5 Τι Κερέν Λάφι Τουμαρέ Τσσαβέντζαρ

ΣΟ ΜΑΝΓΚΕΛΑ ΤΙ ΒΑΚΕΡΕΛ

Κερένα μπαγιά λάφι τουμαρέ τσσαβέντζαρ κάνα βακερένα ελεύθερα ο εκ κο γιαβέρ οντουλά σο σκεφτίνενα ντα νιωθίνενα.

ΣΟΣΚΕ ΙΣΙ ΣΗΜΑΝΤΙΚΟΣ

Κάνα ο τσσαβέ ισί χουρντέ, βακερένα πουμαρέ νταντέσκε ντα πουμαρέ νταγιάκε σο-ντα σκεφτίνενα ντα νιωθίνενα. Κάνα μπαριόνα όμως, να πουτρένα-πες λένγκε ντα να βακερένα λένγκε μπουτ πράγματα ντα οτθάρ ο ντατ ντα η ντάι να τζανένα σο σκεφτίνενα ντα σο νιωθίνενα λένγκε τσσαβέ. Όμως, κάνα αβέλα-πες ανταβά, αζομάν ισί σο τθερένα πο μπουτ ανάγκη τι κερέν λέντζαρ λάφι!

ΣΟ ΜΠΟΡΙΝΕΝΑ ΤΙ ΚΕΡΕΝ

Τι αβέν έτοιμοι τι κερέν λάφι τουμαρέ τσσαβέντζαρ σο-ντα σαάτι τι χρειαζίντιβελ. Τι κερέν λέντζαρ λάφι ατζέ-ντα αντρέ κι ιράτ άμα κα μανγκέν-λες τουμένταρ.

«Μπορεί τι νικιόλ τουμένταρ τι βακερέν: “Ακανά ντινάν-τουτ γκοντί τι κεράς λάφι; Σαρό ο ντιβές ισινάμας γιεκ!” Να αβέλα-πες όμως τι κεράς παράπονα κάνα αμαρέ τσσαβέ μανγκένα τι πουτρέν-πες αμένγκε. Ανταβά να μανγκέλα εκ λατσσό ντατ ντα εκ λατσσί ντάι;»​—Λίζα.

«Ισινόμ τζενό σο σοβέλα νωρίς, αλλά ο πο σουκάρ συζητήσεις σο κερντόμ μι τσσαβέντζαρ ισινέ αντρέ κι ιράτ».​—Χέρμπερτ.

ΑΡΧΗ ΚΑΤΑ ΓΡΑΦΗ: «Ο κάθε εκ τι ντικχέλ, όχι πο συμφέρον, αλλά ι γιαβερέσκο».​—1 Κορινθίους 10:24.

Κερέν ο πο λατσσό για τι ατσσόν συγκεντρωμέ. Εκ ντατ βακερέλα: «Μπάζιμα, ασταράβα μο νεαυτός τι σκεφτίνελ μπουτ πράγματα καζόμ κερένα μάντζαρ λάφι μο τσσαβέ. Ντα ισί μπαγιά ότι αγαβένα-λες—να μπορίνεσα τι γκεραβές-τουτ λένταρ!»

Άμα αβέλα-πες ανταβά τουμένγκε-ντα, τι πφάντεν ι τηλεόραση ντα τι μουκχέν κι νάκρη σαρέ τουμαρέ ηλεκτρονικές συσκευές. Ντεν σημασία οντουλέστε σο βακερένα τουμένγκε τουμαρέ τσσαβέ ντα σικαβέν λένγκε ότι ισί σημαντικός τουμένγκε τι ασουνέν-λεν, ατζέ-ντα άμα ισί κάτι χουρντό.

«Πρέπει τι σικαβάς αμαρέ τσσαβένγκε ότι ενδιαφερτίντιβασα μπουτ οντουλένγκε σο νιωθίνενα. Άμα να κα νιωθίνεν-λες ανταβά, αζομάν κα πφάντεν-πες πουμαρέ νεαυτόστε ή κα μανγκέν βοήθεια γιαβερτθάρ».​—Μαράντα.

«Ατσσόν ήρεμοι ατζέ-ντα άμα ανταβά σο σκεφτίνενα τουμαρέ τσσαβέ νανέ γκοντιαβέρ».—Άντονι.

ΑΡΧΗ ΚΑΤΑ ΓΡΑΦΗ: «Ντεν προσοχή σαρ ασουνένα».​—Λουκάς 8:18.

Μα χασαρέν ο ευκαιρίες σο τθερένα κάθε ντιβές. Μπάζιμα ο τσσαβέ πουτρένα-πες πο εύκολα κάνα να ντικχένα κο γιακχά πουμαρέ νταντές ή πουμαρέ νταγιά καζόμ κερένα λάφι.

«Να χασαράσα ο ευκαιρίες κάνα ισινάμ αντρέ κο αυτοκίνητος. Επειδή μπεσάσα πασέ ο εκ κο γιαβέρ ντα να ντικχάσα-αμέν κο γιακχά, κεράσα σουκάρ συζητήσεις».​—Νικόλ.

Εκ γιαβέρ ευκαιρία για τι κεράς λάφι ισί κάνα χάσα γιεκ μαντρό.

«Κάνα χάσα αρατί, ο κάθε εκ βακερέλα σαρ νακχλάς αντρέ κο ντιβές, βακερέλα εμ ο λατσσέ εμ ο μπέτι. Ανταβά σο κεράσα ανέλα-αμέν πο πασέ ο εκ κο γιαβέρ ντα ανέλα αμαρέ γκοντιάτε ότι να ισινάμ κορκορέ κο προβλήματα».​—Ρόμπιν.

ΑΡΧΗ ΚΑΤΑ ΓΡΑΦΗ: “Πρέπει τι ασουνέν με προσοχή [ντα] μα τι σιγκιαρέν τι κερέν λάφι”.​—Ιακώβου 1:19.