Γράμμας σο Μπουτσσάντιλο κο Ρωμαίοι
5 Ακανά σο βακέρντιλαμ δίκαιοι αντράλ κατά πίστη, τι τθεράς ειρήνη* ι Ντεβλέσαρ αντράλ αμαρέ Κυριόσταρ κατά Ιησούς Χριστός. 2 Αμαρί πίστη λέστε πουτρέλα αμένγκε ο ντρομ για τι λας ο μπαρό λατσσιπέ ι Ντεβλέσκο* σο σικάντιβελα αμένγκε ακανά. Ντα τι χαιρίνας,* σόσκε ντάσα μπέσα* κο Ντεβέλ ότι κα δοξάντιβας λέσταρ. 3 Ντα εκτός ανταλέσταρ, τι χαιρίνας* κάνα τθεράσα στεναχώριες, αφού τζανάσα ότι η στεναχώρια ανέλα αμένγκε υπομονή. 4 Αμαρί υπομονή κερέλα ι Ντεβλές τι ντικχέλ-αμέν λατσσιμάσαρ, ντα ανταβά κερέλα-αμέν τι ντας λέσκε μπέσα.* 5 Ντα η μπέσα* σο τθεράσα να ανέλα αμένγκε λατζ, επειδή αμαρό γκι πφερντιλό κατά αγάπη ι Ντεβλέσκι αντράλ κατά άγιος πνεύμας σο ντιντιλό αμέντε.
6 Μπαγιά, καζόμ αμέν ισινάμας ατζέ μπίζουρανε, ο Χριστός μουλό πφιρνέ* τζενένγκε κο βακίτι σο τραμπιντάς ο Ντεβέλ. 7 Ισί μπουτ δύσκολος τι μερέλ εκ τζενό εκχέ δίκαιε τζενέσκε. Όμως, εκχέ μπουτ λατσσέ τζενέσκε μπέκιμ τι μανγκέλ τι μερέλ. 8 Αλλά ο Ντεβέλ σικαβέλα αμένγκε πιρί αγάπη ακαλέ τροπόσαρ: καζόμ ισινάμας ατζέκ αμαρτωλοί, ο Χριστός μουλό αμένγκε. 9 Οτθάρ, ακανά σο βακέρντιλαμ δίκαιοι αντράλ λέσκε ρατέσταρ, ισινάμ ατζέ πο σίγουροι ότι κα σώντιβας κατά μπαρί χολί ι Ντεβλέσκι. 10 Παρόλο σο ισινάμας ντουσμάνια* ι Ντεβλέσαρ, αβιλάμ λέσαρ αμαλά* αντράλ κατά μεριπέ λέσκε Τσσαβέσκο. Ανταβά κερέλα-αμέν τι αβάς ατζέ πο σίγουροι ότι κα σώντιβας αντράλ κατά ζωή ι Ιησούσκι, ακανά σο ισινάμ αμαλά ι Ντεβλέσαρ. 11 Όχι σάντε ανταβά, αλλά τθεράσα χαρά-ντα κατά Ντεβέλ αντράλ αμαρέ Κυριόσταρ κατά Ιησούς Χριστός, σο λέσταρ αβιλάμ ακανά αμαλά ι Ντεβλέσαρ.
12 Η αμαρτία αβιλί κο ντουνιάς εκχέ τζενέσταρ ντα κατά αμαρτία αβιλό ο μεριπέ. Αντικάς ο μεριπέ γκιλό σαρέ κο τζενέ, σόσκε σαρέ αμαρτιντέας. 13 Η αμαρτία ισινέ κο ντουνιάς πριν κατά Νόμος, αλλά κάνα νανέ νόμος καέκ να κρίντιβελα πι αμαρτιάκε. 14 Ο μεριπέ κερντάς κουμάντος σαρ βασιλιάς κατά Αδάμ μέχρι κο Μωυσής, ατζέ-ντα οντουλέντε σο να αμαρτιντέας οντουλέ τροπόσαρ σο αμαρτιντάς ο Αδάμ. Ο Αδάμ μοιάζελας οντουλέσαρ σο κα αβέλας.
15 Αλλά ο δώρος ι Ντεβλέσκο νανέ σαρ ι αμαρτία ι Αδαμίσκι. Μπουτ τζενέ μουλέ ιτιρί κατά αμαρτία οντουλέ τζενέσκι. Αλλά ο μπαρό λατσσιπέ ι Ντεβλέσκο* ντα λέσκο δώρος αντράλ κατά μπαρό λατσσιπέ εκχέ τζενέσκο, ι Ιησού Χριστόσκο, ισί μπουτ πο μπαρέ. Αντράλ ανταλέ δωρόσταρ, ο Ντεβέλ ανέλα μπερεκέτι ευλογίες μπουτέ τζενέντε! 16 Ο ευλογίες κατά δώρος ι Ντεβλέσκο νανέ σαρ ο μπέτι πράγματα σο αβιλέ κατά αμαρτία οντουλέ εκχέ τζενέσκι. Σόσκε εκ αμαρτία κερντάς ι τζενέν τι καταδικάντιβεν, αλλά ο δώρος σο ντινάς ο Ντεβέλ ιτιρί μπουτέ αμαρτιένταρ κερντάς τι βακέρντιβεν ο τζενέ δίκαιοι. 17 Ο μεριπέ κερντάς κουμάντος σαρ βασιλιάς αντράλ κατά αμαρτία οντουλέ εκχέ τζενέσκι. Αλλά ισί ατζέ πο σίγουρος ότι οντουλά σο λένα μπερεκέτι μπαρό λατσσιπέ κατά Ντεβέλ ντα ο δώρος τι βακέρντιβεν δίκαιοι κα τζουβντιόν για τι κερέν κουμάντος σαρ βασιλιάδες αντράλ εκχέ τζενέσταρ, κατά Ιησούς Χριστός!
18 Άρα, σαρ αντράλ εκχέ αμαρτιάταρ καταδικασάλε σαβέ τι μανγκές τζενέ, αντικάς-ντα αντράλ εκχέ δίκαιε πραγμάσταρ σο αβιλό-πες,* σαβέ τι μανγκές τζενέ βακέρντιβενα δίκαιοι για τι τζουβντιόν. 19 Αντράλ εκχέ τζενέσταρ σο να ντινάς καν, μπουτ τζενέ αβιλέ αμαρτωλοί. Αντικάς-ντα αντράλ εκχέ τζενέσταρ σο ντινάς καν, μπουτ τζενέ κα αβέν δίκαιοι. 20 Ο Νόμος αβιλό για τι σικαβέλ καζόμ μπουτ αμαρτίες κερένας ο τζενέ. Αλλά οτθέ σο αβιλέ-πες μπουτ αμαρτίες, σικάντιλο ο μπαρό λατσσιπέ ι Ντεβλέσκο ατζέ πο μπουτ. 21 Οτθάρ, σαρ η αμαρτία ντα ο μεριπέ κερντέ κουμάντος σαρ βασιλιάδες, αντικάς-ντα τι κερέλ κουμάντος σαρ βασιλιάς ο μπαρό λατσσιπέ ι Ντεβλέσκο αντράλ κατά δικαιοσύνη. Ανταβά κα ανέλ ζωή για πάντα αντράλ κατά Ιησούς Χριστός αμαρέ Κυριόσταρ.