćerena e Jehova. Jekh kotar odova hovajbe tano so o mule mučinena pe ki jag (pakao). Asavke sikljoviba lađaćerena e Devle! Sar odova? Mothovena e Devle kova tano pherdo mangipe, sar dijekh kova tano bizo vilo, a u stvari baš asavko tano o Beng (1. Jov. 4:8). Sar osetineja tut sebepi odova? Soj tano pana považno, sar o Jehova osetini pe? Ov mrzini ked neko tano bizo vilo (Jer. 19:5). E Bengese hovajba ando mule utičinena upro manuša te mislinen so nane potrebno te verujinen ki e Isusesi otkupno žrtva (Mat. 20:28). Jekh aver e Bengeso hovajbe tano so o manuša isi len besmrtno duša (niked našti te meren). Ako bi odova ovela ćaće, tegani svako bi živini večno. O Isus na bi valjani te del po đivdipe sar žrtva te šaj amen te ovel amen večno đivdipe. Ama, ma bistri so e Isusese žrtvaja hine mothovdo najbaro mangipe premalo manuša (Jov. 3:16; 15:13). Zamislin so o Jehova hem oleso Ćhavo mislinena ando odola sikljoviba kola phenena so asavko baro poklon nane vredno! (w19.04 14 ¶1; 16 ¶8-9).

Kaj tano pisimo odova sostar o Isus sikavđa? Ko štar jevanđelja pisini but kotar odova so o Isus vaćerđa hem ćerđa đi hine ki Phuv. Avera knjige ki Biblija kotar grčki deo pomožinena amen te haljova sar o Isus razmislinđa, odolese so okolen kola pisinđe legarđa o sveti duh hem razmislinđe sar o Isus. Odova so o Isus sikavđa pomožini amen ko amaro đivdipe. Odolese, oleso zakon utičini ko odova sar ponašinaja amen ćhere, ki buti, ki škola hem ki skupština (Gal. 6:2). Kotar odova zakon sikljovaja ađahar so čitinaja o grčki deo andi Biblija hem hor razmislinaja odolestar. Amen šunaja odova zakon ked šunaja o savetija, o zapovestija hem o načelija kola isi ko odola biblijake knjige. Ked šunaja odova zakon, tegani šunaja amare mangle Devle, kastar avela sa odova so o Isus sikavđa (Jov. 8:28; w19.05 3 ¶6-7).

Žalosno tano ked o manuša ćerena baš odova so o Beng mangela. Ama, o Jehova uvek dikhela odova so ćerela o Beng. Ov đanela kobor tano amenđe pharo hem ka del amen uteha. Baro blagoslov tano te služina e Devlese kova tano „Devel andi svako uteha, kova utešini amen ki svako amari nevolja, te šaj hem amen te utešina okolen kola tane ki bilo savi nevolja isto odola utehaja kolaja utešini amen o Devel“ (2. Kor. 1:3, 4). I uteha posebno valjani okolenđe kas o roditeljija na zaštitinđe ando zlostavljanje ja okolenđe kas zlostavinđa neko koj tano olenđe paše. O kralj David đanđa so šaj te ova sigurna so o Jehova ka utešini amen (Ps. 27:10). O David hine uverimo so o Jehova ka ovel Dad okolenđe kas i porodica aćhavđa ked valjanđa olenđe. Sar o Jehova ćerela odova? Prekalo pekle verna sluge. Amare phralja hem phenja ki skupština tane amenđe sar porodica. Na primer, o Isus phenđa so okova kova služini e Jehovase tano olese sar phral, phen ja daj (Mat. 12:48-50; w19.05 15-16 ¶8-9).

So amen valjani prvo te proučina? Sigurno valjani svako dive te odvojina vreme te proučina e Devleso Lafi. O poglavlja andi Biblija kola valjani te čitinen pe ko jekh kurko, akana tane smanjime te šaj te ovel amen više vreme te razmislina okolestar so čitinđam hem odova te istražina ko amare publikacije. Amaro cilj na valjani te ovel samo te nakha disavo materijali, nego hem te mukha odova so čitinđam andi Biblija te resel đi amaro vilo hem te ćerel te ova paše e Jehovaja (Ps. 19:14). Ked amen proučinaja i Stražarsko kula ko skupštinako sastanko, odova pomožini amen te haljova i Biblija. Odolese, razmislin kotar stihija, naročito okolendar kola ka čitinen pe ko sastanak. Posebno obratin pažnja ko ključna lafija ja izrazija ando stihija kola mothovena i glavno misao ko odlomko. Uzo odova, odvojin hari vreme te razmisline ando stihija kola čitinđan hem te dikhe sar šaj te primenine len ko toklo đivdipe (Is. Nav. 1:8; w19.05 27 ¶5; 28 ¶9).

O Isus aćhavđa najšukar primer ando odova savo stav valjani te ovel amen premali služba. Olese i služba hine najvažno buti ko đivdipe. Ov nakhlja but kilometrija te šaj te propovedini so pobuter manušenđe. Koristinđa svako prilika te vaćeri e manušencar, ko olenge ćhera hem ko javna thana. E Isusese i služba hine ko prvo than ko đivdipe. Amen šaj te oponašina e Isuse ađahar so kokri arakhaja prilike te vaćera o šukar haberi, kuri god hem ked god odova šaj. Spremna hijam te žrtvujina odova soj tano amenđe šukar, te šaj te učestvujina ki služba (Mar. 6:31-34; 1. Petr. 2:21). Ki skupština šaj điko te služini sar specijalno, opšto ja pomoćno pioniri. Avera sikljilje aver ćhib ja đelje ko dijekh than kuri isi hari objaviteljija. Ama, najbaro deo ki služba ćerena o objaviteljija kola našti te oven pionirija ama ćerena najšukar so šaj. Ki bilo savi situacija te ova, o Jehova na rodela amendar pobuter nego li so šaj te da olese (w19.04 4 ¶7-8).

Puć kokri tut: „Da li isi hari ljubomora ko moklo vilo?“ (1. Petr. 2:1). „Da li mislinava so hijum pošukar ando avera sebepi so avava andi aver phuv, sebepi i škola koja završinđum ja kobor hijum barvalo?“ (Posl. 16:5). „Da li mislinava so o manuša na vredinena odobor but sar me, sebepi so nane len ista buća sar me ja tane kotar aver nacija?“ (Jak. 2:2-4). „Da li mangava o buća kola isi ko akale e Bengeso sveto?“ (1. Jov. 2:15-17). „Da li uživinava ki nemoralno ja ki nasilno zabava?“ (Ps. 97:10; 101:3; Am. 5:15). Ked ka odgovorine ko akala pućiba, tegani šaj ka dikhe kuri valjani te menjine tut. Upro amende but utičinena okola kasa družina amen (Posl. 13:20). Ki buti ja ki škola, amen hijam okružime okolencar kola na pomožinena amen te razmislina ađahar sar so o Devel mangela. Ama, najšukar amalen šaj te arakha ki skupština. Odothe šaj te sikljova sar šaj „te mothova mangipe hem te ćera šukaripe“ (Jevr. 10:24, 25; w19.06 12 ¶13-14).

E Jehovasi namera na hine te ovel amen problemija hem stresna situacije ko đivdipe. Odolese šaj te haljova so ked e Jehovaso verno sluga isi le bare problemija, šaj te vaćeri diso bizo te razmislini (Jov 6:2, 3). Čak, ako vaćeri diso ando Jehova ja amendar so nane tačno, amen na valjani sigate te holjana ja te osudina le sebepi odova. Disavo puti ked o manuš isi le bare problemija, valjani neko te del le savet ja te pomožini le te ispravini pe ko diso (Gal. 6:1). Sar šaj o starešine te ćeren odova? On valjani te ćeren odova so ćerđa o Elijuj, kova mothovđa baro saosećanje đi šunđa e Jove (Jov 33:6, 7). O Elijuj dinđa savet tek ked haljilo sar o Jov razmislini. Sar o Elijuj, hem o starešine pažljivo ka šunen hem ka pokušinen te haljon e manušesi situacija. Tegani hem ked ka den savet, ov šaj ka resel đi e manušeso vilo (w19.06 22-23 ¶10-11).

Sar šaj hem ponodri te služina e Jehovase ako isi zabrana? I podružnica e starešinenđe ka del uputstvija hem praktična predlogija. Ako i podružnica našti te ovel ko kontakt e starešinencar, tegani o starešine ka pomožinen hem tuće hem averenđe ki skupština te šaj ponodri te služinen e Jehovase. On ka den amen uputstvija premalo smernice kola tane ki Biblija hem ko amare publikacije (Mat. 28:19, 20; Jevr. 10:24, 25). O Jehova obećinđa pe slugenđe so ka ovel len dovoljno duhovno hrana (Is. 65:13, 14; Luka 12:42-44). Odolese, šaj te ova sigurna so e Jehovasi organizacija ka del amen odova soj tano potrebno te šaj te aćhova olese verna. So šaj tu te ćere? Ked isi zabrana, arakh šukar than kuri šaj te garave i Biblija hem avera publikacije so isi tut. Pazin te na ćhive asavko but važno materijali, bilo te ovel ko štampano, ja ko elektronsko oblik, ko than kuri šaj lokho te arakhi pe. Svako amendar valjani te del sa pestar te aćhol duhovno zoralo (w19.07 10 ¶10-11).

Angleder but manuša ko sveto hine ki disavi religija. Ama, ko poslednja berša dikhaja bari promena. Sa pobuter hem pobuter manuša nane ki nijekh religija. U stvari, ko disave phuvja but manuša phenena so nane ki nijekh religija (Mat. 24:12). Sose? Disave dikhena samo pekle problemija ja sar te zadovoljinen kokri pes (Luka 8:14). Nesave kola angleder verujinđe ko Devel, akana više na verujinena. A avera verujinena ko Devel, ama mislinena so i religija tani but purani hem nane odobor važno. Isto ađahar, so nane više korisno, na složini pe e nauka hem našti te objasnini pe. Kotar pe amala, pe učiteljija ja e manušendar ki televizija šunđe so o đivdipe ulo slučajno. Ama, na šunđe but odolestar sose valjani te verujinen ko Devel. Disave tane holjame upro e religijake vođe sebepi so on rodena pare hem položaj. Ko disave phuvja, o vlastija ćhivđe zakonja kolencar na mukhena e manušen slobodno te služinen e Devlese (w19.07 20 ¶1-2).

Amenđe na valjani bari fizičko snaga te šaj te ova verna hem revna ki služba e Jehovase. But okolendar kola više nane zorale hem ponodri mangena te den e Jehovase najšukar so šaj (2. Kor. 4:16). Možda but berša služineja e Jehovase hem sebepi toklo sastipe našti te ćere odobor sar angleder. Ako tano ađahar, ma ov obeshrabrimo. Ov uverimo so o Jehova cenini sa so angleder ćerđam ki služba olese (Jevr. 6:10). Ma te bistre so odova so ćeraja e Jehovase, na mothovi kobor amen mangaja le. Kobor tano baro amaro mangipe, mothovi o ispravno stav kova isi amen hem odova so ćeraja sa so šaj (Kol. 3:23). O Jehova đanela so amen šaj hem so amen našti hem na rodela amendar pobuter nego so šaj te da (Mar. 12:43, 44; w19.08 3 ¶6; 5 ¶11-12).

Prekalo amare „šukar delija“ o Jehova šaj te pašaćeri e manušen pese (Mat. 5:14, 15; 1. Petr. 2:12). Ako toklo bračno drug nane e Jehovaso svedoko, da li đanela nekas andi skupština? Vićin le te avel tuvaja ko sastankija (1. Kor. 14:24, 25). Amen na našalaja amari nada so celo amari familija jekh dive ka služini e Jehovase. Iako but trudinaja amen te pomožina amare familijaće te služinen e Devlese, šaj na ka prihvatinen sare o ćaćipe. Ako tano ađahar, amen na valjani te krivina amen sose on anđe asavki odluka. Amen našti nikas te ćhiva zorjeja te prihvatini amari vera. Ama, niked ma te misline so upro lende na utičini ked dikhena kobor hijan bahtalo đi služineja e Jehovase. Molin tut olenđe. Ma mukh te meninen tikli odluka hem uvek trudin tut te pomožine lenđe (Dela 20:20). Ov uverimo so o Jehova ka blagoslovini toklo trud. Hem ako tikli familija ka šunel tut, on ka oven spasime! (w19.08 18-19 ¶15-17).

So manglja o Isus te phenel odoleja? Amaro đivdipe valjani te ovel jednostavno ja te dikha samo ko jekh cilj hem ništa te na lel amari pažnja odolestar. O Isus kokri aćhavđa primer ađahar so i služba hine lese ko prvo than. Isto odova sikavđa hem pe učenikon so i služba e Jehovase hem oleso Kraljevstvo valjani te oven ko prvo than. Hem amen ka ova sar o Isus ako i služba ovela amenđe ko prvo than ko amaro đivdipe hem ako najangleder rodaja o Kraljevstvo hem e Devlesi pravednost (Mat. 6:33). Jekh ando načinja sar šaj i služba te ovel amenđe ko prvo than tano te na našala amaro vreme ko buća kola nane važna. Amen mangaja te koristina pobuter vreme te pomožina averenđe te penđaren hem te mangen e Jehova. Na primer, da li šaj te smanjina o vreme kova trošinaja ki buti te šaj ko radna dive te đa pobuter ki služba? Da li šaj te smanjina o vreme kova trošinaja ki zabava hem rekreacija? (w19.04 5-6 ¶12-13).

But phralja hem phenja kola služinđe e Jehovase beršencar, doživinđe bare promene. Bute phralenđe hem phenjenđe tano pharo te prilagodinen pe ko neve okolnostija. Šaj olenđe tano but pharo sebepi so but manglje poklo zaduženje. Đi probinđe te sikljon ko neve okolnostija, disavenđe hine odobor pharo so odova doživinđe sar ked neko merela. Ama, sar đala o vreme on uspinena te prilagodinen pe. Sose? Odolese so but mangena e Jehova. Đanena so predajinđe po đivdipe e Devlese, a na e bućaće koja ćerena ja e titulaće koja dobinena (Kol. 3:23). Bahtale tane ked šaj ponizno te služinen e Jehovase ko bilo kova način. On sa pe brige fordena koro leste, sose đanena so ov brinini pe olenđe (1. Petr. 5:6, 7). Ked amen sikljovaja te ova ponizna, avera uživinena te oven amencar. Polokho istrajinaja ko amare problemija. Hem soj tano najvažno, amen hijam popaše amare Dadeja (w19.09 6-7 ¶15-17).

O Jehova dinđa e Davidese te ovel poglavari na samo ki olesi porodica, nego sa e manušenđe ko Izrael. Sar kralj, o David hine le baro autoritet. Disavo puti ov koristinđa le ko lošno način hem ćerđa bare greške (2. Sam. 11:14, 15). Ama, ov mothovđa soj tano podložno e Jehovase ađahar so prihvatinđa i disciplina ando Jehova. Đi molinđa pe e Jehovase phenđa sa so isi le ko vilo hem trudinđa pe te šunel e Jehovaso savet (Ps. 51:1-4). Isto ađahar, ov hine ponizno hem prihvatinđa o savetija kola alje na samo ando murša, nego hem ando đuvlja (1. Sam. 19:11, 12; 25:32, 33). O David sikljilo ando pekle greške hem ko prvo than hine lese te služini e Jehovase. Ov đanđa kobor tano šukar te ova podložna e Jehovase. Avdije, šaj te dikha i razlika maškaro okola soj tane podložna e Jehovase hem okola so na mangena te šunen olese savetija. Okola soj tane podložna e Jehovase „ko vilo ka oven but bahtale“ (Is. 65:13, 14; w19.09 17 ¶15; 19 ¶21).

E Jehovase svedokija haljilje so o baro mnoštvo na valjani te ovel ko nebo te šaj te terđol „anglo presto hem anglo Bakro“. On ćerena odova ko simbolično način. Iako on ka živinen ki phuv, o baro mnoštvo terđola „anglo presto“ ađahar so priznajini e Jehova sar Najbaro Vladari hem mothovi so poštujini oleso autoritet ađahar so šunela le (Is. 66:1). Isto ađahar, on terđona „anglo Bakro“ ađahar so mothovena vera ki e Isusesi otkupno žrtva. Ko Matej 25:31, 32 vaćeri pe so „sa o narodija“ hem okola soj tane lošna, ka oven ćedime anglo e Isuseso presto. Haljola pe so sa akala narodija nane ko nebo, već ki phuv. O ćaćipe kova akana pošukar haljola pe tano logično. Sebepi odova amen haljovaja sose ki Biblija na vaćeri pe so o baro mnoštvo ka ovel ko nebo. Jedino grupa kolaće tano vaćerdo so ka živini ko nebo tane o 144 000 kola ka vladinen „sar kraljija upri phuv“ e Isuseja (Otkr. 5:10; w19.09 28 ¶9).

O Jehova ađićeri ando pekle sluge te ikljoven ando Baro Vavilon. Ama, odova nane dovoljno. Amen valjani te ova odlučna te služina e Jehovase. Te dikha duj načinija sar šaj te ćera odova. Sar prvo, valjani zorale te ićera amen ko e Jehovase moralna merilija. Amen niked na valjani te odobrina o nemoralno ponašanje ko akava sveto. Na primer, amen nisar na ka podržina o seksualno nemoral ko bilo kova oblik, sar soj tano o brak maškaro duj murša ja duj đuvlja niti olengo način života (Mat. 19:4, 5; Rimlj. 1:26, 27). Sar dujto, amen valjani hem ponodri te služina e Jehovase amare phralencar hem e phenjencar. Odova ćeraja ki dvorana, ko amare phralenge ćhera ja čak ćorjale. So god te ovel, na ka ćhinava te đa ko sastankija. Valjani te ćeda amen „sa pobuter so [dikhaja] so o dive tano popaše“ (Jevr. 10:24, 25; w19.10 16 ¶6-7).

O Jehova mangela te ova bahtale, a i zabava koja tani šukar šaj te ćerel te ova bahtale. Ko e Devleso Lafi pisini: „Nane ništa pošukar kotar odova o manuš te hal hem te pijel hem te uživini ko šukar buća ando oleso trud“ (Prop. 2:24). Ama, nane svako zabava, koja isi ko sveto, amenđe šukar. Oj šaj te ćerel o manuša te prihvatinen ja te mangen o buća kolenđe i Biblija phenela soj tane but lošna. Odolese so mangaja te služina samo e Jehovase, amen našti te ha hem andi „e Jehovasi sofra“ hem andi „e demonengi sofra“ (1. Kor. 10:21, 22). Ked nekasa bešeja hem hasa maro, odova mothovi so hijen amala. Ako ki zabava koja birinđam isi nasilje, spiritizam, nemoral ja avera telesna želje hem stavija, tegani odova tano sar te beša e Devlese dušmanencar hem zajedno olencar haja o habe kova on pripreminđe. Asavki zabava na utičini lošno samo upro amende, nego hem upro amaro amalipe e Jehovaja (w19.10 26 ¶2; 29-30 ¶11-12).

Te šaj i bavlal te pomožini e mornarese, ov valjani te ćerel duj buća. Sar prvo, oleso brodo valjani te ovel ko than kuri phudela i bavlal. Đanđola pe, o brodo na ka pođini ako tano ki luka, dur ando than kuri i bavlal najviše phudela. Sar dujto, o mornari valjani te vazdel hem te phravel pekle jedrija kobor god šaj. Čak ked i bavlal phudela, oleso brodo ka đal anglal samo ako o jedrija astarena i bavlal. Isto ađahar, amen šaj hem ponodri te služina e Jehovase samo ako oleso sveti duh pomožini amen. Te šaj o sveti duh te pomožini amen, valjani te ćera duj buća. Sar prvo, amen valjani te mukha o sveti duh te utičini upro amende, ađahar so ka učestvujina ko duhovna aktivnostija. Sar dujto, amen valjani „te vazda amare jedrija“, ađahar so ka učestvujina ko duhovna aktivnostija kobor god šaj (Ps. 119:32). O sveti duh tegani šaj te del amen snaga te đa anglal iako šaj isi amen razna pharipa te šaj te aćhova verna (w19.11 9 ¶8; 10 ¶11).

Ko paluno dive ando po đivdipe ki Phuv, o Isus hine le baro stres. Pana hari o lošna manuša ka mudaren le ađahar so but ka mučinen le. O meribe na hine jedino e Isusesi briga. Ov but manglja pe Dade hem manglja te ćerel odova so ov mangela. Ako aćhola lese verno ki akija najphari situacija, o Isus ka opravdini e Devleso nav. O Isus manglja hem e manušen hem đanđa so ka ovel len nada ko večno đivdipe samo ako ov aćhola verno đi ko meribe. Iako o Isus hine le baro stres, ov arakhlja po unutrašnjo mir. Ov hine le „e Devleso mir“, hem odova mir hine le odolese so hine ko šukar odnos e Jehovaja. Odova mir pomožinđa e Isuse te na brinini pe (Fil. 4:6, 7). Niko amendar na ka ovel ki situacija ki koja hine o Isus, ama sar olese učenikija ka ovel amen razna problemija (Mat. 16:24, 25; Jov. 15:20). Sar ov, hem amen ka ovel amen baro stres (w19.04 8 ¶1-3).

Šukar tano te puća amen akava: „Da li hijum zahvalno so hijum deo andi e Jehovasi organizacija koja tani ki phuv?“ O Jehova mothovi amenđe jasno dokaz so ov avdije blagoslovini pe narodo. Ćaće, isi amen bare razlogija te ova zahvalna (1. Sol. 5:18). Sar šaj te mothova so podržinaja e Jehovasi organizacija? Odova šaj te ćera ako ićeraja amen ko odova so sikljovaja andi Biblija, ando publikacije, ko sastankija, ko pokrajinska sastankija hem ko kongresija. Uzo odova, kobor god šaj amen valjani te propovedina o šukar haberi hem te sikava averen (1. Kor. 15:58). De sa tutar te ovel tut šukar odnos e Jehovaja te šaj ov te prihvatini tekle žrtve. Služin e Jehovase sose hijan zahvalno olese. Uvek de e Jehovase toklo najšukar sose mangeja le. De sa tutar te podržine i organizacija koja ov blagoslovini. Ked ćereja sa akala buća tu mothoveja e Jehovase so cenineja i čast ove oleso Svedoko (w19.11 25 ¶17-18).

O Isus na mislinđa so amen ka ćera čudija sar so ov ćerđa. Ov mislinđa so olese učenikija ka propovedinen hem ka sikaven e manušen ko pobuter thana hem pobuter vreme nego so ov odova ćerđa. Ako ćereja buti, tegani puć tut: „Da li ki mi buti hijum penđardo sar bućarno manuš? Da li završinava mi buti ko vreme hem da li dava sa mandar te ćerav la šukar?“ Ako ko akala pućiba šaj te phene ja, odova značini so toklo šef šaj te verujini tuće. Isto ađahar, sebepi odova, tekle kolege šaj ka oven spremna te šunen i šukar vest. Ked razmislineja sar propovedineja hem sar sikaveja e manušen, puć tut: „Da li hijum penđardo sar bućarno ki služba? Da li šukar pripreminava man ked valjani te đav ki služba kotar ćher ko ćher? Da li sigate đava te posetinav e zainteresovano manušen? Da li hem ko avera načinija redovno učestvujinava ki služba?“ Ako ko akala pućiba šaj te phene ja, tegani tu ka ove bahtalo ki služba (w19.12 5 ¶14-15).

Ako jekh ćhavo hem jekh ćhaj kola mangena te len pe odlučinena te ovel len ćhave, šukar bi ovela te razmislinen ando duj važna pućiba: Sar prvo, ked ka ovel len ćhave? Sar dujto, kobor ćhave ka ovel len? Ked tano najšukar te vaćeren akalestar? Sose tane akala duj pućiba odobor važna? Šukar bi ovela jekh par te vaćeri akalestar angleder te venčinen pe. Sose? Odolese so akija odluka tani but važno hem važno tano da li on isto mislinena. Isto ađahar, on valjani te dikhen da li tane spremna te oven roditeljija. Disave parija odlučinđe so ked ka len pe ka ađićeren jekh berš ja duj, hem palo odova te ovel len ćhave. Sose? On đanena so ked ka ovel len ćhave, tegani pobuter vreme hem snaga ka den pekle ćhavenđe nego jekh jekhese. On mangena jekh vreme te sikljon ko zajedničko đivdipe hem te oven paše jekh jekheja angleder te oven roditeljija (w19.12 23 ¶4-5).

Ko celo sveto, bute amare phralenđe hem e phenjenđe tano pharo sebepi o problemija kola isi len. Disavenđe tano pharo sebepi soj tane but naborme ja mulo olendar neko kas but manglje. A averenđe tano pharo sebepi so neko kotar olengi porodica ja olengo šukar amal više na služini e Jehovase. Disavenđe tano pharo sose doživinđe disavi prirodno katastrofa. Sarinenđe olenđe valjani uteha. Sar šaj amen te pomožina len? Ov verno amal. Okova kova tano verno amal koristini po vreme hem pi snaga te pomožini pe phralenđe hem pe phenjenđe. Na primer, amare phralese, e Petarese, o doktorija phenđe soj tano but nabormo hem so sig ka merel. Olesi romni, i Ketrin, phenela: „Odova dive ked o doktorija phenđe amenđe sa ando e Petareso nabormipe, jekh bračno par kotar amari skupština hine amencar. Ked šunđe sa odova, on mothovđe so na ka mukhen amen kokri ko akava pharo vreme. On but pomožinđe amen hem ked god valjanđe amenđe on hine amencar.“ But tano utešno ked đanaja so isi amen verna amala kola pomožinena amen te istrajina ko amare pharipa (w20.01 8 ¶1; 9 ¶5; 10 ¶6).

Ked bi oveja maškaro odola hrišćanija kola ćedinđe pe ki Pedesetnica, ko 33. berš, ki nevi era, tu bi oveja potpuno uverimo so hijan pomazimo e sveto duhoja (Dela 2:5-12). Ama, da li sa o manuša tane pomazime e sveto duhoja ko disavo neobično način hem ko isto vreme? Na. Razmislin ando odova ked neko šaj te ovel pomazimo. Ki Pedesetnica na hine pomazimi samo odija grupa ando 120 manuša. Hari kasnije ko odova dive, hem avera 3 000 manuša dobinđe o sveti duh. On hine pomazime ked krstinđe pe (Dela 2:37, 38, 41). Sar nakhlje o berša, hem avera hrišćanija hine pomazime, ama na ko dive ked krstinđe pe. Na primer, o Samarićanija hine pomazime disavo vreme palo olengo krštenje (Dela 8:14-17). O Kornelije hem olesi porodica, ko jekh neobično način dobinđe o sveti duh, čak angleder so krstinđe pe (Dela 10:44-48; w20.01 20-21 ¶2-4).

Samo ko štar Jevanđelja, o Isus e Jehovase phenđa „Dade“ otprilike 165 putija. Sose o Isus odoborkha vaćerđa ando Jehova? Jekh ando razlogija hine sose manglja te uverini e manušen so o Jehova tano Dad kova but mangela len (Jov. 17:25). Te dikha sar o Jehova ponašinđa pe premalo poklo Ćhavo hem so amen sikljovaja olestar. O Jehova uvek šunđa e Isusese molitve. Ov na samo so šunđa nego hem odgovorinđa ko olese molitve (Jov. 11:41, 42). Save god pharipa hine le, ov osetinđa so oleso Dad mangela le hem so pomožini lese (Luka 22:42, 43). Sebepi so mangela pe ćhave, o Jehova manglja o Isus te đanel so ov podržini le (Mat. 26:53; Jov. 8:16). Iako o Jehova na zaštitinđa e Isuse kotar sa so šaj te povredini le, ov ipak pomožinđa le te istrajini ko pharipa. O Isus đanđa so savo god pharipe te ovel le, odova na ka trajini večno (Jevr. 12:2). O Jehova mothovđa so brinini pe ando Isus ađahar so šunđa olese molitve, brininđa pe ando olese fizička potrebe, sikavđa le hem pomožinđa lese (Jov. 5:20; 8:28; w20.02 3 ¶6-7, 9).

Ked odlučinaja da li ka učestvujina ko nesavo običaj, valjani te razmislina sar amari odluka ka utičini upro averengi savest, posebno ko amare phralja hem phenja. Amen nikako na bi mangaja neko sebepi amaro te spotaknini pe! (Mar. 9:42). Isto ađahar, na bi mangaja te uvredina okolen kola nane e Jehovase svedokija. O mangipe ka podstaknini amen te mothova olenđe poštovanje đi vaćeraja olencar. Odoleja mothovaja čast e Jehovase. Na bi ovela mudro te raspravina amen olencar ja te mara lenđe muj sebepi olenge običaja. Ma bistri so o mangipe isi le bari snaga! Ako mothovaja mangipe hem poštovanje, šaj odoleja ka kovljaćera o vilo okolengo so protivinena pe. Vaćer averenđe so hijan e Jehovaso svedoko (Is. 43:10). Ako neko ki tikli familija merela, tegani tikli familija ja o komšije šaj but te holjanen sose na učestvujineja ko disave običaja. Ka ovel polokho te ikljove ko krajo akala situacija ako objasnineja lenđe angleder ko so verujineja. Niked na valjani te lađa kotar odova ko so verujinaja ja te lađa te branina o ćaćipe ando odova so ovela e manušencar ked merena (Rimlj. 1:16; w19.04 17-18 ¶14-16).

O 12 apostolija hine e Isuseja đi ov hine ki phuv. Ama, o Pavle ulo hrišćanin tek palo e Isuseso meribe hem uskrsenje. Iako, palo odova o Pavle hine „apostol kova tano bićhaldo avere narodonđe“, ov ipak na hine jekh ando 12 apostolija (Rimlj. 11:13; Dela 1:21-26). O Pavle na hine zavidno sebepi so o 12 apostolija uživinđe đi družinđe pe e Isuseja. Ov hine zadovoljno odoleja so dobinđa te ćerel. Ako hijam zadovoljna hem ponizna, sar so hine o Pavle, amen ka mothova poštovanje premalo phralja kase o Jehova dinđa autoritet (Dela 21:20-26). O Jehova odredinđa o starešine te preuzminen o vođstvo ki skupština. Iako tane nesavršena, o Jehova dikhela upro lende „sar dar“ (Ef. 4:8, 11). Ked poštujinaja odole phralen hem ponizno sarađujinaja olencar, amen aćhovaja paše e Jehovaja hem isi amen mir ki skupština (w20.02 17 ¶13-14).

Šaj but poštujinđan odova so pisini ki Biblija hem angleder so počminđan te proučine nekasa kotar e Jehovase svedokija. Šaj hem tegani ceninđan e Isuse. Akana ked dikhljan koj tane e Jehovase svedokija hem save manuša tane on, šaj sviđini pe tuće te družine tut olencar. Ama, odova so mangeja sa odola šukar buća na značini so sebepi odova ka predajine to đivdipe e Jehovase hem so ka krstine tut. O najvažno razlog sebepi kova valjani te krstine tut tano o mangipe premalo o Devel, o Jehova. Ked mangeja e Jehova pobuter nego bilo so aver, tu na ka mukhe nikase hem nisose te sprečini tut te služine lese. O mangipe premalo Jehova ka podstaknini tut te krstine tut hem ka pomožini tut te aćhove verno olese hem palo to krštenje. O Isus phenđa so amen valjani te manga e Jehova celone vileja, dušaja, gođaja hem snagaja (Mar. 12:30). Sar šaj to mangipe hem to poštovanje premalo Jehova te ovel odobor hor? Ako razmislineja kobor o Jehova mangela tut odova ka podstaknini tut hem tu te mange ole (w20.03 4 ¶4-5).

So značini potpuno te ćera amari služba? Te ćera potpuno amari služba značini so valjani te propovedina hem te sikava kobor god šaj. Ama, te ćera potpuno amari služba na odnosini pe samo kobor vreme amen propovedinaja. E Jehovase tano važno o razlog, sose amen odova ćeraja. Amen hijam revna ki amari služba odolese so mangaja e Jehova hem amare pašutnen (Mar. 12:30, 31; Kol. 3:23). Te služina e Jehovase celona dušaja značini te da sa amari snaga hem te koristina sa amare sposobnostija ki služba koja ćeraja olese. Ked amen haljovaja so i služba tani čast, tegani amen ka da sa amendar te propovedina. Amen šaj našti te ova ki služba odobor kobor bi mangaja. Ama, amen mangaja te ćera odova. Odolese, trudinaja amen te ova pana pošukar hem te vaćera o šukar haberi te šaj te resa đi e manušengo vilo. Amenđe i služba tani ko prvo than ko amaro đivdipe (w19.04 2-3 ¶3-4; 3 ¶6).

E Bengese hovajba ćerena o manuša te ovel len pana pobari dukh hem patnja. Disavo puti e roditeljenđe kolendar mulo o ćhavoro phenena so lelja le o Devel, odolese so šaj valjani lese jekh anđeo ko nebo. Da li akava hovajbe smanjini ja barjaćeri olengi dukh? O hovavno sikljovibe ando pakao koristinđa pe sar opravdanje e mučibase, sar soj tano te tharen pe đivde manuša kola protivinđe pe e crkvaće, sebepi odova so sikavi. Sar so pisini ki jekh knjiga andi špansko inkvizicija, disave inkvizitorija mislinđe so e manušen kola na složinđe pe odoleja so sikavi i crkva (jeretikija) dena len prilika te „okusinen o večna muke ko pakao“, sebepi odova šaj ka kajinen pe angleder te meren hem ađahar ka izbegninen i kazna. Ko but Phuvja o manuša smatrinena so mora te obožavinen e manušen kola mulje olendar, te mothoven olenđe čast hem te roden olendar blagoslov. Avera ćerena odova sebepi te na ćeren lenđe lošnipe. Nažalost, o verovanja kola temeljinena pe ko e Bengese hovajba na utešinena e manušen. Odola hovajba ćhivena lenđe nepotrebno briga hem dar (w19.04 14 ¶1; 16 ¶10).