Ο Ευαγγέλιος σο Γραφιντάς ο Ματθαίος
7 »Μα κρίνεν για μα τι κρίντιβεν, 2 σόσκε αντικάς σαρ κρίνενα κα κρίντιβεν, ντα καζόμ ντένα, αζόμ κα λεν.* 3 Σόσκε ντικχέσα ο πους τι πφραλέσκε γιακχάτε, αλλά να ντικχέσα ο μπαρό κας τιρέ γιακχάτε; 4 Ή σαρ αβέλα-πες τι βακερές τι πφραλέσκε: “Μουκχ-μαν τι νικαβάβ ο πους τι γιακχάταρ”, αφού τούι τθερέσα τι γιακχάτε εκ μπαρό κας; 5 Ντουέ μουένγκο ισινάν! Πρώτα νίκαβ ο μπαρό κας τιρέ γιακχάταρ ντα αζομάν κα ντικχές λατσσές για τι νικαβές ο πους τι πφραλέσκε γιακχάταρ.
6 »Μα ντεν ι Ντεβλέσκε πράγματα κο τζουκελά ντα μα φουρτίνεν τουμαρέ μαργαριτάρια κο γουρούνια, για μα τι ισταβέν-λεν ντα τι βουρτίνεν για τι χαν-τουμέν.
7 »Μα τσσιναβέν τι μανγκέν κατά Ντεβέλ ντα κα ντιντιόλ-τουμέν, μα τσσιναβέν τι ρόντεν ντα κα αρακχέν, μα τσσιναβέν τι μπασκιαρέν ντα κα πουτάρντιβελ τουμένγκε. 8 Σόσκε κον μανγκέλα κατά Ντεβέλ λέλα, ντα κον ρόντελα αρακχέλα, ντα οντουλέσκε σο μπασκιαρέλα κα πουτάρντιβελ. 9 Κον τουμένταρ κα ντελ μπαρ πι τσσαβέστε άμα κα μανγκέλ μαντρό; 10 Ή κα ντελ-λες σαπές άμα κα μανγκέλ ματσσό; 11 Άρα, άμα τουμέν, σο ισινέν πφιρνέ,* τζανένα τι ντεν λατσσέ δώρα τουμαρέ τσσαβέντε, τουμαρό Ντατ σο ισί κο ουρανός να κα ντελ λατσσέ πράγματα οντουλέντε σο μανγκένα λέσταρ;
12 »Σαρέ οντουλά σο μανγκένα* τι κερέν τουμένγκε ο γιαβερά πρέπει τι κερέν-λεν τουμέν-ντα λένγκε. Ανταβά βακερέλα ο Νόμος ντα ο προφήτες.
13 »Τσσουβέν-τουμέν κατά στενή πόρτα, σόσκε μπουγλί ισί η πόρτα ντα εύκολος ο ντρομ σο γκερέλα κο μεριπέ, ντα μπουτ τζενέ τσσουβένα-πες ανταλέ πορτάταρ. 14 Αλλά στενή ισί η πόρτα ντα δύσκολος ο ντρομ σο γκερέλα κι ζωή, ντα χάνικ τζενέ αρακχένα-λες.
15 »Αρακχαβέν-τουμέν κατά προφήτες σο χουχαβένα. Βον αβένα κάρινγκ τουμέντε ντα αβριάλ ισί σαρ μπρακέ, αλλά αντράλ ισί μποκχαλέ ρουβά.* 16 Λένγκε καρπόνταρ κα αγαβέν-λεν.* Γκίντελα καέκ τζενό ντρακχά ή χχελιά κατά καντρέ; 17 Ο λατσσό δέντρος κερέλα λατσσό καρπός, αλλά ο κερνό δέντρος κερέλα χαλαντό καρπός. 18 Ο λατσσό δέντρος ναστί νικαβέλα χαλαντό καρπός ντα ο κερνό δέντρος ναστί κερέλα λατσσό καρπός. 19 Ο δέντρος σο να κερέλα λατσσό καρπός τσσιντιόλα ντα φουρτίντιβελα κι γιακ.* 20 Αντικάς ανταλέ τζενέν-ντα λένγκε καρπόνταρ κα αγαβέν-λεν.*
21 »Να κα νακχέλ κι Βασιλεία κι ουρανόσκι κον βακερέλα μάνγκε: “Κύριε, Κύριε”, αλλά σάντε κον κερέλα οντουβά σο μανγκέλα μο Ντατ σο ισί κο ουρανός. 22 Μπουτ τζενέ κα βακερέν μάνγκε οντουβά ντιβές: “Κύριε, Κύριε, να κερντάμ λάφι τι ναβέστε, να νικαντάμ δαιμονέν τι ναβέστε, ντα να κερντάμ μπουτ θαύματα τι ναβέστε;” 23 Αλλά με κα βακεράβ λένγκε: “Να τζανάβα-τουμέν! Νασέν μάνταρ, τουμέν σο κερένα μπέτι πράγματα!”
24 »Οτθάρ, κον ασουνέλα ανταλά σο βακεράβα ντα κερέλα-λεν ισί σαρ εκ γκοντιαβέρ τζενό σο λατσσαρντάς πο κχερ οπράλ κο μπαρ. 25 Ντα ντινάς μπρισίμ, βαντίντιλε ο πανιά ντα αβιλέ ζουρανέ μπαρμπαλιά οπράλ κο κχερ, αλλά ο κχερ να πελό, σόσκε ισινέ λατσσαρντό κο μπαρ. 26 Όμως, κον ασουνέλα ανταλά σο βακεράβα ντα να κερέλα-λεν ισί σαρ εκ ντινιλό τζενό σο λατσσαρντάς πο κχερ οπράλ κο κούμι.* 27 Ντα ντινάς μπρισίμ, βαντίντιλε ο πανιά ντα αβιλέ ζουρανέ μπαρμπαλιά οπράλ κο κχερ, ντα ο κχερ πελό, ντα αβιλό καταστροφή ντιπ σαρό».
28 Κάνα ο Ιησούς βακερντάς-λεν σαρέ ανταλά, ο τζενέ ατσσιλέας πουταρντέ μόσαρ λέσκε σικλιαριμάσταρ, 29 σόσκε οντουλά σο σικλιαρέλας-λεν ισινέ κατά Ντεβέλ, ντα να σικλιαρέλας-λεν σαρ λένγκε γραμματείς.