Ο Ευαγγέλιος σο Γραφιντάς ο Ματθαίος

26 Κάνα ο Ιησούς μπιτισκιαρντάς σαρέ ανταλέ λαφίντζαρ, βακερντάς πι μαθητένγκε: 2 «Τζανένα ότι ατζέ ντούι ντιβεσά ντα κα αβέλ-πες ο Πάσχας, ντα ι τζενέσκε Τσσαβές κα ντεν-λες λέσκε ντουσμανίνγκε* βαστέντε για τι ιμπλαβέν-λες κο κας».

3 Αζομάν ο μπαρέ ιερείς ντα ο πρεσβύτεροι ι λαόσκε γκιντισάλε κι αυλή κι αρχιερεάσκι,* σο βακέρντιβελας Καϊάφας, 4 ντα κερντέ-πες λάφι για τι ντικχέν σαρ τι ασταρέν ι Ιησούς πφιρνιμάσαρ ντα τι μουνταρέν-λες. 5 Όμως, βακερένας: «Μα τι ασταράς-λες κο μπαρό ντιβές, για μα τι αβέλ-πες βαβούρα κο λαός».

6 Καζόμ ισινέ ο Ιησούς κι Βηθανία, κο κχερ κι Σιμωνάσκο κι λεπρόσκο, 7 γκιλί πασέ λέστε εκ τζουβέλ σο τθερέλας εκ μπουκάλι πααλίς λαδίσαρ σο κχάντελας μίσκι, ντα αρχισάλι τι τσσορέλ-λες λέσκε σορέστε καζόμ βοβ χάλας.* 8 Σο ντικχλέ-λες ανταβά ο μαθητές, χολιασάλε μπουτ ντα βακερντέ: «Σόσκε τσσορντιλό σινανέ ανταβά λάδι; 9 Σόσκε μα τι μπικίντιβελας πααλίς ντα ο λοβέ τι ντιντιόνας κο τσορορέ;» 10 Ο Ιησούς τζανέλας καλέ πραγμάσκε κερένας λάφι, οτθάρ βακερντάς λένγκε: «Σόσκε πφανγκένα ο γκι ι τζουβλιάκο; Βόι κερντάς εκ λατσσιπέ μάνγκε. 11 Ι τσορορέν πάντα τθερένα-λεν τουμέντζαρ, αλλά μαν να κα τθερέν-μαν πάντα. 12 Κάνα η τζουβέλ τσσουντάς ανταβά λάδι οπράλ μι σωμάστε, κερντάς-λες για τι αβάβ έτοιμος τι πραχούντιβαβ. 13 Μπαγιά βακεράβα τουμένγκε: Κάι-ντα κα μουτθάντιβεν ανταλά λατσσέ αμπέρια σαρό κο ντουνιάς, κα βακέρντιβελ οντουβά-ντα σο κερντάς ανταγιά τζουβέλ ντα να κα μπιστάρντιβελ».

14 Αζομάν εκ κατά Δώδεκα, οντουβά σο βακέρντιβελας Ιούδας Ισκαριώτης, γκιλό κο μπαρέ ιερείς 15 ντα βακερντάς: «Σο κα ντεν-μαν για τι νταβ-λες τουμαρέ βαστέντε;» Βον βακερντέ ότι κα ντένας-λες 30 ασημένια κέρματα. 16 Οτθάρ μπερί, ρόντελας κάνα κα αβέλας πο λατσσές τι ντελ-λες λένγκε βαστέντε.

17 Κο πρώτος ντιβές κι Μπι-μαγιάκε Μαντρένγκο, ο μαθητές γκιλέ πασέ κο Ιησούς ντα βακερντέ λέσκε: «Κάι μανγκέσα τι ετοιμάνας τούκε τι χας ο Πάσχας;» 18 Βοβ βακερντάς: «Τζαν κι Ιερουσαλήμ, Οκουλέστε, ντα βακερέν λέσκε: “Ο Δάσκαλος βακερέλα: «Ερεσλό μο σαάτι. Κα κεράβ ο Πάσχας μι μαθητέντζαρ τι κχερέστε»”». 19 Οτθάρ, ο μαθητές κερντέ οντουλά σο βακερντάς λένγκε ο Ιησούς ντα ετοιμαντέ ο Πάσχας.

20 Κάνα αράτιλο, ο Ιησούς μπεσλό κο τραπέζι τι χαλ* γιεκ πι 12 μαθητέντζαρ. 21 Καζόμ χάνας, βακερντάς: «Μπαγιά βακεράβα τουμένγκε: Εκ τανό τουμένταρ κα ντελ-μαν μι ντουσμανίνγκε βαστέντε». 22 Σο ασουντέ-λες ανταβά, τσσουντέ μπουτ πουμαρέ γκίστε ντα σαρέ βακερένας λέσκε: «Κύριε, μα τι ισινόμ με;» 23 Βοβ βακερντάς: «Οντουβά σο μπολέλα πο μαντρό γιεκ μάντζαρ κο τσαρό, βοβ κα ντελ-μαν λένγκε βαστέντε. 24 Ισί μπαγιά ότι ο Τσσαβό ι τζενέσκο νασέλα, αντικάς σαρ ισί γραμμέ λέσκε. Αλλά τιμωρία κα τσσίντελ οντουβά σο ντέλα ι τζενέσκε Τσσαβές λέσκε ντουσμανίνγκε βαστέντε! Κα αβέλας πο λατσσό οντουλέ τζενέσκε μα τι μπιάντιβελας». 25 Ο Ιούδας, σο ατζεχάνικ κα ντέλας ι Ιησούς λέσκε ντουσμανίνγκε βαστέντε, πουτσλάς: «Ραββί, μα τι ισινόμ με;» Ο Ιησούς βακερντάς λέσκε: «Τούι κορκορό βακερντάν-λες».

26 Καζόμ χάνας, ο Ιησούς λιντάς εκ μαντρό, κερντάς εκ προσευχή ντα σοράν πφανγκλάς-λες ντα ντινάς-λες κο μαθητές ακαλέ λαφίντζαρ: «Λεν ντα χαν. Ακαβά μαντρό μανγκέλα τι σικαβέλ μο σώμας». 27 Σοράν λιντάς εκ ποτήρι μολιάσαρ, κερντάς εκ προσευχή για τι βακερέλ ευχαριστώ κο Ντεβέλ ντα ντινάς-λες λέντε ακαλέ λαφίντζαρ: «Πιν ακαλέσταρ σαρέ, 28 σόσκε ακαγιά μολ μανγκέλα τι σικαβέλ “μο ρατ ι συμφωνιάκο”, σο κα τσσορντιόλ για τι συγχωρίντιβεν ο αμαρτίες μπουτέ τζενένγκε. 29 Αλλά βακεράβα τουμένγκε: Να κα πιαβ πάλι ανταλέ μολιάταρ μέχρι τι αβέλ ο ντιβές σο κα πιαβ νεβί μολ γιεκ τουμέντζαρ κι Βασιλεία μι Νταντέσκι». 30 Ντα αφού ισαρντέ ι Ντεβλές γκιλίντζαρ,* νικίστιλε αβρί κο Βες κι Ζιτινίνγκο.*

31 Αζομάν ο Ιησούς βακερντάς λένγκε: «Σαρέ τουμέν κα μουκχέν-μαν* ανταγιά ιράτ, σόσκε ισί γραμμέ: “Κα μουνταράβ ι τσομπανής, ντα ο μπρακέ λέσκε κοπαδίσκε κα τρουγίντιβεν”. 32 Αλλά κάνα κα ιστιάβ κατά μουλέ, κα τζαβ πο τζανγκλέ τουμένταρ κι Γαλιλαία». 33 Ο Πέτρος όμως βακερντάς λέσκε: «Ατζέ-ντα άμα σαρέ ο γιαβερά κα μουκχέν-τουτ, με ποτές να κα μουκχάβ-τουτ!»* 34 Ο Ιησούς βακερντάς λέσκε: «Μπαγιά βακεράβα τούκε: Ανταγιά ιράτ, πριν τι μπασέλ ο μπασνό, κα βακερές τριν φαρ ότι να τζανέσα-μαν». 35 Ο Πέτρος βακερντάς λέσκε: «Ατζέ-ντα άμα πρέπει τι μεράβ γιεκ τούσαρ, να κα βακεράβ ότι να τζανάβα-τουτ». Ανταβά βακερντέ σαρέ ο γιαβερά-ντα μαθητές.

36 Αζομάν ο Ιησούς γκιλό πι μαθητέντζαρ εκχέ τθανέστε σο βακέρντιβελας Γεθσημανή ντα βακερντάς λένγκε: «Μπεσέν ατθέ, καζόμ με κα αβάβ οκουτέ ντα κα προσευχίντιβαβ». 37 Ντα λιντάς παλά-πέστε ι Πετρός ντα ι ντουέ τσσαβέν σο τθερέλας ο Ζεβεδαίος. Αζομάν αρχισάλο τι τθερέλ ντουκχ πι γκίστε ντα μπαρό άγχος. 38 Αζομάν βακερντάς λένγκε: «Τθεράβα αζόμ μπαρί ντουκχ αντρέ μι γκίστε* σαρ τι μεράβα. Μπεσέν ατθέ ντα ατσσόν τζανγκαντέ μάντζαρ». 39 Γκιλό χάνικ πο οκόρινγκ, πελό τελέ μόσαρ ντα προσευχίντιβελας: «Ντάντε μου, άμα αβέλα-πες, λε ανταβά ποτήρι ντουρ μάνταρ. Όμως, μα τι αβέλ-πες σαρ μανγκάβα με, αλλά σαρ μανγκέσα τούι».

40 Κάνα βουρτισάλο κο μαθητές, ντικχλάς-λεν τι σοβέν, ντα βακερντάς κο Πέτρος: «Ούτε εκ σαάτι ναστί ατσσόνας τζανγκαντέ μάντζαρ; 41 Ατσσόν τζανγκαντέ ντα μα τσσιναβέν τι προσευχίντιβεν, για μα τι περέν κο πειρασμός. Ο τζενό μανγκέλα τι κερέλ ο λατσσό, αλλά λέσκο σώμας ισί μπίζουρανο». 42 Πάλι γκιλό ντα προσευχισάλο, δεύτερη φαρ, ακαλέ λαφίντζαρ: «Ντάντε μου, άμα να αβέλα-πες τι λες ντουρ ανταβά ποτήρι ντα πρέπει τι πιαβ-λες, τι αβέλ-πες οντουβά σο μανγκέσα». 43 Ντα αβιλό πάλι ντα ντικχλάς-λεν τι σοβέν, σόσκε ναστί ατσσικιαρντέ πουμαρέ γιακχά πουταρντέ. 44 Αφού μουκχλάς-λεν, βουρτισάλο παλάλ ντα προσευχισάλο, τρίτη φαρ, ι ίδιε λαφίντζαρ. 45 Σοράν γκιλό κο μαθητές ντα βακερντάς λένγκε: «Ασακέ σαάτια τουμέν σοβένα ντα ξεκουράντιβενα! Ντικχέν! Αβιλό ο σαάτι σο ο Τσσαβό ι τζενέσκο κα προδόντιβελ ντα κα ντιντιόλ κο βαστά αμαρτωλόνγκε. 46 Ιστίν τι νασάς. Άκ’! Ο τζενό σο κα ντελ-μαν μι ντουσμανίνγκε βαστέντε ισί πασέ». 47 Καζόμ βοβ κερέλας ατζέ λάφι, αβιλό ο Ιούδας, εκ κατά Δώδεκα, ντα λέσαρ μπουτ τζενέ τσσουργίντζαρ ντα λουμπουτίντζαρ, σο μπουτσσαντέ-λεν ο μπαρέ ιερείς ντα ο πρεσβύτεροι ι λαόσκε.

48 Οντουβά σο κα ντέλας-λες λέσκε ντουσμανίνγκε βαστέντε ντινάας-λεν εκ σημάδι ακαλέ λαφίντζαρ: «Κας κα τσσουμίνταβ, βοβ ισί. Ασταρέν-λες». 49 Αζομάν ο Ιούδας γκιλό σουγκό κο Ιησούς ντα βακερντάς: «Γεια, Ραββί!» ντα τσσουμιντάς-λες γκουλντές. 50 Αλλά ο Ιησούς βακερντάς λέσκε: «Σόσκε ισινάν ατθέ;» Αζομάν αβιλέ ντα ασταρντέ ι Ιησούς. 51 Αλλά εκ οντουλένταρ σο ισινέ γιεκ ι Ιησούσαρ, ασταρντάς πι τσσουρί, νικαντάς-λα αβρί ντα ντινάς* ι δουλός ι αρχιερεάσκο ντα τσσιντάς λέσκο καν. 52 Αζομάν ο Ιησούς βακερντάς λέσκε: «Τσσουβ παλάλ τι τσσουρί, σόσκε σαρέ οντουλά σο λένα τσσουρί κα μερέν τσσουριάταρ. 53 Ή αμντίνεσα ότι ναστί μολίναβα μι Νταντές τι μπουτσσαβέλ μάνγκε ακανά χιλιάδες* αγγελόν; 54 Αλλά άμα κα κεράβ-λες ανταβά, σαρ κα νικιόλ μπαγιά η Γραφή σο βακερέλα ότι αντικάς πρέπει τι αβέλ-πες;» 55 Οντουβά σαάτι ο Ιησούς βακερντάς κο τζενέ: «Αβιλέν τι ασταρέν-μαν τσσουργίντζαρ ντα λουμπουτίντζαρ σαρ τι αβάβας τσορ;* Κάθε ντιβές μπεσάβας κο ναός ντα σικλιαράβας, όμως να ασταρντέν-μαν. 56 Αλλά σαρέ ανταλά αβιλέ-πες για τι νικιόν μπαγιά οντουλά σο γραφιντέ ο προφήτες». Αζομάν σαρέ ο μαθητές μουκχλέ-λες ντα νασλέ.

57 Οντουλά σο ασταρντέ ι Ιησούς γκερντέ-λες κο Καϊάφας, κο αρχιερέας, σο οτθέ ισινέ γκιντιμέ ο γραμματείς ντα ο πρεσβύτεροι. 58 Αλλά ο Πέτρος τζάλας παλά-λέστε ντουράλ μέχρι κι αυλή κι αρχιερεάσκι. Ντα αφού ντινάς αντρέ, μπεσέλας ι κχερέσκε υπηρετόντζαρ για τι ντικχέλ σο κα αβέλ-πες.

59 Ο μπαρέ ιερείς ντα σαρό ο Σάνχεδριν* ρόντενας τζενένγκε τι τσσουβέν ψεύτικα λάφια ι Ιησούσκε για τι μουνταρέν-λες. 60 Παρόλο σο αβιλέ μπουτ τζενέ, καεκχέσκε λάφια να κερένας. Σοράν αβιλέ ντούι γιαβερά 61 ντα βακερντέ: «Βοβ βακερντάς: “Μπορίναβα τι περαβάβ ι Ντεβλέσκο ναός ντα τι λατσσαράβ-λες αντρέ τρινέ ντιβεσέντε”». 62 Αζομάν ιστίντιλο ο αρχιερέας ντα βακερντάς λέσκε: «Να κερέσα λάφι; Σο λάφια ισί ανταλά σο τσσουβένα τούκε;» 63 Αλλά ο Ιησούς να κερέλας λάφι. Οτθάρ, ο αρχιερέας βακερντάς λέσκε: «Χα σοβέλ κο τζουβντό Ντεβέλ ντα βάκερ αμένγκε: Ισινάν ο Χριστός, ο Τσσαβό ι Ντεβλέσκο;» 64 Ο Ιησούς βακερντάς λέσκε: «Τούι κορκορό βακερντάν-λες. Αλλά τι τζανέν ακαβά: Κα αβέλ ο ντιβές σο κα ντικχέν ι τζενέσκε Τσσαβές τι μπεσέλ δεξιά κατά Ζουρανό ντα τι αβέλ οπράλ κο σύννεφα κι ουρανόσκε». 65 Αζομάν ο αρχιερέας πφαραντάς πο σέα ντα βακερντάς: «Λέσκε λάφια τζάνα κόντρα κο Ντεβέλ! Σόσκε τι ρόντας γιαβερέ μαρτυρένγκε; Άκ’! Ακανά ασουντέν-λες τι τζαλ κόντρα κο Ντεβέλ πι λαφίντζαρ. 66 Σο πακιάνα;» Βον βακερντέ: «Αξίνελα τι μερέλ». 67 Αζομάν τσσουνγκιαρντέ-λες κο μούι ντα ντινέ-λες μπουνιές. Γιαβερά ντινέ-λες σαμάρια 68 ντα βακερένας: «Άμα ισινάν προφήτης, Χριστέ, βάκερ αμένγκε κον τσαλαντάς-τουτ».

69 Ο Πέτρος μπεσέλας αβρί κι αυλή, ντα εκ τερνί υπηρέτρια γκιλί πασέ λέστε ντα βακερντάς: «Τούι-ντα ισινάνας γιεκ ι Ιησούσαρ σο ισί κατά Γαλιλαία!» 70 Αλλά βοβ βακερντάς ανγκλάλ σαριλέντε: «Να τζανάβα σο βακερέσα». 71 Κάνα νικίστιλο αβρί, πασέ κι μπαρί πόρτα, ντικχλάς-λες εκ γιαβέρ υπηρέτρια ντα βακερντάς οντουλένγκε σο ισινέ οτθέ: «Ακαβά ισινέ γιεκ ι Ιησούσαρ σο ισί κατά Ναζαρέτ». 72 Ο Πέτρος χαλάς σοβέλ ντα βακερντάς πάλι: «Να τζανάβα ανταλέ τζενές!» 73 Χάνικ πο σοράν, γκιλέ πασέ ο τζενέ σο ισινέ οτθέ ντα βακερντέ κο Πέτρος: «Σίγουρα τούι-ντα ισινάν λένταρ, σόσκε κερέσα λάφι λένγκι τσσιπ».* 74 Αζομάν βοβ αρχισάλο τι ντελ-πες αρμανιά ντα τι χαλ σοβέλ: «Να τζανάβα ανταλέ τζενές!» Ντα οντιά στιγμή μπασλό εκ μπασνό. 75 Ντα ο Πέτρος ντινάς-πες γκοντί σο βακερντάας λέσκε ο Ιησούς: «Πριν τι μπασέλ ο μπασνό, κα βακερές τριν φαρ ότι να τζανέσα-μαν». Αζομάν νικίστιλο αβρί ντα ροντάς γκίσαρ.