Oktobar

Sare amen šaj te učestvujina ko sastankija ađahar so ka đilaba hem so ka da šukar pripremime komentarija. Disavenđe tano pharo te đilaben hem te den komentarija. Da li tano hem tuće pharo? Ako tano ađahar, dikh so pomožinđa averenđe te ćeren odova. Disavenđe pomožinđa so đilabena celone vileja. O najvažno razlog sose đilabaja ko amare sastankija tano te hvalina e Jehova. Sebepi odova ked pripreminena tumen aso sastankija, pripreminen hem o đilja. Ked ka vežbinen te đilaben, trudinen tumen te dikhen sar o lafija andi đili tane povezime odoleja sostar ka vaćeri pe ko sastanko. Isto ađahar, razmislinen više ando lafija kola isi ki đili, a na ando odova kobor šukar đilabena. Disavenđe šaj te ovel but pharo te den komentarija. So šaj te pomožini lenđe? Valjani te den sa pestar redovno te den komentarija. Šukar tano ako o komentari tano kratko hem direktno odgovor ko pućibe. O Jehova tano bahtalo ked dikhela so amen komentarišinaja ko sastankija, iako disavo puti isi amen bari trema (w22.04 7-8 ¶12-15).

O lafi „pomoćniko“, kova koristini pe ko akava stiho, odnosini pe ko jekh manuš kova prastala te pomožini nekase ko rodela pomoć. Zamislin sar o Jehova siđari te pomožini nekase kova isi le problemi. Odova so ki Biblija pisini so o Jehova tano amaro pomoćniko, jasno mothovi amenđe so ov isi le bari želja te pomožini amen. A ked tano ov ki amari strana, amen šaj te istrajina ko problemija hem te ova radosna. Sar o Jehova pomožini amen te istrajina ko pharipa? Te šaj te dobina odgovor ko akava pućibe ka pomožini amenđe i knjiga Isaija. Sose? Odolese so o prorok Isaija pisinđa but proročanstvija kola primeninena pe hem upro Devleso narodo avdije. Ov opisujinđa e Jehova e lafencar kola šaj lokho te haljova. Na primer, ko 30. poglavlje koristinđa but šukar primerija kola mothovena sar o Jehova pomožini pe narodose. Ov ćerela odova ađahar so (1) šunela amen hem odgovorini ko amare molitve, (2) vodini amen hem (3) dela amen blagoslovija akana hem ki budućnost (w22.11 8 ¶2-3).

O Isus phenđa e phralenđe ki skupština Smirna hem ki Filadelfija te na daran ando progonstvo sose o Jehova ka nagradini len ako ka aćhon lese verna (Otkr. 3:10). Amen ađićeraja te ovel amen progonstvo hem odolese valjani te ova spremna te istrajina (Mat. 24:9, 13; 2. Kor. 12:10). I knjiga Otkrivenje phenela so e Devleso narodo ko amaro vreme, „ko Gospodeso dive“, ka doživini progonstvo (Otkr. 1:10). Ko 12. poglavlje ki knjiga Otkrivenje pisini so palo odova so o Isus ulo Kralj, ko nebo hine jekh maribe. O Mihailo, o Isus Hrist hem o anđelija borinđe pe protiv o Satana hem o demonija (Otkr. 12:7, 8). E Devlese dušmanija našalđe o maribe hem hine fordime ki phuv kuri počminđe te ćeren bare problemija e manušenđe (Otkr. 12:9, 12; w22.05 5 ¶12-13).

O Jehova uvek sudini pravedno hem niked na dikhela koj tano ko. Olese nane važno da li odova manuš tano šužo, barvalo, da li isi le disavo baro položaj ja kobor tano sposobno (1. Sam. 16:7; Jak. 2:1-4). E Jehova niko našti silaja te ćhivel te ćerel diso ili te del le mito. Ked anela disavi odluka, upro leste na utičinena samo olese emocije (Izl. 34:7). Ov tano najšukar Sudija, sose but šukar haljola amen hem đanela sa andi amari situacija (Pon. zak. 32:4). O manuša kola pisinđe o hebrejsko deo ando Devleso Lafi haljilje so o Jehova oprostini averćhane ando manuša. Ki jekh knjiga pisini so odola manuša koristinđe jekh hebrejsko lafi „ked pisinđe ando odova so o Jehova oprostini e manušenđe, ama niked na koristinđe le te mothoven i situacija ki koja o manuš oprostini jekhe avere manušese. Odolese so o manuša našti te oprostinen odobor kobor o Jehova šaj.“ Samo o Jehova šaj potpuno te oprostini (w22.06 4 ¶10-11).

Ako kokri barjaćereja te ćhaven sose nane tut rom ja ako to rom nane e Jehovaso svedoko, tegani ov sigurno so to primer zorjaćeri averen. So ako to ćhavo na mangela te služini e Jehovase, iako dinđan sa tutar te sikave le? Ma bistri, te šaj te ćhave te oven e Jehovase amala valjani vreme. Ked sadinaja disavo seme, šaj pućaja amen da li odova seme ka barjol hem da li ka anel plod. Iako na đanaja so ka ovel oleja, amen hem ponodri ćhoraja lese pani te šaj te barjol (Mar. 4:26-29). Podijekh puti, šaj pućeja tut da li uspinđan o mangipe premalo Jehova te ćhive ko te ćhaveso vilo. Ama, ma bistri so tu na đaneja so ka ovel ko krajo hem koja odluka te ćhave ka anen. Ako hem ponodri deja sa tutar te sikave len, tu ađahar pomožineja lenđe jekh dive te oven e Devlese amala (w22.04 19-20 ¶16-17).

O Solomon hine ponizno sa đi hine verno e Devlese. Ked hine terno, ov đanđa so šaj te ćerel, a so našti hem pućlja e Jehova te pomožini lese (1. Kralj. 3:7-9). Ked počminđa te vladini, ov đanđa kobor tano opasno ked neko tano ponosno. Ama, ko krajo o Solomon na ićerđa pe ko odova so pisinđa ko avdisutno citati. Sar đelo o vreme, ov ulo ponosno hem na manglja te šunel e Devlese zapovestija. Na primer, jekh ando zapovestija ko kola o izraelsko kralj valjanđa te ićeri pe hine te „na ovel le but romnja, te na đal oleso vilo ko pogrešno drumo“ (Pon. zak. 17:17). O Solomon na šunđa akija zapovest. Ov hine le 700 romnja hem 300 inoče (1. Kralj. 11:1-3). Šaj o Solomon mislinđa so odova na ka ćerel lese problemi. Ama, sar đelo o vreme, sa odova cidinđa le ando Jehova (1. Kralj. 11:9-13; w22.05 23 ¶12).

O manuša avdije valjani te anen jekh važno odluka. Valjani te birinen da li ka služinen e pravo Devlese ili ka oven ki strana ando e Devleso najbaro dušmani, o Beng. Našti te phenen so nane ki nikasi strana. Olengi budućnost ka zavisini ando odova savi odluka ka anen (Mat. 25:31-33, 46). Ki „bari nevolja“, on ka oven obeležime te preživinen ili te oven uništime (Otkr. 7:14; 14:9-11; Jezek. 9:4, 6). Ako odlučinđan te služine e Devlese, but šukar ćerđan. Odolese akana sigurno mangeja te pomožine hem averenđe te anen asavki odluka. O blagoslovija ka dobinen okola kola verno podupirinena e Jehovaso pravo te vladini. Šukar tano te đana so pisini ki knjiga Otkrivenje, sose odova ka del amen snaga hem ponodri te služina e Jehovase. Odova so sikljiljam andi akija knjiga šaj te koristina te šaj te pomožina averenđe te služinen e Devlese (w22.05 15 ¶1-2).

Amen valjani te šuna odova so o Jehova phenela, a na amare dušmanija. O Jov pažljivo šunđa so phenđa lese o Jehova. Te šaj te mothovi e Jovese kobor brinini pe olestar, o Jehova koristinđa nekobor pućiba: „Da li ando odova dikheja kobor hijum moćno? Da li mislineja so na brininava man tutar?“ Ama, o Jov hine ponizno hem but ceninđa sa odova so o Jehova ćerđa lese. Odolese phenđa: „Me kana šunđe tutar, ama akana hem me jaćha dikhena tut“ (Jov 42:5). Kaj hine o Jov ked phenđa akala lafija? Ov pana bešlja ko praho, oleso telo hine pherdo čirija. Ama, hem tegani o Jehova utešinđa le hem mothovđa lese kobor mangela le (Jov 42:7, 8). Avdije hem amen šaj te uvredinen o manuša hem te ponašinen pe amencar lošno. On šaj te den sa pestar te lađaćeren amen ja amari organizacija. Ando Joveso primer sikljovaja so o Jehova isi le poverenje upro pe sluge so na ka irinen lese po dumo ked ka ovel len bare kušnje (w22.06 24 ¶15-16).

Iako ko nebo ka ovel bari radost sose o Baro Vavilon ka ovel uništimo, isi pana jekh pobaro razlog asi radost (Otkr. 19:1-3). A odova tano jekh važno događaj ando kova vaćeri i knjiga Otkrivenje – „e Bakreso bijav“. Hari angleder te počmini o Armagedon sa o pomaznikija ka oven ko nebo. Ama, tegani na ka ovel odova bijav (Otkr. 21:1, 2). E Bakreso bijav ka ovel palo Armagedon ked e Devlese dušmanija ka oven uništime (Ps. 45:3, 4, 13-17). So e Bakreso bijav značini e Isusese hem e pomazanikonenđe? Sar so jekh romni hem jekh rom ovena jekh ked khuvena ko brak, isto ađahar o Isus hem o pomazanikija ka oven ujedinime palo e Bakreso bijav. Ko odova trenutko, e Devleso Kraljevstvo ka počmini te vladini hem ka trajini 1 000 berš (Otkr. 20:6; w22.05 17 ¶11-13).

O Isus prorekninđa so ko vreme ando krajo ka ćhivel „e verno hem e razborito robe“ te del amen hrana ko pravo vreme (Mat. 24.45). Avdije dikhaja so odova robo dela sa pestar šukar te ćerel po zadatko. O Isus prekali odija grupa ando pomazime phralja dela duhovno hrana „ko pravo vreme“ hem e Devlese narodose hem okolenđe kola mangena te đanen o ćaćipe. Odola manuša na mislinena soj tane gospodarija andi amari vera (2. Kor. 1:24). On haljilje so o Isus tano „vođa hem zapovedniko“ ando Devleso narodo (Is. 55:4). Kotar 1919. berš, o verno hem o razborito robo ikalđa razna publikacije kola pomožinđe e manušenđe te sikljon o ćaćipe. Ko 1921. berš, ikalđa i knjiga E Devlesi harfa koja pomožinđa e manušenđe te sikljon o osnovna sikljoviba ando Devleso Lafi. Sar đelo o vreme, ikalđa hem avera publikacije kola pomožinđe e manušenđe. Koja knjiga pomožinđa tuće te haljove o ćaćipe? (w22.07 10 ¶9-10).

O Jehova tano but velikodušno. Bizo obzir kobor tu deja e Jehovase, ov uvek ka irini tuće poviše (Mar. 10:29, 30). Ov pana akana ko akava lošno sveto ka del tut šužo, ispunimo životi kova isi le svrha. Odova tano samo početak. Tu šaj te služine te Dadese, e Jehovase zauvek. O mangipe maškaro tute hem oleste ka ovel sa pobaro. Hem tu šaj te živine večno, sar o Jehova. Ked predajineja to životi e Jehovase hem krstineja tut, tegani isi tut čast te de nešto amare Dadese. Ov dinđa tut sa o šukar buća hem svako radosno trenutko ko životi. Tu šaj te irine lese aso odova ađahar so ka de le nešto so nane le – ti verno služba (Jov 1:8; 41:11; Posl. 27:11). Odova tano najšukar način sar šaj te koristine to životi (w23.03 6 ¶16-17).

Ked hijan tinejdžer, te seksualna želje tane but bare hem šaj avera te pheren ti godi te ćere nemoral. O Beng mangela te ćhivel tut te ćere odova. Ama, so šaj te pomožini tut te aćhove čisto anglo Jehovase jaćha? (1. Sol. 4:3, 4). Molin tut e Jehovase, vaćer lese sar ćaće osetineja tut hem rode olestar te pomožini tut te aćhove zoralo (Mat. 6:13). Ma bistri so o Jehova mangela te pomožini tuće, a na te osudini tut (Ps. 103:13, 14). Ma mislin so šaj kokri te rešine te problemija. Vaćer te dadese hem te dajaće sova borineja tut. Iako na ka ovel tuće lokho te phrave tut, but tano važno te ćere odova. Ked čitineja i Biblija hem hor razmislineja odolestar so čitinđan, odova šaj te pomožini tuće te ane odluke kola ka radujinen e Jehova. Sar napredujineja, ka dikhe so na valjani tuće pravilo asi svako situacija, sose ka haljove sar o Jehova dikhela ki disavi buti (w22.08 5 ¶10-12).

O poglavarija isi len odgovornost te brininen pe andi pi porodica. Ako hijan poglavari, tegani brinineja tut ando odova tekle te ovel len so te han, te platine i kirija hem o računija. Ama, šaj brinineja tut so ka našale ti buti hem so ka ovel tuće pharo te arakhe aver. Sar poglavari, ti odgovornost tani te ane ko ćher. Ama, šaj brininđan tut da li ka uspine te ćere odova? Ja šaj mislineja so našti te menine ti buti hem te živine poskromno. But manuša osetinena pe ađahar. Odolese o Satana šaj te iskoristini odija amari dar. Ov mangela te verujina so o Jehova na brinini pe amendar hem so na mangela te pomožini amen te brinina amen andi amari porodica. Sebepi odova, šaj te mislina so valjani te ćera sa soj tano đi amende te na bi našalaja amari buti, čak iako odova šaj te rumini amaro amalipe e Jehovaja (w22.06 15 ¶5-6).

Amen đanaja so o Jehova tano „milosrdno hem samilosno, strpljivo, pherdo verno mangipaja hem ćaćipaja“ (Izl. 34:6). O Jehova mangela i pravda (Is. 61:8). E Jehova but dukhala ked dikhela so patinaja hem jedva ađićeri te avel o vreme ked ka cidel sa o muke (Jer. 29:11). Odova tano but utešno! Akava tano jekh ando razlogija sose odobor mangaja e Jehova. Kova tano aver razlog sose mangaja o ćaćipe? O ćaćipe but pomožini amenđe. Na primer, dela amen nada asi budućnost. Sar so o sidro ićeri o brod ko jekh than ked isi oluja, ađahar hem amari nada koja temeljini pe ki Biblija pomožini amenđe te aćhova smirime ked isi amen problemija. Ko avdisutno stiho o Pavle vaćerđa andi nada koja isi len o pomazime hrišćanija. Ama, olese lafija odnosinena pe hem upro okola kola isi len nada so ka živinen večno ki phuv (Jov. 3:16). Odova so isi amen nada so ka živina večno, pomožini amen pana akana te đana sose živinaja (w22.08 14-15 ¶3-5).

Te šaj te ovel amen poverenje, prvo mora te ovel amen mangipe. Ki prvo Korinćanima ko 13. poglavlje pisini savo tano o mangipe, a odova mangipe šaj te pomožini amenđe te ovel amen pana pobaro poverenje upro nekaste ili te obnovina amaro poverenje (1. Kor. 13:4-8). Na primer, ko 4. stih pisini so „o mangipe tano strpljivo hem šukar“. O Jehova tano strpljivo amencar čak hem ked grešinaja lese. Odolese, hem amen valjani te ova strpljiva amare phralencar hem phenjencar ked on phenena ili ćerena diso so nerverini amen ili povredini amen. Ko 5. stih pisini so o mangipe „na holjani sigate, na pamtini o lošnipe“. Odova značini so na mangaja te pamtina o buća kola amare phralja ćerđe sovaja povredinđe amen. Ko Propovednik 7:9 pisini: „Ma uvredin tut sigate.“ Trudin tut te dikhe len ađahar sar so o Jehova dikhela len. O Jehova mangela len hem na pamtini olenge grehija. Odolese, ni amen na valjani te ćera odova (Ps. 130:3). Umesto te dikha samo olenge mane, valjani te trudina amen te dikha olenge šukar osobine (Mat. 7:1-5; w22.09 3-4 ¶6-7).

Ki knjiga Danilo pisini kole redoja ka oven disave važna događaja ko vreme ando krajo. Na primer, ko Danilo 12:1 pisini so o Mihailo, kova tano o Isus Hrist, „terđola hem pomožini [e Devlese] narodose“. Akava deo ando proročanstvo počminđa te ispunini pe ko 1914. berš ked o Isus hine pomazimo te ovel Kralj ko nebo. Isto ađahar, o Danilo phenđa so o Isus ka „uštel“ ko „vreme ando pharipe savo na hine odked tano o narodo pa đi odova vreme“. Odova „vreme ando pharipe“ tano isto so hem i „bari nevolja“ koja pomini pe ko Matej 24:21. O Isus ka uštel ili ka zaštitini e Devlese narodo ko krajo kotar vreme ando pharipe ili ko Armagedon. I knjiga Otkrivenje andi akija grupa vaćeri sar ando baro mnoštvo „kova avela andi bari nevolja“ (Otkr. 7:9, 14; w22.09 21 ¶4-5).

O anava kola tane akana pisime ki odija knjiga, šaj te kosen pe. Odolese so on akana tane pisime ka phene obično olovkaja (Otkr. 3:5). Ama, amen valjani te da sa amendar amare anava te aćhon pisime ki odija knjiga sa đi na ovena zauvek pisime disovaja so na kosela pe odobor lokho, sar soj tani i hemijska. Ki prvo grupa tane okola kola ka vladinen e Isuseja ko nebo. Da li olenge anava tane akana pisime ki knjiga ando životi? Ja. Ando odova so o apostol Pavle pisinđa e hrišćanenđe ko Filipi haljovaja so o anava ando pomazana hrišćanija ja okola kola ka vladinen e Isuseja tane već akana pisime ki odija knjiga (Fil. 4:3). Ama, te šaj olenge anava te aćhon ki odija knjiga, on valjani te aćhon verna e Jehovase đi o krajo. Palo odova so ka dobinen o završno pečati, olenge anava ka oven zauvek pisime ki odija knjiga. Odova ka ovel ili angleder so ka meren ili angleder so ka počmini i bari nevolja (Otkr. 7:3; w22.09 14 ¶3; 15 ¶5-6).

Zamislin so neko spreminđa tuće to omiljeno habe. Ama, šaj odolese so siđarđan ja brininđan tut disose haljan but sigate. Tek ked završinđan, haljiljan kobor sigate haljan hem so na uživinđan ko svako zalgo. Odova isto šaj te ovel hem ked čitinaja i Biblija. Šaj čitinaja odobor sigate so nane amen vreme te uživina ko odova so o Jehova mangela te sikavi amen. Odolese, ako mangaja te uživina đi čitinaja i Biblija, valjani te odvojina dovoljno vreme te šaj te ćera amenđe slike ki godi hem te zamislina sar vaćerena okola kastar čitinaja. Ako ađahar ćeraja, amen ka ova pobahtale. O Isus ćhivđa e „verno hem razborito robe“ te del amen hrana ko pravo vreme (Mat. 24:45). Odija duhovno hrana temeljini pe ki Biblija (1. Sol. 2:13. w22.10 7-8 ¶6-8).

Ki Biblija pisini so ko poslednja dive ka oven but manuša kola ka maren muj (2. Petr. 3:3, 4). Odova ćerena odolese so mangena te živinen premalo pe „lošna želje“ (Jud. 7, 17, 18). So valjani te ćera te na ova sar o manuša kola marena muj averenđe? Valjani te cida amen okolendar kola kritikujinena averen (Ps. 1:1). Odova značini so na ka šuna hem na ka čitina ništa so avela ando otpadnikija. Valjani te pazina te na počmina te žalina amen ko sa hem te na sumnjina ko Jehova hem ko smernice kola dobinaja andi olesi organizacija. Odolese, valjani te puća amen: „Da li uvek vaćerava diso negativno ked avela disavi nevi smernica ja disavo nevo objašnjenje? Da li uvek rodava samo o mane ko phralja kola predvodinena?“ Ked trudinaja amen sigate te cida amendar akala buća, o Jehova ka ovel zadovoljno amencar (Posl. 3:34, 35; w22.10 20 ¶9-10).

E Devleso duho zorjaćerđa e Jezekilje te propovedini e manušenđe kola hine len zoralo šero hem zoralo vilo. O Jehova phenđa e Jezekiljese: „Ka ćerav tut te ove zorale šereso sar soj tane on zorale šerese hem to ćekat ka ovel zoralo sar olengo ćekat. Ka ćerav to ćekat te ovel zoralo sar dijamanti, pozoralo ando kremen. Ma dara olendar“ (Jezek. 3:8, 9). Avere lafencar, ov phenđa lese: „Ma mukh te obeshrabrinen tut o manuša kola tane zorale šerese. Me ka zorjaćerav tut.“ Palo odova, e Devleso duho vazdinđa e Jezekilje hem legarđa le ko than kaj valjanđa te propovedini. O Jezekilj phenđa: „Upro mande but delujinđa e Jehovasi sila.“ E Jezekiljese valjanđa kurko dive te haljol i poruka koja valjanđa te objavini. Tek palo odova, ov šaj hine te vaćeri i poruka e manušenđe (Jezek. 3:14, 15). Tegani, o Jehova phenđa lese te đal ki jekh dolina kuri oleso „duho khuvđa ano [leste]“ (Jezek. 3:23, 24). Palo odova, o Jezekilj hine spremno te počmini pi služba (w22.11 4-5 ¶8-9).

O prorok Avakum hine le but problemija. Jekh puti, ov pućlja pe da li o Jehova brinini pe olestar. Tegani, ov phravđa e Jehovase po vilo ki molitva. O Jehova odgovorinđa ki olesi molitva (Avak. 2:2, 3). O Avakum hor razmislinđa sar o Jehova pomožinđa pe narodose hem palo odova palem hine radosno. Ov uverinđa pe so o Jehova brinini pe olestar hem so ka pomožini le ko bilo kova pharipe (Avak. 3:17-19). So sikljovaja olestar? Ked isi amen problemija, valjani te molina amen e Jehovase hem te vaćera lese sar osetinaja amen. Valjani te roda lestar te pomožini amen. Ako ađahar ćeraja, o Jehova ka del amen snaga koja valjani amenđe te istrajina. Ked ka dikha sar o Jehova pomožini amen, amari vera ka ovel pana pobari. Ako hem ponodri ćereja o buća kola pomožinena tut te ove paše e Jehovaja, tu na ka cide tut ando Jehova sebepi o problemija ili disave sumnje (1. Tim. 6:6-8; w22.11 15 ¶6-7).

O Isus hem o duj zločincija osetinena bari dukh sose tane kovime ko stubo (Luka 23:32, 33). O solduj zločincija marena muj e Isusese so mothovi amenđe so nane olese učenikija (Mat. 27:44; Mar. 15:32). Ama, jekh olendar kotar jekhvar počmini averćhane te razmislini. Ov phenela: „Isus, setin tut koro mande ked ka ave ko to Kraljevstvo.“ A o Isus odgovorinđa lese e lafencar ando avdisutno stiho (Luka 23:39-42). E Isusese lafija kola phenđa akale manušese podstakninena amen te razmislina savo ka ovel o životi ko raj. U stvari, ando raj šaj but te sikljova ked razmislinaja odolestar savo hine o životi ked vladinđa o kralj Solomon. Ki Biblija pisini so o Isus tano pobaro ando Solomon. Odolese, o Isus hem okola so ka vladinen oleja ka ćeren i phuv te ovel raj (Mat. 12:42). Kotar akava dikhaja so o „avera bakre“ ka valjani diso te ćeren te šaj te živinen ko raj ki phuv (Jov. 10:16; w22.12 8 ¶1; 9 ¶4).

O Isaija uverini amen so o Jehova pažljivo ka šunel amen ked rodaja olestar pomoć hem sigate ka odgovorini ki amari molitva. O Isaija pana phenđa: „Samo so ka šunel tut, ov ka odgovorini tuće.“ Akala lafija setinćerena amen ko odova so o Jehova isi le bari želja te pomožini okolenđe kola rodena lestar pomoć. Odova so đanaja akava, pomožini amen te istrajina hem te ova radosna. O Jehova pažljivo šunela svakone amendar ked molinaja amen. Sar đanaja odova? Ko prvo deo ando 30. poglavlje ki knjiga Isaija, o Jehova obratini pe pekle narodose sar grupa. Ama ko 19. stiho, ov obratini pe svakonese posebno. O Isaija pisinđa: „Ov sigurno ka smilujini pe tuće“ hem „ov ka odgovorini tuće.“ O Jehova tano amaro Dad kova but mangela amen hem brinini pe svakonestar amendar hem pažljivo šunela svakonesi molitva (Ps. 116:1; Is. 57:15; w22.11 9 ¶5-6).

Ked propovedinaja hem sikavaja averen, iako isi amen progonstvo, amen hijam bahtale hem isi amen mir. Ko prvo veko, ked o vlastija zapovedinđe e apostolenđe te na propovedinen, odola verna phralja šunđe e Devle. On hem ponodri propovedinđe hem sebepi odova hine bahtale (Dela 5:27-29, 41, 42). Naravno, ked amaro delo tano ograničimo, amen valjani te ova mudra đi propovedinaja. Ama, ked daja sa amendar te ćera odova so o Jehova phenela hem ked na ćhinavaja te propovedina, amen ka ovel amen mir. Ov sigurno so hem ked ka ovel tuće najpharo, ka ovel tut mir. Tegani, na valjani te bistre so valjani tuće o mir kova avela ando Devel, avere lafencar, o mir kova samo o Jehova šaj te del tut. Oslonin tut upro leste ked isi disavi epidemija, katastrofa ja progonstvo. Aćhov paše uzi olesi organizacija. Razmislin ando odova so ka ovel ki budućnost. Ked ka ćere sa akava, „o Devel ando mir“ ka ovel tuvaja (Fil. 4:9; w22.12 21 ¶17-18).

Odova šaj te ovel but pharo. Disave manuša valjani te ciden pestar o lošna osobine sar soj tani i holi, o gnev hem i ogorčenost (Ef. 4:31, 32). Sose odova šaj te ovel pharo? Odolese so disave lošna osobine šaj te oven hor ano amende. Na primer, i Biblija phenela so disave manuša „sigate holjanena“ (Posl. 29:22). Ako neko isi le asavke lošna osobine, olese šaj te ovel pharo te menini pe čak hem palo krštenje (Rimlj. 7:21-23). Ako isi diso soj tano tuće pharo te menine koro tute, tegani molin tut e Jehovase hem ov sigurno so ov ka šunel tut hem so ka pomožini tuće (1. Jov. 5:14, 15). Iako o Jehova na ka ćerel čudo te cidel tutar odola lošna buća, ov ka del tut snaga te na ćere len (1. Petr. 5:10). Isto ađahar, ako molinđan tut e Jehovase te pomožini tut, tegani ma ćer o buća kola ka irinen tut te ćere odova soj tano lošno. Isto ađahar, de sa tutar te na razmisline ando neispravna želje (Fil. 4:8; Kol. 3:2; w23.01 10 ¶7, 9-10).

Jekh način sar šaj te ćera odova tano te da sa amendar ki služba. Amen vaćeraja sa e manušencar, na dikhaja savi boja kože isi len ja koja ćhib vaćerena, niti dikhaja da li tane barvale ja ćorore. Ađahar mothovaja so ćeraja e Jehovasi volja, sose ov „mangela te spasinen pe sa o manuša hem šukar te penđaren o ćaćipe“ (1. Tim. 2:4). Isto ađahar, amen mothovaja so mangaja e Jehova hem e Isuse ked mothovaja mangipe premalo amare phralja hem phenja. Brininaja amen olendar hem trudinaja amen te pomožina len ked isi len pharipa. Tešinaja len ked neko merela lendar, đaja koro lende ked tane naborme hem ohrabrinaja len ked tane obeshrabrime (2. Kor. 1:3-7; 1. Sol. 5:11, 14). Molinaja amen olenđe odolese so „e pravednikosi molitva koja avela ando vilo isi la bari snaga“ (Jak. 5:16; w23.01 28-29 ¶7-8).

Sar đala o vreme, jekh manuš kova ćerela buti ki gradnja ovela sa pošukar hem pošukar ki pi buti. Isto ađahar, hem amen šaj te ova pana pošukar ko odova te ohrabrina jekh jekhe. Šaj te pomožina e phralenđe te istrajinen, ađahar so ka vaćera olencar sar disave e Devlese sluge istrajinđe ko pharipa (Jevr. 11:32-35; 12:1). Isto ađahar, šaj te ćera te ovel mir ađahar so ka dikha o šukar osobine ko avera, ka da sa amendar te aćhol o mir ki skupština hem ako nane amen isto mišljenje andi disavi buti ka trudina amen te arakha o jekhipe (Ef. 4:3). Uzo odova, šaj te ohrabrina amare phralen hem phenjen ađahar so ka vaćera olencar ando ćaćipe, ka pomožina lenđe ko odova so valjani lenđe hem ka ohrabrina okolen kasi vera tani slabo. Amen šaj te ova bahtale hem zadovoljna ked izgradinaja ili zorjaćeraja amare phralen hem phenjen. Jekh zgrada palo nekobor berš šaj te propadini, ama odova so amen ćeraja ka trajini večno (w22.08 22 ¶6; 25 ¶17-18).

O Isus phenđa so valjani te ovel amen jekh osobina te šaj pošukar te haljova odova so čitinaja ki Biblija. Odija osobina tani i razboritost (Mat. 24:15). Soj tani i razboritost? I razboritost tani sposobnost te haljova sar tani jekh buti povezimi avera bućaja, sar tani jekh buti averćhane andi aver buti hem te dikha o buća kola na dićhona odmah. Isto ađahar, o Isus phenđa so valjani amenđe razboritost te šaj te haljova kola događaja ispuninena e biblijake proročanstvija. Ako mangaja i Biblija potpuno te koristini amenđe, valjani te ovel amen razboritost. O Jehova dela razboritost pe slugenđe. Odolese, valjani te molina le te pomožini amen te ovel amen odija osobina. Sar šaj te postupina u skladu amare molitvaja? Ađahar so hor ka razmislina kotar odova so čitinđam hem ka dikha sar tano odova povezimo odoleja so već đanaja, te haljova so značini odova so čitinaja hem te dikha sar šaj te primenina odova ko amaro životi (Jevr. 5:14). Ako isi amen razboritost, amen sa pošukar ka haljova odova so čitinaja (w23.02 10 ¶7-8).

Zamislin so to amal dinđa tut jekh but purani, ama but skupo slika. Iako isi la disave fleke hem hari tani oštetimi, oj tani procenimi so koštini milionija dolarija. Sigurno bi cenineja odova poklon hem bi arakheja le. Isto ađahar, o Jehova dinđa amen jekh but vredno poklon – amaro životi. O Jehova mothovđa kobor cenini amaro životi ađahar so dinđa pe Ćhave sar otkupnina amenđe (Jov. 3:16). Ando Jehova avela o životi (Ps. 36:9). O apostol Pavle phenđa: „Sebepi oleso isi amen životi, phiraja hem postojinaja“ (Dela 17:25, 28). Odolese, šaj te phena so amaro životi tano poklon ando Jehova. Ov dela amen sa so valjani amenđe te šaj te aćhova đivde (Dela 14:15-17). Ama, o Jehova na ćerela disavo čudo te šaj te arakhi amaro životi. Umesto odova, ov ađićeri amendar te brinina amen ando amaro sastipe hem andi amari duhovnost najšukar so šaj (2. Kor. 7:1; w23.02 20 ¶1-2).

Amen hijam but zahvalna e Jehovase so dinđa amen i Biblija. Koro late šaj te arakha but savetija kola šaj te pomožinen amen te ikljova ko krajo amare problemencar. Isto ađahar, vaćeri andi but šuži nada asi budućnost. Soj tano najvažno, mothovi amenđe kola osobine isi le o Jehova. Ked razmislinaja ando olese osobine, odova takini amen ko vilo hem podstaknini amen te ova pana popaše oleja hem te ova olese amala (Ps. 25:14). O Jehova mangela o manuša te đanen koj tano ov. Odolese, ko purano vreme, disave manušenđe dinđa te dikhen sune hem vizije. A disavo puti bićhalđa pe anđelen te vaćeren e manušenđe olese poruke (Br. 12:6; Dela 10:3, 4). Ama, amen ne bi đanaja kola tane odola sune, vizije ja poruke ando anđelija ako ne bi ovena pisime. Odolese, o Jehova dinđa disave manušenđe te „pisinen ki knjiga“ odova so ov manglja amen te đana. Odolese so „o drumo ando pravo Devel tano savršeno“, amen šaj te ova sigurna so o način sar mangela te vaćeri amencar tano najšukar hem so ka pomožini amenđe (Ps. 18:30; w23.02 2 ¶1-2).

Ćhiv tuće korisna ciljija. Ćhiv tuće ciljija kola ka zorjaćeren ti vera hem ka pomožinen tut te ove pana pozrelo (Ef. 3:16). Jekh ando ciljija šaj te ovel redovno te čitine hem te proučine i Biblija (Ps. 1:2, 3). Isto ađahar, šaj redovno te moline tut hem te phrave e Jehovase to vilo. Ja šaj valjani pana pobuter te pazine savi zabava ka birine hem kuri ka đal to vreme (Ef. 5:15, 16). Ked pomožineja averenđe, tu oveja pana pozrelo. Na primer, šaj te ćhive tuće cilj te pomožine e phurenđe hem okolenđe kola tane naborme ki ti skupština. Šaj te pazarine lenđe ja te sikave len sar te koristinen o elektronska uređaja. Isto ađahar, ked propovedineja i šukar vest, ađahar mothoveja so mangeja e manušen (Mat. 9:36, 37). Odolese, ako šaj, sose na bi ćhiveja tuće cilj te ove ki punovremeno služba? (w22.08 6 ¶16-17).