Ο Πρώτος Γράμμας σο Μπουτσσάντιλο κο Κορίνθιοι

8 Ακανά κα γραφίναβ ι χαμπέσκε σο ντιντιλό κο είδωλα. Σαρέ τζανάσα ανταλέσκε. Οντουλά σο τζανέλα εκ τζενό κερένα-λες τι πφερντιόλ μπαρικανιπέ, αλλά η αγάπη ντέλα ζορ ι γιαβερέν. 2 Άμα εκ τζενό πακιάλα ότι τζανέλα κάτι, ατζέ να τζανέλα-λες λατσσές. 3 Αλλά άμα εκ τζενό μανγκέλα ι Ντεβλές, ο Ντεβέλ τζανέλα ανταλέ τζενές.

4 Μπορίνασα τι χας χαμπέ σο ντιντιλό κο είδωλα; Τζανάσα ότι εκ είδωλος νανέ αληθινός ντεβέλ ντα ότι υπαρχίντιβελα σάντε εκ Ντεβέλ. 5 Ισί μπουτ πράγματα σο βακερένα ο τζενέ ότι ισί ντεβέλ, είτε κο ουρανός είτε κι πφουβ. Άρα, ο τζενέ τθερένα μπουτέ «ντεβλέν» ντα μπουτέ «κυριόν». 6 Αμέν όμως τθεράσα εκχέ Ντεβλές, ι Νταντές. Σαρέ ισί λέσταρ, ντα αμέν τζουβντιάσα λέσκε. Ντα εκχέ Κυριός, ι Ιησού Χριστός. Σαρέ αβιλέ αντράλ λέσταρ, ντα αμέν τθεράσα ζωή αντράλ λέσταρ.

7 Όμως, να αγαβένα-λες σαρέ ανταβά. Ισί τζενέ σο ανγκλέ ντένας λατρεία κο είδωλα. Οτθάρ, κάνα χάνα χαμπέ σο θυσιασάλο εκχέ ειδωλόστε αμντίνενα ότι ντένα λατρεία κο είδωλος. Ντα λένγκι συνείδηση,* σο ισί μπίζουρανι, ενοχλίνελα-λεν. 8 Αλλά ο χαμπέ να κα ανέλ-αμέν πο πασέ κο Ντεβέλ. Να χασαράσα κάτι άμα να κα χας ούτε κα κερδίνας κάτι άμα κα χας. 9 Τθερέν όμως τουμαρί γκοντί μήπως ο δικαίωμας σο τθερένα τι τραμπίνεν κα κερέλ ι μπίζουρανεν τι περέν.* 10 Παρόλο σο τζανέσα ότι ο είδωλος νανέ τίποτα, ο τζενό σο τθερέλα μπίζουρανι συνείδηση μπορεί τι ντικχέλ-τουτ τι χας εκχέ ναόστε σο οτθέ ο τζενέ ντένα λατρεία κο είδωλα. Ανταβά μπορεί τι κερέλ-λες τι χαλ χαμπέ σο ντιντιλό κο είδωλα. 11 Ατζέ-ντα άμα τζανέσα ότι ισί σωστός τι χας ανταβά χαμπέ, καταστραφίνεσα ι πίστη ι μπίζουρανε τζενέσκι. Τι ντες-τουτ γκοντί ότι βοβ ισί το πφραλ σο μουλό λέσκε ο Χριστός. 12 Κάνα κερένα ανταλέ τροπόσαρ αμαρτία σο τζάλα κόντρα τουμαρέ πφραλέντε ντα κερένα ζιάνι κι μπίζουρανι συνείδηση λένγκι, κερένα αμαρτία σο τζάλα κόντρα κο Χριστός. 13 Οτθάρ, άμα ο χαμπέ κερέλα μπίζουρανι μι πφραλέσκι πίστη,* να κα χαβ ποτές πάλι μας για μα τι κεράβ μπίζουρανι μι πφραλέσκι πίστη.