Ο Ευαγγέλιος σο Γραφιντάς ο Λουκάς
4 Σοράν ο Ιησούς, πφερντό άγιος πνεύμας, νασλό κατά Ιορδάνης, ντα ο πνεύμας ι Ντεβλέσκο γκερέλας-λες τθαν τθανέστε αντρέ κι έρημος 2 40 ντιβεσά. Οτθέ ο Μπενγκ τσσουντάς λέσκε πειρασμός. Ντα να χαλάς τίποτα οντουλά ντιβεσά, οντουλέσκε-ντα κάνα νακχλέ, μποκχάλιλο. 3 Αζομάν ο Μπενγκ βακερντάς λέσκε: «Άμα ισινάν τσσαβό ι Ντεβλέσκο, βάκερ τι αβέλ μαντρό ακαβά μπαρ». 4 Αλλά ο Ιησούς βακερντάς λέσκε: «Ισί γραμμέ: “Ο τζενό δεν πρέπει τι τζουβντιόλ σάντε μαντρέσαρ”».
5 Οτθάρ, βοβ βαντιντάς-λες εκχέ βουτσσέ τθανέστε ντα σικαντάς λέσκε σαρέ ο βασιλείες ι πφουβιάκε ντιπ σουγκό. 6 Αζομάν ο Μπενγκ βακερντάς λέσκε: «Κα νταβ-τουτ σαρί ανταγιά ζορ ντα λένγκο χουλανιπέ,* σόσκε σαρέ ανταλά βασιλείες ισί μιρέ, ντα ντάβα-λεν κάστε μανγκάβα. 7 Οτθάρ, άμα τούι κα περές κοτσίντζαρ ανγκλά-μάντε,* σαρί ανταγιά ζορ κα αβέλ τιρί». 8 Ο Ιησούς βακερντάς λέσκε: «Ισί γραμμέ: “Ανγκλάλ κο Ιεχωβά* τι Ντεβλέστε πρέπει τι περές κοτσίντζαρ ντα σάντε λες πρέπει τι ντες λατρεία”».*
9 Σοράν γκερντάς-λες κι Ιερουσαλήμ ντα τσσουντάς-λες οπράλ κο βουτσσέ ντουβάρια κι ναόσκε ντα βακερντάς λέσκε: «Άμα ισινάν τσσαβό ι Ντεβλέσκο, περ ακατάρ, 10 σόσκε ισί γραμμέ: “Κα μπουτσσαβέλ τούκε πι αγγελόν για τι αρακχαβέν-τουτ” 11 ντα “Βον κα λεν-τουτ πουμαρέ βαστέντε για μα τι ντες το πιντρό κο μπαρ”». 12 Ο Ιησούς βακερντάς λέσκε: «Βακέρντιλο: “Μα δοκίμανε ι Ιεχωβάς* τι Ντεβλές μπέτι τροπόσαρ”». 13 Κάνα ο Μπενγκ κερντάς-λεν σαρέ ανταλά για τι τσσουβέλ λέσκε πειρασμός, νασλό λέσταρ ντα μπεσέλας μέχρι τι αβέλ εκ γιαβέρ βακίτι.
14 Αζομάν ο Ιησούς βουρτισάλο κι Γαλιλαία πφερντό ζοριάσαρ κατά Ντεβλέσκο πνεύμας. Ντα ασούντιλε λατσσέ λάφια λέσκε σαρέ κο τθανά ντονταλάι. 15 Ατζέ, σικλιαρέλας κο συναγωγές, ντα σαρέ ισαρένας-λες.
16 Σοράν γκιλό κι Ναζαρέτ, οτθέ σο μπαριλόας, ντα σαρ κερέλας κο Σάββατα, ντινάς αντρέ κι συναγωγή ντα ιστίντιλο τι διαβάνελ. 17 Ντιντιλό λέστε ο βιβλίος* σο γραφιντάς ο προφήτης Ησαΐας, ντα βοβ πουταρντάς-λες ντα αρακχλάς οτθέ σο ισινέ γραμμέ ακαβά: 18 «Πνεύμας ι Ιεχωβάσκο* ισί οπρά-μάντε, σόσκε βοβ τραμπιντάς-μαν για τι μουτθαβάβ λατσσέ αμπέρια κο τσορορέ. Μπουτσσαντάς-μαν τι βακεράβ κο δούλοι ότι κα ελευθερώντιβεν ντα κο κορορέ ότι κα ντικχέν πάλι, ντα τι ελευθερώναβ οντουλέν σο τθερένα πφανγκό γκι, 19 τι μουτθαβάβ ότι αβιλό ο μπρες σο ο Ιεχωβά* σικαβέλα λατσσιπέ». 20 Αζομάν πφαντάς ο βιβλίος, ντινάς-λες παλάλ κο υπηρέτης ντα μπεσλό, ντα σαριλένγκε γιακχά κι συναγωγή ισινέ οπρά-λέστε. 21 Σοράν αρχισάλο τι βακερέλ λένγκε: «Αντιβές νικιόνα μπαγιά ο λάφια ι Γραφιάκε σο ασουντέν ακανά».
22 Ντα σαρέ βακερένας λατσσέ λάφια λέσκε ντα σαστίνενας κατά σουκάρ λάφια σο νικιόνας λέσκε μόσταρ, ντα βακερένας: «Ι Ιωσηφίσκο τσσαβό νανέ ακαβά;» 23 Αζομάν βακερντάς λένγκε: «Σίγουρα κα βακερέν ότι ακαβά λάφι ταιριάνελα μάνγκε: “Γιατρέ, σάστιαρ* το νεαυτός. Κερ ατθέ-ντα τι τθεμέστε οντουλά σο ασουντάμ ότι αβιλέ-πες κι Καπερναούμ”». 24 Βακερντάς ακαβά-ντα: «Μπαγιά βακεράβα τουμένγκε ότι καεκχέ προφητής να δεχτίνενα-λες λέσκε τθεμέστε. 25 Μπαγιά, ισινέ μπουτ χήρες κο Ισραήλ κο ντιβεσά κι Ηλιάσκε κάνα ο ουρανός πφαντιλό τριν μπρεσά ντα σιοβ μασεκά, ντα πελί μπαρί μποκχ σαρό κο τθεμ. 26 Όμως, ο Ηλίας να μπουτσσάντιλο καεκχιάτε οντουλένταρ, αλλά σάντε εκχέ χηράτε κο Σαρεπτά, κο τθεμ Σιδώνα. 27 Ατζέκ, ισινέ μπουτ λεπροί κο Ισραήλ κάνα ισινέ προφήτης ο Ελισαιέ. Όμως, καέκ λένταρ να αβιλό λατσσές* αλλά σάντε ο Νεεμάν ο Σύριος». 28 Αζομάν σαρέ ο τζενέ σο ασουνένας-λεν ανταλά κι συναγωγή πφερντιλέ χολί, 29 ιστίντιλε ντα νικαντέ-λες σουγκό αβρί κατά πόλη ντα γκερντέ-λες κι νάκρη κι βεσέσκι, οτθέ οπράλ σο ισινέ κερντί, για τι περαβέν-λες κο γκρεμός. 30 Αλλά βοβ νακχλό οτθάρ αντράλ σο ισινέ βον ντα νασλό.
31 Σοράν γκιλό κι Καπερναούμ, εκ πόλη κι Γαλιλαία. Ντα σικλιαρέλας-λεν κο Σάββατος, 32 ντα βον ατσσόνας πουταρντέ μόσαρ λέσκε σικλιαριμάσταρ, σόσκε οντουλά σο βακερέλας ισινέ κατά Ντεβέλ. 33 Κι συναγωγή ισινέ εκ δαιμονισμέ τζενό σο ντινάς βίκος ζουρανές: 34 «Σο μπουτί τθεράσα αμέν τούσαρ, Ιησού Ναζωραίε; Αβιλάν τι καταστραφίνες-αμέν; Τζανάβα μπουτ λατσσές κον ισινάν: ο Άγιος σο μπουτσσάντιλο κατά Ντεβέλ!» 35 Αλλά ο Ιησούς ντινάς βίκος οπράλ κο δαίμονας ακαλέ λαφίντζαρ: «Μα κερ λάφι ντα νίκιουβ λέσταρ!» Οντιά στιγμή ο δαίμονας περαντάς τελέ ι τζενές ανγκλά-λέντε ντα νικίστιλο λέσταρ χωρίς τι κερέλ λέσκε ζιάνι. 36 Αζομάν σαρέ σαστισάλε ντα βακερένας ο εκ ι γιαβερέσκε: «Σο λάφι ισί ανταβά; Τθερέλα ι ζορ τι νικαβέλ ι δαιμονέν, ντα βον νικιόνα!» 37 Ντα λιντιλό αμπέρι λέσκε σαρέ κο τθανά ντονταλάι.
38 Κάνα νασλόας κατά συναγωγή, γκιλό κο κχερ κι Σιμωνάσκο. Η σασούι ι Σιμωνάσκι τσσίντελας μπουτ σόσκε τθερέλας μπουτ πυρετός, ντα μολιντέ-λες τι βοηθίνελ-λα. 39 Βοβ ατσσιλό πασέ λάκε κρεβατίστε, ντινάς βίκος οπράλ κο πυρετός ντα ο πυρετός μουκχλάς-λα. Μπουτ σουγκό βόι ιστίντιλι ντα αρχισάλι τι κερέλ λένγκε χαμπέ.
40 Καζόμ περέλας ο κχαμ, σαρέ οντουλά σο τθερένας νασφαλέν* σαβέ τι μανγκές νασφαλιματέντζαρ αντέ-λεν λέστε. Βοβ τσσουβέλας πο βαστά οπράλ κο κάθε εκ ντα κερέλας-λεν λατσσές. 41 Ντα μπουτέ τζενένταρ νικιόνας δαίμονες σο ντένας βίκος ντα βακερένας: «Τούι ισινάν ο Τσσαβό ι Ντεβλέσκο». Αλλά βοβ ντέλας βίκος οπρά-λέντε ντα να μουκχέλας-λεν τι κερέν λάφι, σόσκε τζανένας ότι ισί ο Χριστός.*
42 Κάνα ντισιλό, νασλό ντα γκιλό εκχέ τθανέστε για τι ατσσόλ κορκορό. Αλλά μπουτ τζενέ ρόντενας λέσκε ντα γκιλέ οτθέ σο ισινέ βοβ ντα να μουκχένας-λες τι νασέλ. 43 Βοβ όμως βακερντάς λένγκε: «Πρέπει τι μουτθαβάβ ο λατσσέ αμπέρια ι Ντεβλέσκε Βασιλειάκερε γιαβερέ-ντα τθεμέντε, σόσκε ανταλέσκε μπουτσσάντιλομ». 44 Ντα συνεχιντάς τι μουτθαβέλ ο λατσσέ αμπέρια κο συναγωγές κι Ιουδαία.