Ο Ευαγγέλιος σο Γραφιντάς ο Μάρκος
12 Σοράν αρχιντάς τι σικλιαρέλ-λεν παραδειγματέντζαρ:* «Εκ τζενό τσσουντάς εκχέ χωραφίστε ρεζά. Πφαντάς-λες ντονταλάι ντα χαντζουντάς εκ τθαν για τι ιστάντιβεν ο ντρακχά ντα κερντάς εκ πύργος. Σοράν, νοικιαντάς-λες γεωργόντε ντα νασλό γιαβερέ τθεμέστε. 2 Κο βακίτι κι γκιντιμάσκο μπουτσσαντάς εκχέ δουλός κο γεωργοί για τι λελ λένταρ μερικά ντρακχά* κατά ρεζά. 3 Αλλά βον ασταρντέ-λες, νταπλέ-λες ντα παλντιντέ-λες τσουτσέ βαστέντζαρ. 4 Πάλι μπουτσσαντάς λένγκε εκχέ γιαβερέ δουλός, ντα λες ντινέ-λες* κο σορό ντα αντέ λέσκε λατζ. 5 Μπουτσσαντάς εκχέ γιαβερές, ντα λες μουνταρντέ-λες, εμ μπουτέ γιαβερέν-ντα σο μερικέν λένταρ νταπλέ-λεν ντα μερικέν μουνταρντέ-λεν. 6 Εκχές τθερέλας ατζέκ, εκχέ τσσαβές σο μανγκέλας-λες μπουτ. Οντουλές μπουτσσαντάς-λες λένγκε κο τέλος, σόσκε βακερέλας: “Κα σεβάνεν μι τσσαβές”. 7 Αλλά οντουλά γεωργοί βακερντέ ο εκ κο γιαβέρ: “Λέστε κα ντιντιόλ ο χωράφι. Ελάν τι μουνταράς-λες, ντα ο χωράφι κα αβέλ αμαρό”.* 8 Οτθάρ, ασταρντέ-λες ντα μουνταρντέ-λες ντα φουρτιντέ-λες αβρί κατά χωράφι. 9 Σο κα κερέλ ο τζενό ι χωραφίσκο; Κα αβέλ ντα κα μουνταρέλ ι γεωργόν ντα κα ντελ ο χωράφι γιαβερέντε. 10 Να διαβαντέν ποτές οντουβά σο βακερέλα η Γραφή: “Ο μπαρ σο να μανγκλέ ο χτίστες αβιλό ο πο σημαντικός μπαρ ι γωνιάκο, 11 κερντιλό κατά Ιεχωβά* ντα ισί μπουτ σουκάρ αμαρέ γιακχίντε”;»
12 Αζομάν μανγκλέ τι ασταρέν-λες, σόσκε αγαντέ ότι λεν τθερέλας πι γκοντιάτε κάνα βακερντάς ο παράδειγμας. Αλλά νταρασάλε κατά μπουτ τζενέ σο ισινέ οτθέ. Αντικάς μουκχλέ-λες ντα νασλέ.
13 Σοράν μπουτσσαντέ λέσκε μερικέ Φαρισαιόν ντα μερικέ τζενέν σο τσσίντενας κατά Ηρώδης για τι κερέν ι Ιησούς τι βακερέλ κάτι λάθος. 14 Κάνα αβιλέ βον βακερντέ λέσκε: «Δάσκαλε, τζανάσα ότι βακερέσα ι αλήθεια ντα να χάλα-τουτ ανάγκη σο βακερένα ο γιαβερά, σόσκε να ντικχέσα σαρ ισί αβριάλ ο τζενέ, αλλά σικλιαρέσα ι αλήθεια ι Ντεβλέσκε. Κερέλα* τι ποκινέλ εκ τζενό φόρος κο Καίσαρας ή να κερέλα; 15 Τι ποκινάς ή μα τι ποκινάς;» Βοβ αγαντάς ότι ισινέ ντουέ μουένγκε ντα βακερντάς λένγκε: «Σόσκε δοκιμάνενα-μαν; Ανέν μάνγκε τι ντικχάβ εκ δηνάριος». 16 Βον αντέ-λες, ντα βοβ βακερντάς λένγκε: «Κάσκο μούι ντα κάσκο ναβ ισί ακαβά;» Βον βακερντέ λέσκε: «Ι Καισαράσκο». 17 Αζομάν ο Ιησούς βακερντάς: «Ντεν οντουλά σο ισί ι Καισαράσκε κο Καίσαρας, αλλά οντουλά σο ισί ι Ντεβλέσκε κο Ντεβέλ». Ντα ατσσιλέ πουταρντέ μόσαρ λέσταρ.
18 Σοράν ο Σαδδουκαίοι, σο να πακιάνα ότι κα ιστίν ο μουλέ, αβιλέ ντα πουτσλέ-λες: 19 «Δάσκαλε, ο Μωυσής γραφιντάς αμένγκε ότι άμα ο πφραλ εκχέ τζενέσκο μουλό ντα μουκχλάς παλά-πέστε ρομνιά, αλλά να κερντάς χουρντές, λέσκο πφραλ πρέπει τι λελ ι ρομνιά ντα τι κερέλ τσσαβέν πι πφραλέσκε. 20 Εκχέ φαμιλιάτε ισινέ εφτά πφραλά. Ο πρώτος λιντάς ρομνιά, αλλά κάνα μουλό να μουκχλάς τσσαβέν. 21 Ντα παντρισάλο λάσαρ ο δεύτερος, αλλά μουλό ντα να μουκχλάς τσσαβέν. Ανταβά αβιλό-πες εμ κο τρίτος. 22 Ο εφτά-ντα να μουκχλέ τσσαβέν. Τελευταία σαριλένταρ μουλί η ρομνί-ντα. 23 Κάσκι ρομνί κα αβέλ βόι κάνα κα ιστίν κατά μουλέ; Σόσκε ο εφτά-ντα παντρισάλεας λάσαρ». 24 Ο Ιησούς βακερντάς λένγκε: «Να τζανένα ούτε ι Γραφή ούτε ι ζορ ι Ντεβλέσκι. Άκ’ σόσκε κερένα λάθος. 25 Κάνα κα τζουβντιόν ο μουλέ, ο μουρσά ντα ο τζουβλιά να κα παντρίνεν αλλά κα αβέν σαρ ο άγγελοι κο ουρανός. 26 Αλλά ι μουλένγκε σο κα τζουβντιόν πάλι, να διαβαντέν κο βιβλίος κι Μωυσίσκο, κι ιστορία ι καντραλέ θαμνόσκε, ότι ο Ντεβέλ βακερντάς λέσκε: “Με ισινόμ ο Ντεβέλ ι Αβρααμίσκο ντα ο Ντεβέλ ι Ισαακίσκο ντα ο Ντεβέλ ι Ιακωβίσκο”; 27 Βοβ νανέ Ντεβέλ ι μουλένγκο, αλλά ι τζουβντένγκο. Κερένα μπουτ μπαρό λάθος».
28 Εκ κατά γραμματείς, σο αβιλόας πασέ ντα ασουντάας-λεν τι χαν-πουμέν λαφίντζαρ, τζανέλας ότι ο Ιησούς βακερντάς λατσσό λάφι ντα πουτσλάς-λες: «Καγιά εντολή ισί πρώτη* σαριλένταρ;» 29 Ο Ιησούς βακερντάς: «Η πρώτη ισί: “Ασούν, Ισραήλ: ο Ιεχωβά* αμαρό Ντεβέλ ισί εκ Ιεχωβά.* 30 Μανγκ ι Ιεχωβάς* τι Ντεβλές σαρέ τι γκίσαρ ντα σαρέ τι ψυχιάσαρ* ντα σαρέ τι γκοντιάσαρ ντα σαρέ τι ζοριάσαρ”. 31 Η δεύτερη ισί ακαγιά: “Μανγκ ι γιαβερέν* σαρ μανγκέσα τουτ”. Νανέ γιαβέρ εντολή πο μπαρί ανταλένταρ». 32 Ο γραμματέας βακερντάς λέσκε: «Δάσκαλε, λατσσό το λάφι, βακερντάν ι αλήθεια: “Βοβ ισί Εκ, ντα νανέ γιαβέρ εκτός λέσταρ”. 33 Ντα τι μανγκέλ-λες εκ τζενό σαρέ πι γκίσαρ, σαρέ πι γκοντιάσαρ ντα σαρέ πι ζοριάσαρ, ντα τι μανγκέλ ι γιαβερέν* σαρ μανγκέλα πες, ισί μπουτ πο σημαντικός σαρέ κατά θυσίες σο πφαμπόνα γιακάσαρ* σαστέ ντα κατά γιαβερά θυσίες». 34 Κάνα ο Ιησούς ντικχλάς ότι απαντιντάας γκοντιάσαρ, βακερντάς λέσκε: «Να ισινάν ντουρ κατά Βασιλεία ι Ντεβλέσκι». Ντα καέκ να κοτίνελας τι πουτσέλ-λες κάτι γιαβέρ.
35 Όμως, καζόμ ο Ιησούς συνεχίνελας τι σικλιαρέλ κο ναός, βακερντάς: «Σόσκε βακερένα ο γραμματείς ότι ο Χριστός ισί τσσαβό ι Δαβιδίσκο; 36 Αντράλ κατά άγιος πνεύμας ο Δαβίδ βακερντάς: “Ο Ιεχωβά* βακερντάς μι Κυριόσκε: «Μπες δεξιά μάνταρ μέχρι τι τσσουβάβ τι ντουσμανίν* τελάλ τι πιντρένταρ»”. 37 Ο Δαβίδ βικίνελα ι Χριστός* “Κύριε”, άρα σαρ αβέλα-πες τι ισί λέσκο τσσαβό;»
Ντα μπουτ τζενέ μπεϊντίνενας* τι ασουνέν-λες. 38 Οτθέ σο σικλιαρέλας βακερντάς: «Αρακχαβέν-τουμέν κατά γραμματείς σο μανγκένα τι πφιρέν σεΐντζαρ σο ταρτίνενα ι προσοχή ντα μανγκένα τι χαιρετίνεν-λεν ο γιαβερά κο αγορές 39 ντα μπεϊντίνενα ο ανγκλαϊνέ* καρέκλες κο συναγωγές ντα ο πο λατσσέ θέσεις κο τραπέζια. 40 Χάνα ι χηρένγκε περιουσίες* ντα κερένα μπαρέ προσευχές για τι σικαβέν-πουμέν. Βον κα λεν πο μπαρί* τιμωρία».
41 Ντα μπεσλό απέναντι κατά κουτιά ι λοβένγκε ντα ντικχέλας σαρ τσσουβένας ο τζενέ λοβέ κο κουτιά, ντα μπερεκέτι χουλανέ τσσουβένας μπουτ λοβέ. 42 Αβιλί όμως εκ τσορορί χήρα ντα τσσουντάς ντούι χουρντέ κέρματα σο τθερένας μπουτ χάνικ αξία.* 43 Οτθάρ, βοβ ντινάς βίκος πι μαθητέν ντα βακερντάς λένγκε: «Μπαγιά βακεράβα τουμένγκε ότι ακαγιά τσορορί χήρα τσσουντάς πο μπουτ σαρέ κατά γιαβερά σο τσσουβένα λοβέ κο κουτιά. 44 Σόσκε σαρέ τσσουντέ κατά λοβέ σο ατσσόνας-λεν, αλλά βόι τσσουντάς σαρέ πο λοβέ, σο-ντα τθερέλας για τι τζουβντιόλ».