Ι Νταντέσκε ντα ι Νταγιάκε σο Ισί Χριστιανοί:

Σαρ ντατ ντα ντάι, μανγκένα τι βοηθίνεν τουμαρέ τσσαβέν τι μανγκέν ι Ιεχωβάς ντα τι ντεν πουμαρό λάφι τι τζουβντιόν λέσκε. Σο μπορίνενα τι κερέν για τι προετοιμάνεν-λεν τι μπολντιόν; Κάνα κα αβέν έτοιμα για τι κερέν ανταβά σημαντικός βήμας;

Ο Ιησούς ντινάς ακαγιά εντολή πι μαθητέντε: «Κερέν μαθητέν σαρέ κατά τθεμά [ντα] μπολέν-λεν». (Ματθ. 28:​19) Ανταλέ λαφίνταρ αγαβάσα ότι για τι μπολντιόλ εκ τζενό πρέπει πρώτα τι αβέλ μαθητής, δηλαδή όχι σάντε τι αγαβέλ οντουλά σο σικλιαρντάς ο Ιησούς ντα τι πακιάλ-λεν, αλλά τι κερέλ-λεν πι ζωγιάτε-ντα. Ανταβά μπορίνενα τι κερέν-λες ατζέ-ντα ο τερνέ ή ο χουρντέ.

Τι αβέν λατσσό παράδειγμας τουμαρέ τσσαβένγκε ντα τι τσσουβέν χάνικ χάνικ λένγκε γκίστε οντουλά σο σικλιαρέλα ο Ιεχωβά. (Δευτ. 6:​6-9) Χρησιμοποιήνεν ο βιβλία Σο Μπορίνελα τι Σικλιαρέλ-αμέν η Αγία Γραφή; ντα Σαρ τι Ατσσόν κι Ντεβλέσκι Αγάπη για τι σικλιαρέν-λεν ο βασικά πράγματα ι Γραφιάκε ντα τι βοηθίνεν-λεν τι αγαβέν ντα τι ντεν καν λάκε λαφίντε. Βοηθίνεν τουμαρέ τσσαβέν τι σικλιόν σαρ τι εξηγίνεν πουμαρέ λαφίντζαρ οντουλά σο πακιάνα. (1 Πέτρ. 3:​15) Ο σικλιαριπέ ντα ι ζορ σο κα λεν τουμένταρ, κάνα κα σικλιαρέν-πες κορκορέ, κατά φαμιλιάκι λατρεία, κατά συναθροίσεις ντα λατσσέ αμαλένταρ κα βοηθίνελ-λεν, όχι σάντε τι μπολντιόν, αλλά τι κερέν ατζέ πιο μπουτ πράγματα. Τι τσσουβέν-λεν τι σκεφτίνεν σαρ τι κερέν πιο μπουτ πράγματα ι Ιεχωβάσκε.

Ο εδάφιος Παροιμίες 20:​11 βακερέλα: «Ατζέ-ντα εκχέ τσσαβέσκι συμπεριφορά αγαβέσα άμα ισί πάκι ντα σωστή οντουλένταρ σο κερέλα». Καλά ισί μερικά πράγματα σο σικαβένα ότι εκ τσσαβό ή εκ τσσάι ισί μαθητής ι Ιησού Χριστόσκο ντα ισί έτοιμος τι μπολντιόλ;

Ο τσσαβό ή η τσσάι σο τζάλα λατσσές κι αλήθεια ντα μανγκέλα τι μπολντιόλ πρέπει τι ασουνέλ πι νταντές ντα πι νταγιά. (Πράξ. 5:​29· Κολ. 3:​20) Η Αγία Γραφή βακερέλα ι Ιησούσκε κάνα ισινέ 12 μπρεσένγκο: «Ντέλας καν [πι νταντές ντα πι νταγιά]». (Λουκ. 2:​51) Σίγουρα, δεν πρέπει τι μπεκλεντίνεν τι αβέλ τέλειος τουμαρό τσσαβό ή τουμαρί τσσάι. Αλλά εκ τσσαβό ή εκ τσσάι σο μανγκέλα τι μπολντιόλ κα προσπαθίνελ τι κερέλ οντουβά σο κερέλας ο Ιησούς ντα τι τθερέλ ο ναβ ότι ντέλα καν πι νταντές ντα πι νταγιά.

Επίσης, κα σικαβέλ ότι μανγκέλα τι σικλιόλ οντουλά σο βακερέλα η Γραφή. (Λουκ. 2:​46) Μανγκέλα τουμαρό τσσαβό ή τουμαρί τσσάι τι τζαλ κο συναθροίσεις ντα τι ντελ απαντήσεις; (Ψαλμ. 122:1) Μανγκέλα τι διαβάνελ κάθε ντιβές ι Αγία Γραφή ντα τι σικλιαρέλ-πες λάταρ;​—Ματθ. 4:4.

Ο τσσαβό ή η τσσάι σο τζάλα λατσσές κι αλήθεια ντα μανγκέλα τι μπολντιόλ προσπαθίνελα τι τσσουβέλ πι ζωγιάτε πρώτα ι Βασιλεία. (Ματθ. 6:​33) Αγαβέλα ι ευθύνη σο τθερέλα τι βακερέλ κο γιαβερά-ντα οντουλά σο πακιάλα. Κερέλα ο έργος ι Ντεβλέσκο με μπουτ τρόπους ντα να λατζάλα τι βακερέλ πι δασκαλόνγκε ντα πι συμμαθητένγκε ότι ισί Μάρτυρας ι Ιεχωβάσκο. Λέλα σοβαρά ο διορισμούς σο ντένα-λες για τη Συνάθροιση Ζωή ντα Έργος.

Επίσης, προσπαθίνελα μπουτ τι ατσσόλ πάκι κι Ντεβλέσκε γιακχά, οτθάρ να κερέλα μπέτι παρέες. (Παρ. 13:​20· 1 Κορ. 15:​33) Ανταβά κα ντικχίντιβελ κατά γκιλιά σο ασουνέλα, κατά ταινίες σο ντικχέλα, κατά βιντεοπαιχνίδια σο κχελέλα ντα οντουλένταρ σο κερέλα κο Ίντερνετ.

Μπουτ τσσαβέ ντα τσσαγιά, σο προσπαθιντέ μπουτ τι βοηθίνεν-λεν λένγκο ντατ ντα λένγκι ντάι, τσσουντέ ι αλήθεια αντρέ πι γκίστε ντα μπολντιλέ κάνα ισινέ ατζέ χουρντέ. Αντράλ αμαρέ γκίσταρ, μανγκάσα τι ευλογίνελ-τουμέν ο Ιεχωβά κο προσπάθειες σο κερένα τι βοηθίνεν τουμαρέ τσσαβέν τι μπολντιόν, σο ισί εκ μπουτ σημαντικός βήμας για τι αβέν αμαλά ι Ιεχωβάσαρ.

Για τον Ευαγγελιζόμενο σο Νανέ Μπολντό:

Ισί μπαρό προνόμιος τι αβές ευαγγελιζόμενος κι κχανγκιρί. Αξίνελα τούκε εκ μπαρό μπράβο σο κερντάν λατσσέ αλλαγές τι ζωγιάτε. Γνωριντάν ι Ντεβλές κατά μελέτη σο κερντάν αντράλ κατά Αγία Γραφή ντα πακιασάλαν κο υποσχέσεις σο ντινάς.​—Ιωάν. 17:3· Εβρ. 11:6.

Πριν τι αρχίνες τι διαβάνες ι Ιεχωβάσκε Μαρτυρέντζαρ, μπορεί τι τθερέας εκ γιαβέρ θρησκεία ή μπορεί μα τι τθερέας καέκ θρησκεία. Μπορεί επίσης τι κερέας πράγματα σο τζάνα κόντρα οντουλέντζαρ σο βακερέλα η Αγία Γραφή. Αλλά ακανά σικαντάν τι πίστη επειδή μετανιωσάλαν αντράλ τι γκίσταρ ι αμαρτιένγκε σο μπορεί τι κερντάνας ντα λιντάν ι απόφαση μα τι κερές ο λάθος πράγματα αλλά τι κερές ο σωστός κι Ντεβλέσκε γιακχά.​—Πράξ. 3:19.

Οκιά μπάνταρ, μπορεί τι τζανές ι Ντεβλέσκε λάφια «χουρντιαρέλα μπερί». Ανταβά αρακχαντάς-τουτ για μα τι κερές αμαρτίες ντα γιαβερά πράγματα σο νανέ Χριστιανικά. (2 Τιμ. 3:​15) Σικλιλάν μα τι κερές οντουλά σο βακερένα τούκε τζενέ σο τθερένα ι ίδια ηλικία τούσαρ ντα μα τι κερές πράγματα σο να μανγκέλα ο Ιεχωβά. Σικαβέσα τι πίστη αφού ντέσα λατρεία κο Ιεχωβά με το σωστός τρόπος ντα βακερέσα γιαβερέ τζενένγκε-ντα οντουλά σο πακιάσα. Σικλιλάν τι κερές λάφι ι Ντεβλέσκε. Αντικάς, λιντάν ι απόφαση τι αβές ευαγγελιζόμενος για τι κερές οντουβά σο μανγκέλα ο Ιεχωβά.

Κο ντούι-ντα περιπτώσεις, είτε γνωριντάν ι Ιεχωβάς κάνα ισινάνας πιο μπαρό, είτε σικλιλάν ι Ιεχωβάσκε χουρντιαρέλα, μπορεί ακανά τι σκεφτίνεσα ατζέ ντούι πράγματα για τι τζας πιο πασέ κο Ιεχωβά—τι ντες-λες το λάφι τι τζουβντιός λέσκε ντα τι μπολντιός. Ντέσα το λάφι κο Ιεχωβά τι τζουβντιός λέσκε κάνα βακερέσα λέσκε κι προσευχή τι απόφαση ότι σαρέ τι ζωγιάτε κα κερές σάντε οντουβά σο μανγκέλα Βοβ. (Ματθ. 16:​24) Σοράν, για τι σικαβές ότι ντινάν το λάφι κο Ιεχωβά, μπολντιόσα κο πανί. (Ματθ. 28:​19, 20) Κάνα ντέσα το λάφι κο Ιεχωβά τι τζουβντιός λέσκε ντα μπολντιόσα, ακανά ο Ιεχωβά ντικχέλα-τουτ σαρ υπηρέτης λέσκο. Σο μπαρό προνόμιος ισί ανταβά!

Όμως, σαρ σικλιλάν κι μελέτη σο κερντάν κατά Αγία Γραφή, μπορεί τι αρακχές δυσκολίες. Ντε-τουτ γκοντί ότι κάνα μπολντιλό ο Ιησούς, “ο πνεύμας [ι Ντεβλέσκο] γκερντάς-λες κι έρημος ντα οτθέ ο Μπενγκ τσσουντάς-λες κο πειρασμός”. (Ματθ. 4:1) Κάνα κα μπολντιός ντα κα αβές μαθητής ι Ιησού Χριστόσκο, τι μπεκλεντίνες ότι μπορεί τι αβέν γιαβερά-ντα δοκιμασίες. (Ιωάν. 15:​20) Ανταλά δοκιμασίες κα αβέν με διάφορους τρόπους. Μπορεί τι φαμιλί τι τζαλ τούσαρ κόντρα. (Ματθ. 10:​36) Ο τζενέ σο κερένα τούσαρ μπουτί, το συμμαθητές ντα ο αμαλά σο τθερέας μπορεί τι πρασάν-τουτ. Τι ντες-τουτ γκοντί πάντα ο λάφια ι Ιησούσκε σο ισί κο εδάφια Μάρκος 10:​29, 30: «Μπαγιά βακεράβα τουμένγκε: Σαρέ οντουλέντζαρ σο μουκχλέ κχερ ή πφραλέν ή πφενίν ή νταγιά ή νταντές ή τσσαβέν ή τθανά μάνγκε ντα ι λατσσέ αμπερίνγκε, κα τζαν λέντζαρ κόντρα, αλλά κα λεν 100 φαρ πιο μπουτ ακανά, ανταλέ ντουνιάστε, εμ κχερά εμ πφραλέν εμ πφενίν εμ νταΐν εμ τσσαβέν ντα τθανά, ντα κο ντουνιάς σο κα αβέλ, κα τζουβντιόν για πάντα». Οτθάρ, συνέχινε τι προσπαθίνες μπουτ για τι ατσσός πασέ κο Ιεχωβά ντα για τι τζουβντιός αντικάς σαρ βακερένα λέσκε νόμοι.

Κάνα κα μανγκές τι μπολντιός, βάκερ-λες κο συντονιστής του πρεσβυτερίου. Ο πρεσβύτεροι κα συζητίνεν τούσαρ ο ερωτήσεις σο ισί πιο τελέ για τι ντικχέν άμα μπορίνεσα τι μπολντιός. Ανταλά ερωτήσεις μπορίνεσα τι διαβάνες-λεν κάνα σικλιαρέσα-τουτ κορκορό.

Καζόμ κα διαβάνες ανταλά ερωτήσεις, τι διαβάνες ντα τι σκεφτίνες μπουτ λατσσές ο εδάφια σο ισί οτθέ. Οντουλά σο αρακχλάν μπορεί τι μανγκές τι γραφίνες-λεν ανταλέ βιβλιαριόστε ή κάπου γιαβερτθέ. Μπορίνεσα τι διαβάνες οντουλά σο γραφιντάν ντα τι τθερές ο βιβλίος πουταρντό κάνα κα κερές ο ερωτήσεις ι πρεσβυτερόντζαρ. Άμα ναστί αγαβέσα κάποιες ερωτήσεις, μα τι λατζάς τι βακερές-λες οντουλέ τζενέσκε σο κερέλα-τουτ μελέτη ή ι πρεσβυτερόνγκε για τι βοηθίνεν-τουτ.

Κάνα κερέσα ο ερωτήσεις ι πρεσβυτερόντζαρ, μα τι αμντίνες ότι πρέπει τι βακερές μπαρέ ή δύσκολες απαντήσεις. Ισί πιο λατσσό τι βακερές εκ απλή ντα χουρντί απάντηση τι λαφίντζαρ. Σε μπουτ ερωτήσεις, μπορίνεσα τι βακερές εκ ή ντούι εδάφια κατά Αγία Γραφή σο σικαβένα ότι οντουλά σο βακερέσα ισί αντράλ κατά Γραφή.

Άμα να τζανέσα ατζέ ο βασικά πράγματα σο σικλιαρέλα η Αγία Γραφή, ο πρεσβύτεροι κα κανονίνεν τι λες βοήθεια για τι μπορίνες τι σικαβές τι λαφίντζαρ ότι αγαβέσα ι Αγία Γραφή ντα για τι μπολντιός πιο σοράν.

[Ι πρεσβυτερόνγκε: Κα αρακχέν οδηγίες σο σικαβένα σαρ τι κερέν ο συζητήσεις οντουλέντζαρ σο μανγκένα τι μπολντιόν κο σελίδες 54-​60]